Wema Ŋkɔtɔ ci Ʒan Ŋwlɛ
1 Mìŋwlɛkɔ enu ɖaɖa mí so agbe nyɔ ci yí li so tɔtɔmɛ nu, eyi mìse yí kpɔ koɖo mìwo ŋkuviwo yí glo kpɔ yí gbetɔ alɔ̀ yi. 2 (Ɛɛ, wodasɛ agbe lɔ nɔ mì yí mìkpɔɛ yí ɖeɖeɛ kunu so nu, énu agbe mavɔ nyɔ lɔ nɔ mí, agbe mavɔ lɔ so Eda gbɔ yí wodasɛ nɔ mì). 3 Enyɔ ci mìkpɔ yí gbese yí mìnu nɔ mí keŋ nɔ míwo can míale ju koɖo mì ci mìle ju koɖo Eda koɖo Eviɛ Yesu Kristo. 4 Eyi mìŋwlɛkɔ enu cɛwo ɖaɖa mí keŋ nɔ eji ajɔ mì sugbɔ.
5 Enyɔ cɛ yí mìse le gbɔ yí nukɔ nɔ mí: Mawu nyi klɛnklɛn yí vinvin ɖekɛ dele mɛ o.* 6 Nɔ mìnukɔ mɔ “Mìdokɔ gbɛ koɖi,” gan yí kpɔtɔ zɔnkɔ vinvin mɛɔ, anyi mìkankɔ ŋsu yí mìdenɔkɔ agbe sɔ koɖo nyɔnɔnwi lɔ o. 7 Vɔ nɔ mìzɔnkɔ klɛnklɛn mɛ shigbe lé yiŋtɔ le klɛnklɛn mɛ nɛɔ, anyi mìdodoɔ gbɛ koɖo mìwonɔnɔwo yí Eviɛ Yesu hun klɔkɔ mìwo nuvɔnwo pleŋ swi.
8 Nɔ mìnukɔ mɔ, “Mìdeɖo nuvɔn ɔ,” anyi mìblekɔ mìwoɖekiwo yí nyɔnɔnwi lɔ dele mì mɛ o. 9 Nɔ mìnu nuvɔn ciwo yí mìwaɔ, ásɔ nuvɔn lɔwo ke mì yí aklɔ enumajɔmajɔwawawo pleŋ so mì nu, ɖo énɔnɔ gbeji yí gbewanɔ enujɔjɔɛ. 10 Nɔ mìnukɔ mɔ, “Mìdewa nuvɔn kpɔɔ,” anyi mìsɔ ɖokɔ ŋsukantɔ yí yi nyɔ dele mì mɛ o.