Hoofstuk 35

Hoe kan ek van dwelms losbreek?

IS JY aan dwelms verslaaf? Jy weet dalk dat jou verslawing vir jou verstand en liggaam skadelik is. Miskien het jy selfs al probeer om met die gewoonte te breek, maar het jy weer begin. Indien wel, moenie moed verloor nie. Ander het dwelmverslawing al oorkom, en jy kan ook! Kyk byvoorbeeld na wat drie mense uit uiteenlopende agtergronde sê oor hoe hulle van dwelmverslawing losgebreek het.

NAAM Marta

MY AGTERGROND My ma was nie getroud toe sy aan my geboorte gegee het nie, en ek en my suster het dus sonder ’n pa grootgeword. Vandat ek so 12 was, het ek na disko’s begin gaan saam met een van my tannies wat lief was vir dans. Ek was baie uitgaande en het gou betrokke geraak by mense wat slegte gewoontes gehad het. Toe ek 13 was, het ek met dwelms begin eksperimenteer. Ek het ook kokaïen begin gebruik. Aan die begin het ek dit geniet om hierdie dwelm te gebruik. Maar ná ’n ruk het ek hallusinasies begin kry en vir alles bang geword. En wanneer die dwelms uitgewerk het, het selfmoordgedagtes my verstand gevul. Ek wou ophou dwelms gebruik, maar het nie die wilskrag gehad nie.

HOE EK LOSGEBREEK HET Ek het aan God begin dink en het selfs ’n paar keer kerk toe gegaan. Maar ek het net wanhopiger gevoel. Toe ek 18 was, het ek by my kêrel gaan bly en ’n baba gehad. Die feit dat ek ’n seun gehad het, het my begeerte versterk om my lewenswyse te verander. ’n Voormalige vriendin het ingetrek in die huis oorkant my. Sy het my besoek en gevra hoe dit met my gaan. Ek het my hart teenoor haar uitgestort. Sy het gesê dat sy een van Jehovah se Getuies geword het en het aangebied om die Bybel met my te studeer. Ek het die aanbod aanvaar.

Ek het geleer dat God nie gelukkig is met my lewenswyse nie en dat ek moet ophou om dwelms te gebruik en te rook. Maar die dwelms het ’n sterk houvas op my gehad. Ek het Jehovah God etlike keer per dag gesmeek om my te help om van my slegte gewoontes los te breek. Ek wou sy hart bly maak (Spreuke 27:11). Nadat ek die Bybel ses maande lank gestudeer het en met Jehovah se Getuies geassosieer het, het ek dit reggekry om dwelms op te gee. Nou is my lewe betekenisvoller. Ek voel nie meer heeltyd terneergedruk nie. Ek het ’n wonderlike Christenman ontmoet en met hom getrou. Ek het my seun volgens Bybelbeginsels grootgemaak. Ek is so dankbaar dat Jehovah my gebede verhoor het en my gehelp het!

NAAM Marcio

MY AGTERGROND Ek het grootgeword in die buitewyke van Santo André, ’n digbevolkte stad in die staat São Paulo, Brasilië. Ek is op ’n vroeë ouderdom aan tabak, dwelms en diefstal blootgestel. Baie van my vriende het motors gesteel en met dwelms gesmokkel. Een van hulle het gratis dwelms vir die jongmense in ons buurt aangebied. Sodra hulle verslaaf was, moes hulle die dwelms by hom koop.

Die polisie het ons buurt heeltyd gepatrolleer, en ek is ’n hele paar keer vir geringe misdade in hegtenis geneem, en een keer onder verdenking van dwelmsmokkelary. Ek het dikwels ’n bende se gesteelde goedere en vuurwapens in my huis gehou.

Mense was bang vir my. My oë was bloedbelope. Ek het nooit geglimlag nie. Om die waarheid te sê, ek het altyd ’n wrede uitdrukking op my gesig gehad. Ek is die bynaam “Tufão” (Tifoon) gegee omdat ek moeilikheid gemaak het waar ek ook al gegaan het. Ek was ook ’n strawwe drinker en het ’n onsedelike lewe gelei. Baie van my vriende het hulle lewe verloor of in die tronk beland. Ek was so terneergedruk dat ek ’n tou om ’n boomtak vasgemaak het en myself probeer ophang het.

