Apotruwo Dɔwawawo
15 Ecɛyɛɔ, ŋsu ɖekawo so Ʒude yí va yí tɔ enu kplakpla nɔvi lɔwo mɔ: “Nɔ wodeso evo nɔ mí shigbe le Moizi se lɔ nui nɛɔ, mídatɛnŋ akpɔ hwlɛngan o.” 2 Vɔ ecɛ hɛn enugɔnmɛmase va gblamɛ nɔ mɛ lɔwo koɖo Pɔlu koɖo Barnabasi yí wodɔn nyɔ koɖo wo veviɖe. Eyi enukplavi lɔwo wa toto keŋ nɔ Pɔlu koɖo Barnabasi sɔ kpe nɔ mɛɖewo le mɛ lɔwo mɛ ayi apotruwo koɖo hamɛmɛshinshinwo gbɔ le Ʒerusalɛmu nɔ woale nyɔ lɔ kpɔ.
3 Hamɛ lɔ ɖe afɔnu ti nɔ wo hwɛɖeka. Eyi woyi emɔzɔnzɔn lɔ ji yí to to Fenisi koɖo Samari yí dre lé jukɔn bu mɛ tɔwo trɔ ji mɛ do nɔ nɔvi lɔwo hlɛnhlɛnhlɛn yí eji gangan ɖeka jɔ wo pleŋ. 4 Ci wovaɖo Ʒerusalɛmu ɔ, hamɛ lɔ koɖo apotruwo sɔ kpe nɔ hamɛmɛshinshinwo wa ɖaŋ xɔ wo nywiɖe yí wonu enu sugbɔ ciwo Mawu wa to wo ji nyɔ nɔ wo. 5 Vɔ mɛ ciwo yí le Farizitɔwo sɛnsɛn mɛ sa yí vatrɔ xɔsetɔ ɖewo so je te yí nu mɔ: “Ele dandan mɛ mɔ woaso vo nɔ wo yí anu nɔ wo mɔ woɖo awanɔ do Moizi Se lɔ ji.”
6 Eyi na taɖo apotru lɔwo koɖo hamɛmɛshinshinwo bɔ keŋ ale enyɔ cɛ kpɔ. 7 Ci wole nyɔ lɔ kpɔ sɛnŋsɛnŋɖe* na nɔ hwenu jinjinɖe goduɔ, Piɛ so je te yí nu nɔ wo mɔ: “Nɔviwo, mínya nywiɖe mɔ le tɔtɔmɛɔ, enyɛ yí Mawu can le mí mɛ mɔ manu eŋɛnywi lɔ nɔ jukɔn bu mɛ tɔwo nɔ woasi keŋ axɔ se. 8 Eyi Mawu ci yí nyanɔ enu ci yí le ji mɛ nɔ agbetɔ na gbɔngbɔn kɔkɔɛ wo shigbe lé ena mìwo can nɛ yí sɔ dasɛ mɔ yexɔ wo. 9 Eyi dedo vovototo ɖekɛ gblamɛ nɔ wowo koɖo mìwo o, vɔ éna yí eji mɛ kɔ nɔ wo to xɔse ci woɖo ji. 10 Ecɛyɛ ɖe, nyi yí taɖo mísɔ agban ci mìwo koɖo mìwo tɔgbiwo detɛnŋ hɛn dada do enukplavi lɔwo ji yí sɔ dodoɔ Mawu kpɔɔ? 11 Vɔ mìxɔɛ se mɔ xomɛvu gangan Axwetɔ Yesu tɔ ji woto yí hwlɛn mì gan shigbe lé wohwlɛn wowo can gan nɛ.”
12 Ci wose ahan ɔ, eɖa ɖo nɔ wo pleŋ ci yí bɔ do nɔ. Eyi Barnabasi koɖo Pɔlu nu enujiŋ hamɛhamɛ sugbɔ ciwo yí Mawu wa to wo ji nɔ jukɔn bu mɛ tɔwo nɔ wo yí woɖo to yí si. 13 Ci woxo nuxu ɖegbɔɔ, Ʒaki nu mɔ: “Nɔviwo, míɖo toŋ. 14 Shigbe lé mìsi yɛ nɛɔ, Simeɔn dre lé Mawu trɔ susu ɖaɖa jukɔn bu mɛ tɔwo gbɔ do yí tɔ amɛwo cancan le wo mɛ nɔ yi ŋkɔ. 15 Ecɛ sɔgbe koɖo enyɔ ciwo Enyɔnuɖɛtɔwo nu, ɖo woŋwlɛ ɖɛ mɔ: 16 ‘Le enu cɛwo goduɔ, natrɔ va yí atrɔ afɔn Davidi zava* ci yí mu lɔ do te. Nadra finiwo yí dahɛn ni do yí atrɔ acui 17 keŋ nɔ mɛ ciwo yí kpɔtɔ sɔ kpe nɔ mɛ ciwo yí so jukɔnwo pleŋ mɛ, ciwo nu ŋyɔ anyi ŋkɔ do abɔ aji Yehowa* kpɔ veviɖe. Yehowa,* yí nu ahan. Eyɛ yí wakɔ enu cɛwo 18 yí ele nyanya mɛ ni so gbeɖegbe ɖii mɔ yeawa wo.’ 19 Eyi taɖo anyi susu yí nyi mɔ mìdado aya nɔ jukɔn bu mɛ tɔ ciwo yí tɔ Mawu sɛnsɛn o. 20 Vɔ mìaŋwlɛ nu ɖaɖa wo mɔ wo le gbe enu ciwo yí ca ka koɖo voju sɛnsɛn yí agbe mateliwawa,* elan ci wobɔ hlo nɔ* koɖo ehun. 21 So tɔgbiwo hwenu ɖiiɔ, amɛwo li yí ɖenɔ kunu so enu ciwo yí Moizi ŋwlɛ nu le eju ɖekaɖeka mɛ, ɖo le sabatigbe ɖeka duuɔ, wokɔ gbe yi ji yí hlɛnnɔ enu cɛwo le Ʒuifuwo nukplaxuwo.”
