Agbenɔnɔ Koɖo Sumɔsumɔdɔ Bɔbɔ Nukplawema Nyɔsoxuwo

© 2025 Watch Tower Bible and Tract Society of Pennsylvania

7-13 JUILLET

MAWU NYƆ MƐ DƆKUNUWO ELODODO WEMA 21

Gɔnmɛɖose Nywi Ciwo ji Woawa do Keŋ Avoŋ le Xomu mɛ

w03 10/15 4 mm. 5

Lé Àwɛ Asɔ Gbeta Nywiwoɔ?

Nɔ wole hwlɛndoji yí sɔ gbetawoɔ, átɛnŋ dɔ yí woawa nu ŋɖɛmanyatɔ. Elododo Wema 21:5 kanxle mì mɔ: “ʒinxododo totomɛwo tɛnŋ kplɔ amɛ yì ele ɖuɖu mɛ. Vɔ, nɔ́ de nyi ʒinxodotɔ yi ɖeblɛ yi wa enuwo ɔ, eyi a va trɔsun wamɛnɔ.” Eyi taɖo jajɛwo ɖo ado ʒinxo keŋ gbɔxwe ado ta nyɔnuɖeɖe alo asuɖeɖe mɛ. Nɔ denyi ahan yɔ nɛɔ, enyɔ ci Ŋlɛshige dotɔ kanŋtata watɔ William Congreve nu le exwe sanŋdi 18 wo mɛ aɖyi wo nu. Énu mɔ: “Nɔ wole hwlɛndoji yí ɖe asu alo nyɔnuɔ, évavenɔ nɔ amɛ.”

g 7/08 7 mm. 2

Lé Asu Koɖo Ashi Awɛ Keke Avo

Sɔ̀ eoɖeki hwe. “Mí ŋgbe wa enu ɖekpokpwi koɖo ŋɔku alo egoyìyì o, vɔ amɛɖekihwehwe le dɔ nɔ amɛ ɖeka ɖeka a kpɔnɔ yi kpena shigbe amɛ ci yí le ŋkɔ ni ɛnɛ.” (Filipitɔwo 2:3) Cukaɖa sugbɔ vanɔ asu koɖo ashi gblamɛ nɔ wosɔ enyɔ sɔ xunɔ wowonɔnɔwo ji, vɔ wodesɔ wowoɖekiwo hwenɔ yí akpɔ lé woawɛ keŋ awa nu ɖaɖa wowonɔnɔwo gbɔ nywiɖe o. Nɔ wosɔ wowoɖekiwo hweɔ, ákpedo mɛɖeka mɛɖeka nu yí davajijiɛ mɔ ye nyɔ yí ajɔ o.

w06 9/15 28 mm. 13

“Kpɔ Jijɔ Koɖo Nyɔlun ci yí e ɖe Hwecinu e Nyi Ðajɛvi”

¹³ Nyi yí atɛnŋ ajɔ do asu koɖo ashi ji nɔ wodekpɔkpɔ wowonɔnɔwo do ŋwiɔ? Gbɔxwe woakpɔ nyɔ gbɔɔ, défanɔ o. Le kpɔwɛ mɛ, étɛnŋ nyi mɔ asu koɖo ashi lɔ xonɔ nuxu manyɔmanyɔwo nɔ wowonɔnɔwo yí evanyi enumamɛ nɔ wo. (Elododo Wema 12:18) Shigbe lé mìkpɔɛ le nyɔta ci yí vayi mɛ nɛɔ, ecɛ hɛnnɔ cukaɖawo vɛ keke yitɔxu defanɔ o. Elododo ɖeka nu le Bibla mɛ mɔ: “É nyɔwu mɔ wo a nɔ̀ zogbe mɛ sɔwu a nɔ̀ koɖo nyɔlun ci yí ɖeblɛ donɔ dɔmɛzi yi lɔnnɔ evu wawa.” (Elododo Wema 21:19) Nɔ nɛnɛ nyɔnu yí ènyiɔ, biɔ eoɖeki se mɔ, ‘Lé ŋwanɔ nu do dɔ yí asunyɛ dejinɔ mɔ yeanɔ eju koɖoŋ a?’ Bibla nu nɔ mɛ ciwo yí ɖe nyɔnuwo mɔ: “Ŋsu ɖo ashiwo, mí a lɔnnɔ míwo shiwo, yi a donɔ vivi nɔ wo.” (Kolosetɔwo 3:19) Nɔ èɖe nyɔnuɔ, biɔ eoɖeki se mɔ, ‘Lé ŋwanɔ nu do dɔ yí ashinyɛ jinɔ mɔ yeava yi nɔ fiɖe keŋ agbɔn kpɔa?’ Nyɔnɔnwi yɔ, wodavanu amɔ wodenya gbɔxwe yí wa hashi o. Nɔ nɛnɛnu vajɔɔ, woakan seŋ so cukaɖa lɔwo nu yí anu nyɔ ciwo le xomɛ nɔ amɛ.

Bibla mɛ Nuveviwo

w05 1/15 17 mm. 9

Nyɔ Ciwo Wonu ɖɛ so Mawu Fyɔɖuxu lɔ nu Vajɔ do ji

⁹ Shigbe amɛ kpoŋ ɖe ci yí nɔ sɔkɛtɛ ji nɛɔ, Yesu vanyi Efyɔ sɛnŋ ɖeka. Wodri mɔ yɛkukuɔ esɔ ɖeka yí Bibla mɔ yɛle dumɛ nɔ ahwawawa. (Elododo Wema 21:31) Enyɔdasɛ 6:2 nu mɔ: “Ŋ ɖe ekɔ yí kpɔ esɔ ɣi ɖeka le ŋkɔ nɔ ŋ. Esɔkutɔ lɔ hɛn aŋugu ɖashi. Wo cɔn efyɔkuku ɖeka nɔ esɔ kutɔ lɔ. É tó nɔ ketɔwo jiɖuɖu. É gbe to nɔ jiɖuɖu xɔxɔ.” Gbesɔ kpe niɔ, ehakpatɔ Davidi ŋwlɛ so Yesu nu mɔ: “Tɔhonɔ a kpedo ao fyɔju nu yí a yì ŋkɔ. Ao fyɔju a tɔ́ so Siɔn, yi ayì ŋkɔ keke a kpacɛ nɔ ao ketɔnɔwo le wowoŋtɔwo juwo mɛ!”​—Ehajiji Wema 110:2.

14-20 JUILLET

MAWU NYƆ MƐ DƆKUNUWO ELODODO WEMA 22

Gɔnmɛɖose Nywi Ciwo ji Woawa do Keŋ Asɔ Hɛn Ðeviwo Nywiɖe

w20.10 27 mm. 7

Nɔ Ðeviɛwo Shin ɖe, Woasɛn Mawua?

