Lɔnlɔn lé Dɔ Nakpɔtɔ Aɖeɖeɛ Kunu!

1. Nyi mìkpla le exweshiaxwe bɔbɔ 2023 tɔ mɛɔ?

LE XWESHIAXWE bɔbɔ 2023 tɔ mɛɔ,a mìxɔ enumɛɖeɖe dojijɔnamɛ so mìwo jixɔse ɖewo nu yí gbese nunɔwoase ɖewo ciwo yí dɔ kpakpa sɔ mì do kunuɖeɖedɔ lɔ nu. Le kpɔwɛ mɛ, mìkpla mɔ emɔ tɛnŋ vahun nɔ mɛɖewo yí woavanɔ Yehowa kpaxwe le Babiloni Gangan lɔ gugu godu. Mìgbese hɛnnɛ mɔ tɔ so Novembre 2023 ɔ, Fyɔɖuxu ŋɛnywidratɔwo dagbenanɔ kɔnŋta nɔ edɔ ciwo pleŋ wowanɔ le kunuɖeɖedɔ lɔ mɛ o. Trɔtrɔ cɛwo dasɛ mɔ kunuɖeɖedɔ mìwotɔ degbele veviɖe alo degbeʒan kpata sɔwu sa yɔa? Ahan yɔ nɛ go!

2. Nyi yí taɖo nɔ eŋ fɔn yí kekeɛ ɖe, mìwo kunuɖeɖedɔ lɔ gbevaʒanʒan kpata dojiɔ? (Maki 13:10)

² Ci eŋ vlɛ yí kekeɛ duuɔ, mìwo kunuɖeɖedɔ lɔ gbevaʒan kpataa sɔwu sa. Nyi yí taɖoɔ? Ðo gamɛ vayikɔ blebleble. Kpɔ enyɔ ci Yesu nu ɖɛ so kunuɖeɖedɔ lɔ nu le ŋkeke vɔvɔɛwo mɛ ɖa. (Hlɛn Maki 13:10.) Sɔgbe koɖo Matie xolɔlɔ lɔɔ, Yesu nu mɔ woadra eŋɛnywi lɔ le nyigban lɔ pleŋ ji gbɔxwe yí “vɔvɔɛnu” lɔ aɖo. (Mat. 24:14) Nyɔgbe cɛ xokɔ nuxu so Satana xexe vwin cɛ gugu keŋkeŋ nu. Yehowa ɖo “ŋkeke [koɖo] egaxoxo” ciwo ji enu cɛwo ajɔ do le majinjinɖe mɛ. (Mat. 24:36; 25:13; Edɔ. 1:7) Nɔ eŋ ke yí ezan do duuɔ, edasɛ mɔ mìgogokɔ hwenu lɔ doji. (Rɔm. 13:11) Gbɔxwe hwenɔnu lɔ aɖoɔ, mìɖo akpɔtɔ adrakɔ eŋɛnywi lɔ keke na nɔ hwenu yí vɔvɔnu lɔ ava.

3. Nyi yí dɔ yí mìɖenɔ kunuɔ?

³ Nɔ mìbu tamɛ kpɔ so mìwo kunuɖeɖedɔ lɔ nuɔ, anyɔ mɔ mìabiɔ enyɔ vevi cɛ mìwoɖekiwo se: Nyi yí taɖo mìdrakɔ eŋɛnywi lɔɔ? Le kleŋ mɛɔ, lɔnlɔn yí dɔ mìdrakɔ eŋɛnywi lɔ. Enu ci mìwakɔ le kunuɖeɖedɔ lɔ mɛ dasɛ mɔ mìlɔn eŋɛnywi lɔ, mìlɔn amɛwo yí vevitɔ lɔɔ, mìlɔn Yehowa koɖo yi ŋkɔ lɔ. Mìaxo nuxu so enu ŋtɔ́wo nu ɖekaɖeka.

