Nyi Ʒerusalɛmu Yoyu Lɔ Nyiɔ?

Ðoŋci ci Bibla na

“Ʒeruzalɛmu Yoyu” nyi enyɔgbe ɖeka ci yí ze zeve le Bibla mɛ. Le kpɔwɛnyɔnunu mɛɔ, ényi jugan ci yí le dumɛ nɔ Yesu nukplaviwo gbɛbɔbɔ ɖeka ci yí akpa cɛ koɖi le jeŋkwi mɛ le Mawu Fyɔɖuxu lɔ mɛ. (Enyɔdasɛ 3:12; 21:2) Bibla dasɛ mɔ woatɛnŋ agbeyɔ gbɛbɔbɔ cɛ mɔ Kristo ashiɛ.

Enu ciwo yí adɔ mìajeshi Ʒerusalɛmu Yoyu lɔ

1. Ʒerusalɛmu Yoyu lɔ le jeŋkwi mɛ. Blaŋblaŋ nɔ Bibla axo nuxu so Ʒerusalɛmu Yoyu lɔ nuɔ, énunɔ mɔ yɛɖyi so jeŋkwi mɛ yí Mawudɔlawo cɔcɔ jugan lɔ gbowo. (Enyɔdasɛ 3:12; 21:2, 10, 12) Gbesɔ kpe niɔ, lé jugan lɔ gangan sugbɔ do dasɛ mɔ datɛnŋ anɔ nyigban ji o. Jugan lɔ jinjinjinmɛ koɖo yi kekemɛ nyi enuɖekɛ. Eyi nyi “12000 stades,” alo “kpeci 2220” trɔdo.a (Enyɔdasɛ 21:16; NWT) Édasɛ mɔ éyi ji kpeci 560 han le hahamɛ kpanŋkpanŋ.

2. Ʒerusalɛmu Yoyu lɔ nyi Yesu dokplɔtɔwo gbɛbɔbɔ ɖeka ci yí nyi Kristo ashiɛ. Woyɔ Ʒerusalɛmu Yoyu lɔ mɔ “nyɔnu ci yí nyi Lɛngbɔvi lɔ ashiɛ.” (Enyɔdasɛ 21:9, 10) Le kpɔwɛnyɔnunu cɛ mɛɔ, Lɛngbɔvi lɔ le dumɛ nɔ Yesu Kristo. (Ʒan 1:29; Enyɔdasɛ 5:12) “Lɛngbɔvi lɔ ashiɛ,” ci yí nyi Kristo ashiɛ le dumɛ nɔ Kristotɔ ciwo yí ayi nɔ ju koɖo Yesu le jenkwi mɛ. Bibla sɔ ekacaca ci yí le gblamɛ nɔ Yesu koɖo Kristotɔ cɛwo sɔ koɖo ekacaca ci yí nɔnɔ gblamɛ nɔ asu koɖo ashi. (2 Korɛntitɔwo 11:2; Efezitɔwo 5:23-25) Gbesɔ kpe niɔ, woŋwlɛ “Lɛngbɔvi lɔ mɛdɔdɔ 12 lɔwo ŋkɔwo” do ekpe ciwo wosɔ ɖo gɔnmɛɖokpe nɔ Ʒerusalɛmu Yoyu lɔ ji.” (Enyɔdasɛ 21:14) Numɛɖeɖe cɛ kpedo mì nu mìnya enu ci Ʒerusalɛmu Yoyu lɔ nyi, ɖo wocu Kristotɔ ciwo yí ayi nɔ agbe le jeŋkwi mɛ “do apotruwo koɖo nyɔnuɖɛtɔwo gɔnmɛɖokpe ji.”—Efezitɔwo 2:20, NWT.

3. Ʒerusalɛmu Yoyu lɔ nyi akpaxwe ɖe nɔ acɛkpakpa ɖeka. Ʒerusalɛmu xoxwi lɔ nyi Izraɛli fyɔju, fini Efyɔ Davidi, eviɛ Salomɔ koɖo wowo jijimɛviwo kpa acɛ “le Yehowa fyɔʒinkpin ji” le.” (1 Kronika 29:23, NWT) Woyɔ Ʒerusalɛmu mɔ “jugan kɔkɔɛ lɔ,” ɖo Davidi xomu jijimɛviwo le dumɛ nɔ Mawu cɛkpakpa lɔ. (Nexemi 11:1, NWT) Woyɔ Ʒerusalɛmu Yoyu lɔ can mɔ “jugan kɔkɔɛ lɔ” ci yí nyi mɛ ciwo yí ayi nɔ jeŋkwi mɛ koɖo Yesu yí “woaɖu fyɔ do nyigban lɔ ji.”—Enyɔdasɛ 5:9, 10; 21:2, NWT.

4. Ʒerusalɛmu Yoyu lɔ ahɛn shicuwo vɛ nɔ agbetɔwo le nyigban ji. Bibla mɔ Ʒerusalɛmu Yoyu lɔ “ɖyi so jeŋkwi mɛ le Mawu gbɔ.” Édasɛ mɔ Mawu zinkɔ keŋ asɔ kpɔ enyɔwo gbɔ le nyigban ji. (Enyɔdasɛ 21:2) Eyi taɖo, Ʒerusalɛmu Yoyu lɔ nyi akpaxwe ɖe nɔ Mawu Fyɔɖuxu lɔ ci ezanzan yí sɔ wawa yi dro “le nyigban ji shigbe lé enyi wawa le jeŋkwi mɛ nɛ.” (Matie 6:10, NWT) Shicu ciwo Mawu dro lɔ ahɛn vɛ nɔ mɛ ciwo yí le nyigban ji wo ke:

   • Nuvɔnwo agu. “Etɔ ci mɛ agbe shi le” sa so Ʒerusalɛmu Yoyu lɔ mɛ yí wukɔ eshi nɔ “agbe ciwo.” Agbe ci lɔwo “danɔ edɔ̀ nɔ akɔtawo pleŋ.” (Enyɔdasɛ 22:1, 2) Nɔ woda dɔ̀ nɔ agbetɔwo le ŋcilan mɛ koɖo gbɔngbɔn mɛɔ, nuvɔn dagbele agbetɔwo nu o, shigbe lé Mawu ji do le gɔnmɛjeje nɛ.—Rɔmatɔwo 8:21.

   • Ekacaca nywi anɔ gblamɛ nɔ Mawu koɖo agbetɔwo pleŋ. Nuvɔn te agbetɔviwo yi azɔge nɔ Mawu. (Ezai 59:2) Nɔ wocucu nuvɔn lɔ siɔ, enyɔnuɖɛ cɛ avamɛ keŋkeŋ: “Mawu goxɔ lɔ le agbetɔwo domɛ. Á nɔ̀ koɖo wo. Wo a nyi Yi mɛwo. Mawu ŋtɔ a nɔ̀ koɖo wo yí Á nyi wowo Mawu.”—Enyɔdasɛ 21:3.

   • Efunkpekpewo koɖo eku avɔ. To Mawu Fyɔɖuxu lɔ jiɔ, Mawu “a cucu ɖashi keŋkeŋ le ŋkuviwo ji nɔ wo. Eku, enulolo, avifanfan, alo vevisese da gbe li o. Enu ŋkɔtɔwo a vayì.”—Enyɔdasɛ 21:4.