Op soek na die waarheid omtrent die hemel
HOE aantreklik kan die vooruitsig om hemel toe te gaan tog klink! Moslems, Hindoes, Boeddhiste, lidmate van die Christendom se kerke, en selfs baie wat nie in godsdiens belangstel nie, koester die hoop op lewe ná die dood in die een of ander vorm. Die hemel word gewoonlik voorgestel as ’n plek van prag en genot waar mense verligting van lyding kry en met “afgestorwe dierbares” herenig word. Maar hoewel baie mense hemel toe wil gaan, wil niemand sterf om daar te kom nie. Waarom is dit die geval?
As ons bedoel was om te sterf en hemel toe te gaan, sou meer mense dan nie daarna uitgesien het soos ’n kind daarna uitsien om groot te word of soos ’n jongmens daarna uitsien om te trou nie? Maar die meeste mense wil nie sterf nie.
Nogtans beweer predikante dat ons bedoel is om, ná ons kort verblyf op aarde, in die hemel te lewe. Kardinaal Theodore Edgar McCarrick, emeritusaartsbiskop van Washington, DC, het byvoorbeeld volgens berig gesê: “Ons is nie vir hierdie lewe gemaak nie. Ons is vir die hemel gemaak.” ’n Voormalige president van die Amerikaanse Nasionale Vereniging van Evangeliesgesindes se woorde is eweneens soos volg aangehaal: “Die doel van die lewe is om God te verheerlik en hemel toe te gaan . . . , want die hemel is ons tuiste.”
Diegene wat aan ’n hiernamaals in die hemel glo, baseer hulle geloof gewoonlik op beperkte inligting. George Barna, die hoofbestuurder van ’n maatskappy wat navorsing doen oor godsdiensopvattings, het gevind dat baie mense “beskouings oor die lewe en die hiernamaals [aanneem] op grond van idees uit ’n wye verskeidenheid bronne, soos rolprente, musiek en romans”. ’n Episkopaalse predikant in Florida het volgens berig gesê: “Ons weet niks van die hemel nie, behalwe dat die hemel is waar God is.”
Nietemin is die hemel ’n belangrike onderwerp wat in die Bybel bespreek word. Watter soort plek is die hemel volgens God se Woord? Is die mens gemaak om in die hemel te lewe? As mense wel hemel toe gaan, wat sal hulle daar doen?
[Lokteks op bladsy 3]
Waarom wil baie mense hemel toe gaan, hoewel min wil sterf om daar te kom?