Kpɔtɔ Akpɔkɔ Jijɔ le Kpokpo Hwenu

1-2. Lé Yehowa kpɔnɔ amɛshinshin egbejinɔtɔwo doɔ? (Ehajiji Wema 92:​12-14; gbekpɔ foto ci yí le akpa lɔ ji.)

LE XEXE lɔ pleŋ mɛɔ, susu vovovowo yí amɛwo ɖonɔ do shinshin nu. Le kpɔwɛ mɛ, bu enyɔ cɛ kpɔ: Èɖo ŋwi hwenu yí ewa je ao ɖawo mɛ ŋkɔtɔa? Ètɛnŋ ji mɔ yeaɖi swi kaaka nɔ mɛɖe ŋgbekpɔɛ o. Vɔ èvakpɔɛ mɔ ci yeɖe ewa lɔwo so eɖa lɔwo mɛ can ɔ, dedɔ yí ebuwo gɔnmato o. Kpɔwɛ cɛ dasɛ lé amɛ sugbɔtɔ delɔnnɔ kpokpo nyɔ gbɔ do.

² Éle ahan gan, mìwo Da ci yí le jeŋkwi mɛ kpɔnɔ yi sɛntɔ ciwo yí shinshin ɛ to emɔ bu ji. (Elo. 16:31) Émɔ wole shigbe aci nyakpɔkpɔwo nɛ. (Hlɛn Ehajiji Wema 92:​12-14.) Enyɔ cɛ gɔnmɛ ɖe? Blaŋblaŋ ɔ, aci ciwo yí shinwo nyanɔ kpɔkpɔ ɖo woɖonɔ ama sugbɔwo koɖo flawa hwɛntehwɛntewo. Le kpɔwɛ mɛ, wokpɔ aci ŋtɔ́ han ɖeka ci yí li so exwe nɛniɖewo ke le Japon. Ðewo le aci ŋtɔ́wo mɛ ɖo exwe kotokun ɖeka enu le ji yí nya kpɔkpɔ sugbɔ. Shigbe aci shinshin cɛwo nɛɔ, Mawu sɛntɔ ciwo yí shin le exwe mɛ nyakpɔkpɔ sugbɔ, vevitɔ le ŋmɛ nɔ Mawu. Yehowa kpɔnɔ mɛ ciŋmɛ amɛ lɔ nyi sɔwu ewa ciwo yí le eta ni. Édonɔ afixɔxɔ nɔnɔmɛ nywi ciwo yí amɛshinshinwo ɖo nu. Wosinkɔ so exwe nɛniɖewo ke yí kpɔtɔ nɔkɔ egbeji ni le hwenu gbɔnnugbɔnnuwo koɖo hwenu nywiwo mɛ.

3. Na kpɔwɛ ɖeka ci yí dasɛ mɔ Yehowa zannɔ amɛshinshinwo yí sɔ wanɔ yi dro.

³ Yehowa kpɔtɔ donɔ afixɔxɔ mì nu nɔ mìshinshin ɛ can.a Le nyɔnɔnwi mɛɔ, Yehowa zannɔ amɛshinshinwo blaŋblaŋ yí sɔ wanɔ yi dro. Le kpɔwɛ mɛ, Sara shin haan hwenu yí Yehowa nu ni mɔ yɛanyi enɔ nɔ jukɔn gangan ɖeka yí agbenyi mama nɔ Mɛsia lɔ. (Gɔnm. 17:​15-19) Moizi shin le exwe mɛ hwenu yí Yehowa ɖo edɔ ni mɔ yɛakplɔ Izraɛliviwo ti le Eʒipti (Hun. 7:​6, 7) Eyi hwenu yí apotru Ʒan nyi amɛshinshin ɔ, Yehowa zin yí eŋwlɛ Bibla wema amatɔn.

4. Sɔ koɖo Elododo Wema 15:15 ɖe, nyi yí atɛnŋ akpedo amɛshinshinwo nu woado ji hwenu wodokɔ go cukaɖawoɔ? (Kpɔ foto lɔ hɛnnɛ.)

