Mína nɔ mìwo kunuɖeɖe mɔnuwo anyɔ doji: Tɔ seŋkankan ciwo yí ana naɖe kunu ji

Yesu kpe ji yí ɖe avomɛ kunu nɔ nyɔnu Samaritɔ lɔ, ɖo étɔ seŋkankan ji koɖyi. Lé mìawɛ yí mìwo kunuɖeɖe anyɔ doji nɔ mìjikɔ atɔ seŋkankan ji koɖo mɛ ciwo yí mìdeshi ɖɛɔ?

• Xo nuxu exlɔwawatɔ nɔ amɛwo. Ci enu cikɔ nɔ Yesu can ɔ, ébiɔ shi mɔ yeanu yí sɔ tɔ yi seŋkankan lɔ ji fafɛɖe. Eyi taɖo, àtɛnŋ atɔ seŋkankan ji koɖo egbedonamɛ vividodoamɛnutɔ. Le yi goduɔ, àtɛnŋ axo nuxu so ayamɛ nɔnɔmɛ, alo ŋɖe ci yí jɔkɔ kaka nu. Ðo ŋwi mɔ, tajinu ŋkɔtɔ yí nyi mɔ woatɔ seŋkankan ji, eyi taɖo xo nuxu so ŋɖekpokpui ci mɛ yí amɛ lɔ atɛnŋ asɔ ɖe le nu. Nɔ amɛ lɔ desɔ ɖe le mɛ can ɔ, dewa ŋɖe o. Gbeti kpɔ koɖo mɛbu. Biɔ Yehowa mɔ yɛ le na edɔngbegbe ye.​—Nex 2:4; Edɔ 4:29.

• Nɔ zanŋte do mɔnukpɔkpɔ ɖeshiaɖe ci yí ahun nɔ eo yí nadra eŋɛnywi lɔ nu, vɔ ŋgbele hwlɛndoji o. Na seŋkankan lɔ ayi nywiɖe. Nɔ èsɔ enyɔ lɔwo ʒin amɛ lɔ jiɔ, atɛnŋ ana mɔ amɛ lɔ davo le yiɖeki mɛ o, yí aɖo te seŋkankan lɔ. Nɔ detɛnŋ yí ɖe kunu gbɔxwe seŋkankan lɔ vɔɔ, ŋgbeve eo o. Nɔ lé àwɛ atɔ avomɛ kunu ɖeɖe ji donɔ vɔnvɔn nɔ eoɔ, ɖui do susu mɛ mɔ yeatɔnɔ seŋkankan ji koɖo amɛwo kunumaɖe. [Xo video 1 keŋ akan seŋ so nu.]

• Ji emɔ ɖe ci ji àto anu nyɔnɔnwinyɔ ɖe so ao xɔse nu ci yí atɛnŋ ana amɛ lɔ aji mɔ yease ŋɖe gɔnmɛ kaka, keŋ asɔ hun kunuɖeɖe mɔnu. Yesu zan enyɔ wadɔdoamɛji ciwo yí cucu nyɔnu lɔ yí ebiɔ nyɔwo se. Hwecinu yí Yesu vatɔ nuxu xoxo so eŋɛnywi lɔ nuɔ, nyɔnu lɔ nyɔbiɔsewo yí ena ɖoŋci nɔ. [Xo video 2 keŋ akan seŋ so nu. Le yi goduɔ, xo video 3 keŋ akan seŋ so nu.]