Gebed

7 Sal God daarna luister en dit verhoor?

DIE vraag hierbo lok heelwat bespreking en nuuskierigheid uit. Die Bybel toon dat Jehovah vandag beslis na gebede luister. Of hy na ons gebede sal luister, hang grootliks van ons af.

Jesus het godsdiensleiers van sy dag wat huigelagtige gebede gedoen het, veroordeel; al wat vir hulle belangrik was, was om ’n vertoon van hulle vroomheid te maak. Hy het gesê dat sulke mense “hulle volle beloning” sou ontvang, wat beteken dat hulle net sou ontvang wat hulle die graagste wou hê, die aandag van mense, maar nie wat hulle nodig gehad het nie, God se horende oor (Matteus 6:5). Vandag bid baie mense eweneens in ooreenstemming met hulle eie wil en nie God s’n nie. Omdat hulle die Bybelbeginsels wat ons bespreek het, verontagsaam, luister God nie na hulle nie.

Maar wat van jou? Sal God na jou gebede luister en dit verhoor? Die antwoord hang nie af van jou ras, nasionaliteit of sosiale stand nie. Die Bybel verseker ons: “God [is] nie partydig . . . nie, maar in elke nasie is die mens wat hom vrees en regverdigheid beoefen, vir hom aanneemlik” (Handelinge 10:34, 35). Beskryf hierdie woorde jou? As jy God vrees, het jy die hoogste agting vir hom en vrees jy om hom te mishaag. As jy regverdigheid beoefen, streef jy daarna om te doen wat God sê reg is eerder as om jou eie wil of dié van ander mense te doen. Wil jy werklik hê dat God na jou gebede moet luister? Die Bybel toon hoe jy jou doelwit kan bereik.a

Baie mense wil natuurlik hê dat God hulle gebede deur middel van ’n wonderwerk moet verhoor. Maar selfs in Bybeltye het God selde sulke wonderwerke verrig. Soms het eeue tussen een opgetekende wonderwerk en die volgende verloop. Daarbenewens toon die Bybel dat die tyd van wonderwerke ná die dae van die apostels geëindig het (1 Korintiërs 13:8-10). Beteken dit dan dat God nie vandag gebede verhoor nie? Glad nie! Beskou ’n paar van die gebede wat hy verhoor.

God gee wysheid. Jehovah is die eintlike Bron van alle ware wysheid. Hy gee dit mildelik aan dié wat sy leiding soek en daarvolgens probeer lewe.—Jakobus 1:5.

God gee sy heilige gees en al die voordele wat daarmee gepaardgaan. Die heilige gees is God se werkende krag. Daar is geen sterker krag nie. Dit kan ons help om beproewinge te verduur. Dit kan ons met vrede vervul wanneer ons verontrus is. Dit kan ons help om ander pragtige en innemende eienskappe aan te kweek (Galasiërs 5:22, 23). Jesus het sy volgelinge verseker dat God hierdie gawe mildelik voorsien.—Lukas 11:13.

God gee kennis aan dié wat hom ernstig soek (Handelinge 17:26, 27). Oral in die wêreld is daar mense wat opreg na die waarheid soek. Hulle wil meer van God weet—wat sy naam is, wat sy voorneme met die aarde en die mensdom is, hoe hulle nader aan hom kan kom (Jakobus 4:8). Jehovah se Getuies ontmoet dikwels sulke mense en help hulle met graagte om die Bybel se antwoorde op hierdie vrae te kry.

Is dit waarom jy hierdie tydskrif geneem het? Soek jy na God? Miskien is dit hoe hy jou gebed verhoor.

[Voetnoot]