Ons beskou die wêreld
“Selfone kan help om ongewenste persoonlike interaksie te vermy—13% van mense wat ’n selfoon het, het [al] voorgegee dat hulle oor die foon praat sodat hulle interaksie met die mense om hulle kon vermy.”—PEW-NAVORSINGSENTRUM, VSA.
Die afgelope vyf somers was daar volgens rekord minder seeys in die Noordpoolstreek as ooit tevore.—BBC NEWS, BRITTANJE.
“Omtrent 47% van Afrika se bewerkbare grond is steeds onbewerk.”—THE WITNESS, SUID-AFRIKA.
“Oor die afgelope 10 jaar het 10 lande (Nederland, België, Kanada, Spanje, Suid-Afrika, Noorweë, Swede, Portugal, Ysland en Argentinië) gay huwelike gewettig.”—FAMILY RELATIONS, VSA.
“The Troubles” het sy letsels gelaat
’n Opname in Noord-Ierland toon dat godsdiens- en politieke konflik sy letsels gelaat het. Die konflik, wat plaaslik bekend staan as “The Troubles”, het byna drie dekades geduur en het twee-derdes van die bevolking aan traumatiese gebeurtenisse blootgestel. Die Universiteit van Ulster se Bamford-sentrum vir Geestesgesondheid en -welsyn het bevind dat byna 1 uit 10 mense in Noord-Ierland die een of ander tyd aan posttraumatiese stresversteuring gely het—“een van die hoogste voorkomssyfers” ter wêreld, sê The Irish Times. “Verhoudingsgewys”, voeg die koerant by, “was ‘The Troubles’ een van die hewigste konflikte in die wêreld, aangesien dit die lewe geëis het van een uit elke 500 van die bevolking.”
Uiterste weerstoestande is “nou normaal”
In die Verenigde State kom ongewone weerstoestande al hoe meer voor. Wat voorheen as uiterstes beskou is—yslike oorstromings, dodelike droogtes en ontsaglike sneeustorms—is “nou normaal”. By ’n geleentheid wat deur die Unie van Besorgde Wetenskaplikes gereël is, het Katharine Hayhoe, ’n klimatoloog by die Tegniese Universiteit van Texas, vir kollegas gesê: “Ons is gewoond aan sekere weerstoestande, en deesdae gebeur daar baie dinge waaraan ons nie gewoond is nie.” Hayhoe en ander deskundiges meen dat mensebedrywighede grootliks bydra tot klimaatsverandering en onvoorspelbaarder weer dwarsoor die wêreld.