Hoofstuk 36

Hoe kan ek my geloof in God verdedig?

Wat sou jou heel moontlik daarvan terughou om met ’n klasmaat oor jou geloof te praat?

□ Ek het te min Bybelkennis

□ Ek is bang om gespot te word

□ Ek weet nie hoe om die gesprek te begin nie

Wat sou vir jou die maklikste manier wees om oor jou geloof te praat?

□ As ek alleen met ’n skoolmaat praat

□ As ek voor die hele klas praat

□ As ek oor my Bybelse oortuigings in ’n opstel skryf

Skryf die naam van ’n skoolmaat neer met wie jy moontlik oor die Bybel sal kan praat as jy geweet het hoe om die gesprek te begin. ․․․․․

GOD is heel moontlik nie die gewildste onderwerp vir gesprekke onder jou skoolmaats nie. Begin oor enigiets anders praat—sport, klere of die teenoorgestelde geslag—en dit sal tot ’n lewendige gesprek lei. Maar sê iets oor God, en ’n ongemaklike stilte sak dalk op die geselskap neer.

Dis nie dat jou portuurs nie in God glo nie; baie jongmense glo wel in hom. Maar party voel te ongemaklik om daaroor te praat. ‘Dis net nie die ding om te doen nie’, dink hulle dalk.

Wat van jou?

Dis te verstane dat jy dalk huiwerig voel om met jou skoolmaats oor God te praat. Dis vir niemand lekker om verwerp te word nie, en dis nog erger as mense jou spot! Kan dit gebeur as jy oor jou geloof praat? Dit kan. Aan die ander kant verras jou portuurs jou dalk. Baie van hulle soek na antwoorde op vrae soos: Waarheen is hierdie wêreld op pad? en: Waarom is daar soveel probleme? Jou portuurs sou heel moontlik eerder met iemand van hulle eie ouderdom daaroor praat as met ’n volwassene.

Dit kan nogtans na ’n baie groot uitdaging lyk om met jou portuurs oor godsdiens te praat. Maar jy hoef regtig nie bang te wees dat jy fanaties sal klink nie, en jy hoef ook nie bekommerd te wees dat jy presies die regte ding moet sê nie. Om oor jou geloof te praat, is amper soos om ’n musiekinstrument te speel. Aan die begin lyk dit dalk byna onmoontlik. Maar hoe meer jy oefen, hoe makliker word dit, en jou inspanning sal vrugte afwerp. Maar hoe begin ’n mens die gesprek?

Daar is eintlik baie maniere waarop ’n mens dit kan doen. Byvoorbeeld, wanneer iets in die nuus by die skool bespreek word, kan jy noem wat die Bybel daaroor sê. Of jy kan met net een klasmaat probeer praat. Nog makliker, party jong Christene sit eenvoudig ’n Bybelpublikasie op hulle lessenaar neer en kyk of dit ’n klasmaat se aandag trek. Dikwels werk dit, en ’n gesprek volg!

Watter van die metodes hierbo kan jy gebruik? ․․․․․

Kan jy aan ’n ander manier dink waarop jy met ’n klasmaat oor jou geloof kan praat? Indien wel, skryf dit hieronder neer.

․․․․․

Soms gee ’n skooltaak jou ’n goeie geleentheid om van jou geloof te getuig. Byvoorbeeld, wat kan jy doen wanneer evolusie bespreek word? Hoe kan jy jou geloof in die skepping verdedig?

Hoe om die skepping te verdedig

“Wanneer evolusie in die klas bespreek is, was dit soos ’n aanval op alles wat ek geleer is”, sê ’n jong man met die naam Ryan. “Dis as ’n feit aangebied, en dít was vir my intimiderend.” ’n Meisie met die naam Raquel sê iets soortgelyks. “Ek was doodbang toe my sosialestudie-onderwyseres gesê het dat ons die volgende periode evolusie sou bespreek”, sê sy. “Ek het geweet dat ek in die klas sou moes verduidelik wat my standpunt oor hierdie kontroversiële onderwerp is.”

Hoe voel jy wanneer evolusie in die klas bespreek word? Jy glo dat God ‘alles geskep het’ (Openbaring 4:11). Jy sien bewyse van intelligente ontwerp oral om jou. Maar die handboeke, sowel as jou onderwyser, sê dat lewe geëvolueer het. Wie is jy nou om met die “kenners” te stry?

Wees verseker dat jy nie die enigste een is wat so voel oor die evolusieteorie nie. Die feit is dat daar selfs etlike wetenskaplikes is wat dit nie aanvaar nie. En baie onderwysers en leerders glo dit ook nie.

Maar om jou geloof in die skepping te verdedig, moet jy weet wat die Bybel werklik daaroor leer. Dis nie nodig om te stry oor dinge wat nie direk in die Bybel genoem word nie. Kyk na ’n paar voorbeelde.