⁴ Nɔ exwewo yikɔ nɔ amɛhinshinwoɔ, wodonɔ go cukaɖa sugbɔ. Nɔvinyɔnu ɖeka ɖɔɖɔ ɖɔkwi yí nu mɔ: “Nyɔxokuku deblevi ɖeeɖe o.” Vɔ jijɔkpɔkpɔb atɛnŋ akpedo amɛshinshinwo nu yí woado ji le cukaɖa ciwo yí va vanɔ wo ji le wowoshinshin hwenu. (Hlɛn Elododo Wema 15:15.) Le nyɔta cɛ mɛɔ, mìakan seŋ so enu ŋtɔŋtɔ ɖewo ciwo atɛnŋ akpedo amɛshinshinwo nu yí woakpɔtɔ akpɔkɔ jijɔ nu. Mìagbekpɔ lé mɛbuwo atɛnŋ akpedo nɔviŋsu koɖo nɔvinyɔnu shinshinwo nu le wowo hamɛwo mɛ do. Doŋkɔɔ, mìaxo nuxu so enu ci yí taɖo agbɔnnu nɔ mì mɔ mìakpɔ jijɔ nɔ mìshinkɔ nu.

LÉ SHINSHIN ATƐNŊ ADAHƐN AO JIJƆ DO

5. Nyi yí atɛnŋ adɔ yí amɛshinshinwo agbɔjɔɔ?

⁵ Nyi yí atɛnŋ adɔ yí àgbɔjɔɔ? Taŋfuin, étɛnŋ wanɔ nɔ eo mɔ èci ŋshishi mɛ ɖo dèsɛnŋ yí gbewakɔ ŋciwo èwanɔ eoŋtɔ sa o. Ètɛnŋ ji mɔ yeakpɔtɔ anyi jajɛ yí anɔ lanmɛsɛn mɛ tɛgbɛɛ. (Ŋun. 7:10) Le kpɔwɛ mɛ, nɔvinyɔnu ɖeka ci yí tɔ mɔ Ruby nu mɔ: “Ŋsɛn vɔ nɔŋ yí kpexukpexuwo veveɛŋ. Ŋcɛwo pleŋ dɔ yí awudodo kpetii nyi edɔ nɔŋ. Ŋɖewo shigbe makɔ afɔ yi ji ádo fɔgodi nɛ vanyi edɔ nɔŋ. Anyi lɔ̀wo hunhunnɔ keke enu nyɛkwinnyɛkwinwo wawa can gbɔnnɔnu nɔŋ.” Harold ci yí wa edɔ le Betɛli nu mɔ: “Ŋdegbejeshi mɛ ci ŋvatrɔ o yí gaɖewomɛɔ, ŋcanɔka. Hwenu ŋnyi jajɛɔ, ŋɖo ŋsɛn haan. Base-ball xoxo jɔnɔ eji nɔŋ sa haan. Mɛɖewo tɛnŋ nu mɔ, ‘Sɔ balɔn lɔ nɔ Harold, ákpedo mì nu mìaɖu ji.’ Vɔ evyɛɔ, ŋdasɛnŋ sun ji kpetii adɔ balɔn lɔ o.”

6. (a) Susu bu ciwo yí atɛnŋ adɔ yí amɛshinshinwo akpɔɛ mɔ yewogbɔjɔɔ? (b) Nyi yí atɛnŋ akpedo amɛshinshinwo nu yí woasɔ gbeta mɔ yewoami ehun kuku alo yewodamiɔ? (Kpɔ nyɔta ci yí nyi “Ŋɖo Ami Emɔzɔnnuwo Kukua?” le Jutakpɔxɔ cɛ mɛ)