22 Eyi apotru lɔwo koɖo hamɛmɛshinshinwo sɔ kpe nɔ hamɛ lɔ pleŋ sɔ gbeta mɔ yewoacan ŋsu ɖewo le yewo mɛ keŋ adɔ wowo koɖo Pɔlu koɖo Barnabasi ɖaɖa Antiɔshi. Wocan Ʒudasi ci wogbeyɔnɔ mɔ Barsabasi sɔ kpe nɔ Silasi. Ŋsu cɛwo nyi amɛ ŋkuvilejiwo le nɔviwo mɛ. 23 Enyɔ ciwo woŋwlɛ yí sɔ nɔ wo ke:
“Apotruwo koɖo hamɛmɛshinshin ciwo yí nyi míwo nɔviwo yí ŋwlɛkɔ enyɔ cɛwo ɖaɖa míwo ciwo yí nyi nɔvi yí nyi jukɔn bu mɛ tɔwo yí le Antiɔshi, Siri koɖo Silisi. Mìdo gbe nɔ mí! 24 Mìse mɔ mɛɖewo so mì mɛ yí vanu nyɔ ɖewo yí sɔ caka mí yí teteɛkpɔ mɔ yewoasɔ mí* bu mɔ, vɔ kpɔ denyi mìwo yí nu nyɔ ɖe nɔ wo mɔ wo le nu nɔ mí o. 25 Mì pleŋ sɔ gbe ɖo ju yí can ŋsu ɖewo yí dɔ wo koɖo Barnabasi koɖo Pɔlu ciwo mìlɔn veviɖe ɖaɖa mí. 26 Ŋsu cɛwo koɖo ve sɔ wowo gbewo* na do ta nɔ mìwo Xwetɔ Yesu Kristo ŋkɔ lɔ. 27 Taɖo, mìdɔ Ʒudasi koɖo Silasi ɖaɖa nɔ wowo can anu enyɔ ɖekɛ lɔwo ciwo wose so mì gbɔ nɔ mí. 28 Ðo gbɔngbɔn kɔkɔɛ lɔ koɖo mìwoŋtɔwo deji mɔ mìasɔ agban bu ɖe da do mí ji sɔ zeto vevitɔ cɛwo nu o: 29 Mígbe enu ciwo wosɔ sa vɔn nɔ vojuwo, ehun, elan ci wobɔ ehlo nɔ* koɖo mateliwawa.* Nɔ míkpɔtɔ yí gbekɔ enu cɛwo gbijigbijiɔ, enuwo anyɔ nɔ mí. Éwa ahan!”
30 Ci ŋsu cɛwo so yí vaɖo Antiɔshi ɔ, wobɔ enukplavi lɔwo doju yí sɔ wema lɔ nɔ wo. 31 Ci wohlɛn wema lɔɔ, édo ŋsɛn wo yí eji jɔ wo. 32 Ci Ʒudasi koɖo Silasi can nyi enyɔnuɖɛtɔwoɔ, woxo nuxu sugbɔ nɔ nɔvi lɔwo yí sɔ do ŋsɛn wo. 33 Wonɔ hunnɔ hwɛɖeka; yi goduɔ, nɔvi lɔwo yi ɖo wo do mɔ ji le fafa mɛ yí wotrɔ yi mɛ ciwo yí dɔ wo ɖaɖa gbɔ. 34* —— 35 Vɔ Pɔlu koɖo Barnabasi ci Antiɔshi. Wowo koɖo amɛ sugbɔ buwo kplakpla nu amɛwo yí dradra eŋɛnywi ci yí kuso Yehowa* nyɔ lɔ nu.
36 Le azan ɖewo goduɔ, Pɔlu nu nɔ Barnabasi mɔ: “Ecɛyɛɔ, mìatrɔ ayi* ji nɔviwo kpɔ le eju ciwo pleŋ mɛ mìdra Yehowa* nyɔ lɔ le keŋ akpɔ mɔ lé wole do ma.” 37 Barnabasi yɛɖui koŋ mɔ Ʒan ci wogbeyɔnɔ mɔ Maki akplɔ yewo do. 38 Vɔ Pɔlu yɛdeji mɔ yɛayi koɖo yewo o, ɖo éso gbeɖe wo ɖɛ le Panfili sa yí degbeyi edɔ lɔ ji koɖo wo o. 39 Ecɛ na yí wodo dɔmɛzi do wowonɔnɔwo sugbɔ yí ma mɔ. Barnabasi kplɔ Maki yí woɖo tɔjihun yi Shipru. 40 Pɔlu yɛkplɔ Silasi yí ci nɔvi lɔwo do gbe ɖaɖa yí biɔ mɔ xomɛvu gangan Yehowa* tɔ le nɔ koɖi ɖegbɔɔ, éje emɔ. 41 Pɔlu yi Siri koɖo Silisi yí dokɔ ŋsɛn hamɛwo.