Hoofstuk 2

Wat is fout daarmee om in die geheim met iemand uit te gaan?

Jessica was in ’n penarie. Dit het alles begin toe ’n klasmaat, Jeremy, in haar begin belangstel het. “Hy was baie oulik”, sê sy, “en my vriende het gesê dat hy die ordentlikste ou is wat ek ooit sou ontmoet. ’n Hele paar meisies het al ’n verhouding met hom probeer aanknoop, maar hy het nie in hulle belanggestel nie. Hy het net van my gehou.”

Kort voor lank het Jeremy vir Jessica gevra om met hom uit te gaan. Jessica het verduidelik dat sy as een van Jehovah se Getuies nie met iemand sou mag uitgaan wat nie aan dieselfde geloof as sy behoort nie. “Maar toe het Jeremy ’n idee gehad”, sê sy. “Hy het gevra: ‘Kan ons nie net agter jou ouers se rug uitgaan nie?’”

WAT sou jy sê as iemand van wie jy hou, so ’n voorstel maak? Dit sal jou dalk verbaas dat Jessica ingestem het met Jeremy se plan. “Ek was seker dat ek hom sou kon leer om Jehovah lief te hê as ek met hom uitgaan”, sê sy. Hoe het dinge afgeloop? Ons sal later uitvind. Kom ons kyk eers hoe party in hierdie strik vasgevang kan word, naamlik om in die geheim met iemand uit te gaan.

Waarom hulle dit doen

Waarom gaan party in die geheim met iemand uit? ’n Jong man, David, som dit goed op: “Hulle weet dat hulle ouers dit nie sal goedkeur nie, en daarom vertel hulle hulle nie.” Jane noem nog ’n moontlikheid. “Om in die geheim met iemand uit te gaan, het te doen met rebelsheid”, sê sy. “As jy voel dat jy nie behandel word soos die jong volwassene wat jy dink jy is nie, besluit jy om te doen wat jy wil en net nie vir jou ouers te sê nie.”

Kan jy aan enige ander redes dink waarom party in die versoeking kom om in die geheim met iemand uit te gaan? As jy kan, skryf dit hieronder neer.

․․․․․

Jy besef natuurlik dat die Bybel jou beveel om gehoorsaam te wees aan jou ouers (Efesiërs 6:1). En as jou ouers daarteen beswaar maak dat jy met iemand uitgaan, het hulle sekerlik goeie redes. Maar moenie verbaas wees as die volgende gedagtes by jou opkom nie:

● Ek voel uit omdat almal met iemand uitgaan, behalwe ek.

● Ek hou van iemand wat nie aan dieselfde geloof as ek behoort nie.

● Ek wil graag met ’n mede-Christen uitgaan, al is ek te jonk om te trou.

Jy weet heel moontlik wat jou ouers oor die stellings hierbo sou sê. En in jou hart weet jy dat jou ouers reg is. Maar jy voel dalk soos ’n meisie met die naam Manami, wat sê: “Die druk om met iemand uit te gaan, is so sterk dat ek soms twyfel oor my standpunt. Vir vandag se jongmense is dit ondenkbaar om nie met iemand uit te gaan nie. Buitendien is dit geen pret om alleen te wees nie!” Party wat in daardie situasie is, het met iemand begin uitgaan en dit vir hulle ouers weggesteek. Hoe?

“Hulle het vir ons gesê om dit geheim te hou”

Die uitdrukking “in die geheim uitgaan” sê klaar vir jou dat daar ’n mate van oneerlikheid by betrokke is, en dis die enigste manier hoe dit kan werk. Party hou die feit dat hulle met iemand uitgaan, geheim deur hoofsaaklik per telefoon of oor die Internet te kommunikeer. In die openbaar is hulle net vriende, maar hulle e-posse, telefoonoproepe en SMS’e vertel ’n heeltemal ander storie.

Nog ’n skelm taktiek is om te reël om iets as ’n groep te doen en dan later af te paar. James sê: “Eenkeer is ’n klompie van ons genooi om iewers te ontmoet, maar toe vind ons uit dat die hele ding gereël is sodat twee in die groep bymekaar kon wees. Hulle het vir ons gesê om dit geheim te hou.”

