Woatrɔ Aji Amɛ Zevetɔ Gɔnmɛ Ðe?

Ðoŋci ci Bibla na

Enyɔgbe ‘woatrɔ aji mɛɖe’ gɔnmɛ yí nyi tɔtɔmɛ yoyu bu nɔ ekacaca ci yí le mɛ ci wotrɔ yí ji koɖo Mawu gblamɛ. (Ʒan 3:3, 7, NWT) Mawu sɔ mɛ ciwo wotrɔ yí ji zevetɔ wa eviɛwo. (Rɔmatɔwo 8:15, 16; Galatitɔwo 4:5; 1 Ʒan 3:1) Shigbe evi ciwo mɛbuwo xɔ yí hɛnnɔ le ese mɔnu nɛɔ, wotrɔnɔ amɛ ci wonyi sa yí vanyinɔ Mawu xomu lɔ mɛ tɔwo.—2 Korɛntitɔwo 6:18.

Nyi yí taɖo wotrɔ yí jinɔ amɛ zevetɔɔ?

Yesu nu mɔ: “Nɔ wodetrɔ yí ji mɛɖeɔ, datɛnŋ akpɔ Mawu Fyɔɖuxu lɔ o.” (Ʒan 3:3, NWT) Eyi taɖo nɔ woji mɛɖe zevetɔɔ, ádra mɛ lɔ do yí akpa cɛ koɖo Kristo le Mawu Fyɔɖuxu lɔ mɛ. Fyɔɖuxu lɔ kpakpa cɛ so jeŋkwi mɛ, eyi taɖo Bibla dre ‘jiji yoyu’ lɔ mɔ yɛnyi cinɔ ‘ci wosɔ ɖɛ do jeŋkwi mɛ.’ (1 Piɛ 1:3, 4) Mɛ ciwo woji zevetɔ ɖonɔ kankandoji mɔ “yewoaɖu fyɔ koɖo” Kristo.—2 Timɔte 2:12; 2 Korɛntitɔwo 1:21, 22.

Lé wotrɔ yí jinɔ amɛ zevetɔ doɔ?

Hwenu Yesu xokɔ nuxu so nyɔ cɛ nuɔ, émɔ mɛ ciwo wotrɔ yí jiɔ, woaji wo to “eshi koɖo gbɔngbɔn mɛ.” (Ʒan 3:5) Enyɔgbe cɛ dasɛ mɔ woaʒin wo do eshi mɛ doŋkɔ; yi goduɔ, woavaʒin wo do gbɔngbɔn kɔkɔɛ lɔ mɛ.—Edɔwawawo 1:5; 2:1-4.

Yesu yí nyi amɛ ŋkɔtɔ ci woji zevetɔ. Éwa ʒinʒindoshimɛ le Ʒurdɛn Tɔsasa mɛ; yɛ goduɔ, Mawu shi ami ni (alo ʒin do) gbɔngbɔn kɔkɔɛ lɔ mɛ. To emɔ cɛ jiɔ, wotrɔ ji Yesu zevetɔ to gbɔngbɔn kɔkɔɛ lɔ ji yí enyi Mawu vi keŋ atɛnŋ atrɔ ayi nɔ agbe le jeŋkwi mɛ. (Maki 1:9-11) Mawu fɔn Yesu so ku yí enyi gbɔngbɔn mɛ nuwawa nɔ ecɛ avamɛ.—Edɔwawawo 13:33.

Mɛbu ciwo wovaji zevetɔ lɔ can ɔ, woʒin wo do eshi mɛ gbɔxwe wovaxɔ gbɔngbɔn kɔkɔɛ lɔ.a (Edɔwawawo 2:38, 41) Woɖo emɔkpɔkpɔ ci nu kankandoji le mɔ yewoavanɔ agbe le jeŋkwi mɛ, yí ecɛ avamɛ hwenu Mawu afɔn wo so ku.—1 Korɛntitɔwo 15:42-49.

Susu masɔgbe ciwo amɛwo ɖonɔ do woatrɔ aji amɛ zevetɔ nu

Susu masɔgbe: Mɛɖe atɛnŋ asɔ gbeta mɔ wo le trɔ aji ye zevetɔ.

Nyɔnɔnwi: Emɔ hun nɔ mɛshiamɛ yí anyi xlɔ koɖo Mawu keŋ akpɔ hwlɛngan. (1 Timɔte 2:3, 4; Ʒaki 4:8) Ele ahan gan, Mawu yí sɔnɔ mɛ ciwo woatrɔ aji zevetɔ alo asɔ gbɔngbɔn kɔkɔɛ shi ami nɔ. Sɔ koɖo nyɔ ci Bibla nuɔ, “Mawu yí a can” mɛ ci woatrɔ aji zevetɔ, “dekudo enu ci agbetɔ dro a wa nu alo enu ci agbetɔ tekpɔ mɔ ye a wa nu o.” (Rɔmatɔwo 9:16) Woatɛnŋ aɖe enyɔgbe ‘woatrɔ aji mɛɖe’ gɔnmɛ mɔ “woatrɔ aji so jeŋkwi mɛ.” Ecɛ dasɛ mɔ Mawu yí can mɛ ciwo wotrɔ yí ji “so jeŋkwi mɛ.”—Ʒan 3:3, gɔnmɛnuŋwlɛŋwlɛ NWT.