“Sy onsigbare eienskappe word . . . duidelik gesien”

Glo jy aan God? Indien wel, watter bewyse oortuig jou dat hy bestaan? Ons is in werklikheid omring deur bewyse van ’n Skepper wat wys, kragtig en liefdevol is. Wat is hierdie bewyse, en hoe oortuigend is dit? Om die antwoord te vind, kan ons kyk na die woorde van die apostel Paulus in sy brief aan Christene in Rome.

Paulus het gesê: “Sy [God se] onsigbare eienskappe word van die wêreld se skepping af duidelik gesien, omdat hulle waargeneem word in die dinge wat gemaak is, ja, sy ewige krag en Godheid, sodat hulle onverskoonbaar is” (Romeine 1:20). Soos Paulus aangedui het, het die Skepper sy stempel afgedruk op sy handewerk. Kom ons ondersoek Paulus se woorde van naderby.

Paulus sê dat God se eienskappe “van die wêreld se skepping af” gesien kon word. In hierdie konteks verwys die Griekse woord wat met “wêreld” vertaal word, nie na die planeet Aarde nie. Dit verwys eerder na die mensdom.a Paulus sê dus dat mense van die oomblik dat hulle geskep is, bewyse van die Skepper se eienskappe kon sien in die dinge wat hy gemaak het.

Hierdie bewyse is oral om ons. Dit is nie verborge in die natuur nie, maar kan “duidelik gesien” word. Al die skeppingswerke, van die grootste tot die kleinste, openbaar nie net dat daar ’n Skepper is nie, maar ook dat hy wonderlike eienskappe het. Openbaar die intelligente ontwerp wat so duidelik in die natuur gesien kan word, nie God se wysheid aan ons nie? Openbaar die sterrehemel en die dreunende branders nie sy krag nie? Openbaar die verskeidenheid smaaklike kossoorte en die prag van ’n sonsopkoms en sonsondergang nie sy liefde vir die mensdom nie?—Psalm 104:24; Jesaja 40:26.

Hoe duidelik is die bewyse? Dit is so duidelik dat diegene wat dit nie sien nie en dus weier om aan God te glo, “onverskoonbaar is”. ’n Geleerde lig dit soos volg toe: Stel jou voor dat ’n bestuurder ’n teken verontagsaam wat sê: “Ompad—Draai links.” ’n Polisiebeampte keer hom voor en begin vir hom ’n kaartjie uitskryf. Die bestuurder beweer dat hy nie die teken gesien het nie. Maar sy woorde dra min gewig, want die teken is duidelik sigbaar en daar is niks fout met die bestuurder se sig nie. Wat meer is, as ’n bestuurder is dit sy verantwoordelikheid om sulke tekens raak te sien en daarop ag te slaan. Dit is ook die geval met die bewyse in die natuur dat God bestaan. Hierdie “teken” is duidelik sigbaar. As denkende wesens het ons die vermoë om dit te sien. Daar is geen verskoning as ons dit verontagsaam nie.

Ja, die boek van die skepping openbaar baie omtrent ons Skepper. Maar daar is nog ’n boek wat baie meer omtrent hom openbaar—die Bybel. In hierdie boek kan ons uitvind wat die antwoord is op hierdie belangrike vraag: Wat is God se voorneme met die aarde en die mense wat daarop woon? As jy uitvind wat die antwoord op hierdie vraag is, kan dit jou help om nader te kom aan die God wie se “onsigbare eienskappe . . . duidelik gesien” word in die wêreld om ons.