HOE EK VAN DWELMS LOSGEBREEK HET Ek het God gevra om my te help. Uiteindelik het ek Jehovah se Getuies ontmoet en die Bybel begin studeer. Ek het geleer dat God ’n persoonlike naam, Jehovah, het en dat hy omgee vir dié wat hard probeer om volgens sy standaarde te lewe (Psalm 83:18; 1 Petrus 5:6, 7). Ek moes baie veranderinge maak. Een van die moeilikstes was om te leer glimlag.

Ek het Jehovah aanhoudend om hulp gevra en die Bybel se raad toegepas. Ek het byvoorbeeld opgehou om met my ou “vriende” te assosieer en om na kroeë te gaan. Ek het besluit om eerder te assosieer met mense wat volgens Bybelstandaarde lewe. Dit was ’n moeilike stryd, maar ek is nie meer ’n dief en ’n moeilikheidmaker nie. En ek is nou al meer as ’n dekade lank vry van dwelms.

NAAM Craig

MY AGTERGROND Ek het op ’n plaas in Suid-Australië grootgeword. My pa was ’n alkoholis, en hy en my ma het uitmekaar gegaan toe ek agt was. My ma het weer getrou, en ek het by haar gebly totdat ek 17 was. Daardie jaar het ek geleer om skape te skeer, en ek het by groepe skaapskeerders gebly wat as gevolg van hulle werk rondgereis het. Ek het ’n aantal verskillende dwelms begin gebruik en het begin drink. Ek het my hare lank laat groei. Toe het ek was daarop gesmeer, dit gevleg en krale daarin vasgevleg. Ek het jaloers en gewelddadig geraak en het ’n slegte humeur ontwikkel. Meer as een keer het ek in die tronk beland.

Ek het na ’n klein dorpie in Wes-Australië getrek en by my meisie gebly, wat ’n kroegmeisie by die plaaslike hotel was. Ons het albei gerook en gedrink, en ons het ons eie dagga gekweek.

HOE EK VAN DWELMS LOSGEBREEK HET Net nadat ons ons dagga geoes het, het Jehovah se Getuies aan die deur van ons vervalle ou huis geklop. Ek het nie sommer net aanvaar wat hulle gesê het nie. Ek het eerder met verloop van tyd aan myself bewys dat wat die Bybel sê, waar is. Toe het ek my probleme een vir een aangepak.

Ek het gou besef dat ek sal moet ophou om dagga te gebruik. Wat sou dit behels? Ek het baie hard gewerk om my dagga te kweek, en daarom wou ek dit eers weggee. Maar ek het besluit dat dit nie ’n goeie oplossing is nie en het toe eerder die oes vernietig. Gebed het my baie gehelp om my dwelm- en alkoholprobleem te bowe te kom. Ek het God vir sy gees gevra om my te help om teen my slegte gewoontes te stry en dit te oorkom. Ek het ook opgehou om te assosieer met mense wat my in my slegte gewoontes sou versterk. Namate ek die Bybel se leringe leer ken en begin toepas het, het ek ’n groter gevoel van emosionele veiligheid verkry wat my gehelp het om party van my persoonlikheidsprobleme te oorkom. My meisie het ook die Bybel gestudeer en haar gewoontes en lewenswyse verander. Ons het getrou. Ons geniet nou al 21 jaar lank beter gesondheid, en ons het die voorreg om twee kinders groot te maak. Ek sidder as ek dink hoe my lewe sou gewees het as Jehovah my nie gehelp het om my lewenswyse te verander nie.

SLEUTELTEKSTE

“Jehovah is my sterkte en my mag.”—Jesaja 12:2.

WENK

Indien moontlik moet jy mense, plekke en dinge vermy wat met jou vorige dwelmmisbruik verband hou. Navorsing toon dat jou begeerte na dwelms weer gewek kan word as jy enige van die bogenoemde selfs net sien.

HET JY GEWEET . . . ?

Dwelmmisbruik kan die struktuur van jou brein verander.

AKSIEPLAN!

As ek ’n terugslag het wanneer ek dwelms probeer opgee, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom sal ’n persoon moontlik drastiese veranderinge in sy lewenswyse moet aanbring as hy van dwelms wil losbreek?

● Hoe kan dit help as ’n persoon die waarheid omtrent God leer?

[Lokteks op bladsy 253]

Omdat ek volgens die Bybel se hoë standaarde lewe, geniet ek nou ’n gelukkige en betekenisvolle lewe.’’—Marta

[Prent op bladsy 256]

Om ’n verslawing te oorkom, is soos om uit ’n brandende huis te vlug—jy sal dinge agterlaat, maar jy sal jou lewe red