“Ate Gogo Mawu Nyɔ nɔ” Mì!

1-2. (a) Egbla ciwo wodonɔ gbɔxwe vanyinɔ exlɔ bakpomadɔn koɖo mɛɖeɔ? (b) Nyi nu mìaxo nuxu so le nyɔta cɛ mɛɔ?

ÈÐO xlɔ vevi ɖea? Lé èwɛ yí eo koɖo yɛ vanyi xlɔ bakpomadɔn ɔ? Kankandoji li mɔ ènɔ ju koɖi sugbɔ, èkpla nu so cukaɖa ciwo edonɔ go nu, èvanya enu ciwo yí jɔnɔ ji ni koɖo nu ciwo yí dejɔnɔ ji ni o. Èvado jeshi mɔ éɖo nɔnɔmɛ nywiwo ciwo èji mɔ yeasran. Èvalɔn ao xlɔ lɔ.

² Eʒan gamɛ koɖo agblajeje gbɔxwe woanyi exlɔ bakpomadɔn koɖo mɛɖe. Enyɔ cɛ hanci ke yí mìanu so exlɔnyinyi koɖo Yehowa Mawu nu nɛ. Nyɔta cɛ axo nuxu so lé mìawɛ anyi xlɔ koɖo mìwo Mawu koɖo nyɔna ciwo mìakpɔ so mɛ nɔ mìwɛ ahan. Ðoŋkɔɔ, mìakpɔ enu ci yí taɖo enyɔ mɔ mìate gogo mìwo Xlɔ nywitɔ Yehowa.

3. Nyi yí taɖo mìabu tamɛ kpɔ so nyɔna ciwo mìakpɔ nɔ mì mìkpɔtɔ yí teteɛ gogo Yehowa dojiɔ? Na kpɔwɛ ɖeka.

³ Kankandojitɔɔ, èlɔn do ji mɔ ate gogo Yehowa yí nyi enywitɔ. Vɔ tamɛbubukpɔ so lé enyɔ do nu teŋteŋ yí akpedo mì nu mìakpɔtɔ ateteɛ gogui. (Eha. 63:​6-8) Le kpɔwɛ mɛ, mìnya mɔ nɔ mìɖunɔ enu nywiɖe, teteɛ kanmɛ, gbɔnnɔ domɛ nywiɖe yi nunɔ shi sugbɔɔ, wowanɔ nywi nɔ mì. Ele ahan gan, amɛ sugbɔ debunɔ tamɛ so nyɔ ŋtɔ́wo nu o yí wodelenɔ bu nɔ wowo lanmɛsɛn nywiɖe o. Vɔ nɔ mìbunɔ tamɛ blaŋblaŋ so lé enu ŋtɔ́wo wawa ana yí mìwo lanmɛ ale nywiɖe doɔ, kankandoji li mɔ mìaji mɔ mìakpɔtɔ awakɔ wo. Ahanke mìtɛnŋ nya mɔ nɔ mìteteɛ gogo Yehowaɔ, awa nywi nɔ mì. Vɔ tamɛbubukpɔ so nyɔna ciwo mìakpɔ nɔ mì wɛ ahan adɔ yi mìakpɔtɔ ateteɛ gogo mìwo Xlɔ doji.—Eha. 119:​27-30.

4. Shigbe lé Ehajiji Wema 73:28 nui nɛ ɖe, nyiwo yí le jimɛ nɔ ehakpatɔ lɔ yí enuɔ?

⁴ Hlɛn Ehajiji Wema 73:28. Mɛ ci yí ŋwlɛ Ehajiji Wema 73 lɔ nyi Levitɔ ci wosɔ nɔ anyi mizikixotɔ le Yehowa gbedoxɔ mɛ. Kankandoji li mɔ, ésɛn Yehowa le egbejinɔnɔ mɛ na nɔ hwenu ɖe. Vɔ ékpɔtɔ kpɔkpɔɛ mɔ yɛle veviɖe mɔ yeaɖo ŋwi nɔ yeɖeki koɖo mɛbuwo mɔ “ate gogo Mawu nyɔ nɔ” ye koɖo wo. Nyɔna ɖewo ciwo woakpɔ nɔ wowa nu ahan?

“ATE GOGO MAWU” HƐNNƆ JIJƆKPƆKPƆ VA

5. (a) Nyi yí taɖo nɔ mìte gogo Yehowaɔ, mìkpɔnɔ jijɔɔ? (b) Sɔ koɖo Elododo Wema 2:​6-16 ɔ, na kpɔwɛ ŋtɔŋtɔ ciwo dasɛ mɔ Yehowa nunya atɛnŋ wa nywi nɔ eo yí aglɔn ta nɔ eo.

