Ewige geluk—In die hemel of op die aarde?

HANG jou geluk hoofsaaklik af van waar jy woon? Die meeste mense sou geredelik erken dat geluk meer afhang van faktore soos goeie gesondheid, ’n doel in die lewe en goeie verhoudings met ander. ’n Bybelspreuk stel dit so: “Liewer ’n porsie groente waar liefde by is, as ’n vetgevoerde bees en haat daarby.”—Spreuke 15:17.

Maar ongelukkig het ons aardse tuiste ’n lang geskiedenis van haat, geweld en ander vorme van goddeloosheid. Wat dan van die hemel, of die geesteryk, waarheen baie mense hoop om ná hulle dood te gaan? Was dit nog altyd ’n plek van salige vrede en kalmte, sonder enige soort steurnis, soos baie mense dink?

Die Bybel leer dat God in die hemel woon saam met miljoene geesskepsele wat engele genoem word (Matteus 18:10; Openbaring 5:11). Hulle word beskryf as ‘geesseuns van God’ (Job 38:4, 7). Soos mense het die engele ook wilsvryheid; hulle is nie robotte nie. Hulle kan dus ook kies of hulle wil doen wat reg is of wat verkeerd is. Sou engele kies om te doen wat verkeerd is? Party mense sal dalk verbaas wees om uit te vind dat ’n groot aantal engele duisende jare gelede wel teen God gesondig het—hulle het teen hom in opstand gekom!—Judas 6.

Opstandelinge in die hemel

Sonde het in die geesteryk gekom as gevolg van die opstand deur ’n engel, wat later Satan (Teenstander) en Duiwel (Lasteraar) genoem is. Hierdie engel wat voorheen gehoorsaam was, het uit vrye wil gekies om te doen wat verkeerd is. Daarna het hy ’n verderflike invloed op die ander geesskepsele gehad, sodat baie van hulle teen die tyd van Noag, voor die Vloed, by Satan aangesluit het in sy opstand teen God.—Genesis 6:2, voetnoot in NW; 2 Petrus 2:4.

Hierdie gevalle engele is nie onmiddellik uit die hemel geban nie. Hulle toegang tot die hemel is eerder duisende jare lank geduld—klaarblyklik met sekere beperkings.a Maar toe God hierdie kwaaddoeners lank genoeg geduld het, is hulle uit die hemel “neergeslinger”, en hulle gaan uiteindelik vernietig word. ’n Stem in die hemel het toe gesê: “Wees om dié rede bly, o hemele en julle wat daarin woon!” (Openbaring 12:7-12). Die getroue engele was klaarblyklik baie verheug dat die hemele uiteindelik ontslae was van daardie slegte onrusstokers!

As ’n mens hierdie besonderhede in ag neem wat oor die algemeen onbekend is, is dit duidelik dat daar nooit enige ware vrede kan wees as intelligente skepsele God se wette en beginsels verontagsaam nie (Jesaja 57:20, 21; Jeremia 14:19, 20). Daarenteen heers daar vrede en kalmte wanneer almal God se wet gehoorsaam (Psalm 119:165; Jesaja 48:17, 18). Sou die aarde dus nie ’n waarlik wonderlike, gelukkige tuiste gewees het as alle mense God liefgehad en gehoorsaam het en vir mekaar lief was nie? Die Bybel antwoord ja!

Maar wat van diegene wat selfsugtig weier om hulle goddelose weë te verander? Sal hulle vir ewig die vrede versteur van diegene wat God se wil werklik graag wil doen? Nee, God het met die goddelose engele in die hemel afgereken, en hy sal ook met die goddelose mense hier op die aarde afreken.

