Ons beskou die wêreld
“Wêreldwye militêre uitgawes gedurende 2008 word op altesaam [R11 092 miljard] geskat. Dit dui op ’n vermeerdering . . . van 45 persent sedert 1999.”—STOCKHOLM SE INTERNASIONALE VREDESNAVORSINGSINSTITUUT, SWEDE.
“Volgens Google word etlike miljarde nuwe webblaaie elke dag [op die Internet] gesit.”—NEW SCIENTIST, BRITTANJE.
“Hongersnood in die wêreld [sou] na raming in 2009 ’n geskiedkundige hoogtepunt bereik met 1 020 miljoen mense wat elke dag honger ly.”—VOEDSEL-EN-LANDBOU-ORGANISASIE VAN DIE VERENIGDE NASIES, ITALIË.
Eerste gekloonde kameel
Sedert 1996, toe navorsers die eerste keer ’n skaap gekloon het, is ’n aantal ander soogdiere—insluitende beeste, bokke en perde—deur dieselfde tegniek voortgebring. Nou het wetenskaplikes by ’n instansie vir veeartsenykundige navorsing in Doebai vir die eerste keer ’n kameel gekloon. Die verskalf is Indjaz genoem, wat Arabies is vir “prestasie”. “Die kloning van diere . . . is nou al verby die stadium waar dit net ’n eksperiment is”, sê die Abu Dhabiese koerant The National. “In die toekoms sal die program die moontlikhede ondersoek om kloning te gebruik om die gene van gesogte resies- en melkproduserende kamele te laat voortbestaan.”
“Botsing” tussen satelliete
“Die vernaamste wentelbane om die aarde het deur die jare heen al hoe voller geraak, maar die eerste groot botsing tussen twee satelliete het eers in Februarie [2009] plaasgevind”, berig Science News. ’n Funksionerende Amerikaanse kommunikasiesatelliet het ongeveer 800 kilometer bo Siberië met ’n uitgediende Russiese militêre apparaat gebots. Die ongeluk het ’n swerm van ongeveer 700 groot wrakstukke veroorsaak. Hoe meer wrakstukke daar in ’n wentelbaan is, hoe groter is die moontlikheid van nog ’n ongeluk. Opsporingstasies monitor tans die wentelbane van sowat 18 000 stukke ruimterommel wat groter as tien sentimeter in deursnee is. Maar ’n botsing met ’n voorwerp wat enigsins groter as ’n ertjie is en teen wentelsnelheid beweeg, kan rampspoedig wees vir satelliete of selfs bemande vlugte.
Motorafskakeltoestelle
“Die meeste mense betaal hulle selfoonrekening, want hulle weet dat die telefoon sal ophou werk as hulle dit nie doen nie”, berig The Wall Street Journal. Dieselfde beginsel word nou op motors toegepas. “Tweedehandse motorhandelaars installeer afstandbeheerde afskakeltoestelle wat verhoed dat die motors aangeskakel kan word as die koper te ver agterraak met sy paaiemente”, sê die koerant. Die toestel—wat aan die motor se ontstekingstelsel gekoppel is—is deel van die finansieringsvoorwaardes vir subprima klante en kan verwyder word wanneer lenings afbetaal is. Dit gebeur egter selde dat afskakeltoestelle gebruik moet word om voertuie te immobiliseer, sê die Journal. Hulle flitsende liggies en waarskuwingseine is genoeg om “klante aan te spoor om paaiemente betyds te betaal”.