Ano ro Ginaobra it mga Elder sa Kongregasyon?

Owa kami nagabayad it mga tawo para manguna sa amon organisasyon. Sa amon Cristianong kongregasyon may ginpili nga magdumaea agud “bantayan ro kongregasyon it Dyos.” (Binuhatan 20:28, NW) Ro mga elder may una mabakod nga relasyon kay Jehova, agud manguna ag magbantay sa kongregasyon, “bukon it napilitan, kundi halin sa kinabubot-on; bukon it tungod ku suhoe, kundi may matuod sanda nga handum.” (1 Pedro 5:1-3, NW) Ano ro andang ginaobra para kamon?

Nagakabaeaka ag ginaproteksyonan nanda kami. Nagatao ro mga elder it giya sa Biblia agud mangin maeapit ro relasyon it kongregasyon kay Jehova. Ginsaligan sanda it Dyos nga tatapon ro kongregasyon, ngani interesado sanda sa amon kamaeayran ag gabulig nga mangin masadya kami. (2 Corinto 1:24) Kapareho ku manogbantay nga ginadipara ro kada sambilog sa anang mga karnero, makaruyon man ro mga elder gatinguha sanda agud makilaea ro kada miembro it kongregasyon.—Hulubaton 27:23.

Ginatur-an kami nga obrahon ro pagbuot it Dyos. Kada sang Domingo, nagapanguna ro mga elder sa among miting sa kongregasyon agud mapabakod pagid ro amon nga pagtuo. (Binuhatan 15:32) Sanda man ro nagapanguna sa amon pagwali nga hilikuton. Ginaibhan man nanda kami ag ginahanas sa eain-eain nga klase it pagministeryo.

Ginapalig-on nanda kami. Ginabisitahan man kami it mga elder sa amon nga baeay o ginaistorya sa Kingdom Hall agud taw-an kami it eugpay halin sa Biblia. Ginaobra nanda ra agud magbakod ro amon nga relasyon kay Jehova.—Santiago 5:14, 15.

Euwas sa andang responsibilidad sa kongregasyon, eaban sa mga elder may una man obra ag responsibilidad sa andang pamilya nga nagakinahang-ean it andang oras ag atensyon. Ngani tahuron gid naton rayang mahugod nga mga igmanghod.—1 Tesalonica 5:12, 13.

• Ano ro responsabilidad it mga elder sa kongregasyon?

• Paano nagapakita it kabaeaka ro mga elder kamon?