Maeapit Eon Baea Ro Katapusan It Kalibutan?

1. Siin naton masayran ro matabo sa paeaabuton?

NAKATAN-AW ka baea it balita ag nakaisip, ‘Magalala pa gid baea ra?’ Abu nga trahedya ag kapintas, ngani nagapati ro ibang tawo nga maeapit eon ro katapusan it kalibutan. Matuod baea ron? May paagi baea nga masayran kon ano ro matabo sa paeaabuton? Huo. Ro mga tawo owa kasayod sa matabo, pero si Jehova nga Dyos nakasayod. Ginasugid na katon sa Biblia ro parti sa atong paeaabuton ag sa eugta.​—Isaias 46:10; Santiago 4:14.

2, 3. Ano ro gustong masayran it mga disipulo ni Jesus, ag ano ro sabat ni Jesus?

² Kon mabasa naton sa Biblia ro katapusan it kalibutan, owa ra nagakahueogan sa katapusan it Eugta, kundi sa katapusan it kaeautan. Gintur-an ni Jesus ro mga tawo nga ro Ginharian it Dyos magagahum sa bilog nga eugta. (Lucas 4:43) Gusto masayran it anang mga disipulo kon hin-uno gaabot ro Ginharian it Dyos, ag nagpangutana sanda kay Jesus: “Hin-uno baea mahanabo ro mga butang ngara? Ano ro mangin paeatandaan it imong pag-abot it uman ag ro katapusan it kalibutan?” (Mateo 24:3) Owa nagtao si Jesus it insakto nga petsa, pero ginhambae na kon ano ro matabo bago ro katapusan it kalibutan. Nagakatabo eon makaron kon ano ro ginhambae ni Jesus.

³ Sa rayang kapitulo matun-an naton ro mga pamatuod nga iya eon kita sa tyempo bago tapuson ro kalibutan. Una, dapat naton tun-an ro natabo nga inaway sa eangit agud maeubtan kon ham-an maeain ro nagakatabo sa eugta.

INAWAY SA EANGIT

4, 5. (a) Ano ro natabo sa eangit kat nangin Hari eon si Jesus? (b) Sa Pahayag 12:12, ano ro natabo sa eugta kat ginhueog si Satanas?

⁴ Sa Kapitulo 8 natun-an naton nga nangin Hari si Jesus sa eangit ku 1914. (Daniel 7:13, 14) Ro libro it Pahayag nagasugid sa natabo: “Nag-umpisa ro inaway sa eangit: Si Miguel [Jesus] ag ro anang mga anghel nagpakig-away kontra sa dragon [Satanas]. Ro dragon nagsukoe kaibahan it anang mga anghel.”a Napirdi si Satanas ag anang mga demonyo sa inaway ag ginhueog sanda sa eugta. Isipa ro kasadya it mga anghel! Pero paalin ro mga tawo sa eugta? Naghambae ro Biblia nga raya ro tyempo it kinagulo ku katawhan. Ham-an? Tungod naakig gid ro Yawa, “nasayran nana nga sangkurot eon lang ro anang tyempo nga nabilin.”​—Pahayag 12:7, 9, 12.

⁵ Ro Yawa gaobra it kinagulo sa eugta hasta sa makaya na. Naakig gid imaw tungod sangkurot lang ro tyempo nga nabilin ag dueaon eon imaw it Dyos. Hisayron naton ro ginhambae ni Jesus nga matabo sa katapusan nga mga inadlaw.​—Tan-awa ro Endnote 24.

RO KATAPUSAN NGA MGA INADLAW

6, 7. Ano ro mahambae naton sa inaway ag gutom makaron?

⁶ Inaway. Naghambae si Jesus: “Ro isaeang ka banwa magasukob sa isaeang ka banwa, ro isaeang ka ginharian magagubat sa isaeang ka ginharian.” (Mateo 24:7) Makaron abu nga mga tawo ro ginpatay sa inaway kumpara sa mga kasaysayan kato. Ro sang ka report halin sa Worldwatch Institute nagapakita nga umpisa ku 1914, sobra 100 milyon ka mga tawo ro namatay sa inaway. Sa nagtaliwan nga 1,900 ka dag-on, sobra tatlong pilo ro namatay sa inaway sa sueod ku 100 ka dag-on sa tunga it 1900 ag 2000. Isipa ro kalisdanan ag kasakit nga nabatyagan it minilyon nga mga tawo tungod sa inaway!

⁷ Gutom. Naghambae si Jesus: ‘May kakueang sa pagkaon.’ (Mateo 24:7) Bisan abu ro ginaani nga pagkaon makaron kaysa kato, abu gihapon ro ginakueang sa pagkaon. Ham-an? Tungod owa sanda it kwarta nga ibakae it pagkaon o eugta nga tamnan. Sobra sang bilyon nga tawo ro nagakita it isaea ka dolyar kada adlaw o manaba pa. Ro World Health Organization naghambae nga tungod sa malnutrisyon, minilyon ka mga unga ro nagakamatay kada dag-on.