Soos James sê, is dit dikwels die samewerking van vriende wat dit vir party moontlik maak om in die geheim uit te gaan. “Ten minste een vriend weet van die situasie, maar besluit om niks te sê nie weens ’n ‘moenie klik nie’-mentaliteit”, sê Carol. Soms is blatante oneerlikheid daarby betrokke. “Baie hou die feit dat hulle met iemand uitgaan, geheim deur vir hulle ouers leuens te vertel oor waarheen hulle gaan”, sê die 17-jarige Beth. Misaki, 19, het juis dit gedoen. “Ek moes my stories mooi uitdink”, sê sy. “Ek was versigtig om nie leuens te vertel oor enigiets anders as die feit dat ek met iemand uitgaan nie, sodat ek nie my ouers se vertroue sou verloor nie.”

Slaggate wanneer jy in die geheim met iemand uitgaan

As jy in die versoeking kom om in die geheim met iemand te begin uitgaan—of as jy dit reeds doen—moet jy jou die volgende twee vrae afvra:

Waartoe sal dit lei? Is jy van plan om redelik gou met die persoon te trou? “Om met iemand uit te gaan sonder dat jy van plan is om te trou, is soos om iets te adverteer wat jy nie wil verkoop nie”, sê die 20-jarige Evan. Waarop kan dit uitloop? Spreuke 13:12 sê: “’n Uitgestelde verwagting maak die hart siek.” Wil jy werklik iemand vir wie jy omgee, seermaak? Nog ’n waarskuwing: As jy in die geheim met iemand uitgaan, sal dit jou van die liefdevolle belangstelling van jou ouers en ander besorgde volwassenes beroof. Dit maak die kanse groter dat jy in die strik van geslagsonsedelikheid sal trap.—Galasiërs 6:7.

Hoe voel Jehovah God oor wat ek doen? Die Bybel sê: “Alles lê naak en oop en bloot voor die oë van hom aan wie ons rekenskap moet gee” (Hebreërs 4:13). Al steek jy weg dat jy—of ’n vriend(in)—met iemand uitgaan, weet Jehovah dus alreeds daarvan. En as leuens daarby betrokke is, het jy goeie rede om besorg te wees. Jehovah God keur leuens ten sterkste af. Om die waarheid te sê, “’n valse tong” word uitdruklik in die Bybel genoem as een van die dinge wat vir hom verfoeilik is!—Spreuke 6:16-19.

Beëindig die geheimsinnigheid

Dit sal beslis verstandig wees as jy met jou ouers of ’n ryp Christenvolwassene praat as jy ’n geheime verhouding met iemand het. En as jy ’n vriend(in) het wat in die geheim met iemand uitgaan, moet jy nie deel hê aan wat hy of sy doen deur dit te help wegsteek nie (1 Timoteus 5:22). Hoe sou jy voel as die verhouding skadelike gevolge het? Sou jy nie ten minste gedeeltelik daarvoor verantwoordelik wees nie?

Ter toeligting: Gestel ’n vriend wat suikersiekte het, eet in die geheim soetgoed. Sê nou jy vind daarvan uit, maar jou vriend soebat jou om vir niemand te sê nie? Wat sal vir jou die belangrikste wees—om jou vriend se geheim te bewaar of om iets te doen wat moontlik sy lewe kan red?

Jy is in dieselfde posisie as jy iemand ken wat ’n geheime verhouding het. Moenie bekommerd wees dat dit die einde van julle vriendskap sal beteken nie. ’n Ware vriend(in) sal mettertyd besef dat jy sy of haar belange op die hart gedra het.—Psalm 141:5.

Geheimsinnigheid of privaatheid?

Natuurlik is nie alle geheimsinnigheid in verband met verhoudings die gevolg van oneerlikheid nie. Byvoorbeeld, sê nou ’n jong man en vrou wat oud genoeg is om te trou, wil mekaar beter leer ken, maar wil dit ’n tyd lank redelik privaat hou. Dis dalk soos ’n jong man, Thomas, sê: “Hulle wil nie geterg word met vrae soos: ‘Wanneer trou julle?’ nie.”