⁵ Nɔ mìteteɛ gogo Yehowa dojiɔ, ahanke mìakpɔkpɔ jijɔ doji nɛ. (Eha. 65:4) Susu sugbɔ yí dɔ yí nyɔ cɛ nyi nyɔnɔnwi. Susu ɖeka yí nyi mìkpɔnɔ nyɔna nɔ mìwa do nukplamu ŋtɔŋtɔ ciwo mɛ nunya le ciwo mìkpɔnɔ le yi Nyɔ Bibla lɔ mɛ ji. Nunya cɛ glɔnnɔ ta nɔ mì so enu ciwo yí adahɛn nu le mì nu yí ena yí mìzenɔ nɔ nuvɔn ganganwo wawa. (Hlɛn Elododo Wema 2:​6-16.) Eyi dɔ yí Bibla nu mɔ: “Amɛ ci yí kpɔ ŋununyanya akpɔ jijɔ sugbɔ. Wo a cushi nɔ amɛ hunnɔ hwecinu é tɔ́ enyɔ gɔnmɛ sese.”—Elo. 3:13.

6. Nyi yí dɔ yí ehakpatɔ lɔ degbekpɔkɔ jijɔɔ?

⁶ Le nyɔnɔnwi mɛɔ, Yehowa xlɔwo can nɔnɔ ŋshishi mɛ hweɖewonu. Hwenu yí mɛ ci yí ŋwlɛ Ehajiji Wema 73 tɔ lɔ vatɔ susu masɔgbewo ɖoɖoɔ, degbekpɔkpɔ jijɔ o. Évatɔ dɔmɛzi wawa yí enu vatɔ ŋmɛ cici ni, ɖo le yi susu mɛɔ, enuwo yikɔ nywiɖe nɔ mɛ ciwo yí delɔnnɔ Mawu koɖo mɛ ciwo yí dewanɔ do agbenywinɔnɔse yitɔwo ji o. Éwa afɛn kpɔɛ mɔ mɛ ciwo yí wanɔ tamɛsɛnnuwo koɖo egoyitɔnɔwo tɛnŋ kpɔkpɔ enu ciwo yí wojijiɛ yí eho le wo shi yí wodekpekpeɛ fun o. (Eha. 73:​3-7, 12) Ehakpatɔ lɔ xa le yiɖeki mɛ keke vabiɔkɔ yiɖeki se mɔ egbla ciwo yedokɔ le Yehowa sɛnsɛn mɛ gbenyi ŋɖe yɛ ma. Ci ele ŋshishi mɛɔ, énu mɔ: “Gbali yí ŋna anyi ji le mɛmiɖe yí klɔ anyi lɔwo le afɛnmawamawa mɛ.”—Eha. 73:​13, nwt.

7. Lé mìatɛnŋ awɛ aɖu enuxoxokpɔ ciwo yí ana mìabu mìwo jijɔkpɔkpɔ jiɔ? (Kpɔ akpa lɔ ji.)

⁷ Ehakpatɔ lɔ dewɛ yí ŋshishi ci mɛ ele na yí egbɔjɔ keŋkeŋ o. Éwa ŋɖe yí sɔ trɔ yi nɔnɔmɛ lɔ. Éyi “Mawu sɛnxu [gangan]” lɔ, fini Yehowa atɛnŋ akpedo nu atrɔ yi susu le. (Eha. 73:​17-19) Hwenu mìle ŋshishi mɛɔ, Yehowa mìwo Xlɔ vevitɔ nyanɔ. Nɔ mìdo gbe ɖaɖa ni mɔ le dasɛ emɔ nɔ mì yí lɔn yí xɔ kpekpedonu ci enanɔ to yi Nyɔ koɖo hamɛ lɔ jiɔ, mìakpɔ ŋsɛn yí aɖu ŋshishi ci mɛ mìle ji. Yí nɔ mìkpɔɛ mɔ enuxoxokpɔwo vawugan mì can ɔ, Yehowa afa akɔn nɔ mì yí ana mìavo le mìwoɖekiwo mɛ.—Eha. 94:19.a

“ATE GOGO MAWU” ANA YÍ MÌWO GBE ANYƆ GBƐ YÍ AGBENYƆ LE ESƆ MƐ

8. Enuvevi ciwo mɛ yí ate gogo Mawu nyɔ nɔ mì leɔ?

⁸ Ate gogo Mawu nyɔ nɔ mì le enuvevi amɛve buwo mɛ. Doŋkɔɔ, ana yí agbe lɔ aje ji nɔ mì kakayɛ. Amɛvetɔ, ana yí mìaɖo emɔkpɔkpɔ sɛnŋ mɔ esɔ mɛ avanyɔ. (Ʒer. 29:11) Mìaxo nuxu so nyɔna cɛwo nu nywiɖe doji.