8, 9. Ano ro pamatuod nga ro mga tagna ni Jesus parti sa linog ag mga baeatian natuman?

⁸ Mga Linog. Si Jesus nagtagna: “May magaabot nga mabaskog nga mga linog.” (Lucas 21:11) Abu ro mabaskog nga linog ro nagaabot kada dag-on. Umpisa ku 1900 ka dag-on, sobra sa daywang milyon nga tawo ro namatay tungod sa mga linog. Bisan pa may teknolohiya agud masayran kon may linog, abu gihapon nga tawo ro namatay.

⁹ Baeatian. Si Jesus nagtagna nga may una ‘baeatian.’ Makataeagam nga mga baeatian ro madasig nga nagaeapta ag abu ro nagakamatay. (Lucas 21:11) Bisan nagtuon ro mga doktor sa pagbueong it mga sakit, may una gihapon nga indi mabueong. Ro sang ka report naghambae nga kada dag-on, minilyon nga tawo ro nagakamatay tungod sa baeatian kapareho it TB, malaria, ag kolera. Bukon eang it duyon, nasayran man it mga doktor nga may 30 pa ka bag-o nga mga sakit, ag owa raya it mga bueong.

RO MGA TAWO SA KATAPUSAN NGA MGA INADLAW

10. Ano ro ginahambae sa 2 Timoteo 3:1-5 nga nagakatabo makaron?

¹⁰ Sa 2 Timoteo 3:1-5, naghambae ro Biblia: “Manginmabudlay gid ro mga inadlaw sa katapusan nga tyempo.” Si apostol Pablo nagsugid kon ano ro batasan it mga tawo sa katapusan nga mga inadlaw. Naghambae imaw nga ro mga tawo

• mahikawon

• mahigugmaon sa kwarta

• buko’t matinumanon sa ginikanan

• buko’t mapinasaeamaton

• owa’t pagpalangga sa pamilya

• owa’t pagpugong sa kaugalingon

• mapintas ag mabangis

• mahigugmaon sa kinasadya kaysa sa Dyos

• gapakuno-kuno nga palangga ro Dyos pero owa nagatuman kana

11. Sa Salmo 92:7, ano ro matabo sa maeaut nga mga tawo?

¹¹ Makaraya baea ro mga tawo sa inyong lugar? Sa bilog nga kalibutan, makaron gid. Sa indi magbuhay may obrahon ro Dyos kara. Nagpromisa imaw: “Kon ro maeaut magtubo kapareho it mga hilamon ag ro tanan nga makasasaea magaeambo, raya agud laglagon sa owa it katapusan.”​—Salmo 92:7.

MAYAD NGA BALITA SA KATAPUSAN NGA MGA INADLAW

12, 13. Ano ro ginturo katon ni Jehova sa katapusan nga mga inadlaw?

¹² Nagtagna ro Biblia nga sa katapusan nga mga inadlaw, ro kalibutan abu nga kasakit ag pag-antus. Pero naghambae man ro Biblia nga may mayad nga matabo.

¹³ Pag-eubot sa Biblia. Si propeta Daniel nagsueat parti sa katapusan nga mga inadlaw. Naghambae imaw: “Ro matuod nga ihibaeo gabugana.” (Daniel 12:4) Ro Dyos nagtao it ikasarang sa anang katawhan agud eubton ro Biblia nga mangin klaro kumpara kato. Gin-obra ra ni Jehova ku 1914. Halimbawa, gintur-an na kita kon ham-an importante ro anang ngaean ag kon ano ro anang katuyoan sa eugta ag ro kamatuoran parti sa pantubos, ag kon ano ro matabo kon mamatay kita ag sa pagkabanhaw. Natun-an man naton nga ro Ginharian it Dyos eang ro makasulbar it atong mga problema. Natun-an man naton kon paano mangin masadya ag kon paano magkabuhi nga nailaan it Dyos. Pero ano ro obrahon it mga alagad it Dyos sa andang hatun-an? May isaea pa ka tagna nga gatao katon it sabat.​—Tan-awa ro Endnote 21 ag 25.