⁷ Nɔ mínyi asu koɖo ashi yí ji mɔ yewoaji viɔ, míbiɔ míwoɖekiwo se mɔ: ‘Mìnyi gbɔngbɔnmɛmɛwo yí gbesɔnɔ mìwoɖekiwo hwe keke Yehowa acan mì mɔ, mìwo le le bu nɔ vifin vevi lɔa?’ (Eha. 127:3, 4) Nɔ ènyi jila vɔɔ, biɔ eoɖeki se mɔ: ‘Ŋkplakɔ vinyɛwo mɔ edɔ sɛnsin wawa nyi enunywia?’ (Ŋun. 3:12, 13) ‘Ŋwanɔ ŋɖekpokpui ci ji ŋsun keŋ glɔnnɔ ta nɔ vinyɛwo so ŋcilanmɛ fɔku koɖo agbe dɔndɔn nɔnɔ ciwo yí le Satana xexe lɔ mɛ shia?’ (Elo. 22:3) Datɛnŋ axe mɔ nɔ cukaɖa ciwo pleŋ viowo atɛnŋ ado go o. Datɛnŋ awɛ ahan o. Vɔ àtɛnŋ adra wo do vivivi koɖo lɔnlɔn yí akpla wo lé woakando Bibla ji keŋ akpɔnɔ nukplamu ciwo yí akpedo wo nu woato agbemɛ cukaɖawo mɛ. (Hlɛn Elododo Wema 2:1-6.) Le kpɔwɛ mɛ, nɔ xomumɛtɔ ɖe mi Yehowa sɛnsɛn ɔ, kpedo viowo nu nɔ woakpla Mawu Nyɔ lɔ keŋ anya nu ci yí taɖo ele veviɖe mɔ mìakpɔtɔ anɔ gbeji nɔ Yehowa. (Eha. 31:23) Alo nɔ amɛ vevi ɖe ku nɔ míɔ, dasɛ Bibla kpukpui ɖewo nɔ viowo ciwo yí atɛnŋ akpedo wo nu nɔ woakpanŋkɔ vevisese lɔ keŋ akpɔ fafa.​—2 Kor. 1:3, 4; 2 Tim. 3:16..

w19.12 26 mm. 17-19

Jilawo: Mína kpla míwo viwo nɔ woalɔn Yehowa

¹⁷ Tɔ̀ ekpla nana viowo so vifinmɛ. Jila ciwo nu mìxo nuxu so vayi na kpla wowo viwo so vifinmɛ. (Elo. 22:6) Mìasɔ Timɔte ci yí vazɔn mɔ koɖo apotru Pɔlu kpɔwɛ. Timɔte nɔlɔ, Enisi koɖo mamalɔ, Loisi na kpla yi so “ɖevi mɛ.”​—2 Tim. 1:5; 3:15.

¹⁸ Jean-Claude koɖo Peace can nyi asu koɖo ashi le Côte d’Ivoire. Wokpe ji yí hɛn wowo vi amadɛn lɔwo yí wolɔn Yehowa keŋ yí sinkɔ. Nyi yí kpedo wo nu wotɛnŋ wɛɔ? Wosran Enisi koɖo Loisi kpɔwɛ. Womɔ: “Mìje agbla yí kpla Mawu Nyɔ lɔ wo so vifinmɛ. Mìtɔɛ ji so hwenu mìji wo zeɖeka.”​—2 Ese. 6:6, 7.

¹⁹ ‘Woaje agbla yí akpla’ Yehowa Nyɔ lɔ ɖeviwo gɔnmɛ ɖe? Enyɔgbe “je agla yí akpla nu” gɔnmɛ yí nyi mɔ “woakpla nu amɛ lɔ yí aɖonɔ ŋwi ni alo atrɔnɔ to enyɔ lɔ ji ni.” Gbɔxwe jilawo awɛɔ, woɖo azan gamɛ anɔnɔ koɖo wowo viwo. Atɛnŋ awa dɔmɛzi nɔ jilawo hweɖewonu mɔ, woatrɔ aɖonɔ ŋwi emɔdasɛnamɛ nɔ wowo viwo. Vɔ jilawo atɛnŋ ate kpɔ akpɔɛ mɔ yɛnyi emɔ ci ji yewoato yí akpedo yewo viwo nu nɔ woamɔŋje Mawu Nyɔ lɔ mɛ yí awa do ji.

w06 4/1 9 mm. 4

Vida koɖo Vinɔwo​—Mínyi Kpɔwɛ Nywi nɔ Míwo Viwo

Nyɔnɔnwi yɔ, ɖeviwo wanɔ vihwɛwonu, to akpo nɔ nɔnɔ yí gbesɛnnɔ eto. (Gɔnmɛjeje 8:21) Lé vida koɖo vinɔwo awɛɔ? Bibla nu mɔ “Ðeviwo wanɔ sukunuwo. Vɔ, nɔ e dɔn to nɔ wo ɔ, wo a kpla enu hunnɔwo wawa.” (Elododo Wema 22:15) Mɛɖewo kpɔɛni mɔ nyɔ cɛ nyi xomɛvevenu yí do xoxwi. Le nyɔnɔnwi mɛɔ, Bibla gbe mɔ woŋgbewa tamɛsɛnnu alo atafu amɛ do o. Nyɔgbe “dɔn to nɔ,” gɔnmɛɖeɖe tiin yí nyi acɛ ci vida koɖo vinɔwo ɖo yí adɔn to nɔ wowo viwo koɖo lɔnlɔn yí wodasɔ wo sɔ wa yeye o. Eyi woawɛ keŋ nɔ esɔ mɛ anyɔ nɔ ɖevi lɔwo.​—Ebretɔwo 12:7-11.

Bibla mɛ Nuveviwo

w21.08 22 mm. 11

Kpɔ Jijɔ le Edɔ Ciwo yí Ètɛnŋ Wanɔ nɔ Yehowa mɛ

¹¹ Mìwo can, mìatɛnŋ ana mìwo jijɔ asugbɔ doji nɔ mìlenɔ bu do edɔ ɖekpokpui ci woɖo nɔ mì le Yehowa sumɔsumɔ mɛ. “Zan [ao] gamɛwo pleŋ” le eŋɛnywidradradɔ lɔ mɛ yí awanɔ hamɛ lɔ dɔwo veviɖe. (Edɔ. 18:5; Ebre. 10:24, 25) Dranɔ bɔbɔ lɔwo do nywiɖe keŋ atɛnŋ ana ɖoŋci ciwo mɛ ŋsɛndoamu le. Nɔ wona sukluvidɔ ɖe eo le kwɛshila dodomɛ bɔbɔwo mɛɔ, sɔɛ mɔ yɛnyi nuvevi. Nɔ womɔ eo le do alɔ hamɛ lɔ dɔ ɖeɔ, nɔnɔ gamɛ ji yí anyi mɛ ci ji woakando. Ŋgbewa nu shigbe mɔ edɔ ci woɖo nɔ ye dele veviɖe keke yeazan gamɛ do nu o. Tekpɔ nɔ ao nujikpekpewo anyɔkɔ doji. (Elo. 22:29) Nɔ èlenɔ bu do gbɔngbɔnmɛdɔwo koɖo dɔdashiwo veviɖeɔ, àwanɔ ŋkɔyiyi kaba yí jijɔ ci àkpɔ asugbɔ. (Gal. 6:4) Agbenɔ fafɛɖe nɔ eo mɔ àkpɔ jijɔ nɔ mɛbuwo xɔ dɔdashi ci èjikɔ mɔ yeaxɔ.​—Rɔm. 12:15; Gal. 5:26.