MÌÐEKƆ KUNU ÐO MÌLƆN EŊƐNYWI LƆ

4. Lé mìwanɔ enu do nɔ mìse eŋɛnywi ɖeɔ?

⁴ Àtɛnŋ aɖo ŋwi lé enu wanɔ do nɔ eo nɔ èse eŋɛnywi ɖea? Taŋfuin woji evi yoyu ɖe le ao xomu mɛ alo èkpɔ edɔ yoyu ɖe. Kankandojitɔɔ, àji veviɖe mɔ yeanu eŋɛnywi lɔ nɔ ao xomumɛtɔwo koɖo ao xlɔwo. Enu ŋtɔ́ han ɖe jɔ hwenu yí èse eŋɛnywi ci yí wu kpɛtɛwo pleŋ ci yí nyi Mawu Fyɔɖuxu ŋɛnywi lɔa?

5. Hwenu èse nyɔnɔnwi ci yí le Mawu Nyɔ lɔ mɛ ŋkɔtɔ ɖe, lé ewa do nɔ eoɔ? (Kpɔ foto lɔ hɛnnɛ.)

⁵ Ðo ŋwi lé enu wa do nɔ eo le tɔtɔmɛ, hwenu yí èse nyɔnɔnwi ci yí le Mawu Nyɔ lɔ mɛ. Èdo jeshi mɔ Edao ci yí le jeŋkwi mɛ lɔn eo yí ji mɔ eo anyi ɖeka le ye xomumɛtɔ ciwo yí sɛnkɔ ye mɛ, yí eɖo gbe nɔ eo mɔ vevisese koɖo efunkpekpewo avavɔ yí àtɛnŋ kpɔkɔ emɔ mɔ woavafɔn ye mɛ vevi ciwo kuwo do agbe le xexe yoyu lɔ mɛ koɖo enu ciwo yí gbewu ahan. (Maki 10:​29, 30; Ʒan 5:​28, 29; Rɔm. 8:​38, 39; Enyɔ. 21:​3, 4) Nyɔnɔnwi ŋtɔ́wo do jijɔ nɔ eo sugbɔ. (Luiki 24:32) Èlɔn enu ciwo yí èkplakpla yí èji veviɖe mɔ yeaxo nuxu so nyɔnɔnwi lɔwo nu nɔ amɛshiamɛ!—Sɔ sɔ koɖo Ʒeremi 20:9.

6. Nyi èkpla le Ernest koɖo Rose kpɔwɛ lɔ mɛɔ?

⁶ Mìasɔ kpɔwɛ ɖeka. Nɔviŋsu Ernestb ɖo exwe amɛ́wo han hwecinu yí dalɔ ku. Ernest nu mɔ: “Ŋbiɔkɔ nyɛɖeki se mɔ: ‘Jeŋkwi mɛ yí eyia? alo éku enyi evɔ yɔa?’ Nɔ ŋkpɔ ɖevi ciwo yí wowo dawo kpɔtɔ le wo gbɔɔ, edronɔŋ keke.” Ernest yinɔ amɛɖyixu lɔ yí jenɔ kloji do edalɔ yɔdu ji yí donɔ gbe ɖaɖa mɔ: “Ŋɖekuku, Mawu ŋji mɔ nanya fini edanyɛ le.” Le exwe 17 han godu nɔ hwenu edalɔ kuɔ, womɔ woakpla Bibla koɖo Ernest yí exɔgbe kaaka. Ejɔ eji ni ci ekpla mɔ amɛkukuwo degbenya ɖe o yí ele shigbe mɔ wole alɔn dɔnkɔ hannɛ yí Bibla ɖo gbe mɔ fɔnfɔnsoku li nɔ wo le esɔ mɛ. (Ŋun. 9:​5, 10; Edɔ. 24:15) Le vɔvɔnuɔ, évakpɔ ɖoŋci nɔ nyɔbiɔse ciwo yí xɛkɔ so exwe sugbɔ ke! Kpakpa sɔsɔ Ernest do nyɔnɔnwi ciwo yí ekplakpla le Bibla mɛ nu. Ashiɛ Rose, vatɔ Bibla kplakpla koɖi yí gbelɔn Fyɔɖuxu ŋɛdu lɔ hɛnnɛ. Le 1978 mɛɔ, wowa ʒinʒindoshimɛ. Wosɔ ezolelanmɛ yí xo nuxu so nyɔnɔnwi vevi ciwo wokpla nu nɔ wowo xomumɛtɔwo, wowo xlɔwo koɖo mɛbuwo ciwo yí lɔn yí se nyɔ lɔ. Ecɛ dɔ yí Ernest koɖo Rose kpedo mɛ ciwo yí wu 70 nu yí wowa ŋkɔyiyi yí wa ʒinʒindoshimɛ.

