’n Byna ondraaglike verlies

Nicolle was ’n gesonde dogtertjie. Maar een aand het sy gesê dat sy hoofpyn het, en haar ouers het haar hospitaal toe geneem. Die volgende aand, terwyl sy nog vir waarneming in die hospitaal was, het Nicolle ’n hartaanval gekry. Verdere ondersoeke het aan die lig gebring dat sy ’n seldsame bakteriële infeksie het wat na haar longe, niere en hart versprei het. Binne 48 uur was Nicolle dood. Sy was maar drie jaar oud.

DIE dood van ’n geliefde is een van die verpletterendste ondervindinge wat ’n mens kan deurmaak. Soms voel dit dalk of die verlies ondraaglik is. “Ek mis Nicolle verskriklik baie”, sê Isabelle, die dogtertjie se ma. “Ek mis haar drukkies, haar reuk, haar teerheid. Ek mis hoe sy elke dag vir my ’n blom gegee het. Nicolle is altyd in my gedagtes.”

Het jy ook ’n geliefde verloor—hetsy dit ’n kind, ’n huweliksmaat, ’n broer of suster, ’n ouer of ’n intieme vriend is? Indien wel, hoe kan jy jou droefheid verwerk?