21-27 JUILLET

MAWU NYƆ MƐ DƆKUNUWO ELODODO WEMA 23

Gɔnmɛɖose Nywi Ciwo ji Woazɔn do so Ahamuamɛ Nunu nu

w04 12/1 19 mm. 5-6

Nyà lé Azannɔ Ahamuamɛ do

⁵ Nyi yí ajɔ nɔ mɛɖe nunɔ aha, vɔ yí deɖo sɛnxu niɔ? Nɔ mɛɖewo nu aha sugbɔ can ɔ, wodekpɔ wo yí nyanɔ o. Eyi taɖo, nɔ wobui mɔ yɛdawa ŋɖe nɔ yewo alo ada hɛn nu le yewo nu gan yí nuinui ahan ɔ, anyi woblebleɛ wowoɖekiwo. (Ʒeremi 17:9) Viviviɔ, mɛɖe tɛnŋ vatrɔ ahanumutɔnɔ yí avanyi “hwashi nɔ vɛn sugbɔ nunu.” (Titu 2:3) Ci wemaŋwlɛtɔ Caroline Knapp xoxoɔ nuxu so ŋɖewo ciwo yí dɔ mɛɖe vanyinɔ ahanumutɔnɔ nuɔ, énu mɔ: “Viviviɔ, édana hɛn nu le amɛ lɔ nu le manyamanya mɛ yí wodasɛnŋ adri o.” Aha nyi amɛwutɔ ci yí desonɔ kuzu nɔ amɛ o!

⁶ Gbebu tamɛ kpɔ so amɛkanxlenyɔ ci Yesu nu nu: “míkpɔ míwoɖekiwo ji nywiɖe, nɔ sukanuɖuɖu, aha sugbɔ nunu koɖo enulolokpɔ agbe mɛ tɔwo ŋgbenyi agban akpɛn míwo jiwo gbeɖe o keŋ nɔ ŋkeke ŋtɔ́ ŋgbevacu mí le avomɛ shigbe lé wojenɔ fɛnca mɛ nɛ o. Ðo ŋkeke ŋtɔ́ daxla mɛɖe do le nyigban lɔ keŋkeŋ ji o.” (Luiki 21:34, 35) De sugbɔ woaɖu nɔ gbɔsulan gbɔxwe ahwɛn o. Eyi taɖo, de sugbɔ woanu nɔ aha gbɔxwe akpo alo anyi ɖyiɖɔnɔ le gbaza alo le gbɔngbɔn mɛ o. Nyi yí ajɔ do mɛɖe ji hwenu enu aha mu yí Yehowa ŋkeke lɔ va le avomɛɔ?

it-1 1222

Ahanumu

Bibla gbe. Bibla gbe mɔ woŋgbenu aha keke amu o. Ŋɖɛnyatɔ ci yí ŋwlɛ Elododo Wema yí esɔgbe pɛpɛpɛ koɖo jɔjɔmɛnununya nu alɔzu ciwo yí tonɔ le aha sugbɔ nunu mɛ. Ékanxle mì mɔ: “Á nyina do amɛ ciwo yí nunɔ vɛn sugbɔ koɖo ŋsɛn ha. Amɛ hunnɔwo wanɔ evu sugbɔ koɖo enyɔ dɔndɔn sugbɔ. Wowo ŋkuwo bianɔ yi wo jwin ni yi a do akpa wowoɖekiwo nu. Wo a ze nɔ cukaɖa hunnɔwo pleŋ dru. Wa blɛu ɖaɖa vɛn gbɔ. É nya kpɔkpɔ yi bia. É klɛnnɔ le kɔnkpu mɛ [hwenu wokpɔkpɔɛɔ, édronɔ amɛ]. Hwecinu e nui ɔ, é yìnɔ xomɛ nywiɖe [hwenu efanɔ to hlokwi mɛ nɔ amɛ ɖɔɖɔɖɔ]. Vɔ, le vɔvɔnu ɔ, é ɖunɔ amɛ shigbe edan ɛnɛ [édonɔ edɔ̀ amɛ (le kpɔwɛ mɛ, édonɔ ejidɔ̀ amɛ) eyi le susu mɛɔ, (édɔ yí wowunɔ juinjuindɔ̀, cinɔ dɔnmanyɔ mɛ), eyi agbe wu amɛ dru]. Vɛn dɔ yí a kpɔ enu kpotuwo. [viviviɔ, aha sɛnŋ nunu danɔ hɛn nu le susu nu nɔ amɛ; wodegbewanɔ nu do amɛwo tɔ ji o; ŋkuviwo atɔ tɔntɔn; woale nuxu maɖotawo xokɔ shiinn koɖo ŋsɛn; nɛnɛnmɛ degbeɖunɔ yiɖekiji o]. Ao susu mɛ a xa [lé wobunɔ tamɛ kpɔ do yí gbewanɔ nuwo do sa atɔ trɔtrɔ].”​—Elo 23:29-33; Oz 4:11; Mat 15:18, 19.

Enuŋwlɛtɔ lɔ gbexo nuxu so lé enu wanɔ nɔ ahanumutɔnɔwo: “Nɔ́ e mlɔ anyi ɔ, a bu mɔ ye le axu blabla ji [éwanɔ ni shigbe mɛ ci yí kukuɔ shiku yí caka yí gbebu do yiɖeki hannɛ]. ‘E kpɔ yiɖeki mɔ yele anyinɔ̀nɔ̀ le tɔjihun mɛ’ [shigbe lé ehwi dana hɛn tɔjihun nɛɔ, ahanumunɔwo gbe le afɔku mɛ, gbazavisese, evuwawa, koɖo ebuwo]. ‘A nu mɔ, Wo xo ŋ, vɔ dé wa ŋɖe nɔ ŋ gbeɖe o. Wo xo ŋ, vɔ ŋ de ɖoŋwi o [eyi ahanumutɔnɔ nunɔ nɔ yiɖeki. Déɖonɔ ŋwi ŋci yí jɔ do ji koɖo vevisese ci ehɛn va yiŋtɔ ji o]. Evyɛ ɔ, ŋ da tɛnŋ fɔn jete o. Ŋ ʒan aha bu [ecɛyɛɔ, éŋlɔ be ŋsɛn ci aha kpɔ do ji, vɔ étrɔ hwashi nɔ aha sugbɔ nunu yí gbejinɔ mɔ yeanu sugbɔ do ji lé yekpe ji do].’” Áje abɔ, ɖo ézannɔ eho sugbɔ do aha mɛ yí wodegbekannɔdo ji o. Eyi evatrɔnɔ edɔɖemawatɔ.​—Elo 23:20, 21, 34, 35.

