Die natuur—Wat ons daaruit leer
“Hoe talryk is u werke, o Jehovah! U het hulle almal in wysheid gemaak.” —Psalm 104:24.
BAIE mense gebruik die woord “natuur” om te verwys na die bron van die ontwerp van lewende dinge. Byvoorbeeld, die tydskrif Scientific American het in sy nommer vir Maart 2003 gesê: “Van al die liggaamsbedekkings wat die natuur ontwerp het, is vere die uiteenlopendste en die raaiselagtigste.” Hoewel hierdie skrywer dalk aan die natuur as ’n blote krag dink, sê hy dat die natuur vere “ontwerp” het. Kan ’n krag dinge ontwerp?
“Ontwerp” beteken om iets te beplan “met ’n bepaalde doel, funksie of gebruik in gedagte” (Woordeboek van die Afrikaanse Taal). Slegs ’n persoon kan ontwerp en uitvindings doen. Net soos uitvinders name het, het die Skepper ’n naam. Jehovah is die Ontwerper van die natuur. Hy alleen is “die Allerhoogste oor die hele aarde”, wat “alles geskep” het.—Psalm 83:18; Openbaring 4:11.
Wat leer ons uit die skepping? Die belangrikste lesse daarin handel oor Jehovah en sy wonderlike eienskappe, insluitende sy wysheid. “Sy onsigbare eienskappe word van die wêreld se skepping af duidelik gesien, omdat hulle waargeneem word in die dinge wat gemaak is, ja, sy ewige krag en Godheid” (Romeine 1:20). Ons leer uit die natuur dat God se wysheid verhewe is bo ons s’n. As hy dinge beter as uitvinders kan ontwerp, is dit dan nie redelik om te aanvaar dat hy ons beter raad as menseraadgewers kan gee nie?
God se raad kom nie hoofsaaklik in die “boek van die natuur” voor nie, maar eerder in sy geskrewe Woord, die Bybel. Jy kan ’n oorvloed praktiese wysheid daarin vind. Wat dink jy? Sal die Ontwerper van die organe waarmee ons kommunikeer, met ons wil kommunikeer? Dit lyk na ’n redelike slotsom. Die Bybel sê: “Die hele Skrif is deur God geïnspireer en is nuttig.”—2 Timoteus 3:16.
As jy dit interessant vind om van uitvinders te leer, sal dit vir jou nog interessanter wees om van die Skepper te leer. Byvoorbeeld, jy wil waarskynlik antwoorde hê op vrae soos: Waarom ly ons en sterf ons dan? Is dit werklik God se voorneme vir die mens? Indien nie, waarom laat God lyding toe?
Of wetenskaplikes dit nou wil erken of nie, hulle het ontwerp by Jehovah geleer. Jy kan ook baie by ons Skepper leer. Jy kan byvoorbeeld leer hoe om ’n bestendige huwelik te geniet, hoe om kinders suksesvol groot te maak, wat God se voorneme vir die aarde is en nog baie meer wat jou lewe sinvol kan maak. Die boek Wat leer die Bybel werklik?, uitgegee deur Jehovah se Getuies, kan jou help om grootliks by God se Woord baat te vind.