Hoofstuk 24

Sal seks ons verhouding verbeter?

Heather gaan nog net twee maande met Mike uit, maar dit voel vir haar asof sy hom al haar hele lewe lank ken. Hulle SMS mekaar gedurig, hulle gesels ure lank oor die telefoon en hulle kan selfs mekaar se sinne voltooi! Maar nou, terwyl hulle in ’n geparkeerde motor in die maanlig sit, wil Mike meer doen as net gesels.

Gedurende die afgelope twee maande het Mike en Heather net hande vasgehou en mekaar vlugtig gesoen. Heather wil nie verder gaan nie. Maar sy wil Mike ook nie verloor nie. Niemand anders laat haar so mooi, so spesiaal, voel nie. ‘Wat meer is’, sê sy vir haarself, ‘ek en Mike is mos verlief . . . ’

JY KAN seker raai waarop hierdie scenario afstuur. Maar wat jy dalk nie besef nie, is hoe drasties seks dinge vir Mike en Heather sal verander—en nie met goeie gevolge nie. Dink hieraan:

As jy ’n fisiese wet, soos die swaartekragwet, ignoreer, sal jy die gevolge dra. Dieselfde geld as jy ’n sedewet oortree, soos die een wat sê: “Onthou [jou] van hoerery” (1 Tessalonisense 4:3). Wat is die gevolge as ’n mens ongehoorsaam is aan hierdie gebod? Die Bybel sê: “Hy wat hoerery beoefen, sondig teen sy eie liggaam” (1 Korintiërs 6:18). Hoe so? Kyk of jy hieronder drie skadelike gevolge van voorhuwelikse seks kan neerskryf.

1 ․․․․․

2 ․․․․․

3 ․․․․․

Kyk nou na wat jy neergeskryf het. Het jy dinge ingesluit soos seksueel oordraagbare siektes, ongewenste swangerskappe of die verlies van God se guns? Hierdie gevolge is beslis verwoestend, en dit kan kom oor enigiemand wat God se sedewet oor hoerery oortree.

Jy kom dalk nogtans in die versoeking om seks te hê. ‘Niks sal met my gebeur nie’, redeneer jy miskien. Almal doen dit tog. Jou skoolmaats spog oor hulle eskapades, en dit lyk nie of hulle enigiets oorkom nie. Dalk voel jy, soos Heather in die scenario aan die begin van die hoofstuk, dat seks julle nader aan mekaar sal bring. Wat meer is, ’n mens wil mos nie gespot word omdat jy ’n maagd is nie. Is dit nie beter om in te gee nie?

Wag ’n bietjie! In die eerste plek doen nie almal dit nie. Jy lees dalk wel van statistiek wat toon dat ’n groot aantal jongmense seksueel aktief is. Byvoorbeeld, volgens ’n studie in die VSA is 2 uit 3 jongmense in daardie land seksueel aktief teen die tyd dat hulle met hoërskool klaarmaak. Maar dit beteken ook dat 1 uit 3—’n redelike aantal—nie seksueel aktief is nie. Maar wat van dié wat wel seksueel aktief is? Navorsers het gevind dat baie van hierdie jongmense een of meer van die volgende wrede ontnugterings ervaar.

WREDE ONTNUGTERING 1 ONTSTELTENIS. Die meeste jongmense wat voorhuwelikse seks gehad het, sê dat hulle agterna daaroor spyt was.

WREDE ONTNUGTERING 2 WANTROUE. Nadat ’n paartjie seks gehad het, begin al twee wonder: ‘Met wie anders het hy/sy al seks gehad?’

WREDE ONTNUGTERING 3 TELEURSTELLING. Diep in hulle hart verkies die meeste meisies iemand wat hulle sal beskerm, nie gebruik nie. En baie seuns vind dat hulle minder aangetrokke voel tot ’n meisie wat ingegee het en met hulle seks gehad het.

’n Aantal seuns het ook al gesê dat hulle nooit met ’n meisie sal trou met wie hulle seks gehad het nie. Waarom nie? Omdat hulle iemand met beter sedes verkies!

