TUEON-AN NGA ARTIKULO 42
KANTA 103 Mga Manugbantay—Dulot nga mga Lalaki
Ipakita ro Apresasyon sa “Regalo nga mga Eaki”
“Kat pagsaka nana sa kaeangitan . . . , nagtao imaw it mga regalo nga mga eaki.”—EFE. 4:8, NWT.
RO ATONG MATUN-AN
Tun-an naton kon paano kita ginabuligan it mga ministeryal nga alagad, mga elder, ag mga manogdipara it sirkito, ag kon paano naton mapakita ro atong apresasyon sa ginaobra it rayang matutom nga mga eaki.
1. Ano ro pila nga mga regalo nga atong nabaton kay Jesus?
OWA it tawo nga makatupong sa kaalwan ni Jesus. Kat iya imaw sa eugta, gingamit na ro anang gahum para buligan ro iba. (Luc. 9:12-17) Gintao na ro pinakaespesyal nga regalo sa tanan paagi sa pagtao it anang kabuhi katon. (Juan 15:13) Umpisa nga nabanhaw si Jesus, padayon na kita nga ginabuligan. Pareho sa anang ginpromisa, ginpangabay na kay Jehova nga taw-an kita it baeaan nga espiritu agud tur-an ag paumpawan kita. (Juan 14:16, 17; 16:13) Ag paagi sa mga miting sa kongregasyon, padayon nga ginatao ni Jesus ro atong mga kinahang-ean sa pag-obra it mga disipulo sa bilog nga kalibutan.—Mat. 28:18-20.
2. Sin-o ro “regalo nga mga eaki” nga gintukoy sa Efeso 4:7, 8, NWT?
2 May regalo pa nga gintao si Jesus katon. Nagsueat si apostol Pablo nga kat igto eon si Jesus sa eangit, “nagtao imaw it mga regalo nga mga eaki.” (Basaha ro Efeso 4:7, 8, NWT.) Gin-eksplikar ni Pablo nga gintao ni Jesus rayang mga regalo agud buligan ro kongregasyon sa iba-ibang paagi. (Efe. 1:22, 23; 4:11-13) Makaron, rayang “regalo nga mga eaki” hay nagatukoy sa mga ministeryal nga alagad, mga elder, ag mga manogdipara it sirkito.a Syempre, rayang mga eaki hay bukon man it perpekto, nagakasaea man sanda. (Sant. 3:2) Pero ginagamit sanda it atong Ginuong Jesu-Cristo para buligan kita; mga regalo na sanda para katon.
3. Iilustrar kon paano kita tanan makasuporta sa ueobrahon it rayang “regalo nga mga eaki.”
3 Gintaw-an it asayment ni Jesus rayang “regalo nga mga eaki” para palig-unon ro kongregasyon. (Efe. 4:12) Pero tanan kita hay makabulig para maobra nanda rayang importante nga responsibilidad. Sa pag-ilustrar: Makumpara naton ra sa pagpatindog it Kingdom Hall. Ro iba hay nagabulig sa konstruksyon. Ro iba mat-a hay nagasuporta paagi sa pagtao it pagkaon, transportasyon, ag sa iba pang paagi. Pareho karon, tanan kita hay makasuporta sa pagtinguha it mga ministeryal nga alagad, mga elder, ag mga manogdipara it sirkito paagi sa atong ginahambae ag ginaobra. Talakayon naton kon paano kita makabenepisyo sa andang kahugod, ag kon paano naton mapakita ro apresasyon kanda ag kay Jesus, nga nagtao it rayang “regalo nga mga eaki.”
NAGABULIG RO MGA MINISTERYAL NGA ALAGAD
4. Ano ro pila sa mga paagi nga ro mga ministeryal nga alagad hay nakabulig sa unang siglo nga mga Cristyano?
4 Ku unang siglo, ro pila nga mga igmanghod nga eaki hay ginpili bilang mga ministeryal nga alagad. (1 Tim. 3:8) Posible nga sanda ro gintukoy ni Pablo sa anang sueat nga “mga manogtabang” o mga manogbulig. (1 Cor. 12:28) Gindipara it mga ministeryal nga alagad kato ro importante nga mga bagay agud ro mga elder hay makapukos sa pagturo ag pag-shepherding. Halimbawa, ro mga ministeryal nga alagad kato hay nakabulig agud mag-obra it abung kopya it Kasueatan o magbakae it mga materyales nga kinahang-ean nanda sa pagkopya.