Bibla mɛ Nuveviwo

w04 11/1 31 mm. 2

Enyɔbiɔse Ciwo yí so yi Hlɛntɔwo Gbɔ

Le kpɔwɛ mɛ, gangangandɔ̀ tɛnŋ nyi enu sugbɔ ɖuɖu, vɔ de ahan enyinɔ gashiagamɛ o. Nɔ mɛɖe kpɛn sugbɔɔ, étɛnŋ nyi mɔ edɔ̀ yí ele. Gangangandɔ̀ tɛnŋ nyi ehunmɛnu nɔ mɛɖewo. Mìɖo anya mɔ gangangandɔ̀ nyi lé wokpɔnɔ mɛɖe do, vɔ enu sugbɔ ɖuɖu yɛ nyi susu ci yí le mɛɖe shi do ŋɖuɖu nu. Gangangan gɔnmɛ yí nyi “lé mɛɖe klo alo gangan le gbaza mɛ do,” vɔ enu sugbɔ ɖuɖu gɔnmɛ nyi “mɛɖe ci yí nyi enuɖutɔ yí dekpɔ ŋɖuɖu yí gbenɔ ɖɛ o.” Eyi taɖo, de gangangan mɛ yí enu sugbɔ ɖuɖu le o, vɔ ényi lé mɛɖe wanɔ nu do nɔ ekpɔ ŋɖuɖu. Mɛɖe tɛnŋ klo alo ale tralɛlɛ gan yí aɖunɔ enu sugbɔ. Gbesɔ kpe niɔ, enyɔ lɔ yí nyi mɔ fini mɛɖekaɖeka leɔ, yi gbaza yí nɔnɔ shi.

28 JUILLET–3 AOÛT

MAWU NYƆ MƐ DƆKUNUWO ELODODO WEMA 24

Dò Ŋsɛn Eoɖeki ɖɛ nɔ Cukaɖa Gbɔnnugbɔnnuwo

it-2 563 mm. 4

Yumɛcici

Kristotɔwo kpɔnɔ jijɔ so efɛn nywi ci woavacu nɔ mɛ ciwo yí do ji nu. Yesu nu so efɛn ci woacu nɔ wo nu mɔ: “Mɛ ciwo yí wocikɔ yumɛ nɔ do enujɔjɔɛwawa ŋci kpɔnɔ jijɔ, ɖo wowotɔ yí nyi jeŋkwi mɛ Fyɔɖuxu lɔ.” (Mat 5:10) Ci wonya mɔ fɔnfɔnsoku li yí gbekando Mɛ ci ji Agu agbe tɔ jɔ soɔ, édo ŋsɛn wo. Édo ŋsɛn wo sugbɔ yí wonɔ gbeji nɔ Mawu ci yumɛcitɔ xomɛvetɔwo do agbeya nɔ wo keke yí ji mɔ yewoawu wo can. Ŋci yí to le mɛ yí nyi mɔ Yesu ku lɔ kpedo wo nu yí wodegbevɔn nɔ lé woado agbeya nɔ wo yí awu wo do o. (Ebre 2:14, 15) Lé Kristotɔ ɖe kpɔnɔ nuwo do le veviɖe hwenu ekpɔtɔ nɔnɔ gbeji le yumɛcici sɛnŋsɛnŋ ɖe mɛ. “Susu ciwo yí so Yesu Kristo gbɔ ɔ, le nɔ̀ mí mɛ hɛnnɛ. . . É hwe yiɖeki kpɔtɔ, yi setonu keke sɔyì eku mɛ le [aci] nu.” (Fili 2:5-8) “É wa enu lɔ ahan sɔ kudo jijɔkpɔkpɔ ci yí Mawu sɔ daɖo ŋkɔ ni ŋci.”​—Ebre 12:2; gbekpɔ 2Kor 12:10; 2Tɛs 1:4; 1 Piɛ 2:21-23.

w09 12/15 18 mm. 12-13

Eji le Kpɔtɔ Ajɔnɔ eo le Cukaɖawo Hwenu

¹² Elododo Wema 24:10 nu mɔ: “Nɔ́ e gbɔjɔ le cukaɖawo hwenu ɔ, e gbɔjɔnɔ nyɔnɔnwitɔ.” Elododo bu nu mɔ: “Nɔ́ amɛ ɖe xa le yi ji mɛ ɔ, eyi yi kla a dasɛ xaxa lɔ.” (Elo. 15:13) Kristotɔ ɖewo gbɔnɔjɔ keke ami amɛɖekɛnukplakpla wawa yí wodegbebunɔ tamɛ kpɔ so Mawu Nyɔ lɔ nu o. Wovawanɔ gbedoɖa lɔ ɖewoɖewo yí wodegbegogonɔ wowo kpena Kristotɔwo o. Nɔ mìanu nyɔnɔnwi teŋ ɔ, ŋshishimɛnɔnɔ dana hɛn enu le amɛ nu.​—Elo. 18:1, 14.

¹³ Ebu yí gbenyi mɔ, enuwo bubu kpɔ nywiɖe kpenɔdo mì nu mìwo susu nɔnɔ mìwo gbe ji. Ecɛ dɔ mìvonɔŋ yí kpɔnɔ jijɔ. Davidi ŋwlɛ mɔ: “Anyi Mawu, ŋ jiji a wa enu ci yí E dro. Ŋ jeshi Ao nukplamuwo.” (Eha. 40:8) Nɔ nuwo vatrɔ le mìwo gbe mɛɔ, enu ci mìavakpɔtɔ nɔ yí nyi mɔ mìawanɔ gbɔngbɔnmɛdɔwo. Le nyɔnɔnwi mɛɔ, ŋci mìawa yí mìdanɔnɔ ŋshishi mɛ yí nyi mɔ mìawanɔ gbɔngbɔnmɛdɔ ciwo yí ahɛn jijɔkpɔkpɔ vɛ nɔ mì. Yehowa nu nɔ mì mɔ mìatɛnŋ akpɔ jijɔ nɔ mìhlɛnnɔ yi Nyɔ lɔ yí gbejini gashiagamɛ. (Eha. 1:1, 2; Ʒaki 1:25) Enuŋwlɛŋwlɛ Kɔkɔɛ lɔwo koɖo Kristotɔwo bɔbɔwo nanɔ “nuxu viviwo” mì ciwo yí donɔ ŋsɛn mì yí gbewɛ yí eji jɔnɔ mì.​—Elo. 12:25; 16:24.

w20.12 15

Enyɔbiɔse Ciwo yí so yi Hlɛntɔwo Gbɔ

Elododo Wema 24:16 nu mɔ: “Nɔ́ amɛ nywi jwin ze adrɛ ɔ, a gbe fɔn jete ke.” Mɛ ci yí wakɔ nuvɔn gbɛmɛgbɛmɛ yí Mawu sɔ kini nu yí kpukpui cɛ xokɔ nuxu soa?

Le nyɔnɔnwi mɛɔ, denyi gɔnmɛsese ci yí le kpukpui cɛ nu nɛ o. Vɔ mɛ ci yí dokɔ go cukaɖawo gbɛmɛgbɛmɛ, gan yí dokɔ ji nu yí exokɔ nuxu so.

Eyi taɖo enyɔ cɛwo pleŋ dasɛ mɔ denyi nuvɔnwawa nu yí Elododo Wema 24:16 xokɔ nuxu so o, vɔ cukaɖawo koɖo nɔnɔmɛ sɛnŋsɛnŋwo mɛ toto gbɛmɛgbɛmɛ nu yí exokɔ nuxu so. Le xexe vwin cɛ mɛ gbɛɔ, amɛjɔjɔɛ atɛnŋ ado go lanmɛsɛn cukaɖa alo cukaɖa buwo. Acɛkpakpawo tɛnŋ ci yumɛ ni do yi xɔse ŋci. Vɔ átɛnŋ akando ji mɔ Mawu akpedo ye nu yí yeakpanŋkɔ nɔnɔmɛ lɔ keke aɖu ji. Ci èkpɔɛ ɖe, enuwo demlɛnɔ nɔ Mawu sɛntɔwo nywiɖe ba? Nyi yí taɖoɔ? Mìkando ji mɔ “[Yehowa] fɔnnɔ amɛ ciwo yí jwin tɔte. Tɔhonɔ [kpenɔdo] amɛ ciwo yí le cukaɖa mɛ nu.”​—Eha. 41:1-3; 145:14-19.

