‘Haeungi ro Paghiusa nga Ginatao Katon ku Espiritu’
GINPALIG-ON ni apostol Pablo ro mga Cristyano sa Efeso nga mangin ‘mapinasensyahon sa gihapon ag ipakita ro andang gugma paagi sa andang pagbueoligan. Tinguhaan gid nanda nga haeungan ro paghiusa nga ginatao kanda ku espiritu, paagi sa paghidait nga ruyon ro nagahiusa kanda.’—Efe. 4:2, 3.
Nasadyahan kita sa ‘paghiusa nga ginatao katon ku espiritu.’ Buot hambaeon, may paghiusa kita dahil sa bulig ku baeaan nga espiritu it Dyos. Pero pareho sa ginhambae ni Pablo, kinahang-ean it pagtinguha para indi maduea ro paghiusa. Sin-o dapat ro mag-obra kara? Bilang mga Cristyano, dapat obrahon it kada isaea katon ro atong parte para padayon nga ‘mahaeungan ro paghiusa nga ginatao katon ku espiritu.’
Sa pag-ilustrar: Imadyina nga ginregaluhan ka it bag-o nga saeakyan. Pero, sin-o dapat ro magmentinar kara? Klaro gid ro sabat. Ngani, indi mo mabasoe ro nagregalo kimo it saeakyan kon masamad ra dahil owa mo ra ginmentinar.
Pareho karon, ro atong paghiusa hay regalo halin kay Jehova, pero dapat magtinguha ro kada isaea katon nga indi ra maduea. Ngani kon bukon it mayad ing relasyon sa sangka igmanghod, pangutan-a ing sarili, ‘Ginaobra ko baea ang parte para mapabilin ro paghiusa sa kongregasyon?’
‘TINGUHAI GID’ NGA MAPABILIN RO PAGHIUSA
Ginhambae ni Pablo nga posibleng malisud para katon kon amat nga mapabilin ro paghiusa sa atong mga igmanghod, eabi eon gid kon ro sambilog kanda hay nakasakit katon. Para mapabilin ro paghiusa, kinahang-ean baea nga pirme mong paeapitan ag istoryahon ro igmanghod nga nakasakit kimo? Bukon man. Pangutan-a ing sarili, ‘Kon istoryahon ko ro igmanghod nga nakasakit kakon, maayos baea ro problema o mapalala eang kara ro sitwasyon?’ Kon amat, mas mayad nga patawaron mo lang imaw o kalipatan lang ro natabo.—Hulu. 19:11; Mar. 11:25.
Pangutan-a ing sarili, ‘Kon istoryahon ko ro igmanghod nga nakasakit kakon, maayos baea ro problema o mapalala eang kara ro sitwasyon?’
Pareho sa ginsueat ni apostol Pablo, tinguhaan naton nga mangin ‘mapinasensyahon sa gihapon ag ipakita ro atong gugma.’ (Efe. 4:2) Ginahambae it sangka reperensya nga nagakahueogan man ra it “pagbaton kanda sa kon sin-o gid sanda.” Buot hambaeon, ginabaton naton nga ro atong mga igmanghod hay nagakasaea man pareho katon. Syempre, ginatinguhaan man naton nga isuksok ro “bag-o nga kinaugali” o personalidad. (Efe. 4:23, 24) Pero, owa katon it makaobra kara it perpekto. (Roma 3:23) Kon batunon naton rayang kamatuoran, mas maeumo para katon nga mangin matiniison, mapinatawaron, ag padayon nga ‘mahaeungan ro paghiusa nga ginatao katon ku espiritu.’
May “paghidait nga . . . nagahiusa” katon sa sueod it kongregasyon kon patawaron ag kalipatan naton ro masakit nga bagay nga gin-obra katon it iba. Ro Griego nga termino nga “nagahiusa” sa Efeso 4:3 hay gin-translate nga “litid-litid” sa Colosas 2:19, Ro Bag-o nga Kasugtanan, TAP. Ro litid-litid o eanit-eanit hay matibay nga tissue nga nagasugpon sa mga tue-an. Pareho kara, ro paghiusa ag pagpalangga hay makabulig katon para mapadayon ro atong mayad nga relasyon sa mga igmanghod maskin pa iba-iba ro atong ugali.
Ngani kon ro sangka igmanghod hay nagkasaea, nagpaakig, o nagpaugot katon, tinguhai nga pakitaan imaw it kaeuoy imbes nga pakaeainon imaw. (Col. 3:12) Ag dahil tanan kita hay buko’t perpekto, makahambae o makaobra kita it mga bagay nga makasakit sa iba. Kon tandaan naton ra, makabulig ra katon nga maobra ro atong parte para padayon nga ‘mahaeungan ro paghiusa nga ginatao katon ku espiritu.’