Ongepaste druk van ander kan beslis skadelik wees (Hooglied 2:7). Daarom sal sommige paartjies aan die begin van ’n verhouding dalk met goeie rede besluit om hulle verhouding stil te hou (Spreuke 10:19). “Dit gee twee mense tyd om te besluit of hulle ernstig is oor mekaar”, sê die 20-jarige Anna. “As hulle is, kan hulle die dan verhouding bekend maak.”

Terselfdertyd sal dit verkeerd wees om jou verhouding weg te steek van dié wat ’n reg het om daarvan te weet, soos jou ouers en die ouers van die persoon met wie jy uitgaan. As jy nie eerlik kan wees oor jou verhouding nie, moet jy jou afvra waarom dit so is. Weet jy in jou hart dat jou ouers goeie rede sou hê om daarteen beswaar te maak?

‘Ek het geweet wat ek moes doen’

Toe Jessica, wat aan die begin genoem is, die ondervinding van ’n ander Christen gehoor het wat in dieselfde situasie was, het sy besluit om nie meer in die geheim met Jeremy uit te gaan nie. “Nadat ek gehoor het dat sy die verhouding verbreek het”, sê Jessica, “het ek geweet wat ek moes doen.” Was dit maklik om die verhouding te beëindig? Nee! “Hy was die enigste ou van wie ek ooit regtig gehou het”, sê Jessica. “Ek het weke lank elke dag gehuil.”

Maar Jessica het ook geweet dat sy Jehovah liefhet. En al het sy die spoor ’n ruk lank byster geraak, wou sy graag doen wat reg is. Ná ’n ruk het die pyn afgeneem. “Nou”, sê Jessica, “is my verhouding met Jehovah beter as ooit. Ek is so dankbaar dat hy ons op net die regte tyd die leiding gee wat ons nodig het!”

SLEUTELTEKSTE

‘Ons wil ons in alles eerlik gedra.’—Hebreërs 13:18.

WENK

Jy hoef nie jou verhouding aan die hele wêreld bekend te maak nie. Maar vertel dié wat ’n reg het om daarvan te weet. Dit sluit oor die algemeen jou ouers in, asook die ouers van die persoon met wie jy uitgaan.

HET JY GEWEET . . . ?

Blywende verhoudings word op vertroue gebou. As jy in die geheim met iemand uitgaan, skend jy die vertroue van jou ouers en ondermyn jy die grondslag van jou verhouding met die persoon met wie jy uitgaan.

AKSIEPLAN!

As ek in die geheim met ’n mede-Christen uitgaan, gaan ek ․․․․․

As een van my vriende in die geheim met iemand uitgaan, gaan ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Kyk terug na die drie situasies wat in vet druk op bladsy 22 beskryf word. Watter een, indien enige, beskryf hoe jy soms voel?

● Hoe kan jy iets daaraan doen sonder om in die geheim met iemand uit te gaan?

● Wat sou jy doen as jy weet dat ’n vriend(in) in die geheim met iemand uitgaan, en waarom sou jy besluit om dit so te doen?

[Lokteks op bladsy 27]

Ek het opgehou om in die geheim uit te gaan. Ja, dit was moeilik om terug te gaan skool toe en hom elke dag te sien. Maar Jehovah God kan alles sien, terwyl ons nie kan nie. Ons moet Jehovah net vertrou.’’—Jessica

[Prent op bladsy 25]

Om dit weg te steek as ’n vriend(in) in die geheim met iemand uitgaan, is soos om dit weg te steek as iemand wat suikersiekte het, in die geheim soetgoed eet

Hoofstuk 5

Waarom moet ek voorhuwelikse seks vermy?

“Ek voel onder druk om met seks te eksperimenteer.”—Kelly.

“Ek voel abnormaal omdat ek nog nie seks gehad het nie.”—Jordon.

“HET jy nog nooit seks gehad nie?” Die vraag alleen laat jou dalk al bloos! In baie plekke word ’n jong persoon wat nog nie seks gehad het nie, as anders, ’n bietjie eienaardig, beskou. Dis geen wonder dat soveel jongmense seks het terwyl hulle nog tieners is nie!

Druk van binne en van buite

As jy ’n Christen is, weet jy die Bybel sê dat jy jou moet “onthou van hoerery” (1 Tessalonisense 4:3). Maar dis nie maklik om jou seksuele drange te beteuel nie. “By tye kom gedagtes oor seks sonder enige rede by my op”, erken ’n jong man met die naam Paul. Wees verseker dat sulke gevoelens tot ’n groot mate normaal is.