7. Nɔ lɔnlɔn ci mìɖo nɔ Bibla mɛ nyɔnɔnwi lɔ do ke do mìwo ji mɛ ɖe, nyi yí jɔnɔɔ? (Luiki 6:45)

⁷ Eze gbawlɛ mɔ, nɔ lɔnlɔn ci mìɖo nɔ Bibla mɛ nyɔnɔnwi lɔ do ke do mìwo ji mɛɔ, mìdatɛnŋ abɔ nu di o. (Hlɛn Luiki 6:45.) Ewa nɔ mì shigbe Yesu nukplavi ciwo ni le exwe sanŋdi ŋkɔtɔ mɛ nɛ ciwo yí nu mɔ: “Mì da tɛnŋ bɔ enu o. Mì ɖo anu enu ciwo yí mì se yí kpɔ nɔ amɛwo.” (Edɔ. 4:20) Mìlɔn nyɔnɔnwi lɔ sugbɔ keke mìji mɔ mìanui nɔ amɛ sugbɔ lé mìakpe ji do.

MÌÐENƆ KUNU ÐO MÌLƆN AMƐWO

8. Nyi yí dɔ yí mìyinɔ mɛbuwo gbɔ yí vayi dranɔ eŋɛnywi lɔ nɔ woɔ? (Kpɔ dakavi ci yí nyi. “Lɔn Amɛwo—Ðo Nukplaviwo.”) (Kpɔ foto lɔ hɛnnɛ.)

⁸ Shigbe Yehowa koɖo Eviɛ nɛɔ, mìlɔn amɛwo. (Elo. 8:31; Ʒan 3:16) Amɛ ciwo yí “de jeshi Mawu o” koɖo amɛ ciwo shi “Ŋkuɖoɖo de le” o nu sanɔdɔnu nɔ mì sugbɔ. (Efe. 2:12) Woɖo cukaɖa sugbɔ le agbe mɛ, vɔ enu ci woʒan le mì shi, eyi nyi Mawu Fyɔɖuxu ŋɛnywi lɔ. Ci mìlɔn wo yí wowo nu sadɔnu nɔ mìɔ, mìji mɔ mìawa enuɖekpokpui ci ji mìsun keŋ ayi dra eŋɛnywi lɔ nɔ wo. Nɔ wose ŋɛdu vevi cɛɔ, atɛnŋ ana woaɖo emɔkpɔkpɔ yí akpedo wo nu woakpɔ jijɔ le agbe mɛ le kakacɛ mɛ yí emɔ agbehun nɔ wo gbeɖeka yí woavakpɔ “agbe adodwi” ci yí nyi agbe tɛgbɛɛ nɔnɔ le Mawu xexe yoyu lɔ mɛ.—1 Tim. 6:19.

