’N WÊRELD VOL PROBLEME

4 | Beskerm jou hoop

HOEKOM DIT SAAK MAAK

Wanneer mense angstig is oor die probleme in die wêreld, kan dit ’n fisiese en emosionele uitwerking op hulle hê. Baie mense wat deur hierdie probleme geraak word, dink nie dat die situasie ooit beter sal word nie. Hoe reageer hulle?

Party wil nie eers aan die toekoms dink nie.
Ander probeer om van hulle bekommernisse te vergeet deur alkohol of dwelms te gebruik.
Party kom tot die gevolgtrekking dat die dood beter is as die lewe. Hulle vra: “Is dit die moeite werd om aan te hou lewe?”

Wat jy moet weet

Party van die probleme wat jy het, is dalk tydelik en kan onverwags goed uitdraai.
Selfs al verander jou situasie nie, is daar dinge wat jy kan doen wat jou kan help om dit te hanteer.
Die Bybel gee ware hoop – ’n permanente oplossing vir die mens se probleme.

Wat jy nou kan doen

Die Bybel sê: “Moet . . . nooit bekommerd wees oor die volgende dag nie, want die volgende dag sal sy eie bekommernisse hê. Elke dag het genoeg van sy eie probleme.” – Matteus 6:34.

Vat dit een dag op ’n slag. Moenie so bekommerd oor die toekoms wees dat jy nie die verantwoordelikhede wat jy vandag het, kan hanteer nie.

As jy jou bekommer oor negatiewe dinge wat dalk sal gebeur, sal dit jou net meer laat stres en sal jou hoop vir ’n beter toekoms nie meer so sterk wees nie.

HOE OM JOUSELF TE BESKERM – Wenke wat help

FOKUS OP POSITIEWE DINGE

Die Bybel sê: “Vir die een wat swaarkry, is elke dag sleg, maar vir die een met ’n vrolike hart is die lewe ’n fees” (Spreuke 15:15). As jy te veel op die probleem fokus, sal jy dalk nie sien dat daar ’n oplossing is nie. Maar ’n positiewe gesindheid kan jou help om aan maniere te dink hoe jy jou situasie kan hanteer.

Moenie te veel tyd aan die nuus spandeer nie.
Skryf aan die einde van elke dag twee of drie dinge neer waarvoor jy dankbaar kan wees.
Maak ’n lysie van alles wat jy vandag moet doen. Verdeel groter take in kleiner takies sodat jy aan die einde van die dag die resultate van jou harde werk kan sien.

VRA VIR HULP

Die Bybel sê: “Iemand wat hom afsonder, . . . verwerp alle praktiese wysheid” (Spreuke 18:1). Jy kan nie op jou eie uit ’n diep, donker gat klim nie, maar as iemand jou help, kan jy dit doen.

Vra vir familie of vriende om jou te help.
Soek ook na maniere hoe jy vir hulle kan help. Wanneer jy dinge vir ander doen, sal dit jou help om ’n gebalanseerde beskouing van jou eie probleme te hê.
As jy alle hoop verloor het en voel dat dit nie meer die moeite werd is om te lewe nie, oorweeg dit om na ’n dokter toe te gaan. Soms as ’n mens oorweldig voel, is dit ’n simptoom van ’n gesondheidsprobleem, soos depressie. Baie mense is al gehelp deur behandeling daarvoor te kry.a

a Ontwaak! beveel nie enige spesifieke behandeling aan nie.

Die Bybel gee ware hoop

’n Psalmskrywer uit die ou tyd het in gebed tot God gesê: “U woord is ’n lamp vir my voet en ’n lig vir my pad” (Psalm 119:105). Kyk hoe die Bybel – God se Woord – soos ’n lamp en ’n lig kan wees.

Op ’n donker nag help ’n lamp ons om te sien waar ons moet loop. Net so bevat die Bybel praktiese wysheid wat ons kan help wanneer ons ’n moeilike besluit moet maak.

’n Lig kan ons pad verlig sodat ons kan sien wat voorlê. Net so kan die Bybel vir ons wys dat daar ’n beter toekoms vir ons voorlê.

Die Bybel is ’n heilige boek wat nie net die mens se geskiedenis van die begin af vertel nie, maar ook vir ons ware hoop vir die toekoms gee. Dit beantwoord hierdie vrae:

Hoe?

Hoe swaarkry begin het: Die Bybel sê dat ‘sonde deur een mens in die wêreld ingekom het en die dood deur die sonde, en die dood so na alle mense versprei het omdat hulle almal gesondig het’. – Romeine 5:12.

Hoekom?

Hoekom menseregerings dit nie reggekry het om ons probleme op te los nie: Die Bybel sê dat ‘dit nie aan die mens wat loop, behoort om sy voetstappe te rig nie’ (Jeremia 10:23). Die probleme in die wêreld bewys dat hierdie teks waar is.

Wat?

Wat God sal doen om die situasie op te los: Die Bybel wys dat hy ‘elke traan van hulle oë sal afvee, en die dood nie meer daar sal wees nie. Daar sal geen getreur, geen gehuil en geen pyn meer wees nie.’ – Openbaring 21:4.