Maar dis glad nie pret om aanhoudend geterg en bespot te word omdat jy nog nie seks gehad het nie! Byvoorbeeld, sê nou jou portuurs sê vir jou dat jy nie werklik ’n man of ’n vrou is as jy nog nie seks gehad het nie? “Jou portuurs laat seks opwindend en normaal klink”, sê Ellen. “As jy nie rondslaap nie, dink hulle jy’s ’n bietjie snaaks.”

Maar daar is ’n sy van voorhuwelikse seks waaroor jou portuurs moontlik nie praat nie. Maria, wat met haar kêrel seks gehad het, vertel byvoorbeeld: “Ek het agterna verleë en skaam gevoel. Ek het myself gehaat, en ek het my kêrel gehaat.” Sulke ondervindinge is baie algemener as wat die meeste jongmense besef. In werklikheid is voorhuwelikse seks dikwels ’n emosioneel pynlike ondervinding—met verwoestende gevolge!

Maar ’n jong meisie, Shanda, vra: “Waarom het God vir jongmense seksuele begeertes gegee as hy weet dat hulle dit nie mag bevredig totdat hulle getroud is nie?” Dis ’n goeie vraag. Maar dink aan die volgende gedagtes:

Is seksuele drange die enigste sterk gevoelens wat jy ervaar? Glad nie. Jehovah God het jou geskep met die vermoë om ’n groot verskeidenheid begeertes en emosies te ervaar.

Moet jy op elke impuls reageer sodra dit by jou opkom? Nee, want God het jou ook gemaak met die vermoë om jou dade te beheers.

Wat leer ons dan hieruit? Jy kan dalk nie keer dat sekere begeertes by jou opkom nie, maar jy kan jou reaksie daarop beheers. Om die waarheid te sê, dit sal net so verkeerd en dom wees om op elke seksuele drang te reageer as wat dit sou wees om iemand te slaan elke keer as jy kwaad word.

Die feit is dat God nooit bedoel het dat ons ons voortplantingsvermoë moet misbruik nie. “Elkeen van julle moet weet hoe om in heiliging en eer sy eie vat in besit te kry”, sê die Bybel (1 Tessalonisense 4:4). Net soos daar “’n tyd [is] om lief te hê en ’n tyd om te haat”, is daar ook ’n tyd om toe te gee aan seksuele drange en ’n tyd om dit nie te doen nie (Prediker 3:1-8). Uiteindelik is jy die een wat in beheer is van jou begeertes!

Maar wat kan jy doen as iemand met jou spot en verbaas vra: “Het jy regtig nog nooit seks gehad nie?” Moenie geïntimideer voel nie. Vir iemand wat jou net probeer verneder, kan jy sê: “Ja, ek het nog nooit seks gehad nie, en weet jy wat? Ek is bly ek het nie!” Of jy kan sê: “Dis ’n persoonlike saak wat ek nie met ander mense bespreek nie” (Spreuke 26:4; Kolossense 4:6).a Aan die ander kant voel jy dalk dat die persoon wat vra, verdien om meer te weet. In daardie geval kan jy besluit om jou Bybelse standpunt te verduidelik.

Kan jy aan ’n paar ander antwoorde dink op die vraag “Het jy regtig nog nooit seks gehad nie?” Indien wel, skryf hulle hieronder neer.

․․․․․

’n Kosbare skat

Hoe voel God wanneer mense besluit om voorhuwelikse seks te hê? Wel, stel jou voor jy het vir ’n vriend ’n geskenk gekoop. Maar voordat jy dit vir daardie vriend kan gee, maak hy of sy die geskenk oop—uit pure nuuskierigheid! Sou jy nie kwaad wees nie? Stel jou nou voor hoe God sou voel as jy voor die huwelik seks het. Hy wil hê dat jy moet wag totdat jy getroud is voordat jy die gawe van geslagsomgang geniet.—Genesis 1:28.

