Apotruwo Dɔwawawo
2 Le Pantekoti xweɖuɖu jiɔ, wo pleŋ bɔ do texwe ɖeka. 2 Eyi zeɖeka vɔ, egbe ɖeka ɖyi so jeŋkwi mɛ shigbe jihɔn sɛnŋsɛnŋ ɖe yí xoxoɔ nɛ. Egbe lɔ ɖyi gban kpedo axwe ci mɛ wole. 3 Eyi wokpɔ ŋɖekawo shigbe ezoɖewo nɛ yí woma yí je wo ji ɖekaɖeka. 4 Wo pleŋ ɖɔ koɖo gbɔngbɔn kɔkɔɛ yí tɔ egbe vovovowo dodo shigbe lé gbɔngbɔn lɔ na wo do nɛ.
5 Ʒuifu ciwo yí nyi Mawu sɛntɔwo yí so eju vovovowo mɛ le xexe lɔ pleŋ mɛ le Ʒerusalɛmu hwenɔnu. 6 Eyi taɖo ci egbe lɔ ɖyiɔ, amɛwo sugbɔ kpiŋ yí va bɔ. Enu lɔ kpaca wo, ɖo mɛɖekaɖeka se yí wododoɔ yiŋtɔ gbe. 7 Le nyɔnɔnwi mɛɔ, éjiŋ nɔ wo sugbɔ yí wonu mɔ: “Míkpɔ ɖa! De Galiletɔwo yí nyi mɛ cɛwo pleŋ ciwo yí xoxoɔ nuxu ba? 8 Lé ewɛ yí mɛɖekaɖeka le mì mɛ seseɛ yiŋtɔ gbeɔ? 9 Amɛwo le mì mɛ yí so Partia, Mɛdi, Elamu, Mezopotami, Ʒude, Kapadɔsi, Pɔn, Azi kan mɛ, 10 Friʒi koɖo Panfili, Eʒipti koɖo Libi ju ci yí gogo Sirɛnu mɛ. Amɛwo so Rɔma hɛnnɛ, mɛɖewo nyi Ʒuifuwo yí ɖowo nyi mɛ ciwo yí trɔ ji mɛ yí vanyi Ʒuifuwo. 11 Mɛɖewo so Krɛti koɖo Arabi hɛnnɛ. Mìse yí woxoxoɔ nuxu so enujiŋ Mawu tɔwo nu do mìwoŋtɔwo gbewo mɛ.” 12 Ɛɛ, ékpaca wo pleŋ yí wocaka. Wobiɔbiɔ wowonɔnɔwo se mɔ: “Nyi yí nyi enu lɔ yí jɔkɔ teŋ ɔ?” 13 Gan mɛbuwo kokoɔ wo yí nukɔ mɔ: “Aha* wonu mu.”
14 Vɔ Piɛ so je te koɖo Amɛ Wiɖeka lɔwo yí do axwa yí nu nɔ wo mɔ: “Ʒude ŋsuwo koɖo mɛ ciwo pleŋ yí le Ʒerusalɛmu, enyɔ cɛ le nɔ nyanya mɛ nɔ mí yí míaɖo to anyi nyɔwo nywiɖe. 15 Le nyɔnɔnwi mɛɔ, denyi aha wonu shigbe lé míbuikɔ do nɛ o, ɖo nyidin gashiɖekɛ han* yí xoxoɔ yɛ. 16 Vɔ enyɔ ci wonu ɖɛ to enyɔnuɖɛtɔ Ʒoɛli ji yí jɔkɔ. Énu mɔ: 17 ‘Mawu mɔ, “Le ŋkeke vɔvɔɛ lɔwo mɛɔ, naku anyi gbɔngbɔn kɔ do agbetɔ hamɛhamɛwo pleŋ ji. Eyi míwo vi ŋsuviwo koɖo míwo vi nyɔnuviwo anu nyɔ ɖɛ. Ðajɛvi míwotɔwo akpɔ ŋtegannuwo yí mɛgan shinshin míwotɔwo aku drɔwo. 18 Le ŋkeke ŋtɔ́wo mɛɔ, nakɔ anyi gbɔngbɔn kpaxwe ɖe do anyi dɔwavi ŋsuwo koɖo anyi dɔwavi nyɔnuwo ji ŋtɔkpu yí woanu nyɔ ɖɛ. 19 Nawɛ yí enujiŋ ganganwo aze le jeŋkwi mɛ koɖo nyigban ji. Ehun koɖo ezo ali yí azɔ abla. 20 Ewe ado vinvin yí wleci atrɔ ehun gbɔxwe Yehowa* ŋkeke gangan ci yí nyi ŋkeke vevi lɔ ava. 21 Eyi mɛɖekpokpui ci yí ayɔ Yehowa* ŋkɔɔ, woahwlin gan.”’
22 “Izraɛliviwo, míɖo to ase nyɔ cɛwo: Mawu dasɛ nɔ mí gbajɛɛ mɔ eye yí dɔ Yesu Nazarɛtitɔ lɔ ɖaɖa ci eto ji yí wa ŋsɛndɔwo, enujiŋ hamɛhamɛwo le mí mɛ shigbe lé hanci ele nyanya mɛ nɔ mí nɛ. 23 Ŋsu cɛɔ, mísɔ do alɔ̀ mɛ nɔ mɛ ciwo yí danɔ le ese ji yí wokin do aci nu yí sɔ wu. Ejɔ ahan sɔgbe koɖo toto ci Mawu wa koɖo ŋci yí le nyanya mɛ ni ɖɛ. 24 Vɔ Mawu fuin do agbe ci ehwlin ti le eku* mɛ, ɖo eku detɛnŋ kpe ji yí li ɖɛ o. 25 Davidi nu so nu mɔ: ‘Ŋsɔ Yehowa* ɖo ŋkɔ nɔ nyɛɖeki* tɛgbɛɛ yí ci ele ɖushi mɛ nɔŋ ɔ, ŋdahunhun kpɔ o. 26 Ecɛ yí dɔ taɖo anyi ji kpɔkɔ jijɔ yí ŋxokɔ nuxu koɖo jijɔ manumanu, eyi nakpɔtɔ* ale emɔ kpɔkɔ. 27 Ðo dàgbeŋ ɖɛ* do Yɔdu* mɛ o, dàlɔn yí mɛ ci yí le gbeji nɔ eo anyinyɔ o. 28 Èdasɛ agbe mɔwo nɔŋ, àna yí nakpɔ jijɔ sugbɔ le ŋmɛ nɔ eo.’
