Ro Atong Matun-an sa Hula ni Jacob Bago Imaw Mamatay—Parte 2

1. Ano ro atong pagatalakayon sa rayang artikulo?

RO MGA unga ni Jacob hay nakapalibot kana, ag nagapamati it mayad habang ginasugid ku andang tatay ro mga pagpakamayad it kada isaea kanda. Ku nagtaliwan nga artikulo, natun-an naton nga ginhambae ni Jacob kanday Ruben, Simeon, Levi, ag Juda ro mga bagay nga owa nanda ginapaabot nga mabatian. Ngani, posibleng ginaisip nanda kon ano man ro ihambae ni Jacob sa anang waeo pa nga mga unga nga eaki. Sa rayang artikulo, pagatalakayon ta kon ano ro mga leksyon nga atong matun-an sa anang ginhambae kanday Zebulon, Isacar, Dan, Gad, Aser, Neptali, Jose, ag Benjamin.a

SI ZEBULON

2. Ano ro ginhula ni Jacob kay Zebulon ag paalin ra natuman? (Genesis 49:13) (Tan-awa man ro kahon.)

² Basaha ro Genesis 49:13. Ginhula ni Jacob nga ro mga inapo ni Zebulon hay magaestar maeapit sa dagat sa ibabaw nga parte it Ginpromisa nga Eugta. Pagtaliwan it sobra 200 nga dag-on, nabaton it tribu ni Zebulon bilang mana ro eugta nga napatung-an ku Dagat it Galilea ag it Mediteraneo. Ginhula ni Moises: “Magkasadya ka, O Zebulon, sa imong pagpamanawon.” (Deut. 33:18) Posibleng ginapakita kara nga ro tribu ni Zebulon hay madali eang makabyahe sa daywang ka dagat ag maeumo para kanda nga magbakae ag magbaligya it mga bagay halin sa mga tawo sa iba-ibang mga lugar. Ano man ro rason, ro mga inapo ni Zebulon hay may dahilan nga magkasadya.

3. Ano ro makabulig katon nga mangin masadya sa kon ano ro may una kita?

³ Ano ro atong matun-an? Abu kitang rason nga magkasadya, siin man kita nagaestar o ano man ro atong mga sitwasyon. Para makapabilin nga masadya, dapat kitang mangin kontento sa kon ano ro may una kita. (Sal. 16:6; 24:5) Madali kitang masubuan kon ginaisip naton pirme ro mga bagay nga owa katon kaysa sa mga bagay nga may una kita. Ngani, tinguhai nga isipon pirme ro mayad nga mga bagay nga may una ka, ag mangin masadya kara.​—Gal. 6:4.

SI ISACAR

4. Ano ro ginhula ni Jacob kay Isacar ag paalin ra natuman? (Genesis 49:​14, 15) (Tan-awa man ro kahon.)

⁴ Basaha ro Genesis 49:​14, 15. Gindayaw ni Jacob si Isacar dahil sa anang kahugod. Ginhambae na nga si Isacar hay pareho it sangka makusog nga asno nga kayang magdaea it mabug-at nga mga paeas-anon. Ginhambae man ni Jacob nga si Isacar hay magamana it manami nga eugta. Ag natuman ro anang ginhambae kat nabaton it mga inapo ni Isacar ro manami ag mabungahon nga eugta maeapit sa Suba it Jordan. (Jos. 19:22) Nangin mahugod gid sanda sa pagdipara it andang eugta ag pati man sa pagbulig sa iba. (1 Hari 4:​7, 17) Halimbawa, ro tribu ni Isacar hay handa magbulig sa pagpakig-away para apinan ro nasyon it Israel, pareho sa natabo ku panahon nanday Hukom Barak ag propetisa Debora.​—Huk. 5:15

5. Ham-an dapat natong tinguhaan nga mangin mahugod?

⁵ Ano ro atong matun-an? Ginaapresyar ni Jehova ro atong kahugod sa pag-alagad kana, pareho sa pag-apresyar na sa kahugod nga ginpakita it tribu ni Isacar. (Man. 2:24) Tan-awon ta ro halimbawa it mga brother nga mahugod gid sa pagdipara it kongregasyon. (1 Tim. 3:1) Rayang mga brother hay buko’t literal nga nagapakig-away, pero kinahang-ean nanda nga magtinguha it mayad para protektahan ro mga igmanghod sa mga bagay nga makasamad it andang relasyon kay Jehova. (1 Cor. 5:​1, 5; Jud. 17-23) Nagatinguha man sanda nga handaan it mayad ag ipresentar ro mga diskurso nga makapabakud sa kongregasyon.​—1 Tim. 5:17.

