Wema Amɛvetɔ ci Woŋwlɛ Ðaɖa Timɔte
1 Enyɛ Pɔlu, ŋnyi apotru Kristo Yesu tɔ to edro Mawu tɔ ji sɔgbe koɖo egbe ci woɖo mɔ woakpɔ agbe to Kristo Yesu ji. 2 Enyɛ yí ŋwlɛkɔ wema cɛ ɖaɖa Timɔte anyi vi vevi:
Mawu Eda koɖo Kristo Yesu mìwo Xwetɔ le wa xomɛvu gangan nɔ eo yí aku ŋshishi nɔ eo yí agbena fafa eo.
3 Ŋdokɔ akpe nɔ Mawu ci yí ŋsɔ ayexa mɛmi wakɔ sɛnsɛndɔ kɔkɔɛ nɔ shigbe lé tɔgbinyɛwo wɛ do nɛ. Ŋdemi eŋwi ɖoɖo eo gbeɖe le anyi kwifan ciwo ŋwanɔ ezan koɖo kede mɛ o. 4 Ci ŋɖoɖoɔ ŋwi ao ɖashiwo kpɔɔ, édrodroɔŋ veviɖe mɔ makpɔ eo keŋ nɔ eji ajɔŋ sugbɔ. 5 Ðo ŋɖonɔ ŋwi ao xɔse ci mɛ yí amɛbleble dele o. Mamao Loisi koɖo enɔo Enisi yí ɖo xɔse cɛ hanci doŋkɔ yí ŋkando ji mɔ eyi lɔ ke yí eo can èɖo.
6 Eyi dɔ taɖo ŋɖoɖoɔ ŋwi nɔ eo mɔ, eo le wɛ nɔ Mawu nunana ci èxɔ hwenu ŋsɔ anyi lɔ̀wo da do eo ji akpɔtɔ ajejeɛ le eo mɛ shigbe ezo nɛ. 7 Ðo denyi vɔnvɔn gbɔngbɔn yí Mawu na mì o, vɔ ŋsɛn koɖo lɔnlɔn koɖo susu nywi gbɔngbɔn yí ena mì. 8 Eyi taɖo kunuɖeɖe so mìwo Xwetɔ alo nuxuxoxo so enyɛ ci yí le gakpa mɛ do eyɛ ŋci nu ŋgbewa ŋkpɛn nɔ eo o, vɔ kando Mawu ŋsɛn ji yí alɔn keŋ akpe fun do ta nɔ eŋɛnywi lɔ. 9 Éhwlɛn mì gan yí yɔ mì nɔ mìanyi yi mɛkɔkɔɛwo yí denyi edɔ ciwo mìwa nu ekpɔ do o, vɔ enu ci edrɔ do te mɔ yeawa koɖo xomɛvu gangan yitɔ yí dɔ. Éwa xomɛvu gangan cɛ nɔ mì to Kristo Yesu ji gbeɖegbe ɖii. 10 Vɔ ecɛyɛɔ, évaze petii ci wodasɛ mìwo Hwlɛngantɔ Kristo Yesu, mɛ ci yí gu eke nɔ eku yí to eŋɛnywi lɔ ji yí na klɛnklɛn kɔ do agbe koɖo lankpu ci yí dedanahɛn ji. 11 Eŋɛnywi cɛ yí wosɔŋ nɔ yí ŋnyi eŋɛnywidratɔ, apotru koɖo enukplamɛtɔ.
12 Eyi dɔ taɖo ŋkpekpeɛ fun cɛwo hɛnnɛ, vɔ ŋkpɛn dewawaŋ o, ɖo ŋjeshi Mɛ ci ji ŋxɔ se yí ŋkando ji mɔ enu ci ŋsɔ ɖo gbɔ ɖɛɔ, ásun ji akpɔkpɔ ji keke aje azan ŋtɔ́ gbe. 13 Kpɔ̀tɔ awawa do enyɔ adodwi* ciwo èse le ŋgbɔ ji yí akpɔtɔ adadasɛ mɔ yeɖo xɔse koɖo lɔnlɔn le Kristo Yesu mɛ. 14 Lè bu nɔ enuvevi cɛ ci wosɔ do alɔ̀ mɛ nɔ eo to gbɔngbɔn kɔkɔɛ ci yí le mì mɛ ji.
15 Ènya mɔ mɛ ciwo pleŋ yí le Azi kan lɔ mɛ trɔ le godu nɔŋ, Fiʒeli koɖo Hɛmoʒeni can le wo mɛ. 16 Axwetɔ lɔ le ku ŋshishi nɔ Onezifɔ xwemɛtɔwo, ɖo éfa akɔn nɔŋ zenɛniɖe yí ci ŋle gakpa mɛ yí wodo awlɛgawoŋ can ɔ, anyi nu dewa ŋkpɛn ni o. 17 Éwaɖeɔ, éjiŋ kpɔ veviɖe keke yí kpɔŋ ci eva Rɔma. 18 Axwetɔ lɔ le wɛ nɔ Yehowa* aku ŋshishi ni le ŋkeke ŋtɔ́ ji. Eyi ènya enu ciwo pleŋ ewa le Efezi nywiɖe.