9. Lé mìkpɔnɔ jijɔ le agbe mɛ nɔ mìvate gogo Yehowa dojiɔ?

⁹ Nɔ Yehowa nyi mìwo xlɔ veviɔ, ana yí mìwo gbe anyɔ doji. Amɛ sugbɔ nunɔ mɔ Mawu ɖe deli o yí wodenya enu ci yí taɖo yí agbetɔwo le nyigban ji o, yí wodekando ji mɔ agbetɔwo akpɔtɔ ale nyigban lɔ ji le esɔ mɛ o. Vɔ ci mìkplakpla Mawu Nyɔ lɔɔ, mìvakando ji mɔ Mawu “[acu eshi nɔ] mɛ ciwo yí ji mɔ yewo a kpɔ ɛ nyɔnɔnwitɔ.” (Ebre. 11:6) Le egbɛ mɛ can ɔ, mìkpɔkpɔ jijɔ le agbe mɛ sɔwu, ɖo mìwakɔ enu ci yí dɔ yí Mawu wa mì, eyi nyi mɔ mìasɛn mìwo Da ci yí le jeŋkwi mɛ, Yehowa.—2 Ese. 10:​12, 13.

10. Enyɔ ci Ehajiji Wema 37:29 nu so esɔ mɛ nu nɔ mɛ ciwo yí kpɔkpɔ emɔ nɔ Yehowaɔ?

¹⁰ Amɛ sugbɔ deɖo emɔkpɔkpɔ ŋtɔŋtɔ le agbe mɛ o, wowanɔ edɔ yí ahɛn wowo xomu keŋ adra ŋɖe daɖo ɖɛ nɔ hwenu wodegbevale dɔ wakɔ o. Wodenya mɔ Mawu ɖo gbe ɖe ɖɛ nɔ esɔ o. To akpo nɔ mɛ hunnɔtɔwoɔ, Yehowa sɛntɔwo sɔ mɔkpɔkpɔ wowotɔ daɖo Yehowa ji. (Eha. 25:​3-5; 1 Tim. 6:17) Mìkando mìwo Mawu ci yí nyi mìwo xlɔ ji yí nya mɔ awa do egbe ci eɖo nɔ mì ji. Enunywi sugbɔwo le ŋkɔ nɔ mì le esɔ mɛ vevitɔ lɔ yí nyi mɔ mìasin keke asɔyi mavɔ mavɔ le Paradiso mɛ.—Hlɛn Ehajiji Wema 37:29.

11. Nɔ mìte gogo Mawu ɖe, nyi ewanɔ nɔ mìɔ, yí lé ewanɔ nɔ yɛɔ?

¹¹ Ate gogo Mawu nyɔ nɔ mì le enu sugbɔ buwo mɛ. Le kpɔwɛ mɛ, Yehowa ɖo gbe nɔ mì mɔ yeasɔ enu ke nuvɔnwatɔ ciwo yí trɔ ji mɛ yi te gogo ye. (Ezai 1:18) Eyi dɔ taɖo mìdeɖo akpɔtɔ avɔnvɔn yi adokɔ hwɛ mìwoɖekiwo do nuvɔn ciwo yí mìwa vayi nu o. (Eha. 32:​1-5) Yí mìkpɔnɔ jijɔ nɔ mìdo jijɔ nɔ Yehowa. (Elo. 23:15) Kankandoji li mɔ, àtɛnŋ agbebu tamɛ kpɔ so shicu buwo ciwo yí tonɔ so ekacaca nywi mɛ nɔnɔ koɖo Mawu mɛ. Vɔ lé àwɛ akpɔtɔ ateteɛ gogo Mawuɔ?

LÉ WOAWƐ AKPƆTƆ “ATETEƐ GOGO MAWU”

12. Nyi èwa vayi keŋ te gogo Mawuɔ?

¹² Nɔ ènyi Kristotɔ wa ʒinʒindoshimɛɔ, èwa nu sugbɔ keŋ yi te gogo Yehowa vɔ. Èkpla nyɔnɔnwi sugbɔ so Yehowa koɖo Kristo Yesu nu yi trɔ ji mɛ so ao nuvɔnwo mɛ yi ɖo xɔse sɛnŋ do Mawu nu yí je agbla yí nɔkɔ agbe yí esɔkɔ koɖo Mawu dro. Nɔ woate gogo Mawu dojiɔ, mìɖo akpɔtɔ awakɔ enu cɛwo.—Kol. 2:6.