14. Siin ginawali ro mayad nga balita it Ginharian, ag sin-o ro nagawali kara?

¹⁴ Bilog kalibutan nga pagwali. Kon parti sa katapusan nga mga inadlaw, naghambae si Jesus: “Rayang mayad nga balita nahanungod sa Ginharian iwali sa bilog nga kalibutan.” (Mateo 24:3, 14) Ro mayad nga balita it Ginharian hay ginwali sa sobra 230 ka mga eugta ag sobra 700 ka mga linggwahe. Huo, sa bilog nga kalibutan, ro mga Saksi ni Jehova naghalin sa ‘tanan nga nasyon ag tribu’ nagabulig sa mga tawo nga maeubtan kon ano ro Ginharian ag ro maobra kara sa mga tawo. (Pahayag 7:9) Ginaobra nanda ra it libre. Bisan abu ro naakig ag nagakontra, owa’t makapapundo kanda sa pagwali sa gintagna ni Jesus.​—Lucas 21:17.

ANO RO IMONG OBRAHON?

15. (a) Nagapati ka baea nga iya eon kita sa katapusan nga mga inadlaw, ham-an? (b) Ano ro matabo sa mga owa nagtuman ag nagtuman kay Jehova?

¹⁵ Nagapati ka baea nga iya eon kita sa katapusan nga mga inadlaw? Abu nga tagna sa Biblia ro nagakaeatabo. Maeapit eon papunduhon ni Jehova ro pagwali it mayad nga balita ag “ro katapusan” magaabot. (Mateo 24:14) Ano ro katapusan? Raya ro Armagedon kon siin dueaon it Dyos ro tanan nga kaeautan. Gamiton ni Jehova si Jesus ag ro anang makusog nga mga anghel agud laglagon ro mga owa gatuman Kana ag sa anang Unga. (2 Tesalonica 1:6-9) Pagkatapos, indi eon mapataeang ni Satanas ag ku anang mga demonyo ro mga tawo. Ro tanan nga gusto magtuman sa Dyos ag magbaton it anang Ginharian makakita it anang mga promisa nga matabo.​—Pahayag 20:1-3; 21:3-5.

16. Tungod maeapit lang ro katapusan, ano ro dapat mong obrahon?

¹⁶ Rayang kalibutan nga ginagamhan ni Satanas maeapit eon tapuson. Ngani importante nga pangutan-on naton ro atong kaugalingon, ‘Ano ro dapat kong obrahon?’ Gusto ni Jehova nga magtuon ka it Biblia hasta sa makaya mo. Dapat mo nga seryosohon ro imong pagtuon. (Juan 17:3) May mga miting ro mga Saksi ni Jehova kada domingo agud buligan ro mga tawo nga maeubtan ro Biblia. Pwede ka maka-attend sa miting it regular. (Basaha ro Hebreo 10:24, 25.) Kon matun-an mo nga kinahang-ean magbag-o, indi mahadlok nga obrahon ra. Magabakod ro imong pagpakig-amigo kay Jehova kon obrahon mo ra.​—Santiago 4:8.

17. Ham-an mangawa ro kaeabanan nga tawo sa pag-abot it katapusan?

¹⁷ Si apostol Pablo naghambae nga ro pagduea sa mga maeauton gaabot sa panahon nga owa ginapaabot it mga tawo, “pareho sa pag-abot it manakaw sa kagab-ihon.” (1 Tesalonica 5:2) Gintagna ni Jesus nga abu ro indi magpati nga nagakabuhi eon kita sa katapusan nga mga inadlaw. Naghambae imaw: “Pareho sa nanabo ku tyempo ni Noe, makaruyon man ro manabo sa pag-abot ku Unga it Tawo. Ay kat owa pa ro Baha, ro mga tawo nagakinaon ag nagaieinom, nagapangasawa ag ginapaasawa hasta gid sa adlaw nga si Noe nagsueod sa arka. Owa gid sanda nakasayod kon ano ro nagakatabo hasta nga nag-abot ro Baha ag nagkaeaeumos sanda. Makaruyon man ro manabo sa pag-abot ku Unga it Tawo.”​—Mateo 24:37-39.

18. Ano ro paandam nga gintao ni Jesus?

¹⁸ Nagpaandam si Jesus nga indi kamo magpadaea-daea sa “[sobra nga pagkaon] paghinilong ag madaea ro inyong painu-ino ku mga paealigban sa rayang kabuhi.” Naghambae imaw nga ro katapusan magaabot pareho it “siod.” Naghambae man imaw nga “magaabot sa tanan nga mga tawo sa bilog nga kalibutan.” Nagdugang pa imaw: “Magbantay ag magpangamuyo kamo pirme agud nga may kusog kamo ag indi maano kon rayang mga butang manabo, ag makatindog kamo sa atubangan ku Unga it Tawo.” (Lucas 21:34-36) Ham-an importante nga magpamati sa paandam ni Jesus? Tungod maeapit lang gid waskon ro maeaut nga kalibutan ni Satanas. Ratong ginpili eang ni Jehova ag ni Jesus ro maeuwas sa katapusan ag mabuhi sa bag-ong kalibutan.​—Juan 3:16; 2 Pedro 3:13.