Apotruwo Dɔwawawo
5 Ŋsu ɖeka ci yí tɔ mɔ Ananiasi koɖo ashiɛ Safira sa wowo nyigban ɖeka. 2 Vɔ ŋsu lɔ sɔ le eho lɔ nu yí sɔ wla, ashiɛ can nya, eyi esɔ kpɛtɛ vɛ nɔ apotru lɔwo. 3 Piɛ biɔɛ se mɔ: “Ananiasi, nyi yí na taɖo ètashi eoɖeki ɖɛ yí Satana do eo domɛ yí èkan ŋsu nɔ gbɔngbɔn kɔkɔɛ yí sɔ le nyigban ho lɔ nu yí sɔ wlaɔ? 4 Gbɔxwe àsa nyigban lɔ ɖe, de tɔo enyi ba? Ci èvasɛ can ɖe, eho lɔ dekpɔtɔ nyi aotɔ ba? Nyi yí taɖo èdrɔ ŋcɛ le ao ji mɛɔ? Denyi agbetɔwo yí èkan ŋsu nɔ o, vɔ Mawu yí èkan ŋsu nɔ.” 5 Ci Ananiasi se nyɔ cɛwoɔ, éjuin yí ku yí vɔnvɔn gangan ɖeka lé mɛ ciwo pleŋ yí se ŋci yí jɔ lɔ. 6 Eyi ɖajɛviwo so yí blɛ do avɔn mɛ yí kɔɛ ti yí sɔ yi ɖyi.
7 Ci ewa gaxoxo amɛtɔn han ɔ, ashiɛ vaɖo, vɔ dese enu ci yí jɔ do asuɔ ji o. 8 Piɛ nu ni mɔ: “Mabiɔ eo se lo, eho cɛ yí eo koɖo asuo sa nyigban lɔa?” Éɖo ŋci mɔ: “Ɛɛ, eyi yɔ.” 9 Eyi Piɛ nu ni mɔ: “Nyi yí taɖo míwo koɖo ve lɔ sɔ gbe ɖo ju mɔ yewoate Yehowa* gbɔngbɔn lɔ kpɔɔ? Kpɔ ɖa! Mɛ ciwo yí ɖyi asuo nɛ le ehɔn lɔ ji, woakɔ eo can ti hɛnnɛ.” 10 Zeɖeka tɔntɔn ɔ, éjuin le ŋmɛ nɔ Piɛ yí ku. Ci ɖajɛvi lɔwo vaɖoɔ, wokpɔ mɔ yɛku, eyi wokɔɛ vayi ɖyi do axa nɔ asuɔ. 11 Eyi vɔnvɔn gangan ɖeka ɖo hamɛ lɔ pleŋ koɖo mɛ ciwo pleŋ yí se ŋciwo yí jɔ.
12 Gbesɔ kpe niɔ, apotru lɔwo kpɔtɔ wakɔ enujiŋ gangan hamɛhamɛwo le amɛwo mɛ. Eyi wo pleŋ bɔnɔ doju le Salomɔ Kpatɛ mɛ. 13 Le nyɔnɔnwi mɛɔ, mɛbuwo degbe dɔn yí bɔdo wo nu o, gan amɛwo kanfukɔ wo. 14 Gbesɔwu hunnɔɔ, amɛwo xɔkɔ Axwetɔ lɔ ji se yí vatata nɔ wo. Ŋsu koɖo nyɔnuwo sugbɔ kpiŋ. 15 Wokɔ dɔ̀nɔwo va da do mɔganwo ji ŋtɔkpu yí sɔ wo mlɔ ebawo ji keŋ nɔ Piɛ vayikɔɔ, kpɔli yitɔ akɔ do wo ji nɔ edɔ̀ ami nɔ wo. 16 Amɛ sugbɔ ɖekawo sonɔ eju ciwo yí trɔdo Ʒerusalɛmu mɛ yí vanɔ hɛnnɛ. Wokɔnɔ dɔ̀nɔwo koɖo mɛ ciwo gbɔngbɔn makɔmakɔwo dokɔ aya nɔ vɛ yí wodanɔ edɔ̀ nɔ wo pleŋ.
17 Vɔ avɔnsatɔ gangantɔ koɖo mɛ ciwo pleŋ yí le koɖi ciwo yí nyi Sadusitɔwo sɛnsɛn mɛ tɔwo ɖɔ koɖo ŋhwan. Woso 18 yí lé apotru lɔwo yí sɔ wo cu do jugan lɔ gakpa mɛ. 19 Vɔ le zanmɛɔ, Yehowa* dɔla va hun gakpa lɔ hɔnwo yí kplɔ wo ti. Énu nɔ wo mɔ: 20 “Míso yi gbedoxɔ lɔ mɛ keŋ akpɔtɔ anunuɔ agbe ci yí gbɔgbɔ nyɔwo pleŋ nɔ amɛwo.” 21 Ci wose nyɔ cɛɔ, woyi gbedoxɔ lɔ mɛ nyidin fɔnfɔnmɛ yí tɔ enu kplakpla amɛwo.