13. Enu amɛtɔn ciwo yí akpedo mì nu mìakpɔtɔ ateteɛ gogo Yehowaɔ?

¹³ Nyi yí akpedo mì nu mìakpɔtɔ ateteɛ gogo Yehowaɔ? (1) Mìɖo akpɔtɔ ahlɛnnɔ Bibla yí akplɛni. Nɔ mìawa enu cɛwoɔ, mìwo tajinu danyi kpoŋ mɔ mìakpla enukplakpla gɔnmɛjejetɔwo so Mawu nu o. Vɔ mìagbekpla nu so nu wu ahan. Mìɖo aje agbla amɔŋje Mawu dro mɛ nywiɖe, enu ci ejikɔ nɔ mì koɖo gɔnmɛɖose ciwo ji mìazɔn do le yi Nyɔ lɔ mɛ. (Efe. 5:​15-17) (2) Mìɖo ado ŋsɛn mìwo xɔse to tamɛ bubu kpɔ so kpeɖoji sugbɔ ciwo yí dasɛ mɔ élɔn mì ji. (3) Mìɖo akpɔtɔ agbegbeɛ enu ciwo yí dekpenɔ nɔ Yehowa o yí aze nɔ exlɔnyinyi koɖo mɛ ciwo yí wanɔ enu ŋtɔ́wo.—Eha. 1:1; 101:3.

14. Shigbe lé 1 Korɛntitɔwo 10:31 nui nɛ ɖe, enuɖewo ciwo mìatɛnŋ awa le mìwo gbe mɛ ŋkeke ɖeka ɖeka nɔ mìwo nu ajɔ eji nɔ Yehowaɔ? (Kpɔ foto lɔ hɛnnɛ.)

¹⁴ Hlɛn 1 Korɛntitɔwo 10:31. Ele veviɖe mɔ mìakpɔtɔ awakɔ enu ci yí jɔnɔ eji nɔ Yehowa. Ecɛ wugan wu kunuɖegbe yiyi koɖo bɔbɔ yiyi kpoŋ. Lé mìnɔnɔ agbe nywi do ŋkeke ɖeka duu le enunywi ciwo yí kpenɔ nɔ Yehowa mɛ. Le kpɔwɛ mɛ, nɔ mìtonɔ nyɔnɔnwi le enuwo pleŋ mɛ yí nanɔ enu mɛbuwoɔ, ejɔnɔ eji nɔ Yehowa. (2 Kor. 8:21; 9:7) Gbesɔ kpe niɔ, éji mɔ mìadasɛ mɔ enunana ci yí nyi agbe le veviɖe nɔ mì sugbɔ. Nɔ mìɖunɔ enu yí nunɔ aha le dredrenu yí gbewanɔ nubuwo keŋ anɔ lanmɛsɛn mɛ nywiɖeɔ, anyi mìteteɛ gogo agbe Natɔ lɔ. Agbla ciwo pleŋ mìaje nɔ mìwo nu akpe nɔ Yehowa nɔ egbenyi enu nyɛkuinwo mɛ yɔ can ana yí mìwo nu ajɔ eji ni.—Luiki 16:10.

15. Lé Yehowa kpɔkpɔ emɔ mɔ mìawanɔ nu do amɛwo nu doɔ?

¹⁵ Yehowa wanɔ xomɛvu nɔ amɛjɔjɔɛwo koɖo amɛmajɔjɔwo. (Mt. 5:45) Ékpɔkpɔ emɔ mɔ, mìwo can mìawa xomɛvu nɔ mɛbuwo. Le kpɔwɛ mɛ, “[mìdanukɔ] enyɔvɔn soso amɛɖekpokpui nu yí a gbe nɔ eke mɛ koɖo amɛɖe o. Vɔ, . . . [mìadanasɛ] nɔ amɛshamɛ mɔ [mìnyi amɛfafawo.]” (Titu 3:​2, Ezoɖuɖu Yoyu Wema) Ci nyɔ cɛ le susu mɛ nɔ mìɔ, denyɔ mɔ ci mɛɖewo deɖo jixɔse ɖekɛŋmɛ koɖo mì kpoŋ vɔ, mìagbagbali wo o. (2 Tim. 2:​23-25) Nɔ mìwanɔ xomɛvu nɔ amɛshiamɛ hweshiahwenu yí wanɔ nu do wo nu nywiɖeɔ, anyi mìteteɛ gogo Yehowa.

