Amɛshinshinwo, Míle Veviɖe Le Hamɛ Lɔ Mɛ

Taŋfuin, shinshin mɛ cukaɖawo dɔ yí ŋsɛn vɔ nɔ eo can. Ci èsɛnkɔ Yehowa le egbejinɔnɔ mɛ so exwe sugbɔ ke can ɔ, lé èle do yɛ tɛnŋ dɔ yí nàtɔ susu dɔndɔnwo ɖoɖo do eoɖeki nu. Le kpɔwɛ mɛ, ètɛnŋ sɔ ŋciwo èwawa le egbɛ mɛ yɛ sɔ tɔ sɔsɔ kpɔ koɖo ŋciwo èwa vayi sa. Nɔ enyi ahan yɔ nɛ ɖe, nyi àtɛnŋ awa yí aze nɔ susu ŋtɔ́woɔ?

ENU CI YEHOWA JIKƆ MƆ EƆ LE WA

Biɔ eoɖeki se mɔ: ‘Nyi Yehowa jijiɛ mɔ nyɛ le waɔ?’ Àtɛnŋ akpɔ akɔnfanamɛnyɔwo le 2 Ese Wema 6:5 mɛ. Énu mɔ: “Èɖo alɔn Yehowa ao Mawu koɖo ao ji pleŋ, ao se pleŋ koɖo ao ŋsɛn pleŋ.”

Sɔgbe koɖo kpukpui cɛɔ, Yehowa jijiɛ so eo gbɔ mɔ eɔ le sɔ ao ji, ao se koɖo ao ŋsɛn pleŋ sɔ sɛn ye. Nyɔnɔnwi cɛ atɛnŋ akpedo eo nu yí dàsɔnɔ eoɖeki sɔnɔ kpɔ koɖo mɛbuwo o. Átɛnŋ agbekpedo eo nu yí dàsɔ enu ci yí èwakɔ yɛɛ sɔ sɔnɔ kpɔ koɖo enu ciwo ji èsun yí wanɔ vayi sa o.

Bù enyɔ cɛ kpɔ: Hwenu ènyi jajɛ ɖe, nyiwo ètɛnŋ nanɔ Yehowa ɔ? Sugbɔtɔ le Yehowa sɛntɔwo mɛ anu mɔ enu ciwo yí ve nɔ yewo sɔwu yí yewonini. Kankandoji li mɔ ao nuveviwo yí èsɔ na Yehowa hwenu ènyi jajɛ. Nyi ji àsun yí ana Yehowa le kakacɛ mɛ yɛɔ? Le nyɔnɔnwi mɛɔ, éwa shigbe mɔ enu ci ji àkpe awa le ao nɔnɔmɛ lɔwo mɛ wakɔ yí èle le egbɛ mɛ. Enu ci àtɛnŋ awa le kakacɛ mɛ yɛ nɛ. Nɔ èkpɔɛ do ahan jiɔ, àtɛnŋ avamɔŋje mɛ mɔ enu ci yí yenana Yehowa yɛ nyi ɖekaŋmɛ koɖo enu ci han yí yenini vayi sa. Èna ao nuvevitɔ Yehowa vayi sa, eyi ecɛ yɛ can ɔ, ègbenakɔ ao nuvevitɔ yi le kakacɛ mɛ.

ÀTƐNŊ ANYI SHICU SUGBƆ NƆ MƐBUWO

Akpaxwe bu ci yí gbele enyɔ lɔ mɛ ke: Ŋgbesɔ susu ɖo sɛnxu ciwo ao shinshin mɛ xwe ɖokɔ nɔ eo ji o. Éwaɖeɔ, tèkpɔ yí akpɔɛ mɔ emɔ bu yɛnyi yí hun nɔ ye. Le nyɔnɔnwi mɛɔ, ci èvanyi amɛshinshin yɛɔ, àtɛnŋ awa ŋɖewo le kakacɛ mɛ ciwo yí dàtɛnŋ awa sa hwenu ènyi jajɛ o. Le kpɔwɛ mɛ, àtɛnŋ awa enu cɛwo ciwo yí gbɔgbɔ:

Xò nuxu so enu ciwo mɛ èto nu nɔ mɛbuwo. Bù tamɛ kpɔ so enyɔ cɛ ciwo woŋwlɛ do Bibla mɛ nu:

Efyɔ Davidi: ‘Ŋnyi ɖajɛvi vayi, vɔ evyɛɔ, ŋku nyɔxo yí ŋdekpɔ Mawu yí eɖe kɔ le amɛ nywiwo nu gbeɖe o. Ŋdekpɔ amɛ nywiwo viwo yí wobiɔbiɔ ŋɖuɖu gbeɖe o.’—Eha. 37:25.