5. Ano ro pila nga mga bulig nga ginaobra it mga ministeryal nga alagad makaron?
5 Tan-awon ta ro pila nga mga bulig nga ginaobra it mga ministeryal nga alagad sa inyong kongregasyon. (1 Ped. 4:10) Pwede sandang iasayn para magdipara sa mga account o teritoryo it kongregasyon, mag-order it mga literatura agud may kopya ro mga igmanghod, mag-operate sa audio ag video, mangin mga attendant, o magbulig sa pagmentinar it Kingdom Hall. Raya tanan nga ueobrahon hay importante agud mangin organisado ro kongregasyon. (1 Cor. 14:40) Dugang pa, ro pila nga mga ministeryal nga alagad hay may mga parte sa Pagkabuhi ag Ministeryo nga Miting ag mga pangpubliko nga diskurso. Pwede man sandang iasayn nga assistant ku manogdumaea it grupo. Kon amat, ro kwalipikado nga mga ministeryal nga alagad hay nagasunod man sa mga elder kon naga-shepherding.
6. Ham-an ginaapresyar naton ro atong mahugod nga mga ministeryal nga alagad?
6 Paano nakabenepisyo ro kongregasyon sa ginaobra it mga ministeryal nga alagad? Ro taga-Bolivia nga sister nga si Beberlyb hay naghambae: “Nagapasaeamat ako sa atong mga ministeryal nga alagad, na-enjoy ko gid ro mga miting. Tungod sa andang ginaobra, makakanta ako, makakomento, makapamati sa mga diskurso, ag makabenepisyo sa mga video ag piktyur. Ginasigurado nanda nga safe ro tanan nga naga-attend, ag makakonek paagi sa videoconference ro mga indi maka-attend. Pagkatapos it miting, nagapanguna sanda sa paglimpyo, nagabulig sa account, ag ginasigurado nanda nga may literatura kaming gamiton. Nagapasaeamat gid ang kanda!” Si Leslie nga taga-Colombia ag elder ro anang asawa hay naghambae: “Ginasaligan it ang asawa ro mga ministeryal nga alagad para magdipara sa iba-ibang asayment. Kon owa sanda, mangin mas masako gid ang asawa. Ngani nagapasaeamat gid ako sa andang kahugod ag kahanda sa pagbulig.” Tanan kita hay nagapasaeamat gid sa ginaobra it atong mga ministeryal nga alagad.—1 Tim. 3:13.
7. Paano naton mapakita nga ginaapresyar naton ro mga ministeryal nga alagad? (Tan-awa man ro piktyur.)
7 Maskin nagabatyag kita it pagpasaeamat sa mga ministeryal nga alagad, ginapalig-on kita it Biblia: “Ipakita nga mapinasaeamaton kamo.” (Col. 3:15, NWT) Si Krzysztof nga elder sa Finland hay nagapakita it anang pagpasaeamat sa rayang paagi: “Ginapadaehan ko it card o text message nga may nakakutar nga teksto ag ginasambit ko ro espisipiko nga paagi kon paano ako ginpalig-on it ministeryal nga alagad o kon ham-an naapresyar ko ro anang ginaobra.” Sanday Pascal ag Jael nga taga-New Caledonia hay espisipiko nga nagapangamuyo para sa mga ministeryal nga alagad. Naghambae si Pascal: “Ku raya eang, ro among pangabay, pag-ampo, ag pangamuyo it pagpasaeamat hay para gid sa mga ministeryal nga alagad sa among kongregasyon.” Ginapamatian gid ni Jehova rayang klasi it pangamuyo, ag makabenepisyo kara ro bilog nga kongregasyon.—2 Cor. 1:11.
“NAGAPANGABUDLAY PARA KINYO” RO MGA ELDER SA KONGREGASYON
8. Ham-an nakasueat si Pablo nga ro mga elder ku unang siglo hay “nagapangabudlay”? (1 Tesalonica 5:12, 13)
8 Ro mga elder ku unang siglo hay nagapangabudlay para sa kongregasyon. (Basaha ro 1 Tesalonica 5:12, 13; 1 Tim. 5:17) Nagapanguna sanda sa kongregasyon paagi sa pagdumaea it mga miting ag pag-obra it mga desisyon para sa kongregasyon. Nagatao man sanda it mapinalanggaon nga pahanumdom sa mga igmanghod agud makapabilin sanda nga may mabakud nga pagtuo. (1 Tes. 2:11, 12; 2 Tim. 4:2) Syempre, rayang mga eaki hay mahugod man sa pagtao it kinahang-eanon ku andang pamilya ag sa pagpalig-on it andang espiritwalidad.—1 Tim. 3:2, 4; Tito 1:6-9.
