Paano Nagahueag ro Nagadumaea nga Hubon Makaron?

Ku unang siglo, ro maisot nga grupo, “mga apostoles ag mga katigueangan it Jerusalem,” hay nag-alagad bilang nagadumaea nga hubon agud makaobra it importante nga mga desisyon para sa bilog nga kongregasyon it Cristianong hinaplas. (Binuhatan 15:2, NW) Nagaobra sanda it mga desisyon nga ginakasugtan it tanan nga nabase sa Kasueatan ag nagapatuytoy sanda sa espiritu it Dyos. (Binuhatan 15:25) Ginasunod gihapon ruyon nga paagi makaron.

Ginagamit sanda it Dyos agud maobra ro anang kabubut-on. Ro mga hinaplas nga mga eaeaki nga kaibahan it Nagadumaea nga Hubon hay may una pag-apresyar sa Bisaea it Dyos ag ginasunod nanda ro eaygay kara. Kada sang Domingo, nagaistorya sanda parti sa kinahang-eanon it mga igmanghod sa bilog nga kalibutan. Pareho ku unang siglo, gapadaea sanda it mga pahanumdom nga base sa Biblia paagi sa mga sueat o sa nagadumaea nga manogtatap o iba pa. Sa bulig kara, gahilisugot ro katawhan it Dyos sa andang painu-ino ag paggawi. (Binuhatan 16:4, 5) Ginadumaeahan it Nagadumaea nga Hubon ro paghanda it espiritwal nga pagkaon, ginapalig-on ro tanan sa pagwali it Ginharian nga hilikuton, ag ginadumaeahan nanda ro pagpili it mga igmanghod nga eaeaki agud manguna.

Ginasunod nanda ro giya it espiritu ku Dyos. Ro Nagadumaea nga Hubon hay nagapagiya sa Soberano it Uniberso, si Jehova, ag Ueo it kongregasyon nga si Jesus. (1 Corinto 11:3; Efeso 5:23) Ro miembro kara hay owa naga-angkon o naga-isip nga sanda ro lider it katawhan it Dyos. Kaibahan it mga hinaplas nga mga Cristiano, “nagasunod sanda sa Kordero [Jesus] bisan siin imaw mag-agto.” (Pahayag 14:4) Nagapasaeamat gid ro Nagadumaea nga Hubon kon ipangamuyo naton sanda.

• Sin-o ro Nagadumaea nga Hubon ku unang siglo?

• Paano nagapangayo it bulig sa Dyos ro Nagadumaea nga Hubon makaron?