29 “Nɔviwo, maxo nuxu nɔ mí faa so mìwo tɔgbi Davidi nu, mɛ ci yí ku yí woɖyi yí yɔdu yitɔ kpɔtɔ le mì gbɔ keke vaje egbɛ. 30 Ci enyi enyɔnuɖɛtɔ yí nya mɔ Mawu ɖo gbe nɔ ye yí ta nu yí sɔ ɖo kpe yi ji mɔ yeasɔ ye viviye ɖeka asɔ ɖo ye fyɔʒinkpin jiɔ, 31 ékpɔ fɔnfɔnsoku Kristo tɔ doŋkɔ yí xo nuxu so nu mɔ wodegbi ɖɛ do Yɔdu* mɛ o yí yi lankpu can denyinyɔ o.* 32 Mawu fɔn Yesu cɛ do agbe yí mì pleŋ kpɔ tɔxu. 33 Eyi taɖo ci wona kɔkɔ yi yí evayi le ɖushi mɛ nɔ Mawu yí xɔ gbɔngbɔn kɔkɔɛ ci gbe woɖo so Eda gbɔɔ, ékɔɛ do mì ji shigbe lé míkpɔkpɔɛ yí sisiɛ yɛ nɛ. 34 Davidi deyi jeŋkwi mɛ o, vɔ yiŋtɔ nu mɔ: ‘Yehowa* nu nɔ anyi Xwetɔ mɔ: “Nɔ nyinɔnɔ do anyi ɖushi mɛ 35 keke je hwenu yí nasɔ ao ketɔnɔwo wa afɔɖojinu nɔ eo.”’ 36 Eyi taɖo Izraɛli xwe lɔ pleŋ le nya nywiɖe mɔ, Mawu sɔ Yesu cɛ ci míkan do aci nu sɔ ɖo Axwetɔ koɖo Kristo.”
37 Ci wose enyɔ cɛɔ, éɖo lanmɛ nɔ wo, eyi wobiɔ Piɛ koɖo apotru kpɛtɛwo se mɔ: “Nɔviwo, nyi mìɖo awaɔ?” 38 Piɛ nu nɔ wo mɔ: “Mítrɔ ji mɛ, eyi mɛɖekamɛɖeka awa ʒinʒindoshimɛ le Yesu Kristo ŋkɔ mɛ keŋ nɔ woasɔ míwo nuvɔnwo ke mí yí míaxɔ gbɔngbɔn kɔkɔɛ nunana lɔ gbali. 39 Ðo míwo koɖo míwo viwo koɖo mɛ ciwo pleŋ yí le jinjintɔxuwo sɔ kpe nɔ mɛ ciwo pleŋ yí Yehowa* mìwo Mawu adɔn va yiɖeki gbɔ tɔ yí gbeɖu lɔ nyi.” 40 Eyi egbenu enyɔ sugbɔ buwo yí sɔ ɖe kunu nɔ wo kitokito yí kpɔtɔ kplakpla nu wo mɔ: “Mína nɔ woahwlɛn mí gan le jijimɛ nyinashu cɛ mɛ.” 41 Eyi taɖo mɛ ciwo yí sɔ jijɔ xɔ yi nyɔ lɔ wa ʒinʒindoshimɛ yí amɛ* 3 000 han vagɔn nɔ wo gbenɔgbe lɔ. 42 Wokpɔtɔ kplakpla nu so apotru lɔwo gbɔ. Wowanɔ nuwo doju* yí ɖunɔ nu doju yí gbedonɔ gbe ɖaɖa doju.
43 Le nyɔnɔnwi mɛɔ, apotru lɔwo wa enujiŋ hamɛhamɛ sugbɔwo. Eyi mɛshiamɛ* tɔ vɔnvɔn. 44 Mɛ ciwo pleŋ yí vatrɔ xɔsetɔwo le ju yí makɔ enushianu ci yí le wo shi koɖo wowonɔnɔwo. 45 Wosanɔ wowo nyigbanwo koɖo wowo nuwo yí sɔ eho lɔ manɔ nɔ wo pleŋ sɔgbe koɖo eʒan mɛɖekamɛɖeka tɔ. 46 Gbeɖeka duuɔ, wobɔnɔ do gbedoxɔ lɔ mɛ yí ɖo susu ŋmɛ ɖekɛ. Woɖunɔ nu le axwe vovovowo mɛ yí sɔ jijɔ gangan manɔ wowo ŋɖuɖuwo koɖo wowonɔnɔwo faa. 47 Wokanfukɔ Mawu yí wowo nu jɔkɔ ji nɔ jukɔn lɔ pleŋ. Le gaxoxo ɖekɛ lɔ mɛɔ, Yehowa* kpɔtɔ kplɔkplɔ mɛ ciwo ehwlɛnhwlɛn gan vɛ yí sɔ tata nɔ wo gbeɖeka duu.