9. Ano ro pila sa mga responsibilidad nga ginaobra it mga elder makaron?
9 Masako gid ro mga elder makaron. Sanda hay mga manogwali. (2 Tim. 4:5) Mahugod gid sanda sa pagpanguna sa ministeryo, sa pag-organisar it pagwali sa lokal nga teritoryo, ag sa pagsanay katon nga mangin epektibo sa pagwali ag pagturo nga ueobrahon. Maeueoy-on sanda ag patas nga mga hukom. Kon nakaobra it seryoso nga saea ro sangka Cristyano, ginatinguhaan gid it mga elder nga buligan imaw nga mabalik ro anang relasyon kay Jehova. Ag ginahaeongan man nanda nga indi mahigkuan ro kongregasyon. (1 Cor. 5:12, 13; Gal. 6:1) Eabaw sa tanan, ro mga elder hay kilaea bilang mga manogbantay. (1 Ped. 5:1-3) Ginahandaan nanda it mayad ro mga diskurso sa Biblia, ginatinguhaan man nanda nga makilaea ro tanan sa kongregasyon, ag gina-shepherding ro mga igmanghod. Dugang pa sa andang asayment sa kongregasyon, ro pila sa mga elder hay nagabulig man sa pagpatindog ag pagmentinar it Kingdom Hall, sa pag-organisar it kunbensyon, sa mga Hospital Liaison Committee ag sa mga Patient Visitation Group. Nagapangabudlay gid it mayad ro mga elder para katon!
10. Ham-an ginaapresyar naton ro atong mahugod nga mga elder?
10 Ginhula ni Jehova nga ro mga manogbantay hay magadipara katon it mayad ag “indi eon [kita] mahadlok o makuebaan.” (Jer. 23:4) Raya mismo ro nabatyagan it sister sa Finland nga Johanna kat nagmasakit it grabi ro anang nanay. Naghambae imaw: “Maskin nalisdan ako magsugid it ang nabatyagan sa iba, nangin mapinasensyahon kang ro elder nga bukon ko’t masyadong kilaea, nagpangamuyo imaw kaibahan nakon, ag ginpasalig na ako it pagpalangga ni Jehova. Indi ko eon matandaan ro insakto nang ginhambae, pero tungod kato, naduea ang kahadlok. Nagapati ako nga ginpadaea gid imaw ni Jehova agud buligan ako sa ruyong panahon.” Paano ka ginbuligan it mga elder sa inyong kongregasyon?
11. Paano naton mapakita nga ginaapresyar naton ro mga elder? (Tan-awa man ro piktyur.)
11 Gusto ni Jehova nga ipakita naton ro atong tinagipusuon nga pag-apresyar sa mga elder “tungod ku bueohaton nga andang ginahimo.” (1 Tes. 5:12, 13) Si Henrietta nga taga-Finland man hay naghambae: “Handa gid ro mga elder magbulig sa iba, pero owa ra nagakahueogan nga mas abu andang oras ag kusog kaysa sa iba o owa sanda it mga kalisdanan sa andang kabuhi. Kon amat ginahambaean ko sanda: ‘Sayod mo, mayad ka gid nga elder. Gusto ko nga masayran mo ron.’” Ro sister sa Türkiyec nga si Sera hay naghambae: “Kinahang-ean it mga elder ro pagpalig-on para makapadayon sanda sa andang ueobrahon. Ngani pwede naton sandang taw-an it sueat, imbitahon sa pagkaon, o ibhan sa ministeryo.” May naisip ka baea nga elder nga gusto mong pasaeamatan tungod sa anang kahugod sa inyong kongregasyon? Mag-usoy it paagi para mapakita ing pagpasaeamat kana.—1 Cor. 16:18.
Pwede mo mapalig-on ro ginpili nga mga brother para makapadayon sanda sa andang ueobrahon (Tan-awa ro parapo 7, 11, 15)
NAGAPALIG-ON RO MGA MANOGDIPARA IT SIRKITO
12. Ano ro kahimusan nga gintao ni Jesus para palig-unon ro kongregasyon ku unang siglo? (1 Tesalonica 2:7, 8)
12 Nagtao si Cristo Jesus it “regalo nga mga eaki” sa kongregasyon agud mag-alagad sa ibang paagi. Sa idaeum it anang instruksyon, ginpadaea it mga elder sa Jerusalem sanday Pablo, Bernabe, ag iba pa bilang nagapanaw nga mga manogdipara. (Binu. 11:22) Ham-an? Para palig-unon ro kongregasyon pareho sa ginaobra it mga ministeryal nga alagad ag mga elder. (Binu. 15:40, 41) Abu ro ginsakripisyo it rayang mga eaki agud maobra rayang asayment ag handa sandang magrisgo it andang kabuhi para tur-an ag palig-unon ro iba.—Basaha ro 1 Tesalonica 2:7, 8.
