Ons beskou die wêreld
Minder as ’n kwart van Duitsers onder die ouderdom van 40 meen dat dit ’n goeie idee is om daagliks saam met kinders te bid, en onder kerklidmate meen slegs 4 uit 10 dat dit belangrik is.—APOTHEKEN UMSCHAU, DUITSLAND.
’n Spermskenker met ’n onopgespoorde genetiese mutasie wat met hartsiekte verbind word, het dieselfde toestand oorgedra aan 9 van die 24 kinders van wie dit bekend is dat hy die vader is. Een van hierdie kinders het op tweejarige ouderdom aan hartversaking gesterf.—JAMA, VSA.
“Meer as 50% van Russe glo dat korrupsie ’n onvermydelike en permanente deel van die lewe is.”—RIA NOVOSTI, RUSLAND.
Min ware vriende
“Die gemiddelde Brit het net drie ware vriende waarop [hy of sy] kan vertrou”, sê Londen se Daily Telegraph. Volgens een studie verloor ’n deursneemens “oor die jare kontak met gemiddeld 36 vriende”, en van die redes hiervoor is dat “die lewe besig is”, hulle ‘bloot vervreemd geraak het’ en, in die geval van 43 persent van die respondente, hulle ’n “uitval . . . gehad het en besluit het om nooit weer met mekaar te praat nie”. Byna ’n vyfde neem kollegas in hulle vertroue omdat daar “niemand anders is vir wie hulle raad kan vra nie”. ’n Woordvoerder van die groep wat die opname gedoen het, het gesê: “Iets spesiaals is nodig voordat mense hulle vertroue in iemand stel.”
Semiduikbote vol dwelms
Die metodes wat Colombiaanse dwelmhandelaars gebruik om kokaïen in Mexiko, Sentraal-Amerika en die Verenigde State in te smokkel, word al hoe meer gesofistikeerd. Sedert 1993 is ten minste 42 semiduikbote wat vir dwelmhandel gebruik word deur die Colombiaanse owerheid onderskep en gekonfiskeer. ’n Aantal werkswinkels waar sulke vaartuie vervaardig word, is ook ontdek. Hoewel hierdie dieselaangedrewe vaartuie nie kan duik nie, is dit baie moeilik om hulle met radar op te spoor. Party kan ’n afstand van 3 200 kilometer aflê, kan tussen ses en tien ton kokaïen vervoer en kos waarskynlik tot R7 miljoen om te bou.
Voordele om saam as ’n gesin te eet
In ’n onlangse opname onder Finse kinders tussen die ouderdomme van 14 en 16 is daar bevind dat minder as die helfte saam met hulle gesin eet. Die studie het getoon dat daar in baie huise geen etes voorsien word nie. En tog smag jongmense na hierdie gereelde, ontspanne oomblikke saam met hulle gesin. Toe hulle gevra is wat hulle van hulle ouers wil hê, was die boodskap duidelik: “Kookkos, etenstye saam as ’n gesin en iemand wat luister en tyd vir jou het”, berig die koerant Helsingin Sanomat. Gesinsmaaltye is uiters belangrik vir ’n jongmens se geestesgesondheid. “Jongmense wat saam met hulle gesin eet”, sê die artikel, “doen gewoonlik goed op skool, sal selde rook, drink of dwelms gebruik en raak minder dikwels terneergedruk.”