My wetenskaphandboek sê dat die aarde en die sonnestelsel al miljarde jare lank bestaan. Die Bybel sê dat die aarde en die res van die heelal voor die eerste skeppingsdag bestaan het. Die aarde en die sonnestelsel is dus heel moontlik miljarde jare oud.—Genesis 1:1.

My onderwyser sê dat dit nie moontlik is dat die aarde in net ses dae geskep kon word nie. Die Bybel sê nie dat die ses skeppingsdae letterlike tydperke van 24 uur was nie.

Ons klas het ’n hele paar voorbeelde bespreek van veranderinge in diere en mense wat oor ’n tydperk plaasgevind het. Die Bybel sê dat God lewende dinge “volgens hulle soorte” geskep het (Genesis 1:20, 21). Dit steun nie die idee dat lewe uit nielewende materie ontstaan het of dat God die evolusieproses met ’n enkele sel aan die gang gesit het nie. Daar is nogtans die potensiaal vir groot verskeidenheid binne elke ‘soort’. Die Bybel laat dus ruimte vir die idee dat veranderinge binne elke ‘soort’ kan plaasvind.

In die lig van wat ons in hierdie hoofstuk bespreek het, hoe sou jy reageer as ’n onderwyser of klasmaat sê:

“Die wetenskap het al bewys dat ons die produk van evolusie is.” ․․․․․

“Ek glo nie in God nie, want ek kan hom nie sien nie.” ․․․․․

Wees seker van jou oortuigings!

As jy in ’n Christenhuis grootgemaak word, glo jy dalk in die skepping bloot omdat jy dit geleer is. Maar noudat jy ouer word, wil jy God aanbid “met [jou] denkvermoë”, omdat jy ’n vaste grondslag vir jou oortuigings het (Romeine 12:1). Jy kan jou dus afvra: ‘Wat oortuig my dat daar ’n Skepper is?’ Sam, 14, gebruik die menseliggaam as voorbeeld. “Dis so ingewikkeld en kompleks”, sê hy, “en al die dele werk so goed saam. Die menseliggaam kon nie geëvolueer het nie!” Holly, 16, stem saam. “Vandat ek met suikersiekte gediagnoseer is”, sê sy, “het ek baie geleer oor hoe die liggaam werk. Dis byvoorbeeld verbasend hoe die pankreas—’n klein orgaantjie wat agter die maag weggesteek is—so ’n groot werk doen om die bloed en die ander organe aan die gang te hou.”

Skryf hieronder drie dinge neer wat jou oortuig dat daar ’n Skepper is.

1. ․․․․․

2. ․․․․․

3. ․․․․․

Dis glad nie nodig om ongemaklik of skaam te voel omdat jy in God en die skepping glo nie. As ’n mens die bewyse in ag neem, is dit heeltemal redelik om te glo dat ons as mense die produk van intelligente ontwerp is.

Op die ou end is dit eintlik evolusie, nie die skepping nie, wat blinde geloof vereis—in werklikheid geloof in wonderwerke sonder ’n wonderwerker! Nadat jy jou denkvermoë gebruik het om hierdie saak goed te oorweeg, sal jy jou geloof in God met meer selfvertroue kan verdedig.

SLEUTELTEKSTE

“Ek skaam my nie vir die goeie nuus nie; dit is trouens God se krag tot redding vir elkeen wat geloof het.”—Romeine 1:16.

WENK

Wees bewus van die indruk wat jy skep wanneer jy oor jou oortuigings praat. As jy ongemaklik lyk, sal dit dalk bespotting van jou portuurs uitlok. Maar as jy met vertroue praat—net soos jou skoolmaats oor hulle idees sou praat—is die kanse groter dat hulle jou sal respekteer.

HET JY GEWEET . . . ?

Wanneer onderwysers gevra word om evolusie te bewys, besef hulle soms dat hulle dit nie kan doen nie en dat hulle die teorie net aanvaar omdat hulle dit geleer is.

AKSIEPLAN!

Om ’n gesprek oor die Bybel met ’n klasmaat te begin, kan ek ․․․․․

As ek gevra word waarom ek in ’n Skepper glo, sal ek sê ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom is dit belangrik om met ander te praat oor wat jy glo?

● Wat is ’n paar maklike maniere waarop jy by die skool oor jou geloof in die skepping kan praat?

● Hoe kan jy jou waardering toon vir die Een wat alles geskep het?—Handelinge 17:26, 27.

[Lokteks op bladsy 299]

Skool is ’n predikingsgebied waarby net ons kan uitkom.’’—Iraida

[Prent op bladsy 298]

Om oor jou geloof te praat, is soos om ’n musiekinstrument te speel—as jy oefen, sal jy dit goed kan doen

[Prent op bladsy 300, 301]

Jy kan jou vrees om jou oortuigings te verdedig, oorwin