Wat moet jy omtrent jou seksuele begeertes doen? Eenvoudig gestel, jy moet leer om dit te beheers. Jy kán dit doen! Bid dat Jehovah jou moet help. Sy gees kan jou groter selfbeheersing gee (Galasiërs 5:22, 23). Onthou, Jehovah “sal niks goeds terughou van dié wat in onberispelikheid wandel nie” (Psalm 84:11). ’n Jong man, Gordon, sê: “Wanneer ek begin dink dat voorhuwelikse seks nie so verkeerd sou wees nie, dink ek na oor die slegte gevolge wat dit vir my geestelikheid kan inhou en dan besef ek dat my verhouding met Jehovah te kosbaar is om dit ter wille van enige sonde prys te gee.”

Die feit is: Dis nie vreemd of abnormaal om voorhuwelikse seks te vermy nie. Geslagsonsedelikheid is verlagend, vernederend en skadelik. Moet dus nie toelaat dat die wêreld se propaganda jou laat dink dat daar iets met jou verkeerd is as jy by Bybelstandaarde bly nie. Deur nie voorhuwelikse seks te hê nie, beskerm jy jou gesondheid, jou emosionele welsyn en—die heel belangrikste—jou verhouding met God.

LEES MEER OOR HIERDIE ONDERWERP IN DEEL 1, HOOFSTUK 24

[Voetnoot]

SLEUTELTEKSTE

“As iemand . . . hierdie besluit, om sy maagdelikheid te bewaar, in sy eie hart geneem het, sal hy goed doen.”—1 Korintiërs 7:37.

WENK

Moenie met mense assosieer wat nie vaste sedelike standaarde het nie, al sê hulle dat hulle dieselfde godsdiensoortuigings as jy het.

HET JY GEWEET . . . ?

Mense wat seksueel permissief is, sal heel moontlik nie hulle gewoontes verander net omdat hulle trou nie. In teenstelling hiermee sal dié wat voor hulle troue lojaal is aan God se sedelike standaarde, heel moontlik ook ná hulle troue aan hulle huweliksmaat lojaal bly.

AKSIEPLAN!

As ek nie seks gaan hê voordat ek trou is nie, sal ek moet ․․․․․

As my vriende dit vir my moeilik maak om by my besluit te bly, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom dink jy spot party mense met dié wat nog nie seks gehad het nie?

● Waarom kan dit moeilik wees om voorhuwelikse seks te vermy?

● Watter voordele hou dit in om nie seks te hê voordat jy trou nie?

● Hoe sal jy vir jou jonger broer of suster verduidelik watter voordele dit inhou om nie voorhuwelikse seks te hê nie?

[Lokteks op bladsy 51]

Ek kan seksuele versoekings weerstaan omdat ek altyd onthou dat ‘geen hoereerder of onreine enige erfenis in die koninkryk van God het nie.’’’ (Efesiërs 5:5)—Lydia

[Venster op bladsy 49]

Werkblad

Wat gebeur regtig daarna?

Jou portuurs en gewilde vermaak verdoesel dikwels die onaangename werklikhede van voorhuwelikse seks. Kyk na die volgende drie scenario’s. Wat dink jy sou regtig met hierdie tieners gebeur?

● ’n Skoolmaat spog dat hy al met baie meisies seks gehad het. Hy sê dis pret—niemand kry seer nie. Wat gebeur regtig daarna—met hom en met die meisies? ․․․․․

● ’n Fliek eindig met twee ongetroude tieners wat seks het as ’n bewys van hulle liefde vir mekaar. Wat sou daarna gebeur—in die werklike lewe? ․․․․․

● Jy ontmoet ’n oulike ou wat jou vra om met hom seks te hê. Hy sê niemand hoef daarvan uit te vind nie. As jy ingee en dit probeer wegsteek, wat sou regtig daarna gebeur? ․․․․․

[Prent op bladsy 54]

Om voorhuwelikse seks te hê, is soos om ’n geskenk oop te maak voordat dit vir jou gegee is

Hoofstuk 15

Hoe kan ek portuurdruk weerstaan?

“Op skool word jy aan soveel dinge blootgestel—rook, dwelms, seks. Jy weet dat wat die kinders wil hê jy moet doen, dom is. Maar jy kom op ’n punt waar jy voel dat jy net nie kan kop uittrek nie.”—Eve.