9. Amɛkanxlenyɔ ci mìnukɔ nɔ amɛwo so esɔ mɛ nuɔ, yí nyi yí taɖoɔ? (Ezekiɛli 33:​7, 8)

⁹ Lɔnlɔn ci mìɖo nɔ amɛwo dɔ yí mìkannɔxle wo mɔ vɔvɔnu nɔ xexe vwin cɛ gogo. (Hlɛn Ezekiɛli 33:​7, 8.) Mìwo xwexatɔwo koɖo mìwo xomumɛtɔ ciwo yí dele nyɔnɔnwi lɔ mɛ nu wakɔ ŋshishi nɔ mì. Amɛ sugbɔ le wo mɛ yí le agbe kpoŋ yí wodenya enu ci yí jikɔ avajɔ le esɔ mɛ ci yí nyi efunkpekpe gangan lɔ o. “[Efunkpekpe gangan] ahancitɔ ɖekpokpwi de jɔ kpɔ gbeɖe so gɔnmɛjeje nɔ xexe mɛ lɔ keke va nanɔ egbɛ ŋkekewo mɛ o. Dá gbe va jɔ kpɔ gbeɖe o.” (Mat. 24:21) Mìji mɔ woanya enu ci yí jikɔ ajɔ le kojoɖoɖo hwenu. Ŋkɔtɔɔ, woagu ŋsusɛnsɛnwo, le yi goduɔ, woavagu xexe vwin cɛ keŋkeŋ le Harmagedɔn hwenu. (Enyɔ. 16:​14, 16; 17:​16, 17; 19:​11, 19, 20) Mìdokɔ gbe ɖaɖa mɔ amɛ sugbɔ le ɖo to amɛkanxlenyɔ cɛ keŋ avabɔ do mì nu le sɛnsɛn kɔkɔɛ lɔ mɛ le kakacɛ mɛ. Vɔ mɛ ciwo yí deseseɛ amɛkanxlenyɔ cɛ le kakacɛ mɛ o, ciwo mɛ yí mìwo xomumɛtɔ veviwo can le ɖe?

10. Nyi yí taɖo eʒan kpata mɔ mìakpɔtɔ anunuɔ enu ci yí jikɔ avajɔ nɔ amɛwoɔ?

¹⁰ Shigbe lé mìdri do le nyɔta ci yí vayi mɛ nɛɔ, nɔ mɛ ciwo yí kpɔ yí woguguɔ Babiloni Gangan lɔ trɔ wowo gbenɔnɔɔ, Yehowa tɛnŋ ji mɔ yeahwlɛn wo gan. Nɔ ahan yɔ nɛɔ, egbele veviɖe sɔwu sa mɔ mìakpɔtɔ akankanxle wo. Enyɔ cɛ le nɔ susu mɛ nɔ mì: Enyɔ ciwo mìnukɔ nɔ wo le kakacɛ mɛɔ, wotɛnŋ vaɖo ŋwi wo le esɔ mɛ. (Sɔ sɔ koɖo Ezekiɛli 33:33.) Taŋfuin wotɛnŋ vaɖo ŋwi amɛkanxlenyɔ ciwo mìnunɔ nɔ wo yí ecɛ adɔ yí woavabɔ do mì nu le sɛnsɛn kɔkɔɛ lɔ mɛ gbɔxwe yí gamɛ aji. Shigbe lé ‘nyigban hunhun’ sugbɔ ɖegbɔ gbɔxwe yí gakpajikpɔtɔ ci yí le Filipi trɔ ji mɛ nɛɔ, ahanke taŋfuin mɛɖewo daɖo to mì kakayɛ o, vɔ wotɛnŋ vatrɔ ji mɛ hwenu yí wogu Babiloni Gangan lɔ ɖegbɔ.—Edɔ. 16:​25-34.

