1 | Gebed “Gee al julle bekommernisse oor aan God”

DIE BYBEL SÊ: “Gee al julle bekommernisse oor aan God, want hy gee om vir julle.” – 1 PETRUS 5:7.

Wat dit beteken

Jehovah God nooi ons om met hom te praat oor enige bekommernis (Psalm 55:22). Geen probleem is te groot of te klein om oor te bid nie. As dit vir ons saak maak, maak dit vir Jehovah saak. Om tot hom te bid, is ’n belangrike stap om innerlike vrede te kry. – Filippense 4:6, 7.

Hoe dit kan help

Wanneer ons sukkel met ons verstandelike gesondheid, voel ons dalk heeltemal alleen. Ander mense verstaan nie altyd presies waardeur ons gaan nie (Spreuke 14:10). Maar wanneer ons uit ons hart in gebed vir God sê hoe ons voel, sal hy altyd liefdevol na ons luister en ons verstaan. Jehovah sien ons, hy weet watter probleme en watter pyn ons ondervind, en hy wil hê dat ons tot hom moet bid oor enige iets waaroor ons bekommerd is. – 2 Kronieke 6:29, 30.

Om met Jehovah in gebed te praat, versterk ons vertroue dat hy vir ons omgee. Ons kan voel net soos die psalmskrywer wat gebid het: “U het gesien hoe ek swaarkry. U is bewus van my groot angs” (Psalm 31:7). Net om te weet dat Jehovah sien waardeur ons gaan, kan ons baie help om moeilike tye te verduur. Maar hy sien nie net die angstige tye waardeur ons gaan nie. Hy verstaan beter as enige iemand anders waardeur ons gaan, en hy help ons om vertroosting en aanmoediging in die Bybel te vind.

Hoe die Bybel help – Julian

Hoe angstigheid my affekteer

“Ek sukkel met angstigheid en obsessief-kompulsiewe steurnis (OCD). Angstigheid affekteer my op onverwagse tye. Een oomblik voel ek oukei, en die volgende oomblik voel ek sonder enige rede baie angstig. Ek word veral angstig wanneer ek tussen ander mense is. Ek is verskriklik bekommerd oor wat hulle van my dink.

“My vriende wat weet van my angstigheid, doen hulle bes om my te help. Ek moet erken dat die dinge wat hulle sê partykeer nie is wat ek wil hoor nie. Maar ek is dankbaar dat hulle my probeer help.

“Partykeer maak my angstigheid en OCD dit vir my moeilik om te bid. Ek moet baie hard probeer om te konsentreer en met Jehovah in gebed te praat. Ek kan nie baie lank aan een ding dink nie – die meeste van die tyd beweeg my gedagtes so vinnig dat ek nie kan bybly nie. Wanneer ek nie my gedagtes kan beheer nie, is dit moeilik om vir Jehovah te verduidelik wat ek dink en hoe ek voel.”

Hoe die Bybel my help

“Ek het uit my studie van die Bybel geleer dat gebede nie lank of vol mooi woorde hoef te wees om vir God aanvaarbaar te wees nie. Soms wanneer ek nie kan sê hoe ek voel nie, bid ek net: ‘Jehovah, help my asseblief.’ Selfs op daardie tye voel ek dat Jehovah my verstaan en my gee wat ek op daardie oomblik nodig het. Buiten gebed het ek mediese behandeling gekry. Ek is bly om te sê dat hierdie dinge my gehelp het en dat my toestand nou baie beter is. Dit is beslis die moeite werd om my hemelse Vader vir hulp te vra en sy liefdevolle ondersteuning te ondervind.”