Pribilehiyo Ro Pagpangamuyo

1, 2. Ham-an espesyal nga regalo ro pangamuyo, ag ham-an dapat naton masayran ro ginaturo it Biblia parti kara?

KUMPARA sa uniberso, maisot gid lang ro eugta. Kon tan-awon ra ni Jehova, tanan nga mga tawo kapareho eang it sang tueo it tubi halin sa balde. (Salmo 115:15; Isaias 40:15) Maskin maisot eang kita kumpara sa uniberso, ro Salmo 145:18, 19 nagahambae: “Si Jehova maeapit sa tanan nga nagatawag kana, sa tanan nga nagatawag it kamatuoran. Ginatao nana ro handum it mga nagakahadlok kana; ginapamatian nana ro pagpangayo nanda it bulig, ag ginaeuwas nana sanda.” Manami gid nga pribilehiyo! Si Jehova, ro eabing gamhanan nga Manogtuga, gusto magpaeapit katon, ag naila imaw mamati sa atong mga pangamuyo. Huo, pribilehiyo ro pagpangamuyo, espesyal nga regalo nga gintao ni Jehova sa kada isaea katon.

² Pero pamatian eang kita ni Jehova kon mag-istorya kana sa paagi nga nailaan na. Paano naton ra obrahon? Tan-awon ta ro ginasugid it Biblia parti sa pangamuyo.

HAM-AN MANGAMUYO KAY JEHOVA?

3. Ham-an dapat ka mangamuyo kay Jehova?

³ Gusto ni Jehova nga mangamuyo ka, o mag-istorya kana. Paano naton nasayran? Pangabay basaha ro Filipos 4:6, 7. Kanami gid nga imbitasyon. Ro Manoggahum it uniberso interesado gid kimo ag gusto na ihambae mo kana ing ginabatyag ag mga problema.

4. Paano ro pirmeng pagpangamuyo magapabakod it imong pagpakig-amigo kay Jehova?

⁴ Ro pangamuyo makabulig katon agud mangin maeapit nga amigo ni Jehova. Kon nagaistorya pirme ro mag-amigo it andang ginaisip, ginakabaeak-an, ag ginabatyag, magabakod ro andang pag-amigo. Pareho ra sa pagpangamuyo kay Jehova. Paagi sa Biblia, ginasugid na kimo ro anang ginaisip ag ginabatyag, ag kon ano ro anang obrahon sa paeaabuton. Masugid mo man ing madaeum nga ginabatyag kon pirme mo imaw istoryahon. Sa pag-obra kara, mas magabakod ro imong pagpakig-amigo kay Jehova.​—Santiago 4:8.

RO DAPAT OBRAHON AGUD PAMATIAN IT DYOS

5. Paano naton nasayran nga owa ginapamatian ni Jehova ro tanan nga pangamuyo?

⁵ Ginapamatian baea ni Jehova ro tanan nga pangamuyo? Owa. Sa tyempo ni propeta Isaias, si Jehova naghambae sa mga Israelita: “Maskin abu pa ro inyong ginapangamuyo, owa Ako nagapamati; ro inyong mga alima puno it dugo.” (Isaias 1:15) Ngani kon indi maghaeong, makaobra kita it mga bagay nga makapaeayo kay Jehova, ag indi na pagbatunon ro atong pangamuyo.

6. Ham-an importante ro pagtuo? Paano mo mapamatud-an nga may pagtuo ka?

⁶ Kon gusto naton pamatian ni Jehova ro atong mga pangamuyo, dapat may pagtuo kita kana. (Marcos 11:24) Naghambae si apostol Pablo: “Owa it tawo nga makapahamuot sa Dyos kon owa imaw it pagtuo. Ay ro nagapaeapit sa Dyos dapat magtuo nga may Dyos, ag nagatao imaw it baeos sa mga nagausoy kana.” (Hebreo 11:6) Pero indi eang maghambae nga may pagtuo kita. Dapat pamatud-an ron paagi sa pagtuman kay Jehova kada adlaw.​—Basaha ro Santiago 2:26.

