Paano Ginasuportahan ro Among Bilog Kalibutan nga Ueobrahon?

Ro amon organisasyon nagapanao it minilyon nga mga publikasyon ag Biblia kada dag-on nga owa it bayad. Nagapatindog kami it mga Kingdom Hall, sanga taeatapan ag kami man kara gamentinar. Ginasuportahan namon ro mga Bethelite, misyonero, ag nagatao man kami it bulig sa mga naagyan it kalamidad. Basi mangutana ka, ‘Paano raya tanan ginasuportahan?’

Owa kami gapangolekta o gapangayu-ngayo. Bisan pa mabahoe ro amon ginagastos sa pagwali nga ueobrahon, pero owa kami gapangayu-ngayo. Sobra sanggatos ka dag-on eon ro nagtaliwan, ro pangaywang isyu it Lalantawan hay nagasugid nga si Jehova ro nagasuporta kamon ngani “indi gid [kami] magpakalimos o magpangayo it bulig sa mga tawo.”—Mateo 10:8.

Ro amon ueobrahon hay ginasuportahan it boluntaryo nga mga amot. Abu ro gaapresyar ku amon mga pagturo nga base sa Biblia, ngani nagadonar sanda para kara. Nasadyahan gid ro mga Saksi nga magtao it andang kusog, kwarta, ag iba pa nanda nga pagkabutang para masuportahan ro kabubut-on it Dyos iya sa eugta. (1 Cronica 29:9) Sa amon Kingdom Hall, asembliya ag kunbensyon may mga kahon para sa donasyon kung sin-o ro gusto mag-amot. Pwede man magdonar sa amon nga Website, jw.org. Ro kaeabanan nga gaamot hay mga pobre kapareho sa baeo nga ginhambae ni Jesus nga nagtao it daywang ka maisot nga sinsilyo igto sa taeaguan it kwarta sa templo. (Lucas 21:1-4) Ngani bisan sin-o pwede “magpaeain it kwarta” nga hantop sa anang kabubut-on.—1 Corinto 16:2; 2 Corinto 9:7.

Gapati gid kami nga pahueagon ni Jehova ro tagipusuon it mga tawo nga gusto imaw ‘dayawon paagi sa andang mga pagkabutang’ agud masuportahan ro ueobrahon it Ginharian, ag matuman ro anang kabubut-on.—Hulubaton 3:9.

• Ham-an it eain gid ro atong organisasyon sa ibang relihiyon?

• Paano namon ginagamit ro boluntaryo nga mga amot?