⁶ Étɛnŋ wa nɔ eo mɔ yegbɔjɔ ɖo èʒan mɛbuwo nɔ woakpedo eo nu nàwa ŋciwo eoɖekɛ èwanɔ sa. Ecɛ wawa gbɔnnɔnu koŋ nɔ èvaʒan alɔgɔnɔamɛtɔ ɖe nɔ akpedo eo nu alo ayi ci evio ɖe gbɔ. Taŋfuin, dàgbesun ji yí aku ehun alo ayi fiɖekɛ eoŋtɔ o. Ðo ŋsɛn degbexa le eo shi alo dègbekpɔkɔ enu nywiɖe o. Éwa ŋshishi haan! Taŋfuin, dàgbesun ji yí awa sugbɔ le enu ciwo yí ewanɔ sa mɛ o. Vɔ ɖo ŋwi mɔ yele veviɖe nɔ Yehowa koɖo mɛbuwo sugbɔ. Eyi mìatɛnŋ akando ji mɔ Yehowa mɔnɔŋje lé enuwo wawa do nɔ mì mɛ. Énya mɔ mìwo ji ɖɔ koɖo lɔnlɔn yí eyɛ koɖo mìwo kpena xɔsetɔwo nu gbejenɔŋ nɔ mì. Eyi taɖo, enu ci mìnyi le xomɛ yí xɛni.—1 Sam. 16:7.

7. Nɔ ci èkpɔɛ mɔ yedatɛnŋ aso Armagedɔn do dɔ yí eci ŋshishi mɛ ɖe, nyi yí atɛnŋ akpedo eo nuɔ?

⁷ Taŋfuin, ètɛnŋ ci ŋshishi mɛ ɖo èbui mɔ yedatɛnŋ nɔ agbe keke aso Armagedɔn do o. Nɔ enu wakɔ ahan nɔ eo ɖe, nyi yí atɛnŋ akpedo eo nuɔ? Tekpɔ yí aɖo ŋwi mɔ Yehowa xɔkɔ jigbɔnɖɛ fɛɛ gbɔxwe agu xexe vwin cɛ. (Ezai 30:18) Nyi yí taɖo Yehowa xɔkɔ jigbɔnɖɛ ahan ɔ? Yehowa xɔkɔ jigbɔnɖɛ nɔ amɛ miliɔn nɛniɖe ciwo yí dejeshi ɖɛ o nɔ woakpla nu so nu yí avatrɔ yi xlɔwo. (2 Piɛ 3:9) Eyi taɖo, hwenu ewawa nɔ eo mɔ yegbɔjɔɔ, tèkpɔ abu tamɛ kpɔ so amɛ sugbɔ ciwo yí akpɔ nyɔna so jigbɔnɖɛxɔxɔ Yehowa tɔ nu keŋ gbɔxwe vɔvɔnu lɔ avaɖo. Ao xomumɛtɔ ɖewo tɛnŋ le wo mɛ fɛɛ.

8. Lé cukaɖa ciwo wodonɔ go le shinshin hwenu atɛnŋ ado aya nɔ amɛshinshinwo doɔ?

⁸ Hwenu yí enuwo deyikɔ nɔ mì nywiɖeɔ, mìtɛnŋ nu enyɔ ɖewo alo wa ŋɖewo ciwo yí avave mì nu nɔ mìɖo exwe ɖekpokpwi can. (Ŋun. 7:7; Ʒaki 3:2) Le kpɔwɛ mɛ, hwenu yí egbejinɔtɔ Job le efun kpekɔɔ, yi nyɔwo vatrɔ “enyɔ yaawo”. (Job 6:​1-3, nwt) Gbesɔ kpe niɔ, edɔ̀lele tɛnŋ dɔ yí amɛshinshin ɖe awa ŋɖe alo anu enyɔ ɖe ci yí danu alo awa sa hwenu ele nywiɖe o. Le nyɔnɔnwi mɛɔ, mɛɖekɛ dele mì mɛ yí aji mɔ yeasɔ exwe ci yí le yeshi, edɔ̀ ci yelekɔ sɔ ɖo ŋkɔ yí axa awa nu alo anu enyɔ masɔgbewo nɔ amɛwo o. Nɔ mìvado jeshi mɔ mìwa afɛn yí nu enyɔ ɖe nɔ mɛɖe vayiɔ, mìɖo ahwlɛndo aɖe kuku ni.—Mat. 5:​23, 24.

