Wie sit werklik agter die okkulte?

DIE Bybel sê van ons Skepper: ‘God is lig en daar is hoegenaamd geen duisternis in eenheid met hom nie’ (1 Johannes 1:5). Dit is veral waar in ’n geestelike sin. Kan die ware God dus die mag agter die okkulte wees? Of is ’n boosaardige mag daarby betrokke?

Die vernaamste okkulte gebruike is waarsêery en spiritisme, wat astrologie, numerologie, handlesery en towery, sowel as kommunikasie met die “dooies” en towerspreuke insluit. Hierdie gebruike het ’n baie lang geskiedenis, en die meeste daarvan dateer uit eertydse Babilon, waarvan die ruïnes in Irak lê (Jesaja 47:1, 12, 13). Okkulte gebruike het vanaf Babilon regoor die eertydse wêreld versprei en het in baie kulture en beskawings diep ingewortel geraak.

Kyk na ’n voorval in die stad Filippi in eertydse Masedonië. Daar het ’n groepie Christenbedienaars, wat die apostel Paulus en die geneesheer Lukas ingesluit het, ’n meisie teëgekom wat okkulte vermoëns gehad het. Let op hoe die Bybelskrywer Lukas die geheime bron van haar vermoëns geopenbaar het. Hy het geskryf: “’n Sekere diensmeisie met ’n gees, ’n waarsêende demoon, [het] ons tegemoetgekom. Sy het aan haar here groot wins verskaf deur die voorspelkuns te beoefen.”—Handelinge 16:16-18.

Ja, hierdie meisie se vermoëns het nie van die ware God, Jehovah, gekom nie, maar van ’n demoon, ’n bose gees. Daarom het Paulus en sy metgeselle geweier om na haar te luister. Dalk wonder jy nou: ‘Wie is die demone? En waar kom hulle vandaan?’ Kyk weer eens na die Bybel se antwoorde.

Wie is die demone?

Lank voordat Jehovah mense gemaak het, het hy tallose intelligente “[gees]seuns van God” in die hemel geskep (Job 38:4, 7). Soos mense is hulle met wilsvryheid geskep, en hulle het almal ’n geruime tyd lank aan God lojaal gebly. Maar hierdie gunstige situasie het skielik tot ’n einde gekom. Hoe so?

Nadat God mense geskep het, het een geesskepsel iets begin begeer waarop hy nie aanspraak kon maak nie—aanbidding. Net soos ’n buikspreker ’n pop gebruik, het hierdie bose engel ’n slang gebruik om die eerste vrou, Eva, sover te kry om aan haar Skepper ongehoorsaam te wees (Genesis 3:1-6). Die Bybel noem hierdie opstandige engel “die oorspronklike slang, die een wat Duiwel en Satan genoem word” (Openbaring 12:9). Jesus het hom as “’n mensemoordenaar” beskryf wat “nie in die waarheid vasgestaan [het] nie”, en hy het bygevoeg: “Wanneer hy die leuen spreek, spreek hy ooreenkomstig sy eie geaardheid, want hy is ’n leuenaar en die vader van die leuen.”—Johannes 8:44.

Ná verloop van tyd het ander “[gees]seuns van die ware God” by Satan in sy opstand aangesluit (Genesis 6:1, 2). Daar word later na hulle verwys as “die engele . . . wat gesondig het” en “die engele wat nie hulle oorspronklike posisie behou het nie, maar hulle eie gepaste woonplek [hulle toegewese plek in die hemel] verlaat het” (2 Petrus 2:4; Judas 6). Hulle het bekend geword as demone (Jakobus 2:19). Wat meer is, hulle is vasbeslote om soveel mense moontlik van ware aanbidding weg te keer, net soos hulle met baie Israeliete in Bybeltye gedoen het (Deuteronomium 32:16, 17). Satan en die demone maak vandag, net soos in die verlede, op slinkse wyse gebruik van godsdiensleuens.—2 Korintiërs 11:14, 15.

Beskerm jouself!

Selfs al het bose geeste bomenslike mag, kan ons hulle, met God se hulp, “weerstaan” en as oorwinnaars uit die stryd tree (1 Petrus 5:9). Maar om hierdie hulp te ontvang, moet ons uitvind wat God se vereistes is en daaraan voldoen. Die apostel Paulus het van die Christene in sy dag geskryf: “Ons [het] nie opgehou om vir julle te bid nie en te vra dat julle in alle wysheid en geestelike insig vervul mag word met die juiste kennis van sy wil, sodat julle kan wandel op ’n wyse wat Jehovah waardig is om hom ten volle te behaag.”—Kolossense 1:9, 10.

