Hoofstuk 31

Hoe kan ek oor ’n mislukte verhouding kom?

“Ons het ses maande lank uitgegaan en was al vyf jaar lank vriende. Toe hy die verhouding wou beëindig, het hy nie eers die moed gehad om my te sê nie. Hy het eenvoudig opgehou om met my te praat. Ek het hulpeloos gevoel. Die teleurstelling was oorweldigend. Ek het my bly afvra: ‘Wat het ek verkeerd gedoen?’”—Rachel.

’N MISLUKTE verhouding kan jou vreugdevolle uitkyk vernietig en dit met wanhoop en trane vervang. Kyk na die geval van Jeff en Susan, wat twee jaar lank uitgegaan het. In dié tyd het hulle ’n sterk emosionele band gevorm. Jeff het elke dag vir Susan liefdesboodskappe op haar selfoon gestuur. Elke nou en dan het hy vir haar geskenke gegee om te wys dat hy aan haar dink. “Jeff het hard probeer om na my te luister en my te verstaan”, sê Susan. “Hy het my spesiaal laat voel.”

Kort voor lank het Jeff en Susan van trou gepraat en bespreek waar hulle sou woon. Jeff het selfs gevra wat Susan se ringgrootte is. Toe het hy uit die bloute die verhouding beëindig! Susan was verpletter. Sy het voortgegaan met haar daaglikse lewe, maar sy was lamgeslaan en geskok. “Uiteindelik was ek verstandelik en fisies uitgeput”, sê sy.a

Waarom dit seermaak

As jy al in ’n situasie soos dié van Susan was, wonder jy dalk: ‘Sal ek ooit hieroor kom?’ Dit is te verstane dat jy ontsteld is. “Die liefde is so sterk soos die dood”, het koning Salomo geskryf (Hooglied 8:6). Die einde van julle verhouding is dalk een van die mees traumatiese ondervindinge wat jy al ooit moes deurmaak. Trouens, sommige het al gesê dat dit voel asof ’n deel van jou doodgaan wanneer ’n verhouding misluk. Dalk sal jy selfs vind dat jy deur die volgende en ander tipiese stadiums van droefheid gaan:

Ontkenning. ‘Dit kan nie die einde wees nie. Hy gaan oor ’n dag of twee van plan verander.’

Woede. ‘Hoe kon hy dit aan my gedoen het? Ek kan hom nie verdra nie!’

Depressie. ‘Niemand kan of sal my ooit liefhê nie.’

Aanvaarding. ‘Ek sal weer regkom. Dit het my seergemaak, maar ek begin al beter voel.’

Die goeie nuus is: Jy kan die stadium van aanvaarding bereik. Hoe lank dit sal neem om daar te kom, hang van ’n aantal faktore af, insluitende hoe lank julle uitgegaan het en hoe ver julle verhouding gevorder het. Maar hoe kan jy intussen die hartseer verwerk?

Gaan aan met jou lewe

Jy het dalk al die gesegde gehoor: Die tyd heel alle wonde. Net nadat die verhouding beëindig is, klink hierdie woorde dalk leeg. Dit is omdat tyd net ’n deel van die oplossing is. Ter toeligting: ’n Sny in jou vel sal met verloop van tyd genees, maar dit is nou seer. Jy moet die bloeding stop en die pyn verlig. Jy moet ook voorkom dat dit sweer. Dieselfde geld vir ’n emosionele wond. Dit is nou seer. Maar daar is dinge wat jy kan doen om die pyn te verlig en te voorkom dat bitterheid soos ’n sweer binne jou word. Die tyd sal jou wel help om te genees, maar wat kan jy van jou kant doen? Probeer die volgende.

● Laat jouself toe om te treur. Daar is niks daarmee verkeerd om te huil nie. Die Bybel sê immers dat daar “’n tyd [is] om te huil”, en selfs “’n tyd om te weeklaag” (Prediker 3:1, 4). As jy huil, beteken dit nie dat jy ’n swakkeling is nie. Selfs Dawid—’n moedige krygsman—het eenkeer, toe hy intense emosionele pyn ervaar het, erken: “Ek huil die hele nag deur, ek deurweek my bed met trane.”—Psalm 6:7, Nuwe Afrikaanse Bybelvertaling.

● Sien om na jou fisiese gesondheid. Fisiese oefening en ’n gesonde dieet sal jou help om die energie terug te kry wat jy weens die emosionele spanning verloor het. “Liggaamlike oefening het . . . voordeel”, sê die Bybel.—1 Timoteus 4:8.

Aan watter aspekte van jou gesondheid moet jy dalk aandag skenk?