ŊCI YÍ ANA YÍ ÀKPƆTƆ AKPƆKƆ JIJƆ

9. Nyi yí taɖo èɖo alɔn mɔ mɛbuwo le kpedo eye nuɔ? (Kpɔ foto lɔwo hɛnnɛ.)

⁹ Lɔn nɔ mɛbuwo akpedo eo nu (Gal. 6:2) Doŋkɔɔ, ètɛnŋ kpɔɛ mɔ yɛagbɔnnu nɔ eye. Nɔvinyɔnu ɖeka ci yí tɔ mɔ Gretl nu mɔ: “Hweɖewonuɔ, égbɔnnɔnu nɔŋ mɔ mabiɔ amɛwo mɔ wo le kpedo ŋnu, ɖo ŋkpɔɛni mɔ navanyi agban nɔ wo. Éxɔ gamɛ sugbɔ gbɔxwe ŋvatrɔ anyi susu yí vasɔ nyɛɖeki hwe yí valɔn yí xɔ kpekpedonu.” Hwenu yí èlɔn mɔ mɛbuwo le kpedo eye nuɔ, èɖeɖeɛ emɔ nɔ wo nɔ woakpɔ jijɔ ci yí tonɔ so enunana amɛ mɛ. (Edɔ. 20:35) Kankandoji li mɔ ajɔ ji nɔ eo nɔ èvakpɔ lé mɛbuwo lɔn eo yí gbejijiɛ mɔ yewoale bu nɔ eo do.

10. Nyi yí taɖo èɖo aɖonɔ ŋwi adonɔ akpeɔ? (Kpɔ foto lɔwo hɛnnɛ.)

¹⁰ Enu le jenɔŋ nɔ eo. (Kol. 3:15; 1 Tɛs. 5:18) Nɔ mɛbuwo wa enunywiwo nɔ mìɔ, éjenɔŋ nɔ mì. Vɔ mìtɛnŋ ŋlɔbe mɔ mìadasɛ enujeŋnamɛ mìwotɔ nɔ wo. Éle ahan gan, nɔ mìko nukwi yɛɛ yí nu nɔ mɛ lɔ mɔ akpe nɔ eoɔ, mìana yí mìwo xlɔwo akpɔɛ mɔ yewole veviɖe yí wowo nu jeŋ nɔ mì. Leah ci yí lenɔ bu nɔ amɛshinshinwo le Betɛli nu mɔ: “Ðeka le nɔvinyɔnu ciwo ŋlenɔ bu nɔ wo mɛ ŋwlɛnɔ enu nyɛkwinnyɛkwinwo ɖaɖaŋ yí sɔ donɔ akpe nɔŋ. Xomɛfafa nyɔgbe ciwo eŋwlɛnɔ lɔwo desunɔgbɔ o vɔ wovivinɔ nɔŋ. Enu lɔwo hlɛnhlɛn jɔnɔji nɔŋ sugbɔ. Éna yí ŋkpɔnɔ jijɔ yí kpɔɛni mɔ ŋciwo yí ŋwanɔ ni jenɔŋ ni.”

11. Lé àtɛnŋ akpedo mɛbuwo nu doɔ? (Kpɔ foto lɔwo hɛnnɛ.)

¹¹ Tekpɔ akpenɔdo mɛbuwo nu. Nɔ èzannɔ ao gamɛ koɖo ao ŋsɛn do mɛbuwo nuɔ, ádɔ yí dagbesɔnɔ susu daɖo eoŋtɔ cukaɖawo ji o. Elododo ɖeka nu le Afrika mɔ amɛshinshinwo le shigbe wema ciwo yí ɖɔ koɖo enukplamu veviwo nɛ. Vɔ nɔ amɛwo dehlɛn wema lɔwoɔ, wodatɛnŋ akpla ŋɖe so wo mɛ o. Eyi taɖo, shigbe “wema ɖeka ci mɛ agbe le” nɛɔ, ji gamɛ yí anunɔ enu ciwo èjeshi ɖɛ koɖo ŋciwo mɛ èto nɔ jajɛwo. Biɔnɔ enyɔ wo se yí aɖonɔ eto wo. Kpla wo ŋci yí taɖo wawa do agbenywinɔnɔse Yehowa tɔwo ji nyɔnɔ gashiagamɛ yí agbewɛ nɔ woakpɔnɔ jijɔ. Nɔ èwɛ yí jajɛwo vonɔŋ yí gbedonɔ ŋsɛn wo yí wonyi ao xlɔwoɔ, ádɔ yí àkpɔnɔ jijɔ.—Eha. 71:18.