MÌÐEKƆ KUNU ÐO MÌLƆN YEHOWA KOÐO YI ŊKƆ LƆ

11. Lé mìnanɔ kanfukanfu, bubu koɖo ŋsɛn Yehowa doɔ? (Enyɔdasɛ 4:11) (Kpɔ foto lɔ hɛnnɛ.)

¹¹ Susu vevitɔ ci yí dɔ mìdrakɔ eŋɛnywi lɔ yí nyi mɔ mìlɔn Yehowa Mawu koɖo yi ŋkɔ kɔkɔɛ lɔ. Mìkpɔnɔ kunuɖeɖedɔ lɔ mɔ yɛnyi emɔ ɖeka ci ji mìato yí akanfu Mawu ci mìlɔn. (Hlɛn Enyɔdasɛ 4:11.) Mìsɔ mìwo jiwo pleŋ yí lɔn do ji mɔ Yehowa Mawu yí je yí axɔ kanfukanfu, bubu, koɖo ŋsɛn so ao sɛntɔ egbejinɔtɔwo gbɔ. Nɔ mìkpenɔdo mɛbuwo nu yí wokpɔnɔ kpeɖoji ciwo yí dasɛ mɔ “eyi wa enuwo pleŋ” yí mìle agbe, ɖo eyi na agbe lɔ mìɔ, anyi mìkanfuikɔ yí dodoɔ bubu yi nu. Mìnanɔ Yehowa mìwo ŋsɛn nɔ mìzannɔ mìwo gamɛ, mìwo ŋsɛn koɖo enu ciwo yí le mì shi yí sɔ ɖenɔ kunu sugbɔ lé mìakpeji do. (Mat. 6:33; Luiki 13:24; Kol. 3:23) Nɔ mìanui le kleŋ mɛɔ, jijɔ enyi nɔ mì mɔ mìaxo nuxu so Mawu ci mìlɔn nu. Mìgbejinɔ veviɖe mɔ mìaxo nuxu so yi ŋkɔ lɔ nu nɔ mɛbuwo koɖo Mawu ciŋmɛ enyi nu. Nyi yí taɖoɔ?

12. Lé mìkɔnɔ Yehowa ŋkɔ ŋci le mìwo kunuɖeɖedɔ lɔ mɛ doɔ?

¹² Lɔnlɔn ci mìɖo nɔ Yehowa dɔ yí mìkɔnɔ yi ŋkɔ ŋci. (Mat. 6:9) Mìji mɔ mìawɛ nɔ yi ŋkɔ lɔ anɔ mɛmiɖe yí anu nɔ mɛbuwo mɔ enyɔdɔndɔn ciwo Satana nu so Yehowa nu nyi ŋsu. (Gɔnm. 3:​1-5; Job 2:4; Ʒan 8:44) Le mìwo kunuɖeɖedɔ lɔ mɛɔ, mìji veviɖe mɔ mìahwlɛn ta nɔ mìwo Mawu yí anu nyɔnɔnwi ciwo yí kudo nu nɔ mɛ ciwo pleŋ yí aɖo eto mì. Mìji mɔ amɛshiamɛ lé nya mɔ lɔnlɔn yí nyi yi nɔnɔmɛ gangantɔ yí lé ekpanɔ acɛ do, le jɔjɔɛɖe yí gbesɔgbe yí sabaɖeyɛɔ, yi Fyɔɖuxu lɔ avaɖe efunkpekpewo pleŋ swi yí ahɛn fafa koɖo jijɔ va nɔ agbetɔ xomu lɔ. (Eha. 37:​10, 11, 29; 1 Ʒan 4:8) Nɔ mìxokɔ nuxu nɔ amɛwo so mɛ ciŋmɛ Yehowa nyi nu le kunuɖeɖedɔ lɔ mɛɔ, anyi mìkɔkɔ yi ŋkɔ ŋci. Mìgbekpɔnɔ jijɔ ci mìnya mɔ, mìnɔkɔ agbe esɔkɔ koɖo mìwo ŋkɔ lɔ. Lé enyi ahan doɔ?