Onder diegene wat hierdie “juiste kennis” verkry het, was ’n aantal mense in die stad Efese wat toorkunste beoefen het. Let op die uitwerking wat kennis van die waarheid op hulle gehad het. Die Bybel sê: “Heelparty van dié wat toorkunste beoefen het, het hulle boeke bymekaargebring en voor almal verbrand.” Terloops, die boeke was “vyftigduisend silwerstukke” werd—’n aansienlike hoeveelheid geld! (Handelinge 19:17-19). Hierdie moedige voorbeeld is tot ons voordeel opgeteken.—2 Timoteus 3:16.

Beginsels wat beskerm

Daar is nog dinge wat ons kan doen om ons teen die demone te beskerm. Kyk na die volgende Bybelse riglyne.

“Moenie elke geïnspireerde uiting glo nie, maar stel die geïnspireerde uitinge op die proef om te sien of hulle hulle oorsprong by God het” (1 Johannes 4:1). Van die stellings wat astroloë, spiritistiese mediums en toordokters maak, kan wel waar wees. Die demoonbesete meisie in Filippi het byvoorbeeld die waarheid gepraat toe sy van Paulus en sy metgeselle gesê het: “Hierdie mense is slawe van die Allerhoogste God, wat aan julle die weg van redding verkondig” (Handelinge 16:17). Nietemin het Paulus en sy metgeselle haar nie toegelaat om by hulle aan te sluit nie. Paulus het die bose gees eerder beveel om uit haar uit te kom. Toets godsdiensstellings deur dit te vergelyk met wat die Bybel sê.—Handelinge 17:11.

“Onderwerp julle dan aan God; maar staan die Duiwel teë, en hy sal van julle af wegvlug” (Jakobus 4:7). Die demone is God se vyande en joune ook. Moenie eers nuuskierig raak omtrent hulle duistere weë nie. Onderwerp jou eerder aan God deur ag te slaan op sy liefdevolle gebooie, wat nie swaar is nie (1 Johannes 5:3). God het byvoorbeeld vir die eertydse nasie Israel gesê: “Daar mag niemand onder jou gevind word wat . . . van waarsêery gebruik maak, die toorkuns beoefen of voortekens soek of wat ’n towenaar is nie, of wat ’n towerspreuk oor ander uitspreek of ’n geestemedium of ’n beroepsvoorspeller van gebeure om inligting vra of die dooies raadpleeg nie. Want elkeen wat hierdie dinge doen, is vir Jehovah verfoeilik” (Deuteronomium 18:10-12). God se beskouing het nie verander nie.—Galasiërs 5:19, 20.

“Daar is geen ongelukkige towerspreuk teen [Jehovah se knegte] nie” (Numeri 23:23). Almal wat God wil behaag, het geen rede om bang te wees vir die demone nie. Om die waarheid te sê, daardie bose geeste “sidder” voor God omdat hulle bewus is van sy oorweldigende krag, wat hy uiteindelik sal gebruik om hulle te vernietig (Jakobus 2:19). God sal “sy krag . . . toon ten behoewe van dié wie se hart volkome teenoor hom is”, en “nooit sal hy die regverdige laat wankel nie”.—2 Kronieke 16:9; Psalm 55:22.

“Die lewendes is daarvan bewus dat hulle sal sterf; maar wat die dooies betref, hulle is bewus van hoegenaamd niks” (Prediker 9:5). God se Woord leer dat die dooies werklik dood is! Ons hoef nie vir hulle bang te wees nie, want hulle kan niemand meer leed aandoen nie (Jesaja 26:14). Die demone doen hulle soms voor as geeste van die dooies sodat hulle mense kan bedrieg, wat moontlik verklaar waarom mense vind dat die “gees” van ’n persoon wat voorheen gaaf was, dalk anders is as die persoon wat hulle geken het.

“Julle kan nie deel hê aan ‘die tafel van Jehovah’ en die tafel van demone nie” (1 Korintiërs 10:21, 22). Almal wat werklik lief is vir Jehovah, sal boeke, flieks en rekenaarspeletjies vermy wat met die okkulte te doen het of wat okkulte gebruike en opvattings bevorder.a “Ek sal geen waardelose ding voor my oë stel nie”, sê Psalm 101:3. Wat meer is, vermaak wat om die okkulte draai, verheerlik dikwels geweld en onsedelikheid, wat afstootlik is vir diegene “wat Jehovah liefhet”.—Psalm 97:10.

Die demone het nog altyd probeer om hulle ware identiteit vir mense te verberg. Maar hulle het nie heeltemal daarin geslaag nie. Deur middel van die Bybel het Jehovah hulle ontmasker sodat ons kan sien wat hulle werklik is—kwaadwillige leuenaars en boosaardige vyande van die mensdom. Hoe verskil hulle tog van ons Skepper, Jehovah God! Soos die volgende artikel toon, is hy lief vir ons, vertel hy ons altyd die waarheid en wil hy hê dat ons vir ewig moet lewe en gelukkig moet wees.—Johannes 3:16; 17:17.

[Voetnoot]