Ano ro Obligasyon it Ministeryal nga Alagad?

Ro Biblia hay nagahambae it daywa ka grupo it Cristiano nga mga eaki nga magatatap sa kongregasyon—“manogdumaea ag ministeryal nga alagad.” (Filipos 1:1, NW) Sa kada kongregasyon, may una pipila ka elder ag ministerial nga alagad. Ano ro ginaobra it mga ministeryal nga alagad para kamon?

Ginabuligan nanda ro mga elder. Ro mga ministeryal nga alagad hay may una mabakod nga kaangtanan kay Jehova, masaligan, tampad, ag ro iba kanda hay bata pa ag ro iba may edad eon. Gabulig sanda sa iba pa nga ueobrahon it kongregasyon. Ngani, ro mga elder hay makakonsentrar sa pagturo ag pagpalig-on sa iba.

Nagatao sanda it praktikal nga bulig. Ro pila sa mga ministeryal nga alagad hay may obligasyon sa pagpasueod it mga bisita sa miting. Ro iba mat-a hay operator sa sound, nagapanao it mga literatura, may sa account it kongregasyon, ag nagabulig man sanda sa pag-asayn it mga teritoryo sa miembro it kongregasyon. Nagabulig man sanda sa paglimpyo ag pagmentinar it Kingdom Hall. Ginapangabay man sanda it mga Elder nga buligan ratong mga may edad eon. Tungod sa kahugod ag kahanda it mga ministeryal sa pagbaton it mga obligasyon sa kongregasyon ginaapresyar ag ginarespito gid sanda it tanan. —1 Timoteo 3:13.

Nagapakita man sanda it mayad nga halimbawa. Ginpili ro mga ministeryal nga alagad tungod sa andang mayad nga pamatasan. Nagabakod ro among pagtuo tungod sa andang mayad nga pagpaathag it andang bahin. Tungod sa andang kahugod sa pagwali nga hilikuton napalig-on man kami kara. Sa anda man mayad nga halimbawa ag pagbulig sa mga elder nagatao raya it kasadya ag paghiusa. (Efeso 4:16) Sa ulihi, pwede man sanda mangin elder.

• Ano ro mayad nga ugali it mga ministeryal nga alagad?

• Ano ro andang ginaobra agud makabulig sa pag-organisa it kongregasyon?