’n Gereinigde aarde

“Die hemel is my troon en die aarde die voetbank van my voete”, het God gesê (Jesaja 66:1). Aangesien God die absolute verpersoonliking van heiligheid is, sal hy nie toelaat dat sy “voetbank” onbepaald deur boosheid besoedel word nie (Jesaja 6:1-3; Openbaring 4:8). Net soos hy die hemel van bose geeste gesuiwer het, sal hy ook alle goddelose mense van die aarde af verwyder, soos die volgende Skrifgedeeltes toon:

“Die kwaaddoeners sal uitgeroei word; maar die wat die HERE verwag, hulle sal die aarde besit.”—Psalm 37:9.

“Die regskapenes sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word.”—Spreuke 2:21, 22, NW.

“Dit [is] van God se kant regverdig . . . om verdrukking te vergeld aan dié wat vir julle verdrukking veroorsaak, maar aan julle wat verdrukking ly, verligting saam met ons by die openbaring van die Here Jesus vanuit die hemel met sy kragtige engele in ’n vlammende vuur, wanneer hy wraak uitoefen op dié wat God nie ken nie en dié wat die goeie nuus oor ons Here Jesus nie gehoorsaam nie. Húlle sal as regterlike straf ewige vernietiging ondergaan, weg van die aangesig van die Here en van die heerlikheid van sy krag af.”—2 Tessalonisense 1:6-9.

“Die wêreld [van goddelose mense] gaan verby en so ook sy begeerte, maar hy wat die wil van God doen, bly vir ewig.”—1 Johannes 2:17.

Sal die aarde ’n vreedsame plek bly?

Die Skrif toon duidelik dat daar perke is aan hoe lank God die goddelose sal duld. Maar hoe kan ons seker wees dat boosheid nie sal terugkeer nadat dit verwyder is nie? Dit het per slot van rekening kort ná die Vloed van Noag se dag weer in so ’n mate kop uitgesteek dat God die mensdom se bose planne moes dwarsboom deur hulle taal te verwar.—Genesis 11:1-8.

Ons hoofrede vir vertroue dat boosheid nie weer sal ontstaan nie, is dat die aarde nie meer deur mense regeer sal word soos dit kort ná die Vloed die geval was nie. Dit sal eerder deur die Koninkryk van God regeer word. Hierdie Koninkryk wat vanuit die hemel heers, sal die aarde se enigste regering wees (Daniël 2:44; 7:13, 14). Dit sal vinnig optree teen enigiemand wat boosheid weer probeer inbring (Jesaja 65:20). Trouens, dit sal uiteindelik die eintlike vader van goddeloosheid—Satan die Duiwel—vernietig, tesame met die demone, die goddelose engele wat hom gevolg het.—Romeine 16:20.

Daarbenewens sal die mensdom geen rede hê om bekommerd te wees oor voedsel, klere, blyplek en werk nie—die gebrek hieraan dryf sommige vandag tot ’n lewe van misdaad. Ja, die hele aarde sal omskep word in ’n vrugbare paradys met ’n oorvloed vir almal.—Jesaja 65:21-23; Lukas 23:43.

Nog belangriker, die Koninkryk sal sy onderdane leer om vreedsaam te lewe, terwyl dit hulle terselfdertyd verhef tot algehele menslike volmaaktheid (Johannes 17:3; Romeine 8:21). Daarna sal die mensdom nie meer hoef te sukkel met swakhede en sondige neigings nie, wat dit moontlik sowel as aangenaam sal maak om volmaakte gehoorsaamheid aan God te betoon, soos met die volmaakte man Jesus die geval was (Jesaja 11:3). Trouens, Jesus het aan God lojaal gebly ten spyte van hewige versoekings en marteling—dinge wat glad nie in die Paradys sal bestaan nie.—Hebreërs 7:26.

Waarom party hemel toe gaan

Maar baie mense wat die Bybel lees, is bewus van Jesus se woorde: “In die huis van my Vader is daar baie wonings. . . . Ek gaan heen om vir julle ’n plek te berei” (Johannes 14:2, 3). Weerspreek dit nie die idee van ewige lewe op ’n paradysaarde nie?