Ʒozue: “Eku zan gogo nɔ ŋ. Mí nya, yí mí kandoji nyɔnɔnwitɔ mɔ Tɔhonɔ wanɔ enu gangan nɔ mí. Mí nya mɔ Yi de gɛnnɔ le Yi gbeɖu ɖekpokpwi mɛ o. Tɔhonɔ wanɔ do gbeɖu ɖeshaɖe ci É ɖo nɔ mí ji.”—Ʒozue 23:14.

Taŋfuin ahan enu wawa do nɔ eo can nɛ. Davidi koɖo Ʒozue xo nuxu so enu ciwo mɛ wowoɖekaɖeka to nu. Yehowa sɛntɔ egbejinɔtɔ cɛwo xo nuxu so enu ciwo wosɔ exwe sugbɔ yí kpɔ yí gbese nu, eyi taɖo kpɛnkpɛnmɛ sugbɔ le enyɔ cɛ ciwo wonu nu.

Nɔ èsɛnkɔ Yehowa so exwe nɛni ɖewo ke ɖe, eo can, àtɛnŋ axo nuxu so shicu ciwo yí èxɔ le ŋciwo mɛ èto vayi mɛ nu. Èɖo ŋwi hwenu ɖe koŋ ci mɛ yí Yehowa cu shi nɔ yi mɛwo lea? Voŋ fɛɛ yí axo nuxu so nu nɔ mɛbuwo! Enu cɛ ci mɛ èto nunu nɔ mɛbuwo atɛnŋ afa akɔn nɔ eoŋtɔ sugbɔ. Le nyɔnɔnwi mɛɔ, nɔ mɛbuwo se ŋciwo mɛ yí èto le sɛnsɛn lɔ mɛɔ, àtɛnŋ anyi ŋsɛndoamu soxu nɔ wo.—Rɔm. 1:​11, 12.

Emɔ bu ci ji àtɛnŋ agbeto yí ado ŋsɛn mɛbuwo yí nyi mɔ àyinɔ hamɛ lɔ bɔbɔwo ŋmɛŋmɛ lé àkpe ji do. Le nɔɔ, eoŋtɔ koɖo ao kpena xɔsetɔwo akpɔ nyɔna. Connie ci nu mìxo nuxu so vayi nu mɔ: “Bɔbɔwo yiyi na yí ŋdevagbɔjɔ o. Ci lɔnlɔn ci yí ŋkpɔnɔ le Fyɔɖuxuxɔ mɛ sugbɔ ahan ɖe, nyi yí adɔ yí nagbɔjɔ yɛɔ? Ŋjenɔ agbla yí nanɔ enu kleŋkleŋ mɛbuwo yí asɔ dasɛ nɔ wo mɔ enu ciwo wowanɔ nɔŋ jeŋ nɔŋ. Eyi ŋkpɔtɔ yí xonɔ nuxu so gbɔngbɔn mɛ dɔ ciwo ŋwa nu nɔ nɔviŋsu koɖo nɔvinyɔnuwo.”

SƐNSƐNDƆ CI ÈWA NƆ YEHOWA LE EGBEJINƆNƆ MƐ LE VEVIÐE NI SUGBƆ

Amɛ sugbɔ li hannya le Enuŋwlɛŋwlɛ lɔwo mɛ ciwo yí wowo nɔnɔmɛ lɔwo ɖo sɛnxu nɔ wo gan yí wolɔn Yehowa. Mìasɔ Simeɔn ci yí nyi Izraɛlivi shinshin ɖeka ci yí le agbe hwenu yí woji Yesu kpɔwɛ. Hwenu yí Simeɔn vayi gbedoxɔ lɔ mɛɔ, éwa shigbe mɔ ékpɔ jajɛ ciwo yí wakɔ edɔ vevi ɖeka le nɔ. Vɔ lé Simeɔn yɛ akpɔ yiɖeki doɔ? Le agbetɔwo nukpɔkpɔ mɛɔ, étɛnŋ kpɔ yiɖeki mɔ yeshin yí yedegbele veviɖe le Yehowa ŋmɛ o. Vɔ Yehowa kpɔ Simeɔn do alɔkpa bu ji xesexese. Ékpɔɛ mɔ yɛnyi “egbejinɔtɔ yí gbevɔnnɔ nɔ Mawu.” Mawu cu shi ni yí ekpɔ Yesu hwenu enyi vifin. Can hɛnnɛ can ɔ, Yehowa gbezan Simeɔn yí enu enyɔ ɖeka ɖɛ kuso lé esɔ mɛ avanɔ do nɔ Mɛsia lɔ nu! (Luiki 2:​25-35) Éze petii mɔ Yehowa kpɔ nu zeto exwe ci yí le eta nɔ Simeɔn nu. Ékpɔɛ mɔ yɛnyi ŋsu ɖeka ci yí ɖo xɔse sɛnŋ yí “gbɔngbɔn kɔkɔɛ le ji.”