MÌATƐNŊ “ATE GOGO MAWU” NƆ MÌWA AFƐNWO CAN

16. Lé enu vatɔ wawa nɔ mɛ ci yí ŋwlɛ Ehajiji Wema 73 hweɖekanuɔ?

¹⁶ Vɔ nɔ hwenuwo vayikɔ yí èvatɔ kpɔkpɔɛ mɔ yedeje yí Yehowa alɔn ye ɖe? Shigbe lé mìxo nuxu so nu vayi nɛɔ, enu ŋtɔ́ hanci pɛɛ yí jɔ do mɛ ci yí ŋwlɛ Ehajiji Wema 73 ji nɛ. Éfankwi mɔ: “Ekpɔtɔ hwɛɖeka yí anyi fɔwo abu mɔ; kli yí kpɔtɔ yí naɖyiɖyi.” (Eha. 73:​2, nwt) Élɔn doji mɔ yevado “dɔmɛzi” yí wa “sukunu” “shigbe elanwo nɛ” le Yehowa ŋmɛ. (Eha. 73:​21, 22) Afɛn ci ewa ŋtɔ́ na yí ekpɔɛ mɔ yetɔ vɔ yí yedegbeje nɔ Yehowa lɔnlɔn a?

17. (a) Ci Ehajitɔ lɔ vakpɔɛ mɔ yegbɔjɔ sugbɔ ɖe, nyi ewaɔ? (b) Nyi mìatɛnŋ akpla so enujɔjɔ cɛ mɛɔ? (Kpɔ foto lɔ hɛnnɛ.)

¹⁷ Ci ehakpatɔ lɔ vakpɔkpɔɛ mɔ Yehowa gbe yeɔ, èwa ahan ni nanɔ hwenu ɖe kpoŋ yɔ. Éwa shigbe mɔ ci ewa afɛn lɔɔ, évado jeshi mɔ yeɖo ate gogo Mawu nɛ shigbe lé enui le yi Nyɔ lɔ mɛ ɛnɛ mɔ: “Vɔ ecɛyɛɔ, ŋkpɔtɔ le koɖo eo [Yehowa]; èle anyi lɔ ɖushi. Èsɔ ao nukplamu dasɛ emɔ nɔŋ, yí le yi goduɔ, àkplɔŋ yi ŋcikɔkɔɛ mɛ.” (Eha. 73:​23, 24, nwt) Mìwo can mìɖo akpɔnɔ Yehowa shigbe ekpe sɛnŋ ci yí dehwannɔ nɛ hwenu yí mìgbɔjɔ alo hwenu yí mìwo fɛnwo na yí ŋsɛn vɔ nɔ mì. (Eha. 73:26; 94:18) Nɔ mìwo fɔwo vaɖyiɖyikɔ hweɖewonu can ɔ, mìatɛnŋ atrɔ ɖaɖa Yehowa gbɔ koɖo kankandoji mɔ éle “gbesɔsɔ asɔ enu ke mì.” (Eha. 86:​5, nwt) Vevitɔ nɔ mìgbɔjɔ sugbɔɔ, ele veviɖe mɔ, mìɖo ate gogo mìwo Mawu.—Eha. 103:​13, 14.

“TE GOGO MAWU” KEKE ASƆYI MAVƆ

18. Nyi yí taɖo sɛnxu deli nɔ lé woate gogo Yehowa doɔ?

¹⁸ Sɛnxu deli nɔ lé mìate gogo Yehowa do koɖo lé mìawɛ ajeshi ɖɛ o. Bibla nu mɔ “wo da tɛnŋ mɔŋje” Yehowa mɔwo, yi nunya koɖo enujejeshi yitɔ mɛ vɛ gbeɖe o.—Rɔm. 11:33.

19. Kankandojinyɔ ciwo yí le Ehajiji Wemawo mɛ nɔ mìɔ?

¹⁹ Ehajiji Wema 79:13 tɔ nu mɔ: “Mì nyi Ao mɛwo. Mì nyi lɛngbɔwo le Ao lɛngbɔha mɛ. Mì a kanfu Eo keke a sɔyì mavɔmavɔ. Mawu mì a kanfu Eo keke a sɔyì mavɔ mavɔ.” Nɔ èkpɔtɔ yí teteɛ gogo Mawuɔ, eo can àtɛnŋ akando ji mɔ àxɔ shicu mavɔwo. Eyi ànu koɖo kankandoji mɔ: “Mawu yí nyi ekpe anyi ji tɔ koɖo anyi kpaxwe keke asɔyi mavɔ.”—Eha. 73:​26, nwt.