SI DAN

6. Ano ro asayment nga nabaton it tribu ni Dan? (Genesis 49:​17, 18) (Tan-awa man ro kahon.)

⁶ Basaha ro Genesis 49:​17, 18. Ginhambae ni Jacob nga si Dan hay pareho it sawa nga nagapang-angkit sa mas mabahoe nga sapat, pareho it kabayo nga ginagamit sa inaway. Ro tribu ni Dan hay maisog ag handa nga makipag-away sa mga nagakontra sa nasyon it Israel. Ngani sanda ro “nangin bantay sa likod” para protektahan ro nasyon habang nagapaagto sanda sa Ginpromisa nga Eugta. (Num. 10:25) Importante gid ruyong asayment, maskin pa owa nakita it ibang mga tribu ro mga gin-obra it tribu ni Dan.

7. Ano ro dapat natong batyagon sa mga asayment nga atong nabaton sa pag-alagad kay Jehova?

⁷ Ano ro atong matun-an? Kon amat, may mga ginaobra ka nga sa pamatyag mo hay owa nakikita it iba. Posible nga nagbulig ka sa pagpanglimpyo ag pagmentinar it Kingdom Hall, nagboluntaryo sa mga ueobrahon para sa asembliya o kunbensyon, o sa iba pang asayment. Kon huo, ginakomendahan ka gid! Tandai pirme nga nakikita ni Jehova ag ginaapresyar na ro tanan mong ginaobra para kana. Ag mas naapresyar na ra kon nagaalagad ka kana buko’t dahil gusto mong dayawon it iba, kundi gusto mong ipakita nga palangga mo gid imaw.​—Mat. 6:​1-4.

SI GAD

8. Ham-an madali nga masalakay it mga kaaway it Israel ro tribu ni Gad? (Genesis 49:19) (Tan-awa man ro kahon.)

⁸ Basaha ro Genesis 49:19. Ginhula ni Jacob nga pagasalakayon it grupo it mga manakaw ro tribu ni Gad. Pagtaliwan it mga 200 nga dag-on, namana it tribu ni Gad ro eugta sa binit it Suba it Jordan, nga maeapit sa teritoryo it kaaway nga mga nasyon. Ngani madali eang para sa mga kaaway nga salakayon sanda. Pero, gusto gihapon it tribu ni Gad nga mag-estar igto dahil manami ra nga lugar para mag-alaga it mga sapat. (Num. 32:​1, 5) Maisog gid sanda nga mga tawo. Dugang pa, nagsalig man sanda kay Jehova nga buligan sanda nga protektahan ro eugta nga gintao kanda kontra sa grupo it mga manakaw. Sa sueod it mga dinag-on, ginpadaea it tribu ni Gad ro andang mga soldado para buligan ro ibang mga tribu nga masakop ro eugta sa tabok it Jordan. (Num. 32:​16-19) Nagsalig sanda nga protektahan ni Jehova ro andang mga asawa ag mga unga habang owa pa nakabalik ro mga soldado. Ginpakamayad ni Jehova ro andang kaisog ag pagsakripisyo.​—Jos. 22:​1-4.

9. Kon nagasalig kita kay Jehova, ano ro mga desisyon nga atong pagaobrahon?

⁹ Ano ro atong matun-an? Para padayon nga maalagad si Jehova maskin may mga kalisdanan, dapat pirme kitang magsalig kana. (Sal. 37:3) Abu makaron ro nagpakita it andang pagsalig kay Jehova paagi sa pag-obra it mga sakripisyo para suportahan ro mga proyekto sa konstruksyon it organisasyon, sa pag-alagad kon siin ro may mas mabahoe nga pagkinahang-ean, o sa pagdipara it iba pang mga asayment. Ginaobra nanda ra dahil nagasalig sanda nga indi sanda pagpabay-an ni Jehova.​—Sal. 23:1.

