Het jy meer tyd nodig?

AS JY die tweede of derde opsie gemerk het by die meeste van die bygaande vrae, het jy waarskynlik wel meer tyd nodig. En jy is nie die enigste een nie. Byna oral is mense onder druk om te doen wat gedoen moet word—en dit het dalk niks te doen met wat werklik vir hulle belangrik is nie. Moontlik het dit eerder net te doen met die eise van die oomblik—die motor moet reggemaak word, die werkgewer moet tevrede gestel word, onverwagte onderbrekings moet hanteer word. Terwyl jy op die een krisis ná die ander reageer, voel jy dalk asof jy geen beheer het oor hoe jy jou tyd bestee nie. Jy voel dalk selfs asof jou lewe by jou verbyvlieg sonder dat jy dit werklik kan geniet.

Jy sê natuurlik vir jouself dat dit alles tydelik is. Die lewe sal uiteindelik kalmer raak, en jy sal tyd hê om aandag te skenk aan die dinge wat werklik vir jou saak maak—die dinge wat jou lewe sowel as die lewe van jou gesin en ander verryk. Maar wanneer? Sien jy ’n opening in jou rooster vir vandag? Hierdie week? Volgende maand?

Dit is natuurlik onwaarskynlik dat die wêreld om jou kalmer sal raak. Maar jy kan iets doen om die tyd te skep wat jy nodig het. Hoe kan jy dit doen?

[Venster op bladsy 3]

Hoe dikwels het jy tyd vir dinge wat werklik vir jou belangrik is?

◯ Elke dag

◯ Oor naweke

◯ Amper nooit

Gedurende ’n tipiese dag, vind jy dat jy

◯ Doen wat jy beplan het?

◯ ’n Voorgeskrewe roetine volg wat jou planne in die wiele ry?

◯ Impulsief reageer op enige eise wat gestel word?

Gedurende ’n tipiese dag, voel jy

◯ In beheer?

◯ Onder druk om aan onredelike eise te voldoen?

◯ Gedwing om maar net die een taak ná die ander aan te pak?

Het jy teen die einde van die dag

◯ Die belangrike dinge afgehandel?

◯ Die nodige werk gedoen, maar dalk nie so goed nie?

◯ Geen tyd gehad vir wat werklik saak maak nie?

Hoe voel jy gewoonlik teen die einde van die dag?

◯ Gelukkig en tevrede

◯ Leeg, moeg en gespanne

◯ Gefrustreerd