7. (a) Ham-an dapat kita magpaubos ag magtahod kon magpangamuyo kay Jehova? (b) Paano kita mangin sinsero kon gapangamuyo?

⁷ Dapat kita magpaubos ag magtahod kon nagapangamuyo kay Jehova. Ham-an? Kon mag-istorya kita sa hari o presidente, nagapakita kita it pagtahod. Si Jehova ro Eabing Gamhanan nga Dyos, di baea dapat gid kita magtahod ag magpaubos kon nagaistorya kana? (Genesis 17:1; Salmo 138:6) Ro atong pangamuyo dapat sinsero ag halin sa tagipusoon bukon it pauman-uman eang.​—Mateo 6:7, 8.

8. Kon may ipangamuyo, ano pa ro atong obrahon?

⁸ Sa katapusan, kon may ipangamuyo, dapat obrahon kon ano ro atong ginpangamuyo. Halimbawa, kon magpangamuyo kay Jehova sa atong mga kinahang-eanon, indi magtinamad ag magsalig nga itao ra katon tanan ni Jehova kon kaya manlang natong obrahon. Dapat maghugod ag mag-obra it bisan alin nga makaya naton. (Mateo 6:11; 2 Tesalonica 3:10) O kon mangayo kita it bulig kay Jehova agud punduhon ro maeain nga ginaobra, dapat maglikaw sa sitwasyon nga matentar kita. (Colosas 3:5) Tan-awon naton ro pirmeng ginapangutana parti sa pangamuyo.

MGA PANGUTANA PARTI SA PANGAMUYO

9. Kanyo kita dapat mangamuyo? Ano ro ginaturo katon it Juan 14:6 parti sa pangamuyo?

⁹ Kanyo kita dapat mangamuyo? Nagturo si Jesus sa anang sumueonod nga mangamuyo, “Ama namon nga una sa eangit.” (Mateo 6:9) Naghambae pa imaw: “Ako ro daean, ro kamatuoran ag ro kabuhi. Owa it may makaadto sa Ama kon bukon it paagi kakon.” (Juan 14:6) Ngani dapat mangamuyo eang kita kay Jehova paagi kay Jesus. Ano ro buot hambaeon kara? Agud batunon ni Jehova ro atong mga pangamuyo, dapat may pagtahod kita sa espesyal nga pribilehiyo nga gintao ni Jehova kay Jesus. Sa natun-an naton, nag-agto si Jesus sa eugta agud euwason kita sa saea ag kamatayon. (Juan 3:16; Roma 5:12) Gin-obra man ni Jehova si Jesus nga Mataas nga Saserdote ag Hukom.​—Juan 5:22; Hebreo 6:20.

10. Dapat baea may insakto kita nga posisyon kon gapangamuyo? Ipaathag.

¹⁰ Dapat baea may insakto kita nga posisyon kon nagapangamuyo? Owa, si Jehova owa nagsugo katon nga mag-euhod, magpungko, o magtindog kon nagapangamuyo. Ginatur-an kita it Biblia nga pwede kita makaistorya kay Jehova maskin ano nga posisyon. (1 Cronica 17:16; Nehemias 8:6; Daniel 6:10; Marcos 11:25) Buko’t importante kay Jehova ro atong posisyon kon nagapangamuyo, kundi ro atong pagkasinsero kon nagaistorya kana. Makapangamuyo kita it mabaskog o mahipos maskin siin kita, adlaw man o gabii. Makasalig kita nga nagapamati si Jehova sa atong pangamuyo bisan owa ra nakita it iba.​—Nehemias 2:1-6.