SI ASER

10. Ano dapat ro gin-obra it tribu ni Aser? (Genesis 49:20) (Tan-awa man ro kahon.)

¹⁰ Basaha ro Genesis 49:20. Ginhula ni Jacob nga ro tribu ni Aser hay mangin manggaranon, ag raya gid ro natabo. Namana it tribu ni Aser ro pila sa pinakamabungahon nga eugta sa bilog nga Israel. (Deut. 33:24) Maeapit ra sa Dagat it Mediteraneo ag sa dungkaan it Sidon, nga sangka manggaranon nga syudad. Pero, owa ginpahalin it tribu ni Aser ro mga Canaanhon sa rayang eugta. (Huk. 1:​31, 32) Dahil sa andang manggad ag sa maeain nga impluwensya it mga Canaanhon, nangin buko’t mahugod sa matuod nga pagsimba ro tribu ni Aser. Halimbawa, kat nangayo it bulig si Hukom Barak sa mga Israelinhon para makipag-away sa mga Canaanhon, owa nagbulig ro tribu ni Aser. Dahil karon, owa nanda nakita ro daeayawon nga gin-obra ni Jehova “maeapit sa suba it Megiddo,” para buligan ro mga Israelinhon nga magdaog. (Huk. 5:​19-21) Posibleng nahuy-an gid ro tribu ni Aser kat nabatian nanda ro kanta nanday Barak ag Debora: “Si Aser hay nagpungko eang sa binit it baybay.”​—Huk. 5:17.

11. Ham-an dapat natong likawan nga mangin pinakaimportante sa atong kabuhi ro kwarta?

¹¹ Ano ro atong matun-an? Gusto natong itao kay Jehova ro atong pinakamayad. Para maobra ra, kinahang-ean natong likawan nga mangin pareho sa mga tawo sa kalibutan nga nagaisip nga ro kwarta ro pinakaimportante sa atong kabuhi. (Hulu. 18:11) Maskin kinahang-ean naton ro kwarta, owa naton ginaisip nga mas importante ra kaysa sa atong pag-alagad kay Jehova. (Man. 7:12; Heb. 13:5) Owa man naton ginagamit ro atong oras ag kusog para mabuoe ro mga bagay nga bukon man naton it kinahang-ean. Kundi, ginagamit naton ra sa pag-alagad kay Jehova. Sayod naton nga kon padayon kita nga mangin matutom, pagapremyuhan kita ni Jehova it manami nga kabuhi sa paeaabuton.​—Sal. 4:8.

SI NEPTALI

12. Paalin natuman ro ginhula ni Jacob kay Neptali? (Genesis 49:21) (Tan-awa man ro kahon.)

¹² Basaha ro Genesis 49:21. Ginhambae ni Jacob nga si Neptali hay magahambae it “manami nga mga bisaea.” Posibleng nagatukoy ra sa paagi it paghambae ni Jesus sa anang pagministeryo. Si Jesus hay kilaea nga mayad nga manogturo, ag mabuhay imaw nga nag-estar sa Capernaum nga sakop it tribu ni Neptali. Ngani gintawag ra nga “anang kaugalingon nga banwa.” (Mat. 4:13; 9:1; Juan 7:46) Ag ginhula ni Isaias nga si Jesus hay mangin pareho it “mabahoe nga kahayag” sa katawhan it Zebulon ag Neptali. (Isa. 9:​1, 2) Paagi sa mga ginturo ni Jesus, imaw hay nangin “matuod nga kahayag nga . . . nagaiwag sa tanan nga mga tawo.”​—Juan 1:9.

13. Paalin naton masigurado nga ro atong mga ginahambae hay makapasadya kay Jehova?

¹³ Ano ro atong matun-an? Importante kay Jehova kon ano ro atong ginahambae ag kon paalin naton ra ihambae. Paalin kita makahambae it “manami nga mga bisaea” nga makapasadya kay Jehova? Maghambae kita it matuod. (Sal. 15:​1, 2) Maghambae man kita it makapalig-on sa iba. Halimbawa, komendahan naton sanda kon nakaobra sanda it mayad ag likawan naton nga maghambae it buko’t manami sa ibang tawo o magreklamo. (Efe. 4:29) Ag pwede man natong tinguhaan nga mangin mayad sa pag-umpisa it pag-istorya agud masugid rayon naton ro parti kay Jehova.

SI JOSE

14. Paalin natuman ro hula parti kay Jose? (Genesis 49:​22, 26) (Tan-awa man ro kahon.)

¹⁴ Basaha ro Genesis 49:​22, 26. Ginpabugae gid ni Jacob si Jose. Ginpili imaw ni Jehova “halin sa anang mga igmanghod” ag gingamit sa espesyal nga paagi. Gintawag imaw ni Jacob nga “ro sanga it mabungahon nga puno.” Si Jacob mismo ro puno, ag si Jose ro anang sanga. Si Jose ro panganay nga unga ni Jacob sa anang pinalangga nga asawa, nga si Raquel. Ginhula ni Jacob nga magabaton si Jose it doble nga parte it mana imbes nga si Ruben, ro panganay nga unga ni Jacob kay Lea. (Gen. 48:​5, 6; 1 Cron. 5:​1, 2) Natuman rayang hula kat ro daywang unga ni Jose nga sanday Efraim ag Manases hay nangin daywang ka tribu it Israel ag nabaton it kada tribu ro andang namana nga eugta.​—Gen. 49:25; Jos. 14:4.