Hierdie leringe is nie teenstrydig nie. Die een ondersteun in werklikheid die ander. Om mee te begin, die Bybel sê dat net ’n beperkte getal getroue Christene—naamlik 144 000 van hulle—as geesskepsele tot lewe in die hemel opgewek word. Waarom word hulle hierdie wonderlike beloning gegee? Omdat hulle die groep uitmaak wat Johannes in ’n visioen gesien het wat “lewend geword en duisend jaar lank saam met die Christus as konings geheers [het]” (Openbaring 14:1, 3; 20:4-6). In vergelyking met die miljarde op die aarde is die 144 000 waarlik ’n “klein kuddetjie” (Lukas 12:32). Wat meer is, aangesien hulle die probleme ondervind het wat eie aan die mensdom is, sal hulle soos Jesus “met ons swakhede kan simpatiseer”, terwyl hulle toesig hou oor die herstelling van die mensdom en van die aarde.—Hebreërs 4:15.

Die aarde—die mensdom se ewige tuiste

Deur die losprysofferande van Jesus Christus te voorsien, het God die 144 000 byna 2 000 jaar gelede begin insamel, en daar is aanduidings dat hierdie groep nou voltallig is (Handelinge 2:1-4; Galasiërs 4:4-7). Jesus se offerande was egter nie net vir die sondes van die 144 000 nie, “maar ook vir dié van die hele wêreld” (1 Johannes 2:2). Almal wat geloof in Jesus beoefen, het dus die vooruitsig op ewige lewe (Johannes 3:16). Diegene wat gesterf het, maar in God se geheue is, sal opgewek word tot lewe, nie in die hemel nie, maar op ’n gereinigde aarde (Prediker 9:5; Johannes 11:11-13, 25; Handelinge 24:15). Wat sal daar op hulle wag?

Openbaring 21:1-4 antwoord en sê: “Kyk! Die tent van God is by die mense . . . En hy sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.” Stel jou dit voor—mense is bevry van die dood, en die pyn en geskreeu wat daardeur veroorsaak is, is vir ewig iets van die verlede! Uiteindelik sal Jehovah se oorspronklike voorneme met die aarde en die mensdom ’n glorieryke vervulling hê.—Genesis 1:27, 28.

Ons keuse—die lewe of die dood

Daar is nooit vir Adam en Eva die opsie gegee om hemel toe te gaan nie. Hulle kon kies om God te gehoorsaam en vir ewig op ’n paradysaarde te lewe of om ongehoorsaam aan hom te wees en te sterf. Ongelukkig het hulle ongehoorsaamheid gekies en derhalwe na die “stof” van die aarde teruggekeer (Genesis 2:16, 17; 3:2-5, 19). Dit was nooit God se voorneme dat mense oor die algemeen in die hemel moet gaan woon nadat hulle gesterf het nie. God het tienduisende engele geskep om in die hemel te woon; hierdie geesskepsele is nie mense wat gesterf het en daarna tot lewe in die hemel opgewek is nie.—Psalm 104:1, 4, NW; Daniël 7:10.

Wat moet ons doen om geseën te word met ewige lewe in die Paradys op aarde? Een van die eerste stappe is om God se Woord, die Heilige Bybel, te bestudeer. “Dít beteken die ewige lewe,” het Jesus in gebed gesê, “dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.

Die toepassing van daardie kennis is nog ’n stap tot ewige geluk in die Paradys (Jakobus 1:22-24). Diegene wat volgens God se Woord lewe, het die vooruitsig om met hulle eie oë te sien hoe opwindende profesieë vervul word, soos die een in Jesaja 11:9, wat sê: “Hulle [die mensdom] sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.”—Ons kursiveer.

[Voetnoot]

[Prente op bladsy 7]

“Die regverdiges sal die aarde besit en vir ewig daarop woon.”—Psalm 37:29