’n Betroubare bron van leiding en hoop

IN TEENSTELLING met die demone is Jehovah God alwys en almagtig. Hy is ook die verpersoonliking van liefde (1 Johannes 4:8). Sy raad is altyd goed, hy gee dit verniet, en hy dra ons belange op die hart. Hoe verskil dit tog van die raad van heldersiendes en spiritistiese mediums! “Kom, almal wat [geestelik] dors is!” sê God. “Kom na die water. En dié wat geen geld het nie! Kom, koop en eet. Ja, kom, koop wyn en melk selfs sonder geld en sonder prys. Waarom bly julle geld betaal vir wat nie brood is nie, en waarom swoeg julle vir iets wat nie versadig nie? Luister aandagtig na my en eet wat goed is, en laat julle siel hom in vettigheid verlustig.”—Jesaja 55:1, 2.

Omdat die Bybel deur ons liefdevolle Skepper geïnspireer is, gee dit ons hoop, geestelike beskerming, ’n doel in die lewe en die beste beginsels waarvolgens ons kan lewe. Dink gerus na oor die volgende vrae en die Bybelverse wat daarmee verband hou.

[Venster op bladsy 7]

● Hoe kan ek ware gemoedsrus vind? Die Bybel sê: “Só het Jehovah gesê, jou Terugkoper, die Heilige van Israel: ‘Ek, Jehovah, is jou God, die Een wat jou leer om jouself te bevoordeel, die Een wat jou laat loop op die weg wat jy moet bewandel. Ag, as jy maar aan my gebooie aandag sal skenk! Dan sal jou vrede net soos ’n rivier word, en jou regverdigheid soos die golwe van die see.’”—Jesaja 48:17, 18.

● Sal boosheid altyd bestaan? “Die regskapenes sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word” (Spreuke 2:21, 22). Ja, goddelose mense, sowel as die bose engele, sal ewige vernietiging ondergaan, asof deur middel van vuur.—Openbaring 20:10, 14.

● Sal siekte en lyding tot ’n einde kom? “Kyk! Die tent van God is by die mensdom, en hy sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge [al die probleme wat ons vandag ondervind] het verbygegaan.”—Openbaring 21:3, 4.

In teenstelling met die demone lieg God nooit nie. Trouens, hy ‘kan nie lieg nie’ (Titus 1:2). En soos die laaste artikel in hierdie reeks sal toon, is sy waarheid bevrydend sowel as lewegewend.—Johannes 8:32; 17:3.