Bibla mɛ Nuveviwo

w09 10/15 12

Enyɔbiɔse Ciwo yí so yi Hlɛntɔwo Gbɔ

Le Bibla hwenuwoɔ, nɔ ŋsu ɖe ji mɔ ‘yeaɖo xomu’ alo aɖe nyɔnuɔ, éɖo abiɔ yiɖeki se mɔ, ‘Ŋle gbesɔsɔ yí ale bu nɔ ashinyɛ koɖo evi ciwo taŋfuin mìavaji le esɔ mɛa?’ Gbɔxwe ŋsu ɖe aɖe nyɔnuɔ, éɖo awa ŋɖeka. Eyi nyi mɔ ale bu nɔ yi bo koɖo yi jinukuwo. Wema ci woyɔnɔ mɔ Today’s Ŋlɛshigbe mɛ tɔ dre kpukpui cɛ mɛ mɔ: “Ŋgbeɖe nyɔnu keke avayikan nàɖo axwe, nɔ dèdra ao bojiwo do o, eyi àkando ji mɔ àtɛnŋ ahɛn eoɖeki.” Gɔnmɛɖose cɛ gbewawa dɔ egbɛa?

Ɛɛ. Ŋsu ci yí jikɔ mɔ yeaɖe nyɔnu ɖo adra do keŋ gbɔxwe ado ta yi mɛ. Nɔ ele gbesɔsɔ le gbaza mɛɔ, éɖo awa dɔ. Nyɔnɔnwi enyi mɔ xomu ji kpɔkpɔ denyi gbaza mɛ nyɔ ɖekɛ o. Mawu Nyɔ lɔ nu mɔ ŋsu ci yí dele bu nɔ yi xomu le gbaza mɛ, lé enu wanɔ ni do koɖo le gbɔngbɔn mɛɔ, yɛnyina wu mɛ ci yí deɖo xɔse o! (1 Tim. 5:8) Eyi taɖo, gbɔxwe ɖajɛvi ɖe aɖe nyɔnuɔ, éɖo abiɔ nyɔ cɛwo yiɖeki se: ‘Ŋsun nyɛɖeki ji yí hɛn keke avakpɔ anyi xomu mɛ tɔwo gbɔa? Ŋle gbesɔsɔ anyi gbɔngbɔn mɛ xomutatɔa? Natɛnŋ avawa edɔ ci yí nyi woakpla Bibla koɖo amɛ shi koɖo amɛ ŋtɔ viwoa?’ Mawu Nyɔ tɛ gbe do edɔ vevi cɛwo ji.​—2Ese. 6:6-8; Efe. 6:4.

Eyi taɖo, ɖayɛvi ci yí jijiɛ nyɔnu aɖe ɖo abu tamɛ kpɔ nywiɖe so gɔnmɛɖose ci yí le Elododo Wema 24:27 mɛ nu. Devɔ o, cugbejɛvi ci yí jijiɛ asu aɖe can ɖo abiɔ yiɖeki se mɔ yedra do ɖɛ nɔ edɔ ci yí nyi woanyi nyɔnu alo vinɔ ma. Mɛ ciwo yí ɖe nɔnɔ yoyu ɖo abiɔ nyɔ ɖekɛ lɔ ŋmɛ wowonɔnɔwo se so lé woahɛn ɖeviwo do nu. (Luiki 14:28) Tamɛbubukpɔ so enuwo nu ahan atɛnŋ akpedo Mawu mɛwo nu yí woaze nɔ cukaɖawo yí akpɔ jijɔ le xomu gbenɔnɔ mɛ.

4-10 AOÛT

MAWU NYƆ MƐ DƆKUNUWO ELODODO WEMA 25

Gɔnmɛɖose Ciwo Akpedo mì nu Mìawa Ðaŋ Axonɔ Nuxu

w15 12/15 19 mm. 6-7

Zan Ŋsɛn ci yí le ao ɖe Shi yí Asɔ wa Enunywi

⁶ Enyɔ ciwo yí le Elododo Wema 25:11 mɛ dasɛ lé ele veviɖe do mɔ woakpɔ gamɛ nywitɔ ci ji woaxo nuxu le: “Enyɔ jɔjɔɛ nunu do gamɛ jɔjɔɛ ji le shigbe atɔ shikatɔ ci yí le egacuho gban mɛ ɛnɛ.” Atɔ shikatɔ nyanɔ kpɔkpɔ keke. Vɔ nɔ wosɔ do egacuho gban mɛɔ, édɔ yí egbevanyanɔ kpɔkpɔ doji haan. Ahanke mìwo nyɔwo ci mìnu do gamɛ nywitɔ ji aɖo ŋsɛn yí agbekpedo amɛ nu nɛ. Lé anyi ahan doɔ?

⁷ Mɛ ciwo mìxonɔ nuxu nɔ tɛnŋ ʒan mìwo nyɔwo, vɔ nɔ mìdedo jeshi gamɛ nywitɔ ci ji mìanui leɔ, átɛnŋ dɔ yí wodagbese enyɔ lɔ gɔnmɛ o. (Hlɛn Elododo Wema 15:23.) Le kpɔwɛ mɛ, le Mars 2011 mɛɔ, nyigbanhumhun koɖo jihɔnshi ɖeka da hɛn nu le eweyixɔxu nɔ Japon. Amɛ ci yí awu 15000 yí ku. Ci enujɔjɔ lɔ dexla Yehowa Kunuɖetɔ ciwo yí le hunnɔ do can ɔ, woji gamɛ yí zan Bibla yí sɔ kpedo mɛ ciwo amɛ vevi ku nɔ nu. Amɛ sugbɔ ciwo yí le eju lɔ mɛ desɛnnɔ Mawu o. Buda yí amɛwo sɛnnɔ le afishiafi yí wodenya Bibla nukplakpla nyɔ ɖe o. Ci jihɔnshi gangan lɔ da hɛn nu ɖegbɔɔ, mìwo nɔviwo kpɔɛ mɔ yidele veviɖe mɔ yewoaxo nuxu so fɔnfɔnsoku mɔkpɔkpɔ lɔ nu nɔ mɛ ciwo ji enu jɔ do yí woseseɛ vevi o. Vɔ enunywi ci wowa yí nyi mɔ wowa ɖaŋ xo nuxu yí sɔ kpedo amɛwo nu yí gbezan Bibla yí sɔ dasɛ ŋci yí taɖo enubaɖawo jɔjɔ do amɛmanyaɖewo ji.

w15 12/15 21 mm. 15-16

Zan Ŋsɛn ci yí le ao ɖe Shi yí Asɔ wa Enunywi

¹⁵ Lé mìnu nyɔ ɖe do yí adasɛ lé enyɔ ci mìnu lɔ le veviɖe do. Ci Yesu xo nuxu le Ʒuifuwo nukplaxu nɔ yi xomɛtɔwo le Nazarɛtiɔ, “enyɔvivi ciwo yí tokɔ le aglan mɛ ni kpaca wo.” (Luiki 4:22) Enyɔviviwo fanɔ akɔn nɔ mì yí degbɔnɔjɔ amɛ o. Le nyɔnɔnwi mɛɔ, enyɔvivi nunu kpenɔdo amɛ nu wowanɔ enunywi. (Elo. 25:15) Mìatɛnŋ awa Yesu tɔ han yí awa ɖaŋ axonɔ nuxu nɔ amɛwo, ányi xlɔ koɖo wo yí agbesɔnɔ eɖe le lé enu wanɔ nɔ wo ji. Ci Yesu kpɔ agbla ci amɛahwa ɖeka je yí ɖo to yi nuxuɔ, éku ŋshishi nɔ wo ‘yí tɔ enu sugbɔ kplakpla wo.’ (Maki 6:34) Hwenu wozu Yesu can ɔ, dékan nyɔ nɔ amɛ o.​—1 Piɛ 2:23.