Eo can, àtɛnŋ akando ji mɔ Yehowa donɔ afixɔxɔ sɛnsɛn ci èwanɔ ni nu nɔ shinshin dɔ yí dègbetɛnŋ yí wakɔ enu ɖewo can. Le Yehowa gbɔɔ, vɔnsa ci yí jɔnɔ eji ni “denyi ŋci ji wodesun yí [ani] o, vɔ ci ji wosun yí ejinɔ.”—2 Kor. 8:12.

Nɔ enyɔ cɛ le tamɛ nɔ eoɔ, sɔ̀ ao susu ɖo ŋci àtɛnŋ awa ji. Le kpɔwɛ mɛ, nɔ ényi le hwenu kleŋ ɖe mɛ yɔ can ɖe, kunuɖeɖe mɔnu vovovo ciwo àtɛnŋ akpɔtɔ awakɔɔ? Àtɛnŋ ayɔ nɔviŋsu koɖo nɔvinyɔnuwo le telefonu ji alo aŋwlɛ wema kleŋ ɖe ɖaɖa wo keŋ asɔ do ŋsɛn woa? Lɔnlɔn nu kleŋ kleŋ ŋtɔ́wo wawa atɛnŋ awa edɔ do ao kpena xɔsetɔwo ji sugbɔ. Ðo nɔ ŋtɔ́wo so mɛ ciwo yí sɛnkɔ Yehowa le egbejinɔnɔ mɛ na nɔ exwe sugbɔ gbɔɔ, éwanɔ edɔ do amɛ ji koŋ.

Kpokpo dodo aya nɔ mɛɖewo. Do jeshi ŋci yí jɔ do mɛɖeka ji le Wezexu nɔ Afrika yí wonui do dakavi ci yí nyi “Wohwlɛn Yi Gbe Gan” mɛ.

Nyà mɔ ao xɔse koɖo egbeji ci èle nɔ Yehowa so exwe sugbɔ ke dodoɔ ŋsɛn mɛbuwo. Ènyi ejidodo kpɔwɛ adodwi nɔ mì. Àtɛnŋ akando enyɔ ci Bibla nu ji mɔ: “Mawu de nyi majɔmajɔtɔ o. Mawu a ɖoŋwi edɔ pleŋ ciwo yí mí wa. Mawu a ɖoŋwi lɔnlɔn ci yí mí ɖo ni toto alɔ̀du ci mí do Yi mɛwo mɛ. Mawu a gbe ɖoŋwi mɔ mí a kpɔtɔ a donɔ alɔ̀ Yi mɛwo.”—Ebre. 6:10.

KPƆ̀TƆ AKPEKPEƐDO AMƐWO NU LÉ ÈKPE JI DO

Enugɔnmɛjijikpɔwo dasɛ mɔ ŋsu koɖo nyɔnu shinshin ciwo yí kpenɔdo mɛbuwo nu nɔnɔ lanmɛsɛn mɛ nywiɖe, susu nɔnɔ te nɔ wo yí wogbenɔnɔ agbe jinjin.

Le nyɔnɔnwi mɛɔ, edɔ nywiwo wawa ɖekɛ daɖe shinshin mɛ cukaɖawo pleŋ swi o. Mawu Fyɔɖuxu lɔ ɖekɛ kpaŋ yí aɖe shinshin mɛ cukaɖawo, eku koɖo nuvɔn cinɔ ci mìɖu swi.—Rɔm. 5:12.

Edɔ sugbɔ yí èwakɔ le Yehowa sɛnsɛn mɛ, kpekpedo mɛbuwo nu nɔ woajeshi Yehowa can le mɛ. Enu cɛwo adɔ yí ao mɔkpɔkpɔ lɔ asɛnŋ yí nàgbele nywiɖe le lanmɛ ŋtɔkpu. Amɛshinshinwo, mìɖe kuku, mínya mɔ enu ciwo míwakɔ le Yehowa sɛnsɛn mɛ jekɔŋ ni sugbɔ. Ahanke yí hamɛ lɔ can kpɔkɔ nyɔnawo so xɔse kpɔwɛ ci míɖoɖoɔ ɖɛ mɛ nɛ.