15. Ano ro nangin reaksyon ni Jose kat nakaeksperyinsya imaw it inhustisya?

¹⁵ Ginhambae man ni Jacob nga ro mga manogpana hay “ginapana [si Jose] ag padayon sanda nga nagadumot kana.” (Gen. 49:23) Nagatukoy ra sa anang mga igmanghod nga nagselos kana, nagtratar kana it buko’t mayad, ag nangin rason sa mga inhustisya nga anang naeksperyinsyahan. Pero, owa nagdumot si Jose sa anang mga igmanghod o nagbasoe kay Jehova sa natabo kana. Kundi, ginhambae ni Jacob nga ro pana ni Jose hay “nagpabilin gihapon nga malig-on, ag ro anang mga alima hay padayon nga nangin makusog ag maabtik.” (Gen. 49:24) Nagsalig si Jose kay Jehova sa panahon it anang mga kalisdanan, ag owa na eang ginpatawad ro anang mga igmanghod kundi gintratar na man sanda it mayad. (Gen. 47:​11, 12) Gingamit ni Jose ro mga kalisdanan nga anang naeksperyinsyahan para mangin mas mayad nga tawo. (Sal. 105:​17-19) Dahil kara, gingamit imaw ni Jehova para maobra ro daeayawon nga mga bagay.

16. Paalin naton matuead ro halimbawa ni Jose kon makaeksperyinsya it mga kalisdanan?

¹⁶ Ano ro atong matun-an? Indi naton pagpasugtan ro mga kalisdanan nga ipaeayo kita kay Jehova o sa atong mga igmanghod. Tandai nga pwedeng pasugtan ni Jehova ro mga kalisdanan para sanayon kita. (Heb. 12:7) Rayang pagsanay hay makabulig katon nga mapaeambo ag mapauswag ro Cristyanong mga ugali, pareho it kaeuoy ag pagkamapinatawaron. (Heb. 12:11) Makasigurado kita nga pakamayron man kita ni Jehova, pareho kay Jose.

SI BENJAMIN

17. Paalin natuman ro hula parti kay Benjamin? (Genesis 49:27) (Tan-awa man ro kahon.)

¹⁷ Basaha ro Genesis 49:27. Ginhula ni Jacob nga ro tribu ni Benjamin hay mangin mayad sa pagpakig-away pareho it lobo. (Huk. 20:​15, 16; 1 Cron. 12:2) Ro unang hari it Israel nga si Saul hay halin sa tribu ni Benjamin. Ag maisog imaw nga nakipag-away sa mga Filistinhon. (1 Sam. 9:​15-17, 21) Pagtaliwan it abung dinag-on, sanday Reyna Ester ag Mardoqueo nga halin man sa tribu ni Benjamin, ro nag-euwas sa mga Israelinhon sa pagpamatay kanda it mga Persianhon.​—Ester 2:​5-7; 8:3; 10:3.

18. Paalin naton matuead ro pagkamainunongon it tribu ni Benjamin sa mga kahimusan ni Jehova?

¹⁸ Ano ro atong matun-an? Masadya gid ro Benjaminhon kat nangin hari si Saul nga halin sa andang tribu. Pero, kat ginpili ni Jehova bilang hari si David, nga halin sa tribu ni Juda, padayon gihapon nga ginsuportahan it mga Benjaminhon ruyong pagbag-o. (2 Sam. 3:​17-19) Pagtaliwan it mga dinag-on kat nagrebelde ro ibang mga tribu, padayon nga nangin mainunongon ro tribu ni Benjamin sa tribu ni Juda ag sa ginpili nga hari ni Jehova. (1 Hari 11:​31, 32; 12:​19, 21) Kabay nga mainunongon man naton nga suportahan ro mga ginpili ni Jehova nga magpanguna sa anang katawhan makaron.​—1 Tes. 5:12.

19. Paalin katon makabulig ro hula ni Jacob bago imaw mamatay?

¹⁹ Makabulig katon ro hula ni Jacob bago imaw mamatay. Ro atong natun-an parti sa hula ni Jacob ag kon paalin ra natuman hay mas nagapabakud it atong pagtuo nga matuman ro iba pang mga hula sa Biblia. Ag ro atong natun-an kon paalin ginpakamayad ro mga unga ni Jacob hay makabulig katon nga mas maintindihan kon paalin naton mapasadya si Jehova.