¹⁶ Woasɔ aye sɔ xo nuxu koɖo egbe fafa tɛnŋ gbɔnnu, nɔ mìjeshi mɛ ci mìxokɔ nuxu nɔ nywiɖe. Mìtɛnŋ kpɔɛ mɔ mìvo yí axo nuxu lé edro mì do. Étɛnŋ nyi ahan nɔ mìxokɔ nuxu koɖo mìwo xomumɛtɔ ɖe alo mìwo xlɔ vevi ɖe le hamɛ lɔ mɛ. Ci Yesu nyi xlɔ koɖo yi nukplaviwo ɖe, ecɛ dɔ yí ekpɔnɔ mɔ, nɔ nyɔ ɖe dro yeɔ, yeanunɔ nɔ wo yí akankan enyɔ nɔ woa? Oo! Hwecinu yi dokplɔtɔwo hwlɛnhwlɛn aɖe so mɛ ci yí anyi ega nuɔ, Yesu gbe nyɔ nɔ wo koɖo egbe fafa. Éwa kpɔwɛ nɔ wo so ɖevihwɛ ɖeka nu. (Maki 9:33-37) Hamɛmɛshinshinwo atɛnŋ awa Yesu tɔ han nɔ wokplanɔ nu amɛ koɖo “xomɛ fafa.”​—Gal. 6:1.

w95 4/1 17 mm. 8

Lé Woadasɛ Lɔnlɔn Koɖo Enunywi Wawa Doɔ?

⁸ Ci mìnyi Mawu sɛntɔwoɔ, mìatɛnŋ awa nu yí mìwo kpenawo akpɔ adro. Kankandoji li mɔ Yesu donɔ ŋsɛn mɛ ciwo yí ɖonɔ to yi. Élɔn Kristotɔwo dɔ lɔ yí gbekannɔfui. Énu mɔ ŋɖuɖu han yí yɛnyi nɔ ye. (Ʒan 4:34; Rɔmatɔwo 11:13) Ezolelanmɛ cɛ han tɛnŋ dro amɛ. Shigbe Yesu hannɛ ɖe, àtɛnŋ adasɛ mɔ eji jɔnɔ ye le kunuɖeɖedɔ lɔ mɛa? Nù ŋciwo mɛ èto nɔ mɛbuwo le hamɛ lɔ mɛ. Tèkpɔ keke nɔ ŋgbegangan eoɖeki o. Nɔ èyɔ mɛbuwo yí wowawa edɔ koɖo eoɔ, kpɔ mɔ àtɛnŋ akpedo wo nu yí woaxo nuxu nɔ mɛbuwo so Enuwowatɔ Gangantɔ Yehowa nu ma.​—Elododo Wema 25:25.

Bibla mɛ Nuveviwo

it-1 670

Xomɛfafa

Xomɛfatɔnɔ nyi mɛ ci yí ɖo xɔse yí gbedonɔ ŋsɛn amɛ. Égbɔnnɔnu mɔ amɛ cɛ awa enudɔndɔn. Mɛ ci yí defanɔ xomɛ o kpɔnɔ mɔ yedele vofamɛ o. Écakanɔ le yiɖeki mɛ, déɖonɔ xɔse koɖo emɔkpɔkpɔ o, eyi egbɔnɔjɔ le yiɖeki mɛ hɛnnɛ. Elododo ɖeka xo nuxu so mɛ ci yí defanɔ xomɛ nu mɔ: “Nɔ́ amɛ da tɛnŋ ɖu yiɖeki ji ɔ, é le shigbe ejugan ci yí egliwo gban nɔ ɛnɛ.” (Elo 25:28) Susu dɔndɔnwo yí vanɔ tamɛ ni. Ecɛ dɔ yí ewanɔ enumasɔgbewo.

11-17 AOÛT

MAWU NYƆ MƐ DƆKUNUWO ELODODO WEMA 26

Zè nɔ “Sukunu Watɔ”

it-2 602 mm. 1

Eshijaja

Hwenuwo. Hwenu amɛve ci yí li le Gbeɖu Nyigban lɔ ji yí nyi ezo koɖo eli, alo fiɔta koɖo eshijaja hwenu. (Sɔ̀ sɔ koɖo Eha 32:4; Sal 2:11, gɔnmɛnuŋwlɛŋwlɛ.) Tɔ so mamamɛ nɔ Bogan wleci yi mamamɛ nɔ Bleamɛdezwi wleciɔ, eshi dexa janɔ ahan o. Le hwehunnɔtɔnu ci wosɔnɔ jinukuwoɔ, eshi dejanɔ kekeɖe o. Elododo Wema 26:1 dasɛ mɔ eshi dexa janɔ ahan le jinukusɔsɔ hwenu o. (Sɔ̀ sɔ koɖo 1Sam 12:17-19.) Le eshijaja hwenuɔ, eshi dejanɔ gbeɖeka duu o, vɔ évasonɔ do mɛ. Nɔ enyi vuvɔ hwenu yɔɔ, fafa nini sugbɔ. (Ezra 10:9, 13) Eyi taɖo, exɔ ci mɛ woanɔ yí asɔ glo vuvɔ jɔnɔ ji nɔ amɛwo le hwenɔnu.​—Ezai 4:6; 25:4; 32:2; Job 24:8.

w87 10/1 19 mm. 12

Etodɔndɔn Hɛnnɔ Fafa vɛ

¹² Nɔ wole nu wakɔ koɖo mɛɖewoɔ, woɖo awa do enyɔ ciwo yí le Elododo Wema 26:3 mɛ ji. Énu mɔ: “Wo ɖo a xo esɔ koɖo bayɛ. Wo ɖo a do numɛga nɔ esɔ. Yi, wo ɖo axo sukunu watɔ.” Hweɖewonuɔ, Yehowa ɖenɔ mɔ yí yi jukɔn Izraɛli ɖunɔ ale nɔ cukaɖa ci yiŋtɔ hɛn va yiɖeki ji: “Amɛ lɔwo fɔngu do enyɔ ciwo yí Mawu nu ji. Wo gbé etoɖoɖo Mawu Ejiɖaatɔ nukplamu. Mawu dɔ yí agbe sɛnŋ do amɛ hunnɔwo sɔkudo enu ciwo yí wo wa nu. Wo klɛn afɔ yí jwin, amɛ ɖe de li yí akpe do wo nu o. Amɛ hunnɔwo le cukaɖa mɛ, yi wo byɔ alɔ̀du [Yehowa]. Eyi, É hwlɛn wo gan le wowo cukaɖawo mɛ.” (Ehajiji Wema 107:11-13) Éle ahan gan, sukunuwatɔ ɖewo gbenɔ ekpla ci wona wo: “Nɔ́ amɛ ɖe nyi etotrinɔ yi do dɔmɛzi sugbɔ hweshahwenu ci amɛ a nu ni mɔ yi wawa afɛn ɔ, eyi wo a trɔn amɛ hunnɔ. Emɔkpɔkpɔ ɖe de li o.”​—Elododo Wema 29:1.