Is dit vir jou as ’n meisie verbasend—maak dit jou dalk selfs kwaad? Dan moet jy onthou: Die werklikheid van voorhuwelikse seks verskil hemelsbreed van wat in films en op TV uitgebeeld word. Die vermaaklikheidsbedryf verheerlik tienerseks en laat dit soos onskuldige pret of selfs ware liefde lyk. Maar moenie naïef wees nie! Diegene wat jou probeer ompraat om voorhuwelikse seks te hê, soek net hulle eie belang (1 Korintiërs 13:4, 5). Sal enigiemand wat werklik vir jou lief is, jou fisiese en emosionele welsyn in gevaar stel? (Spreuke 5:3, 4). En sal enigiemand wat werklik vir jou omgee, jou in die versoeking bring om jou verhouding met God in gevaar te stel?—Hebreërs 13:4.

As jy ’n jong man is en met ’n meisie uitgaan, moet die inligting in hierdie hoofstuk jou laat nadink oor die verhouding waarin jy is. Vra jou af: ‘Gee ek regtig vir my meisie om?’ As jou antwoord ja is, wat is die beste manier om dit te wys? Jy moet die krag hê om God se wette te gehoorsaam, die wysheid hê om omstandighede te vermy wat julle in die versoeking kan bring en die liefde hê om haar belange eerste te stel. As jy hierdie eienskappe aan die dag lê, sal jou meisie waarskynlik voel soos die Sulammitiese meisie, wat goeie sedes gehad het en gesê het: “My beminde is myne en ek is syne” (Hooglied 2:16). Kortom, jy sal haar held wees!

Hetsy jy ’n seun of ’n meisie is, as jy voor die versoeking swig om voorhuwelikse seks te hê, verlaag jy jouself deur iets kosbaars weg te gee (Romeine 1:24). Geen wonder dat baie agterna leeg en niks werd voel nie, asof hulle nalatig toegelaat het dat iets kosbaars van hulle gesteel word! Moenie toelaat dat dit met jou gebeur nie. As iemand jou probeer ompraat om seks te hê deur te sê: “As jy vir my lief is, sal jy dit doen”, moet jy ferm antwoord: “As jy vir my lief is, sal jy dit nie vra nie!”

Jou liggaam is veels te kosbaar om weg te gee. Wys dat jy beginselvas is deur God se wet te gehoorsaam om jou van hoerery te onthou. Later, as jy eendag trou, kan jy wel seks hê. En jy sal dit ten volle kan geniet, sonder die bekommernis, spyt en onsekerheid wat voorhuwelikse seks so dikwels tot gevolg het.—Spreuke 7:22, 23; 1 Korintiërs 7:3.

LEES MEER OOR HIERDIE ONDERWERP IN DEEL 2, HOOFSTUKKE 4 EN 5

SLEUTELTEKSTE

“Vlug vir die hoerery. . . . Hy wat hoerery beoefen, sondig teen sy eie liggaam.”—1 Korintiërs 6:18.

WENK

’n Goeie reël wat gedrag teenoor die teenoorgestelde geslag betref, is: As jy iets nie voor jou ouers sal wil doen nie, behoort jy dit glad nie te doen nie.

HET JY GEWEET . . . ?

Nadat ’n seun met sy meisie seks gehad het, is die moontlikheid groter dat hy haar sal los en met iemand anders sal uitgaan.

AKSIEPLAN!

Wanneer ek saam met iemand van die teenoorgestelde geslag is, moet ek die volgende omstandighede vermy: ․․․․․

As iemand van die teenoorgestelde geslag my op ’n afgesonderde plek wil ontmoet, sal ek sê ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom dink jy dat voorhuwelikse seks verkeerd is, al is dit dalk vir die onvolmaakte vlees aanloklik?

● Wat sal jy doen as iemand jou vra om seks te hê?

[Lokteks op bladsy 176]

As ’n Christen het jy eienskappe wat jou vir ander aantreklik sal maak. Daarom moet jy wakker wees en weier wanneer ander wil hê dat jy iets onsedeliks moet doen. Respekteer daardie eienskappe. Moenie ingee nie!’’—Joshua

[Prent op bladsye 176, 177]

As jy jou aan voorhuwelikse seks skuldig maak, is dit soos om ’n pragtige skildery as ’n deurmat te gebruik