KRISTOTƆWO GBENƆNƆ
Edɔwawa alɔ-le-alɔ-mɛ yí aɖe kunu le nyigbanmama ci mɛ wodonɔ egbe sugbɔ le
Nɔ amɛwo se Fyɔɖuxu ŋɛdu lɔ do wowoŋtɔwo gbe mɛɔ, wowanɔ nu nywiɖe do nu sugbɔ wu. Taŋfuin susu cɛ yí dɔ le Pantekoti ji le exwe 33 K.H. mɛɔ, Yehowa na ‘Ʒuifu ciwo yí sɛnnɔ Mawu ciwo yí so afishiafi le xexe lɔ mɛ’ se eŋɛnywi lɔ do ‘wowoŋtɔwo gbe mɛ,’ ci yí wodokɔ egbe ɖekɛ lɔwo shigbe mɔ Ebregbe alo Grɛkigbe hannɛ can. (Edɔ 2:5, 8) Le texwe ciwo yí wodonɔ egbe sugbɔ le gbɛɔ, hamɛ ciwo yí wanɔ bɔbɔwo do egbe vovovowo mɛ atɛnŋ aɖo nyigbanmama ɖekɛ ci mɛ woawa dɔ le. Lé eŋɛnywidratɔ ciwo yí le hamɛ ŋtɔ́wo mɛ atɛnŋ awa dɔ alɔ-le-alɔ-mɛ keŋ aɖe kunu nɔ amɛshiamɛ yí wodadokɔ nuxu nɔ axomɛnɔtɔ lɔwoɔ?
Mídonɔ go (Elo 15:22): Sumɔsumɔdɔ jikpɔtɔwo ɖo adonɔ go koɖo wowonɔnɔwo, keŋ akpɔ lé woadra eŋɛnywi lɔ do yí anyɔ nɔ hamɛ lɔwo pleŋ. Hamɛ ciwo yí ɖekɔ kunu le egbe buwo mɛ atɛnŋ aji mɔ, míwo le tashi axwe ciwo mɛ yí wodokɔ wowo gbe le nɔ nyigbanmama wowo tɔ lɔ degangan o. Ele ahan gan, nɔ axwe lɔwo kaka do nyigbanmama gangan mɛ yí wodatɛnŋ aɖenɔ kunu le mɛ pleŋ kabakabaɔ, woatɛnŋ aji mɔ míwo le to axwe lɔwo pleŋ mɛ, keŋ ana yewoajeshi mɛ ciwo yí sɔ eɖe le mɛ yí donɔ yewo gbe lɔ. (od-EW 93 mm. 37) Alo woabiɔ so mí shi mɔ, míwo hamɛ lɔ le kpedo yewo nu nɔ yewoakpɔ mɛ ciwo yí donɔ yewo hamɛ gbe yí asɔ adrɛsi wowo tɔwo ɖaɖa yewo. (km-EW 7/12 5, dakavi) Míɖo ŋwi mɔ atɛnŋ ajɔ mɔ, woadonɔ egbe sugbɔ le axwe ɖewo mɛ. Toto ci woawa mɔ woaɖe kunu le nyigbanmama lɔ pleŋ mɛ, ɖo awa ɖeka koɖo ese ciwo yí kudo lé wozannɔ eju lɔ mɛ viwo nyɔtakankanwo do nu.
Mí wanɔ dɔ alɔ-le-alɔ-mɛ (Efe 4:16): Wanɔ do emɔdasɛnamɛ ɖekpokpui ci yí sumɔsumɔdɔ jikpɔtɔ ao tɔ ana eo ji nywiɖe. Èkplakɔ Bibla koɖo mɛɖe ci yí ji mɔ, woakplɛ koɖo ye le egbe ci yí to akpo nɔ egbe ci ao hamɛ donɔ mɛa? Enukplavi lɔ atɛnŋ awa ŋkɔyiyi kabakaba, nɔ èsɔ jo nɔ mɛɖeka ci yí le hamɛ alo gbɛbɔbɔ ci yí donɔ egbe yi tɔ mɛ.
Mídranɔ do (Elo 15:28; 16:1): Nɔ èvayi do go axomɛnɔtɔ ɖe le nyigbanmama ao tɔ mɛ yí etɔ egbe bu dodoɔ, wa enu ci ji èkpe keŋ aɖe kunu ni. Àtɛnŋ adra do ɖɛ doŋkɔ do egbe ciwo yí ènya mɔ, wodonɔ le nyigbanmama lɔ mɛ nu. Àtɛnŋ awa kɔpi nɔ Bibla gɔnmɛɖeɖewo koɖo videowo do ao telefonu ji. Àtɛnŋ agbezan JW Language dɔwanu, keŋ asɔ kpla lé wodonɔ gbe nɔ amɛ do le egbe ɖewo mɛ.