11. Ano ro mga bagay nga pwede naton ihambae kay Jehova?

¹¹ Ano ro pwede natong ipangamuyo? Makapangamuyo kita it bisan ano suno sa kabubot-on ni Jehova. Ro Biblia naghambae: “Magpangayo kita it bisan ano nga butang nga suno sa anang kabubot-on.” (1 Juan 5:14) Makapangamuyo baea kita it personal nga bagay? Huo. Ro pagpangamuyo kay Jehova pareho sa pag-istorya sa maeapit nga amigo. Pwede naton mahambae kana ro atong ginaisip ag ginabatyag. (Salmo 62:8) Makapangayo kita it baeaan nga espiritu agud makaobra it mayad. (Lucas 11:13) Ag kaaeam agud makadesisyon it tama, mangayo man kita it kusog agud makaya ro mga problema. (Santiago 1:5) Mangayo it patawad sa atong mga saea. (Efeso 1:3, 7) Dapat ipangamuyo man naton ro iba, kaibahan ro atong pamilya ag mga igmanghod sa kongregasyon.​—Binuhatan 12:5; Colosas 4:12.

12. Ano dapat ro pinakaimportante sa atong mga pangamuyo?

¹² Ano dapat ro pinakaimportante sa atong mga pangamuyo? Si Jehova ag ro anang kabubot-on. Dapat halin sa tagipusoon ro atong pagpasaeamat sa tanan nga gin-obra na para katon. (1 Cronica 29:10-13) Sayod naton ra tungod ginturo ni Jesus kato sa anang mga disipulo kon paano mangamuyo. (Basaha ro Mateo 6:9-13.) Hambae na nga dapat una ipangamuyo ro pagdayaw sa ngaean it Dyos ag kabigon nga sagrado o baeaan. Ag ginpakita na nga dapat ipangamuyo nga mag-abot ro Ginharian it Dyos ag ro kabubot-on ni Jehova matuman sa bilog nga eugta. Pagkatapos ipangamuyo rayang importante gid nga mga butang ginhambae ni Jesus nga ipangamuyo naton ro personal nga kinahang-eanon. Kon si Jehova ag ro anang kabubot-on ro unang ipangamuyo, mapakita naton nga pinakaimportante gid ra.

13. Mauno’t haba dapat ro atong pangamuyo?

¹³ Mauno’t haba dapat ro atong pangamuyo? Owa’t ginhambae ro Biblia. Pwede nga mahaba o matag-od, depende sa sitwasyon. Halimbawa, makapangamuyo kita it matag-od bago magkaon ag mahaba kon nagapasaeamat kay Jehova ag nagahambae it atong kabaeaka. (1 Samuel 1:12, 15) Owa kita nagapangamuyo it mahaba para madayaw it iba, pareho sa mga tawo sa tyempo ni Jesus. (Lucas 20:46, 47) Owa karon naila si Jehova. Importante kana ro pangamuyo nga halin sa tagipusoon.

14. Dapat baea kita pirme mangamuyo, ag ano ro ginaturo kara katon parti kay Jehova?

¹⁴ Dapat baea pirme kita mangamuyo? Ginaimbita kita ni Jehova nga pirme mag-istorya kana. Ro Biblia naghambae nga dapat padayon “magpangamuyo,” “magpangamuyo pirme,” ag “magpangamuyo sa tanan nga oras.” (Mateo 26:41; Roma 12:12; 1 Tesalonica 5:17) Si Jehova handa magpamati katon. Pasaeamatan naton imaw kada adlaw sa pagpalangga ag kaatag katon. Makapangabay kita it anang paggiya, kusog, ag katawhay. Kon ginaapresyar naton rayang pribilehiyo, pirme kita mangamuyo kana.