12. Sɔ koɖo Ezai 46:4 ɖe, nyi Yehowa ɖo egbe mɔ yeawa nɔ amɛshinshinwoɔ? (Kpɔ foto lɔwo hɛnnɛ.)

¹² Do gbe ɖaɖa nɔ Yehowa nɔ ado ŋsɛn eo. Gaɖewomɛɔ, ètɛnŋ kpɔɛ mɔ enu cikɔ nɔ ye yí yekle. Ecɛ adɔ yí nagbɔjɔ keŋkeŋ. Vɔ, ɖo ŋwi mɔ Yehowa ɖo ŋsɛn haan. Bibla nu mɔ “enu decinɔ kɔ ni o yí dekponɔ gbeɖe o.” (Ezai 40:​28, nwt) Eyi taɖo ána eo ŋsɛn ci yí èʒan. (Ezai 40:​29-31) Le nyɔnɔnwi mɛɔ, Yehowa ɖo egbe mɔ yeakpedo eo nu. (Hlɛn Ezai 46:4.) Gbesɔ kpe niɔ, Yehowa wanɔ do yi gbeɖuwo ji tɛgbɛɛ. (Ʒoz. 23:14; Ezai 55:​10, 11) Nɔ èdo gbe ɖaɖa nɔ Yehowa ɔ, ána eo kpekpedonu ci èʒan. Le yi goduɔ, àvakpɔ lé hanci èlɔn eo sugbɔ do yí ecɛ adɔ eji ajɔnɔ eo koŋ.

13. Sɔ koɖo 2 Korɛntitɔwo 4:​16-18 ɖe, nyi mìɖo aɖonɔ ŋwiɔ? (Kpɔ foto lɔwo hannɛ.)

¹³ Ðonɔ ŋwi nɔ eoɖeki mɔ ao nɔnɔmɛ lɔ dani keke asɔyi o. Nɔ mìɖo ŋwi mɔ nɔnɔmɛ gbɔnnugbɔnnu ci mɛ mìle dani keke asɔyiɔ, átɛnŋ ana yí mìado ji le mɛ fafɛɖe. Bibla na kankandodji mì mɔ shinshin koɖo edɔ̀lele li nanɔ hwenu kleŋ ɖe. (Job 33:25; Ezai 33:24) Eyi taɖo, àtɛnŋ akpɔ jijɔ nɔ ènya mɔ ŋkeke nywiwo le ŋkɔ yí gbɔgbɔ nɔ ye yí ŋsɛn agbeva lanmɛ nɔ eo. (Hlɛn 2 Korɛntitɔwo 4:​16-18.) Vɔ nyi mɛbuwo atɛnŋ awa yí akpedo eo nuɔ?

