Ano ro Bethel?

Sa Hebreo nga tinaga ro Bethel nagakahueogan “Baeay it Dyos.” (Genesis 28:17, 19, footnote) Nagakabagay gid raya nga panawag sa mga tinukod nga bilding it mga Saksi ni Jehova sa bilog nga kalibutan. Ginasuportahan ag ginadumaeahan iya ro pagwali nga hilikuton. Ro Nagadumaea nga Hubon hay una sa ueong taeatapan sa New York State, U.S.A., halin igto ginadumaeahan ro mga ueobrahon sa tanan nga lugar it sanga nga taeatapan. Bilang grupo, ro mga nagaboluntaryo iya hay ginatawag pamilya it Bethel. Nagakabuhi sanda pareho it isaeang ka pamilya, magkaibahan nga gakaon, gaobra, ag gatuon it Biblia nga may paghiusa.—Salmo 133:1.

Espesyal ra nga lugar para sa pamilya nga may pagsakripisyo ro kada miembro. Sa Bethel, may una mga Cristianong eaeaki ag babayi nga sinsero nga nagaobra it kabubut-on it Dyos ag may interes sa Ginharian. (Mateo 6:33) Owa sanda it sweldo, pero kontento sanda sa ginatao kanda kapareho it kwarto, pagkaon, ag allowance. Ro kada isaea sa Bethel hay may ueobrahon kapareho sa opisina, kusina, o sa kaean-an. Ag ro iba mat-a hay nagaobra sa imprintahan o gaobra it libro, nagapanglimpyo, gapang-eaba, gamentinar, ag iba pa.

Masako nga lugar nga nagasuporta sa pagwali it Ginharian. Ro panguna nga ueobrahon sa Bethel hay ro pagpaeapnag it kamatuoran halin sa Biblia sa tanan nga tawo kon posible. Halimbawa, ro brosyur ngara hay ginsueat sa idaeum it paggiya ku Nagadumaea nga Hubon, ag ginapaagi ra sa elektroniko nga gamit agud ma-translate sa ginatos nga mga grupo it translator sa bilog nga kalibutan. Ag ginaimprinta raya it madasig sa Bethel sa sobra 110,000 ka kongregasyon. Tanan ruyon nga obra hay ginasuportahan it pamilya Bethel agud maobra ro pinakaimportante nga hilikuton—ro pagwali it mayad nga balita.—Marcos 13:10.

• Sin-o ro gaobra sa Bethel, ag sin-o kanda ro nagadipara?

• Ano ro masako nga obra nga ginasuportahan it kada Bethel?