DIS natuurlik om te wil hê dat ander jou moet aanvaar. Portuurdruk buit hierdie begeerte uit. As jy as ’n Christen grootgemaak word, weet jy byvoorbeeld dat dinge soos voorhuwelikse seks en alkoholmisbruik verkeerd is (Galasiërs 5:19-21). Maar baie van jou portuurs spoor jou aan om saam met hulle sulke dinge te doen. Het hulle oor dié sake gedink en hulle eie besluit geneem? Waarskynlik nie. Gewoonlik is hulle deur ander beïnvloed. Hulle wil aanvaar word en daarom laat hulle ander toe om hulle opinies te vorm. Doen jy dit ook? Of het jy die moed om standpunt in te neem vir jou oortuigings?

Moses se broer, Aäron, het—ten minste by een geleentheid—ingegee onder druk. Toe die Israeliete om hom saamgedrom het en by hom aangedring het om vir hulle ’n god te maak, het hy gedoen presies wat hulle vir hom gesê het! (Eksodus 32:1-4). Stel jou dit voor—hierdie man het Farao gekonfronteer en God se boodskap moedig aan hom oorgedra (Eksodus 7:1, 2, 16). Maar toe sy mede-Israeliete druk op hom plaas, het Aäron ingegee. Dit was blykbaar vir hom makliker om sy standpunt in te neem teen die koning van Egipte as teen sy portuurs!

Wat van jou? Is dit vir jou moeilik om standpunt in te neem vir wat jy weet reg is? Sou jy graag portuurdruk wil weerstaan sonder om gespanne en bang te lyk? Jy kan! Die sleutel is om die druk te sien kom en vooraf te besluit hoe jy daarop sal reageer. Die vier stappe hieronder sal jou help om dit te doen.

1. Kyk vooruit (Spreuke 22:3). Jy kan dikwels moeilikheid sien kom. Jy sien byvoorbeeld ’n groep van jou skoolmaats wat eenkant staan en rook. Wat is die kanse dat hulle vir jou ’n sigaret sal aanbied? As jy die probleem sien kom, kan jy voorbereid wees om dit te vermy of te konfronteer.

2. Dink (Hebreërs 5:14). Vra jou af: ‘Hoe sal ek op die ou end voel as ek met die stroom saamgaan?’ Jy sal dalk tydelik die goedkeuring van jou portuurs geniet. Maar hoe sal jy later voel, wanneer jy by jou ouers of mede-Christene is? Is jy bereid om ’n rein posisie voor God op te offer net om jou klasmaats tevrede te stel?

3. Besluit (Deuteronomium 30:19). Vroeër of later moet alle knegte van God kies tussen getrouheid en die seëninge wat daarmee gepaardgaan of ontrouheid en die bittere gevolge daarvan. Manne soos Josef, Job en Jesus het die regte keuse gemaak, terwyl Kain, Esau en Judas verkeerd gekies het. Nou is dit jou beurt om te besluit. Wat sal jy doen?

4. Tree op. Jy dink dalk dat dit die moeilikste deel is. Dit is nie! As jy reeds oor die gevolge nagedink en ’n besluit geneem het, kan dit verbasend maklik—en bevredigend—wees om te sê waar jy staan (Spreuke 15:23). Moenie bekommerd wees nie—jy hoef nie ’n Bybeltoespraak te lewer nie. ’n Eenvoudige maar besliste nee is dalk al genoeg. Of jy kan jou nie-onderhandelbare standpunt duidelik stel deur te sê:

“Nie vir my nie, dankie!”

“Ek doen nie sulke dinge nie!”

“Komaan, julle ken my beter as dit!”

Die sleutel is om dadelik en met oortuiging te reageer. As jy dit doen, sal jy dalk verbaas wees om te sien hoe gou jou portuurs jou sal uitlos! Maar sê nou hulle spot met jou? Hulle sê dalk: “Wat’s fout—is jy bang?” Besef wat hierdie soort aanmerking in werklikheid is—niks anders as portuurdruk nie. Hoe kan jy reageer? Jy het ten minste drie keuses.

● Jy kan die aanmerking absorbeer. (“Jy’s reg, ek is bang!” Sê dan kortliks waarom.)

● Jy kan die druk afweer deur te sê waar jy staan, sonder om ’n groot ding daarvan te maak.