it-1 357 mm. 3

Ebutɔntɔn

Elododo zanzan. Efyɔ ŋɖɛnyatɔ Salomɔ nu mɔ “Amɛ ci yí dɔ edɔ sukunuwatɔ le shigbe amɛ ci yí kpakpa yi fɔwo yí dodoɔ akpa yiɖeki nu ɛnɛ [ecɛ adɔ atɔ ebu tɔntɔn]. Eyi taɖo mɛ ci yí wanɔ danu le shigbe mɛ ci yí va yi drɔdrɔ yi nyɔwo kpɔ le sukunuwatɔ gbɔ hannɛ.” Nyɔnɔnwi yɔ, mɛ ci yí dɔdɔ edɔ sukunuwatɔ hɛnhɛn danuwawawo va yiɖeki ji. Kankandoji li mɔ edɔ agble ni yí ada hɛn nu le nu.​—Elo 26:6.

Bibla mɛ Nuveviwo

it-2 1006

Sukunuwawa

Enyɔŋciɖoɖo nɔ sukunuwatɔ “sɔgbe koɖo ŋɖɛmanyanu ci ewa” dɔ yí wowanɔ ŋci yí denyɔ shigbe sukunuwatɔ ke nɛ. Elododo ɖeka kpla mì mɔ mìwoŋgbewa amɛmabunu shigbe sukunuwatɔ nɛ ci enu mɔ: “Ŋgbeɖo enyɔ ŋci nɔ sukunuwatɔ sɔgbe koɖo ŋɖɛmanyanu ci ewa o.” Elododo Wema 26:4, 5 NWT nu mɔ, nɔ woɖo enyɔ ŋci ni “sɔgbe koɖo ŋɖɛmanyanu ci ewa,” ɖo ŋci ewa lɔ dekpe nɔ amɛɔ, wovanyinɔ enukokwi nɔ amɛwo. Vɔ nɔ wokpedo nu yí dre enyɔ lɔwo mɛ niɔ, áwa nywi nɔ amɛ.

18-24 AOÛT

MAWU NYƆ MƐ DƆKUNUWO ELODODO WEMA 27

Enunywi Ciwo Mìkpɔnɔ le Exlɔ Adodwiwo Gbɔ

w19.09 5 mm. 12

Yehowa Donɔ Afixɔxɔ yi Sɛntɔ Ciwo yí Sɔnɔ Wowoɖekiwo Hwe nu

¹² Nɔ woɖo aɖaŋ nɔ mɛ ci yí sɔ yiɖeki hweɔ, ejenɔŋ ni. Yi kpɔwɛ ɖeka ke: Sɔɛ mɔ èva Kristotɔwo bɔbɔ ɖeka. Ci èxo nuxu koɖo ao kpena xɔsetɔ sugbɔ ɖegbɔɔ, ɖeka nu nɔ eo le bebemɛ mɔ ŋɖuɖu ci aɖu mɛ nɔ eo. Ave eo hwɛɖeka. Vɔ ajɔ ji nɔ eo mɔ yinui nɔ ye. Le nyɔnɔnwi mɛɔ, àji mɔ mɛɖe le nui nɔ ye xoxoxo sa! Ahanke nɔ mìwo kpena xɔsetɔ ɖe gbe dɔn yí ɖo aɖaŋ nɔ mìɔ, mìɖo asɔ mìwoɖeki hwe yí aɖaŋɖoɖo lɔ ajeŋ nɔ mì. Mìasɔ mɛ ci yí ɖo aɖaŋ lɔ nɔ mì wa xlɔ, mìdasɔ wa ketɔnɔ o.​—Hlɛn Elododo Wema27:5, 6; Gal. 4:16.

it-2 669 mm. 7

Amɛ Kpena

Éle ahan gan, Elododo Wema kpla nu mì so lé woakando amɛ kpena ji koɖo lé akpla nu mì hwenu yí mìle ʒan mɛ ci enu mɔ: “Ŋgbe ŋlɔbe ao xlɔwo koɖo edao xlɔwo o. Nɔ́ cukaɖawo le eo ji ɔ, ŋgbe yì nɔvio xwe duu nɔ alɔ̀du o. É nyɔwu nɔ a byɔ alɔ̀du ao kpena [sha·khenʹ] ci yí le axa ji nɔ eo sɔwu a yì keke nɔvio gbɔ.” (Elo 27:10) Le lɛɔ, enuŋwlɛtɔ lɔ nunuɔ mɔ exlɔ le veviɖe yí agbekpedo amɛ nu sɔwu amɛ nɔvi. Amɛ nɔvi nɔnɔ jinjintɔxu, vɔ exlɔ yɛ nɔnɔ amɛ gbɔ hwenu mìle eʒan mɛ.

w23.09 10 mm. 7

Jajɛwo, Agbe Ci Hanŋmɛ Míji Mɔ Yewoanɔɔ?

⁷ Enu ɖeka ci mìatɛnŋ akpla le gbeta dɔndɔn ci Ʒoasi sɔ mɛ yí nyi mɔ mìɖo aje xlɔ koɖo mɛ ciwo yí adɔ mìawanɔ nunywi, exlɔ ciwo yí lɔn Yehowa yí ji mɔ yewoawɛ nɔ eji ajɔɛ. De mìwo koɖo mɛ ciwo yí le xwe mɛ ɖekɛ mìadonɔ ha koɖo o. Ðo ŋwi mɔ, Ʒoasi nyi vihwɛ nɔ yi xlɔ Yoyada. Biɔ eoɖeki se mɔ: ‘Anyi xlɔwo kpenɔdo ŋnu nɔ xɔse ci ŋɖo do Yehowa nu asɛnkɔŋ dojia? Wodonɔ ŋsɛnŋ mɔ nyɛ le nɔ agbe asɔ koɖo Mawu sewoa? Woxonɔ nuxu so Yehowa koɖo nyɔnɔnwi lɔ nua? Wowanɔ do Mawu sewo jia? Nɔ ŋwa afɛn ɖe, taŋfuin enyɔ ci naji mɔ wo le nu nɔŋ yí wonunɔa alo wogbenɔ dɔn yí gbenɔ nɔŋ a?’ (Prov. 27:5, 6, 17) Le nyɔnɔnwi mɛɔ, nɔ ao xlɔwo delɔn Yehowa ɔ, tashi wo. Vɔ nɔ wolɔn Yehowa ɔ, le do wo nu, woakpenɔdo eo nu gashiagamɛ.​—Elo. 13:20.