15. Ham-an dapat kita maghambae it “amen” sa katapusan it pangamuyo?

¹⁵ Ham-an dapat kita maghambae it “amen” sa katapusan it pangamuyo? Ro tinaga nga “amen” gakahueogan it “sigurado” o “kabay pa.” Nagapakita ra nga sinsero gid kita sa atong pangamuyo. (Salmo 41:13) Ginaturo it Biblia nga pwede kita kahambae it “amen” sa mahipos o mabaskog nga limog sa katapusan it pampubliko nga pangamuyo, nagapakita ra nga nagasugot kita sa ginpangamuyo.​—1 Cronica 16:36; 1 Corinto 14:16.

PAANO GINASABAT IT DYOS RO ATONG MGA PANGAMUYO?

16. Ginasabat gid baea ni Jehova ro atong mga pangamuyo? Ipaathag.

¹⁶ Ginasabat gid baea ni Jehova ro atong mga pangamuyo? Huo. Gintawag imaw it Biblia nga “Manogpamati it pangamuyo.” (Salmo 65:2) Ginapamatian ag ginasabat ni Jehova ro sinsero nga pangamuyo it minilyon nga tawo, ginaobra na ra sa eain-eain nga paagi.

17. Paano ginagamit ni Jehova ro mga anghel ag anang mga alagad sa eugta agud masabat ro atong mga pangamuyo?

¹⁷ Ginagamit ni Jehova ro mga anghel ag anang mga alagad sa eugta agud masabat ro atong mga pangamuyo. (Hebreo 1:13, 14) Abu nga halimbawa it mga tawo ro nangamuyo agud mabuligan nga maeubtan ro Biblia ag pagkatapos may nagbisita nga sang ka Saksi ni Jehova. Ginapakita it Biblia nga kaibahan ro mga anghel sa pagsugid it “mayad nga balita” sa bilog nga eugta. (Basaha ro Pahayag 14:6.) Abu man katon ro nagpangamuyo kay Jehova it mga problema o kinahang-eanon ag pagkatapos nakabaton it bulig halin sa mga igmanghod.​—Hulubaton 12:25; Santiago 2:16.

18. Paano ginagamit ni Jehova ro anang baeaan nga espiritu ag Biblia agud sabton ro atong mga pangamuyo?

¹⁸ Ginagamit ni Jehova ro anang baeaan nga espiritu agud sabton ro atong mga pangamuyo. Agud makaya ro mga problema, ginagamit na ro anang baeaan nga espiritu agud taw-an kita it giya ag kusog. (2 Corinto 4:7) Ginagamit man nana ro Biblia agud sabton ro atong mga pangamuyo ag makaobra it maaeam nga mga desisyon. Kon basahon naton ro Biblia, makakita kita it mga bersikulo nga makabulig katon. May ginapahueag si Jehova nga magsabat sa mga miting o may manami nga punto ro sang ka elder sa kongregasyon nga makapalig-on katon.​—Galacia 6:1.

19. Ham-an owa pa ginasabat ni Jehova ro atong mga pangamuyo?

¹⁹ Kon amat, mangawa kita, ‘Ham-an owa pa ginasabat ni Jehova ro akong mga pangamuyo?’ Tandai, nakasayod imaw kon hin-uno ag paano sabton ro atong mga pangamuyo. Sayod na ro atong kinahang-eanon. Padayon nga mangamuyo agud ipakita nga seryoso kita sa atong ginapangabay ag may pagtuo kita kana. (Lucas 11:5-10) Kon amat ginasabat ni Jehova ro atong mga pangamuyo sa paagi nga owa naton ginapaabot. Halimbawa, gapangamuyo kita kon una sa kalisdanan, pero imbes nga dueaon na ro problema, ginataw-an na kita it kusog nga mabatas ra.​—Basaha ro Filipos 4:13.

20. Ham-an pirme kita mangamuyo kay Jehova?

²⁰ Manami gid nga pribilehiyo ro pagpangamuyo kay Jehova! Makasigurado kita nga nagapamati imaw katon. (Salmo 145:18) Kon pirme kita mangamuyo kay Jehova halin sa atong tagipusoon, magabakod pa gid ro atong pagpakig-amigo kana.