LÉ MƐBUWO ATƐNŊ AKPEDO EO NU DO

14. Nyi yí taɖo amɛshinshinwo yɔyɔ koɖo wowo jijikpɔ le veviɖeɔ?

¹⁴ Jinɔ nɔviŋsu koɖo nɔvinyɔnu shinshinwo kpɔ blaŋblaŋ yí ayɔnɔ wo. (Ebre. 13:16) Étɛnŋ wa nɔ amɛshinshinwo mɔ yewoci akogo. Nɔviŋsu ɖeka ci yí tɔ mɔ Camille ci yí ci axomɛ nu mɔ: “Ŋnɔnɔ xɔmɛ so nyidin keke je fiɛfi. Eyi taɖo, ŋdannɔ ta nɔ ŋci nawa yí dɔmɛzi wanɔŋ keke. Gaɖewomɛɔ, éwanɔ nɔŋ mɔ ŋvatrɔ janŋta shinshin ci wolé do gaja mɛ nɛ.” Hwenu mìyi jikɔ amɛshinshinwo kpɔɔ, mìɖo ana yí woakannɔdo ji mɔ wole veviɖe nɔ mì yí mìgbelɔn wo. Taŋfuin gaɖewomɛɔ, mì pleŋ jinɔ mɔ mìayɔ amɛshinshin ɖe alo avayi ji kpɔ gan yí mìdesun ji yí wɛni o. Mɛɖekpokpui devo o. Eyi taɖo, nyi yí atɛnŋ akpedo mì nu yí mìajeshi “enu ciwo yí le veviɖe sɔwu” shigbe amɛshinshinwo gbɔ yiyi hannɛɔ? (Fili. 1:10) Étɛnŋ nyi mɔ amɛshinshinwo le ao hamɛ lɔ mɛ yí èji mɔ yeavayi ji wo kpɔ. Àtɛnŋ aŋwlɛ ŋɖe do exwe wema ji alo do fiɖe daɖɛ keŋ asɔ ɖonɔ ŋwi. Àtɛnŋ awa toto ɖe koŋ keŋ ayi jinɔ wo kpɔ. Ðo azan ɖe ɖɛ koŋ keŋ aɖonɔ ŋwi yí ayinɔ wo gbɔ.

15. Nyi yí atɛnŋ adɔ yí jajɛwo koɖo amɛshinshinwo anɔ juɔ?

¹⁵ Nɔ ènyi jajɛɔ, ètɛnŋ biɔbiɔ eoɖeki se mɔ nyiwo nu yeaxo nuxu so alo edɔ ciwo yí yeatɛnŋ awa nɔ amɛshinshinwo ma. Vɔ jika deɖo aso eo o. Tekpɔ anyi exlɔ nywi nɔ wo kpoŋ. (Elo. 17:17) Nɔ te yí axo nuxu nɔ amɛshinshinwo doŋkɔ alo le bɔbɔwo godu. Taŋfuin ètɛnŋ biɔ wo se mɔ kpukpui ciwo yí jɔnɔ ji nɔ wo ma alo nyiwo yí wosɔ munɔ munu le ɖevihwɛ mɛ ma. Ètɛnŋ gbeyɔ wo nɔ woavakpɔ JW Televiʒiɔn^® wana ɖe koɖo eo. Gbewa enuŋtɔŋtɔ ɖewo keŋ asɔ kpedo amɛshinshinwo nu. Le kpɔwɛ mɛ, àtɛnŋ akpedo wo nu woasɔ enu yoyuwo do wowo telefonu alo tablɛti ji alo awa kɔpi nɔ wema ɖewo ciwo wojikɔ akpla. Nɔvinyɔnu ɖeka ci yí tɔ mɔ Carol nu mɔ: “Wanɔ enu ciwo yí jɔnɔ jinɔ nɔ eo koɖo amɛshinshinwo. Ci ŋvashinshin ɛ yɛ can ɔ, ŋjinɔ mɔ mayi xwle enuwo, aɖu nu koɖo exlɔwo yí anɔ eju koɖo wo le texwe nyakpɔkpɔwo keŋ akpɔ enuwawa Yehowa tɔwo.” Nɔvinyɔnu ɖeka ci yí tɔ mɔ Maira yɛ nu mɔ: “Ðeka le anyi xlɔ nyɔnuwo mɛ ɖo exwe 90. Ésɔ exwe 57 yi gbeɖe ŋɖɛ. Vɔ blaŋblaŋ ɔ, ŋŋlɔnɔbe mɔ yɛnyi gan nɔŋ ɖo mìkonɔ nukwi yí gbekpɔnɔ fimuwo doju. Eyi nɔ mìdokɔ go cukaɖawoɔ, mìkpenɔdo mìwonɔnɔwo nu yí gbenanɔ kpla mìwonɔnɔwo.”