● Jy kan die druk teruggee. Sê waarom jy weier en doen dan ’n beroep op jou portuurs se intelligensie. (“Ek het gedink julle weet beter as om te rook!”)

As jou portuurs jou aanhou spot, loop weg! Hoe langer jy bly, hoe groter sal die druk word. Al moet jy wegloop, onthou: Jy het beheer oor die situasie gekry. Jy het nie jou portuurs toegelaat om jou in hulle vorm te druk nie!

Party van jou portuurs spot jou dalk en sê dat jy nie vir jouself dink nie. Maar dis presies wat jy doen! Om die waarheid te sê, Jehovah wil hê dat jy jouself moet oortuig dat dit die beste is om sy wil te doen (Romeine 12:2). Waarom sou jy dan toelaat dat jou portuurs die toutjies trek? (Romeine 6:16). Neem ’n standpunt in vir wat jy weet reg is!

Dis onrealisties om te dink dat jy van portuurdruk kan wegkruip. Maar jy kan weet wat jy wil doen, sê waar jy staan en beheer oor die situasie kry. Op die ou end is dit jou keuse!—Josua 24:15.

LEES MEER OOR HIERDIE ONDERWERP IN DEEL 1, HOOFSTUK 9

SLEUTELTEKSTE

“Hy wat met wyses wandel, sal wys word, maar hy wat hom met die sotte inlaat, met hom sal dit sleg gaan.”—Spreuke 13:20.

WENK

As jy meer moed wil hê, lees in die publikasies ondervindinge van Jehovah se hedendaagse knegte wat ’n standpunt ingeneem het vir wat reg is.

HET JY GEWEET . . .?

Min van jou klasmaats sal ’n jaar nadat jy skool verlaat het, enige kontak met jou hê. Baie sal nie eers jou naam onthou nie. Maar jou gesin—en bowenal Jehovah God—sal altyd in jou welsyn belangstel.—Psalm 37:23-25.

AKSIEPLAN!

Ek kan my voorberei om portuurdruk te weerstaan deur ․․․․․

As my portuurs druk op my probeer uitoefen om verkeerd te doen, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Onder watter omstandighede sal die vier stappe wat in hierdie hoofstuk genoem word, jou kan help?

● Wat kan gebeur as jy ingee onder portuurdruk?

● Wat is ’n paar maniere waarop jy portuurdruk kan weerstaan?

[Lokteks op bladsy 131]

Baie van die ouens weet ek is ’n Getuie en hulle respekteer my. As hulle oor iets slegs gaan praat, sê hulle: ‘Mike, ons gaan nou praat, so jy moet maar loop as jy wil loop.’’’—Mike

[Tabel op bladsy 132, 133]

Werkblad

portuurdrukplan Voorbeeld

1 Kyk vooruit

Wat is die uitdaging? Om sigarette te rook.

Waar sal ek heel moontlik hiermee te doen kry? In die kleedkamers.

↓ ↓

↓ ↓

↓ ↓

← 4 Tree op → Ek sal

nee sê en wegloop.

Portuurs se aanmerkings

Ek kan op die portuurdruk reageer deur

Dit te absorbeer Dit af te weer Dit terug te gee

LET WEL: Loop dadelik weg as jou portuurs aanhou om druk op jou te plaas. Hoe langer jy bly, hoe groter is die kans dat hulle jou sal beheer. Vul nou die volgende bladsy in.

Portuurdrukplan Maak ’n kopie van dié bladsy!

1 kyk vooruit

Wat is die uitdaging? ․․․․․

Waar sal ek heel moontlik hiermee te doen kry? ․․․․․

↓ ↓

․․․․․ ․․․․․

↓ ↓

․․․․․ ․․․․․

↓ ↓

← 4 Tree op → Ek sal . . .

․․․․․ ․․․․․

Portuurs se aanmerkings

As ’n maat sê: ․․․․․

Ek kan op die portuurdruk reageer deur

Dit te absorbeer Dit af te weer Dit terug te gee

․․․․․ ․․․․․ ․․․․․

Oefen jou antwoorde saam met ’n ouer of ’n volwasse vriend.

[Prent op bladsy 135]

As jy ingee onder druk van jou portuurs, trek húlle die toutjies