Ecɛyɛɔ, avɔnsatɔ gangantɔ lɔ sɔ kpe nɔ mɛ ciwo yí le koɖi va yí yɔ Sanhedrɛn lɔ koɖo Izraɛliviwo gawo pleŋ bɔ yí ɖo sɔjawo ɖaɖa gakpa lɔ mɛ nɔ woakplɔ apotru lɔwo va ŋkɔ nɔ wo. 22 Vɔ ci sɔja lɔwo yiɔ, wodegbekpɔ wo le gakpa lɔ mɛ o, eyi wotrɔ gbɔ yí va ɖo gbe nɔ wo. 23 Womɔ: “Mìkpɔ gakpa lɔ le cucu nywiɖe yí gakpacɔtɔwo le te le ehɔn lɔwo ji, vɔ ci mìhuin ɔ, mìdekpɔ mɛɖe le mɛ o.” 24 Ci mɛ ci yí kpa nɔ gbedoxɔ lɔ jikpɔtɔwo koɖo avɔnsatɔwo gawo se nyɔ cɛwoɔ, wodan ta nɔ wowoɖekiwo yí wodenya ŋci yí jikɔ ajɔ o. 25 Vɔ mɛɖeka va nu nɔ wo mɔ: “Ŋsu ciwo mílé do gakpa mɛ vayi le gbedoxɔ lɔ mɛ yí kplakpla nu amɛwo.” 26 Eyi mɛ ci yí kpa nɔ gbedoxɔ lɔ jikpɔtɔwo koɖo yi sɔjawo yi kplɔ wo vɛ, vɔ wodedo gbla koɖo wo o, ɖo wovɔnvɔn mɔ amɛwo avaxo kpe yewo.
27 Wokplɔ wo va ŋkɔ nɔ Sanhedrɛn lɔ, eyi avɔnsatɔ gangantɔ lɔ biɔ enyɔwo wo se. 28 Énu mɔ: “Mìdexa gbe nɔ mí mɔ míwo ŋgbezan ŋkɔ cɛ asɔ kpla nu amɛwo ba? Vɔ míwɛ keke míwo nukplakpla gban kpedo Ʒerusalɛmu yí jijiɛ mɔ ŋsu cɛ ku le nɔ kɔ nɔ mì.” 29 Piɛ koɖo apotru kpɛtɛwo nu do nu mɔ: “Mìɖo ase tonu nɔ Mawu ci yí nyi acɛkpatɔ sɔwu agbetɔwo. 30 Mìwo tɔgbiwo Mawu fɔn Yesu do agbe, eyɛ ci míkan do aci nu yí sɔ wu. 31 Mawu na kɔkɔ Amɛkplɔtɔ Vevitɔ koɖo Hwlɛngantɔ lɔ yí sɔ da do yi ɖushi mɛ keŋ nɔ Izraɛliviwo atrɔ ji mɛ nɔ woasɔ wowo nuvɔnwo ke wo. 32 Eyi mìkpɔ ŋcɛwo tɔxu yí gbɔngbɔn kɔkɔɛ ci Mawu na mɛ ciwo yí senɔ tonu ni can kpedo mì nu mìɖo kpe yi ji.”
33 Ci wose nyɔ cɛɔ, wodo dɔmɛzi sugbɔ* yí ji mɔ yewoawu wo. 34 Vɔ Farizitɔ ɖeka tɔ mɔ Gamaliɛli. Ékplanɔ Ese lɔ amɛwo yí amɛwo pleŋ buini. Éso je te le Sanhedrɛn lɔ mɛ yí ɖe gbe mɔ wo le kplɔ ŋsu lɔwo ti hwɛɖeka. 35 Eyi enu nɔ wo mɔ: “Izraɛli ŋsuwo, míkpɔ nywiɖe nɔ ŋci mídrɔdrɔ mɔ yewoawa koɖo ŋsu cɛwo. 36 Le kpɔwɛ mɛ, doŋkɔ nɔ ŋkeke cɛwoɔ, Tedasi va yí nunuɔ mɔ yenyi mɛɖeka yí ŋsu sugbɔ ciwo yí ayi 400 han kplɔɛ do, vɔ wowui yí mɛ ciwo pleŋ yí kplɔɛ do gban hlɛn yí evɔ do nɔ. 37 Le yɛ goduɔ, Ʒudasi ci yí so Galile va hwenu woŋwlɛŋwlɛ ŋkɔ nɔ amɛwo le eju lɔ mɛ. Éwɛ keke yí amɛwo kplɔɛ do. Ŋsu cɛ can ku yí mɛ ciwo pleŋ yí kplɔɛ do gban hlɛn. 38 Eyi taɖo, sɔgbe koɖo lé enuwo le do yɛɔ, ŋnukɔ nɔ mí mɔ míwo ŋgbedo nu ŋsu cɛwo nyɔ mɛ o, vɔ mítashi wo. Ðo nɔ enyi agbetɔwo gbɔ yí toto cɛ alo edɔ cɛ soɔ, ádahɛn. 39 Vɔ nɔ enyi Mawu gbɔ esoɔ, mídatɛnŋ adahɛn yi o. Nɔ denyi ahan ɔ, avale shigbe mɔ míwakɔ vu koɖo Mawu ŋtɔ nɛ.” 40 Wose enyɔ ci enu yí kplɔ apotru lɔwo vɛ, woya wo yí do se nɔ wo mɔ, wo le mi nuxu xoxo so Yesu ŋkɔ nu yí tashi wo yí woyi.
41 Eyi woso le Sanhedrɛn lɔ ŋkɔ. Wokpɔkpɔ jijɔ mɔ, Mawu kpɔ mɔ yewonyi nu woado ŋkpɛn do Yesu ŋkɔ ŋci. 42 Gbeɖeka duuɔ, wokpɔtɔ yí kplakɔ nu amɛwo yí nukɔ eŋɛnywi ci yí kuso Kristo Yesu nu mamimami le gbedoxɔ lɔ mɛ koɖo so axomɛ yi axomɛ.