16. Nɔ mìkplɔ amɛshinshinwo yi dotoxwe ɖe, lé atɛnŋ akpedo wo nu doɔ?

¹⁶ Kplɔnɔ wo yi dotoxwe. To akpo nɔ amɛshinshinwo kplɔkplɔ yi dotoxweɔ, àtɛnŋ agbenɔ dotoxwe lɔ keŋ akando ji mɔ dotowo kpɔkpɔ wo gbɔ nywiɖe. (Ezai 1:17) Àtɛnŋ asun ji akpedo amɛshinshinwo nu nɔ èŋwlɛnɔ enyɔ ciwo yí dotowo nu kuso wo nu daɖɛ nɔ wo. Nɔvinyɔnu shinshin ɖeka ci yí tɔ mɔ Ruth nu mɔ: “Blaŋblaŋ hwenu yí ŋyinɔ dotoxwe nyɛɖekɛɔ, doto lɔwo dekpɔnɔ ŋgbɔ nywiɖe o. Doto lɔwo tɛnŋ nu enyɔ ɖewo shigbe mɔ: ‘Susu mɛ yí ao cukaɖa yɛ le, eɔlé edɔ̀ ba.’ Vɔ nɔ mɛɖe kplɔŋ yiɔ, lé doto lɔwo wanɔ nu do ŋnu do tonɔ akpo xesexese. Ŋdonɔ akpe nɔ nɔviŋsu koɖo nɔvinyɔnu ciwo yí zannɔ wowo gamɛ yí sɔ kplɔnɔŋ yi wo gbɔ.”

17. Kunuɖeɖedɔ kpaxwe ci amɛshinshinwo atɛnŋ awa koɖo mìɔ?

¹⁷ Wanɔ edɔ koɖo wo le kunuɖeɖedɔ lɔ mɛ. Taŋfuin ŋsɛn dele amɛshinshin ɖewo nu nɔ woawa so axomɛ yi axomɛ kunuɖeɖedɔ lɔ o. Àtɛnŋ ayɔ wo nɔ woavanɔ ju koɖo eo le jugbaja kunuɖeɖedɔ lɔ mɛ le kekevi gbɔa? Àtɛnŋ aji ʒinkpin ɖe nɔ nɔvi lɔ nɔ anɔ nyinɔnɔ do axa nɔ kekevi lɔ. Alo àkplɔ ao nukplavi ɖe yi amɛshinshin ɖe xomɛ nɔ míawa enukplakpla lɔ dojua? Hamɛmɛshinshinwo atɛnŋ awa toto keŋ awa kunuɖegbe yiyi bɔbɔ le amɛshinshin ɖe xomɛ nɔ wowo can ase vivi ni. Agbla ɖekpokpui ci mìaje yí asɔ do bubu amɛshinshinwo nuɔ, ájɔ ji nɔ Yehowa sugbɔ.—Elo. 3:27; Rɔm. 12:10.

18. Nyi nu mìaxo nuxu so le nyɔta ci yí gbɔgbɔ mɛɔ?

¹⁸ Nyɔta cɛ ɖo ŋwi nɔ mì mɔ Yehowa lɔn amɛshinshinwo yí wole veviɖe ni. Ahanke wole veviɖe nɔ mìwo ciwo yí le hamɛ lɔ mɛ hɛnnɛ nɛ! Kpokpo hwenu dele fafɛɖe o, vɔ to Yehowa kpekpedonu mɛɔ, àtɛnŋ akpɔtɔ akpɔkɔ jijɔ. (Eha. 37:25) Ci ènya mɔ ŋkeke nywiwo kpɔtɔ le ŋkɔ nɔ eo yí gbɔgbɔɔ, ádo ŋsɛn eo sugbɔ! Vɔ enyɔ ci mìanu so mɛ ciwo yí kpenɔ ŋkuvi do wowo xomumɛtɔ ɖe ci yí shin, wowo vi ɖe alo wowo xlɔ ɖe ci yí lé edɔ̀ nuɔ? Lé woawɛ akpɔtɔ akpɔkpɔ jijɔɔ? Mìakpɔ ɖoŋci nɔ nyɔbiɔse cɛwo le nyɔta ci yí gbɔgbɔ mɛ.