Bibla mɛ Nuveviwo

w06 9/15 19 mm. 12

Enyɔ Vevi Ciwo yí le Elododo Wema mɛ

27:21. Kanfukanfu danasɛ mɛ ci ŋmɛ mìnyi. Amɛɖekisɔsɔhwe kpenɔdo mì nu mìnyanɔ mɔ dandanmɛ yí mìɖo akanfu Yehowa. Ecɛ kpenɔdo mì nu yí mìkpɔtɔ sinni. Nɔ wokanfukɔ amɛɖeki ɖoɖuɔ, amɛɖekisɔsɔhwe degbenini o, eyi wokpɔnɔ mɔ wonyi amɛgangan.

25-31 AOÛT

MAWU NYƆ MƐ DƆKUNUWO ELODODO WEMA 28

Vovoto ci yí le Amɛnywi Koɖo Amɛvɔn Domɛ

w93 5/15 26 mm. 2

Èsɛnsɛn Yehowa Nyɔnɔnwitɔa?

“Amɛ nywi gbenɔdɔn shigbe janŋtan ɛnɛ.” (Elododo Wema 28:1) Éɖonɔ xɔse, kannɔdo Mawu Nyɔ lɔ ji yí wanɔ ci ji ekpe le Yehowa sɛnsɛn mɛ. Eyi egbetonɔ cukaɖa ɖekpokpui mɛ.

it-1 1197 mm. 6

Enugɔnmɛsese

Mɛ ciwo yí do ŋgbe do ŋununya Soxu. Mɛ ciwo tɔ enudɔndɔn wawa degbejinɔ Mawu mɔndasɛnamɛwo nɔ wojikɔ asɔ gbeta alo awa ŋɖe o. (Job 34:27) Nɛnɛmɛ tanɔshi yi ji yí eblini yí degbenyanɔ mɔ yewawa nuvɔn keke alé yiɖeki do mɛ o. (Eha 36:1-4) Nɔ éji mɔ yeasɛn Mawu can ɔ, éwanɔ do agbetɔwo nukplakpla ji sɔwu Mawu tɔ (Ezai 29:13, 14) Ékpɔnɔ yi fɛnwo mɔ wonyi “munumumu” kpoŋ. (Elo 10:23) Éwanɔ ayemɛnu, sɛnnɔ tamɛ, nuxu dɔndɔnwo tonɔ le aglan mɛ ni. Ci yí gbedɔn wuɔ, ébuini mɔ Mawu ci wodekpɔnɔ o datɛnŋ akpɔ enudɔndɔn ci yewawa o. Égbebuini mɔ ŋsɛn ci yí le Mawu shi yí esɔ kpɔnɔ nuwo degbewawa dɔ o. (Eha 94:4-10; Ezai 29:15, 16; Ʒer 10:21) Le yi nuxu koɖo yi wana mɛɔ, énunɔ mɔ ‘Yehowa deli o’ (Eha 14:1-3) yí yedesɔ gbɔ kpetii o. Ci dewanɔ do gɔnmɛɖose ɖe jiɔ, désonɔ kojo jɔjɔɛ alo akpɔ cukaɖa ɖe gbɔ nywiɖe o. Debunɔ tamɛ kpɔ so ŋciwo awa keŋ asɔ gbeta nywiwo nu o.​—Elo 28:5.

it-1 1195 mm. 4

Egbejinɔnɔ nɔ Mawu

Wodetɛnŋ nɔnɔ gbeji koɖo amɛ ŋtɔ ŋsɛn o, vɔ xɔse koɖo kankando Yehowa hwlɛngan ŋsɛn ji yí adɔ. (Eha 25:21) Mawu ɖo gbe mɔ yeanyi “akpoxɔnu” koɖo “ekpe” nɔ amɛ ciwo yí nɔnɔ gbeji nɔ ye. (Elo 2:6-8; 10:29; Eha 41:12) Ci wojinɔ tɛgbɛɛ mɔ yewo nu le nyɔ le ŋmɛ nɔ Yehowa ɔ, édɔ yí enuwo nyɔnɔ nɔ wo yi wosun ji yí nɔnɔ gbeji. (Eha 26:1-3; Elo 11:5; 28:18) Shigbe lé Job ŋtɔ kpɔ tɔxu nɛɔ, amɛvɔnwo dɔnɔ yí amɛmanyaɖewo kpenɔ fun, eyi wokunɔ koɖo amɛvɔnwo. Yehowa na mì kankandoji mɔ amɛ ciwo nɔnɔ egbeji nɔ ye gbewo nɔnɔ veviɖe nɔ ye yí wowo fɛncu akpɔtɔ ali keke asɔ yi mavɔmavɔ. Ahanke woakpɔ fafa le esɔ mɛ yí woaɖo enunywi sugbɔ. (Job 9:20-22; Eha 37:18, 19, 37; 84:11; Elo 28:10) Shigbe Job nɛɔ, de dɔkunuwo ɖoɖo yí adɔ yí woanyi amɛnywi yí aje nɔ bubu o, vɔ egbejinɔnɔ yɔ. (Elo 19:1; 28:6) Jijɔ enyi nɔ ɖevi ciwo wowo jilawo nyi egbejinɔtɔwo, (Elo 20:7) ɖo woaɖu cinɔ nɔ agbenywinɔnɔ kpɔwɛ ci wowo jilawo ɖo ɖɛ yi woawa ŋkɔ nywi ɖɛ yí aje nɔ bubu.

Bibla mɛ Nuveviwo

w01 12/1 11 mm. 3

Àtɛnŋ Aze nɔ Ejidɔ̀ Gbɔngbɔn mɛ Tɔ

Kankando amɛɖeki ji ɖoɖu. Keŋ gbɔxwe ejidɔ̀ awa enu koɖo amɛ sugbɔ tɔɔ, wokannɔdo wowoɖekiwo ji ɖoɖu yí amɔ yewo lanmɛ le nywiɖe. Bleŋbleŋ ɔ, wokpɔnɔ mɔ yewoayi gbeje lanmɛ kpɔ le dotoxwe nyi enugbali. Ahanke, mɛɖewo tɛnŋ kpɔɛ mɔ yewonyi Kristotɔwo yɛɔ, désɔ o, eyi taɖo ŋɖe dasɛnŋ wa yewo. Wodegbegbejenɔ wowoɖekiwo mɛ yí akpɔ mɔ yewole gbɔngbɔn mɛ nywiɖe ma o, eyi keke woavakpɔɔ, evwin jɔnɔ do wo ji. Éle veviɖe mɔ mìaɖonɔ ŋwi enyɔ ci apotru Pɔlu nu so kankando amɛɖeki ji ɖoɖu nu. Énu mɔ: “É yí taɖo amɛ ciwo bunɔtamɛ kpɔ mɔ yewo le ete ɔ, wo le kpɔ wowoɖekiwo ji nywiɖe nɔ wo ŋgbe je nyigban o.” Ŋununyanya yí nyi mɔ mìanya mɔ mìnyi nuvɔnmɛwo, eyi mìagbenɔje mìwoɖekiwo mɛ kpɔ bleŋbleŋ yí akpɔ mɔ mìle nywiɖe le gbɔngbɔn mɛ ma.​—1 Korɛntitɔwo 10:12; Elododo Wema 28:14.