Hoofstuk 17

Wat moet ek weet oor vriendskappe by die skool?

“Soms het ek ’n groep kinders gesien en gedink: ‘Sjoe, hulle is regtig goeie vriende. Ek wil ook deel daarvan wees.’”—Joe.

“Dit was nie vir my moeilik om op skool vriende te maak nie. Dit was maklik. Dit was juis die probleem.”—Maria.

ALMAL het vriende nodig—mense saam met wie hulle kan ontspan gedurende goeie tye en op wie hulle kan staatmaak gedurende moeilike tye. Jesus het vriende gehad, en hy het dit geniet om sosiaal met hulle te verkeer (Johannes 15:15). Terwyl Jesus aan die folterpaal gesterf het, was sy intieme vriend Johannes, “die dissipel wat hy liefgehad het”, daar naby (Johannes 19:25-27; 21:20). Jy het sulke vriende nodig—mense wat deur dik en dun by jou sal staan!

Miskien voel jy dat jy op skool sulke vriende gevind het—een of twee van jou klasmaats met wie jy baie goed oor die weg kom. Julle stel in dieselfde dinge belang en geniet dit om met mekaar te gesels. Vir jou lyk dit dalk nie of hulle “slegte omgang” is nie (1 Korintiërs 15:33). “Jy sien dié kinders omtrent elke dag”, sê Anne. “Daarom voel jy op jou gemak wanneer jy saam met hulle is. Dis nie soos om saam met jou geestelike broers en susters te wees nie, waar jy partykeer voel dat jy moet oppas hoe jy jou gedra. By die skool kan jy ontspan.” Daarbenewens vind jy dalk dat jy dinge soos Lois beskou, wat sê: “Ek wou hê my skoolmaats moet sien dat Jehovah se Getuies nie so anders is as wat almal dink nie; ek wou vir hulle wys ons is normaal.” Is dít goeie redes om hegte vriende met jou skoolmaats te word?

Waarom moet jy versigtig wees?

Dink aan wat gebeur het met Maria, wat aan die begin aangehaal is. Weens haar uitgaande persoonlikheid was dit vir haar maklik om vriende te maak, maar moeilik om te weet waar om die streep te trek. “Ek het daarvan gehou as ander van my hou, meisies én seuns”, erken sy. “Gevolglik het ek gevind dat ek al hoe dieper in die dryfsand van hierdie wêreld sink.” Dieselfde het met Lois gebeur. “Die gesindhede van die ander kinders het my beïnvloed”, sê sy. “Ek het soos hulle begin optree.”

Dis glad nie verbasend nie. Om goeie vriende met iemand te bly, moet jy immers dieselfde belangstellings en waardes as hy hê. As jy hegte vriendskappe sluit met mense wat nie dieselfde skriftuurlike oortuigings en standaarde as jy het nie, sal dit beslis ’n uitwerking op jou gedrag hê (Spreuke 13:20). Die apostel Paulus het met goeie rede geskryf: “Moenie saam met ongelowiges onder ’n ongelyke juk kom nie.”—2 Korintiërs 6:14.

Wat jy kan doen

Beteken Paulus se raad dat jy jou klasmaats moet vermy en jou eenkant moet hou? Nee! Christene moet weet hoe om met mans en vroue van alle rasse, godsdienste en kulture te praat sodat hulle hulle opdrag kan uitvoer om “dissipels [te maak] van mense van al die nasies”.—Matteus 28:19.

Die apostel Paulus het ’n uitstekende voorbeeld hierin gestel. Hy het geweet hoe om met “alle soorte mense” te praat, al het hy nie dieselfde dinge as hulle geglo nie (1 Korintiërs 9:22, 23). Jy kan Paulus se voorbeeld navolg. Wees vriendelik met jou skoolmaats. Leer om goed met hulle te kommunikeer. Maar moenie toelaat dat jou spraak en gedrag deur jou klasmaats beïnvloed word nie. Gee hulle eerder so gou as moontlik ’n respekvolle verduideliking waarom jy verkies om volgens Bybelstandaarde te lewe.—2 Timoteus 2:25.

Jy sal weliswaar opvallend anders wees, en dis nie altyd so maklik nie (Johannes 15:19). Maar beskou die saak eerder so: As jy in ’n reddingsbootjie is terwyl ander mense in die water is, hoe sou jy hulle die beste kon help—deur uit die boot te spring en saam met hulle in die water te wees? Beslis nie!

Net so word jy op skool omring deur mense wat nie die beskerming het wat ’n mens geniet wanneer jy een van Jehovah se vriende is nie (Psalm 121:2-8). As jy Jehovah se standaarde laat vaar net sodat jy nader aan jou klasmaats kan wees, sal jy net jou eie geestelikheid en geluk in gevaar stel (Efesiërs 4:14, 15; Jakobus 4:4). Hoeveel beter sal dit tog wees as jy jou klasmaats probeer help om as ’t ware saam met jou in die reddingsbootjie te klim deur vir hulle te wys hoe om Jehovah te dien. Kan daar ’n beter manier wees om te bewys dat jy ’n ware vriend is?

SLEUTELTEKSTE

“Ek doen alles ter wille van die goeie nuus, sodat ek met ander ’n deelgenoot daarvan kan word.”—1 Korintiërs 9:23.

WENK

As party van jou klasmaats bereid is om uit te vind wat jy glo, laat hulle toe om ook te sê wat húlle dink. Luister aandagtig. Wanneer jy praat, doen dit “met sagmoedigheid en diep respek”.—1 Petrus 3:15.

HET JY GEWEET . . .?

Baie mense wat God vandag dien, het van die Bybel geleer by ’n klasmaat wat die moed gehad het om oor sy of haar geloof te praat.

AKSIEPLAN!

As ek voel dat my vriendskap met ’n klasmaat te heg begin raak, sal ek ․․․․․

As ’n skoolmaat my oor my oortuigings spot, sal ek die situasie hanteer deur ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom dink jy lyk dit dalk makliker om by die skool vriende te maak as in die Christengemeente?

● Watter gevare hou dit in om ná skool van jou vrye tyd saam met ’n ongelowige klasmaat deur te bring?

● Watter voordele hou dit in as jy vir jou klasmaats sê dat jy een van Jehovah se Getuies is?

[Lokteks op bladsy 143]

Omdat ek my net soos die ander kinders by die skool gedra het, was dit maklik om met hulle vriende te maak. Maar ek het uit my foute geleer. Nou het ek vriende in die gemeente—vriende wat ek kan vertrou.’’—Daniel

[Prent op bladsy 146]

Hoe kan jy iemand wat verdrink, die beste help—deur in die water te spring of deur vir hom ’n reddingsgordel te gee?