13. Nyi yí taɖo ejɔnɔ eji nɔ mì ci woyɔnɔ mì mɔ Yehowa Kunuɖetɔwoɔ? (Ezai 43:​10-12)

¹³ Yehowa yɔ mì mɔ mìnyi ye “kunuɖetɔwo.” (Hlɛn Ezai 43:​10-12, NWT.) Exwe ɖewo vayiɔ, Edɔjikpɔha nu le wema ɖeka mɛ mɔ: “Bubu gangan ci mìwo pleŋ atɛnŋ aɖo yí nyi mɔ woayɔ mì mɔ Yehowa Kunuɖetɔwo.”c Nyi yí taɖo enyi ahan ɔ? Mìakpɔ kpɔwɛ cɛ. Sɔɛ mɔ wodo ehwɛ eo do ŋɖemajɔ ji. Ecɛyɛɔ, èʒan mɛɖe ci yí axo nuxu nɔ amɛ lɔwo mɔ ŋsu yí wokan do nu nɔ ye, mɔ amɛnywi yenyi yí yedatɛnŋ awa enu ŋtɔ́ hanwo gbeɖe o. Mi yí àsɔ yí aɖe kunu nɔ eoɔ? Kankandojitɔɔ, mɛ ci èjeshi, ci ji èkando, ci yí ɖo adɛn nywi yí axo nuxu yí amɛwo akando ji yí àsɔ. Ci Yehowa sɔ mì mɔ mìnyi ye Kunuɖetɔwoɔ, edasɛ mɔ éjeshi mì ɖɛ nywiɖe yí gbekando mì ji mɔ mìaɖe kunu mɔ, yeɖekɛ yí nyi Mawu adodwi lɔ. Bubu gangan enyi nɔ mì mɔ mìnyi yi Kunuɖetɔwo yí gbetonɔ emɔ ɖekpokpui ci yí hun nɔ mì ji yí na amɛwo jenɔshi yi ŋkɔ lɔ yí gbegbenɔ ŋsu sugbɔ ciwo wokan do nu ni wo. Nɔ mìwɛkɔ ahan ɔ, anyi mìnɔkɔ agbe esɔ koɖo ŋkɔ ci yí le mì nu. Yí enyi jijɔ nɔ mì mɔ mìnyi Yehowa Kunuɖetɔwo!—Eha. 83:18; Rɔm. 10:​13-15.

MÌAKPƆTƆ AÐEÐEƐ KUNU KEKE AJE VƆVƆNU

14. Enu dojijɔnamɛ ciwo yí le ŋkɔ nɔ mì gbɔgbɔɔ?

¹⁴ Enunywi dojijɔnamɛ sugbɔ le ŋkɔ nɔ mì yí gbɔgbɔ! Yehowa acu shi nɔ mì yí amɛ sugbɔ avabɔ do mì nu gbɔxwe yí efunkpekpe gangan lɔ atɔ ji. Gbesɔ kpe niɔ, kpakpa sɔsɔ mì mɔ, nɔ mìgbele efunkpekpe gangan ci yí anyi hwenu sɛnŋ ɖeka le agbetɔwo xolɔlɔwo mɛ can ɔ, mìakpɔ yí amɛ sugbɔ aso le Satana xexe vwin lɔ mɛ keŋ avabɔ do mì nu yí mìakanfu Yehowa!—Edɔ. 13:48.

15-16. Nyi mìakpɔtɔ awakɔɔ, keke asɔ na nɔ hwenuɔ?

¹⁵ Gbɔxwe hwenɔnu aɖoɔ, edɔ le kɔ nɔ mì mìawa. Mɔnukpɔkpɔ enyi nɔ mì mɔ, mìɖekɔ kunu ci wodagbetrɔ awa ke o. Eyi nyi Mawu Fyɔɖuxu ŋɛnywi lɔ dradra le xexe lɔ keŋkeŋ mɛ. Le gaxoxo ɖekɛ lɔ mɛɔ, mìɖo akpɔtɔ akankanxle amɛwo so enu ci yí jikɔ avajɔ sabaɖeyɛ nu. Amɛwo ɖo anya mɔ vɔvɔnu nɔ xexe vwin cɛ gogokɔ sugbɔ. Eyi nɔ kojoɖoɖo ga lɔ xoɔ, woavanya mɔ ŋɛdu ci mìdrakɔ nɔ wo sa so Yehowa Mawu gbɔ.—Ezek. 38:23.

¹⁶ Vɔ nyi mìaɖui koŋ yí awaɔ? Lɔnlɔn adɔ yí mìalɔn eŋɛnywi lɔ, mìalɔn amɛwo yí vevitɔɔ, mìalɔn Yehowa koɖo yi ŋkɔ lɔ yí akpɔtɔ asɔ kpakpa aɖekɔ kunu, ɖo eʒan kpata yí mìasɔ ezolelanmɛ yí awɛkɔ keke ana nɔ hwecinu Yehowa anu mɔ: “Evɔ!”