․․․․․

● Bly besig. Moenie ophou om die dinge te doen waarin jy belangstel nie. En nou, meer as ooit tevore, moet jy jou nie afsonder nie (Spreuke 18:1). As jy met diegene assosieer wat vir jou omgee, sal dit jou iets positiefs gee waarop jy kan konsentreer.

Watter doelwitte kan jy stel?

․․․․․

● Bid tot God oor jou gevoelens. Dit kan ’n uitdaging wees. Nadat ’n verhouding op die rotse beland het, voel party selfs dat God hulle in die steek gelaat het. Hulle redeneer: ‘Ek het aanhoudend gebid om iemand te vind, en kyk net wat nou gebeur het!’ (Psalm 10:1). Maar sou dit reg wees om God bloot as ’n soort hemelse maatsoeker te beskou? Beslis nie; en hy is ook nie daarvoor verantwoordelik as een party die verhouding wil beëindig nie. Ons weet wel die volgende omtrent Jehovah: Hy is besorg oor jou (1 Petrus 5:7). Stort dus jou hart voor hom in gebed uit. Die Bybel sê: “Laat julle versoeke . . . by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.

Oor watter spesifieke dinge kan jy tot Jehovah bid terwyl jy die hartseer van ’n mislukte verhouding probeer verwerk?

․․․․․

Fokus op die toekoms

Nadat jy tyd gehad het om te genees, sal dit dalk goed wees om te kyk presies wat in jou vorige verhouding gebeur het. Wanneer jy hiervoor gereed is, sal jy dit dalk nuttig vind om jou antwoorde neer te skryf op die vrae in die venster “Wat kan ek uit die mislukte verhouding leer?” op bladsy 224.

Die verhouding waarin jy was, het nou wel nie uitgedraai soos jy gehoop het nie. Maar onthou: Tydens ’n storm is dit maklik om op die donker wolke en die reën te fokus. Maar uiteindelik hou die reën op, en die lug trek oop. Die jongmense wat vroeër in hierdie artikel aangehaal is, het gevind dat hulle ná verloop van tyd met hulle lewe kon aangaan. Wees verseker dat dit ook met jou die geval kan wees!

[Voetnoot]

SLEUTELTEKSTE

“[Jehovah] genees die gebrokenes van hart en verbind hulle pynlike plekke.”—Psalm 147:3.

WENK

Susan, wat aan die begin van hierdie hoofstuk genoem is, het ’n lys met Bybelverse gemaak en dit byderhand gehou sodat sy daardie verse kon lees wanneer haar emosies haar oorweldig het. Dalk kan jy dit ook doen met ’n paar van die verse wat in hierdie artikel aangehaal is.

HET JY GEWEET . . . ?

Die meeste tienerverhoudings lei nie tot ’n huwelik nie, en baie van dié wat wel daartoe lei, loop op ’n egskeiding uit.

AKSIEPLAN!

Om my te help om oor ’n mislukte verhouding te kom, sal ek ․․․․․

Om ’n beter maat in my volgende romantiese verhouding te wees, kan ek aan die volgende werk ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Wat het jy uit jou vorige verhouding oor jouself geleer?

● Wat het jy omtrent die teenoorgestelde geslag geleer?

[Lokteks op bladsy 227]

Ná verloop van tyd sal jy dinge in ’n baie beter perspektief sien. Jou emosies sal dan bedaar het, en jy sal die situasie meer objektief kan beskou en dit kan aanvaar. Jy kan ook meer uitvind oor wie jy is en waarna jy in ’n maat soek, sowel as die dinge waarteen jy moet waak om ’n soortgelyke situasie in die toekoms te vermy.’’—Corrina

[Venster op bladsy 224]

Werkblad

wat kan ek uit die mislukte verhouding leer?

Het die ander persoon vir jou gesê waarom hy of sy die verhouding beëindig het? Indien wel, skryf die rede hieronder neer, hetsy jy dink dat dit geldig is of nie. ․․․․․

Watter ander redes dink jy het dalk ’n rol gespeel? ․․․․․

As jy terugdink, is daar enigiets wat jy kon gedoen het om die uitkoms te verander? Indien wel, wat is dit? ․․․․․

Het hierdie ondervinding jou gehelp om te sien in watter opsigte jy geestelik of emosioneel vordering moet maak? ․․․․․

Wat, indien enigiets, sal jy in jou volgende verhouding anders doen? ․․․․․

[Prent op bladsy 223]

’n Mislukte verhouding is soos ’n pynlike sny —dit is seer, maar dit sal met verloop van tyd genees