Kospakkie gee getuienis

GEDURENDE die dae ná die aardbewing in Kobe, Japan, verlede Januarie, was dit vir mense in die geteisterde gebied moeilik om kos in die hande te kry. Tog het Jehovah se Getuies nie ’n gebrek aan lewensmiddele gehad nie, danksy die goedhartige bystand van hulle vriende. Die eerste twee of drie dae ná die aardbewing het die nabygeleë gemeentes rysbolletjies voorsien. Kort daarna het besorgde vriende kospakkies verskaf. Baie het notas aan die kospakkies geheg wat hulle besorgdheid uitgedruk het oor diegene wat deur die ramp getref is. Diegene wat die etes ontvang het, het gesê dat hulle elke ete “gesout” het omdat hulle nie hulle trane kon inhou wanneer hulle die notas gelees het nie.

Jehovah se Getuies het hulle kos gedeel met ander wat gebrek gely het. Een Getuie het sy middagete geniet terwyl hy in ’n motor saam met ’n kollega gery het wat nie ’n Getuie is nie en wat by dieselfde maatskappy werk. Hy het dus een van die kospakkies wat hy ontvang het met hom gedeel.

“Waar het jy hierdie kospakkie gekoop?” het sy kollega gevra. Die broer het hom van die Getuies se noodlenigingswerk vertel. “Ek het dae laas groente geëet. Ek gaan ’n bietjie hiervan hou en huis toe neem vir my gesin”, het die man met waardering gesê.

Die derde keer dat dit gebeur het, het die kollega die Getuie 3 000 jen (ongeveer R125) gegee en gesê: “Ek is bekend met julle werk; laat my dus asseblief ’n bydrae vir julle werk gee. Ek waardeer dit dat jy jou middagete met my deel. Al jou vriende is werklik sulke gawe mense.”