13. Ano ro pila sa mga responsibilidad ku mga manogdipara it sirkito?
13 Nagabyahe pirme ro mga manogdipara it sirkito. Ro pila kanda hay nagabyahe it ginatos nga kilometro paagto sa mga kongregasyon. Kada domingo, ro manogdipara it sirkito hay nagatao it mga diskurso sa Biblia, naga-shepherding, ag nagadumaea it miting para sa mga payunir, miting para sa mga elder, ag mga miting para sa field service. Nagahanda imaw it anang mga diskurso ag nagaorganisar it pangsirkito nga mga asembliya ag mga kunbensyon. Nagaturo imaw sa eskuylahan para sa mga payunir, nagaorganisar it espesyal nga miting para sa mga payunir sa sirkito. Dugang kara, ginadipara na man ro iba pang importanteng bagay nga gin-asayn kana it branch office, nga kon amat hay dapat obrahon eagi.
14. Ham-an ginaapresyar naton ro atong mahugod nga mga manogdipara it sirkito?
14 Paano nakabenepisyo ro mga kongregasyon sa regalo nga mga manogdipara it sirkito? Ro sangka brother sa Türkiye hay naghambae parti sa mga pagbisita it mga nagapanaw nga manogdipara: “Nagapalig-on kakon ro kada pagbisita nanda nga magtao it oras sa pagbulig sa mga igmanghod. Abu eon ang hakilaea nga mga manogdipara it sirkito; pero owa gid it maskin sambato kanda ro nagpabatyag kang nga malisud sanda paeapitan o masako sanda.” Si Johanna nga ginsambit kaina hay nakaibahan ro manogdipara it sirkito sa ministeryo, ugaling owa’t tawo ro baeay. Naghambae imaw: “Pero, indi ko gid malipatan ratong adlaw. Ro daywa nakong igmanghod nga bayi hay kakapanaw eang sa iba nga lugar, ag nahidlaw gid ako kanda. Mapinalanggaon ako nga ginpalig-on ku manogdipara it sirkito ag ginbuligan na ako nga makita nga sa pag-alagad kay Jehova, ro distansya hay temporaryo eang, pero sa bag-ong kalibutan owa eon it katapusan ro atong pag-iliba.” Abu kitang masadya nga mga eksperyinsya kaibahan ro atong manogdipara it sirkito ag kon paano nanda kita ginbuligan.—Binu. 20:37–21:1.
15. (a) Base sa 3 Juan 5-8, paano naton mapakita ro apresasyon sa mga manogdipara it sirkito? (Tan-awa man ro piktyur.) (b) Paano naton mapakita ro konsiderasyon sa asawa it rayang mga brother nga nagapangabudlay para sa kongregasyon, ag paano naton ra maobra? (Tan-awa ro kahon nga “Dumdoma ro Andang mga Asawa.”)
15 Ginpalig-on ni apostol Juan si Gayo nga magpakita it pagkamaabiabihon sa nagabisita nga mga igmanghod nga eaki ag para buligan sanda nga “makapadayon sa andang paeanawon sa bagay nga malipay ro Dyos.” (Basaha ro 3 Juan 5-8.) Sangka paagi nga maobra naton ra hay ro pag-imbita kanda sa pagkaon. Sambato pa gid hay paagi sa pagsuporta sa mga kahimusan para sa ministeryo sa panahon it anang pagbisita. Si Leslie nga ginsambit kaina hay ginpakita man ro anang pagpasaeamat sa iba nga paagi. Naghambae imaw: “Ginapangamuyo ko kay Jehova nga itao ro andang mga kinahang-eanon. Nag-obra man kami ku ang asawa it sueat para kanda nga nagapasaeamat kon paano kami nabuligan it andang pagbisita.” Tandai nga may mga kalisdanan ag ginagaoy man kapareho naton ro mga manogdipara it sirkito. Kon amat, nagamasakit man sanda, nagakabaeaka ag naeuyahan it buot. Basi ing makapalig-on nga ginahambae o simple nga regalo hay sabat sa pangamuyo ku inyong manogdipara it sirkito!—Hulu. 12:25.
KINAHANG-EAN NATON RO “REGALO NGA MGA EAKI”
16. Base sa Hulubaton 3:27, ano ro pwedeng ipangutana it mga brother sa andang sarili?
16 Sa bilog nga kalibutan, kinahang-ean naton it dugang nga mga brother para mag-alagad bilang “regalo nga mga eaki.” Kon bautismado ka nga brother, kaya mo baea nga magbulig? (Basaha ro Hulubaton 3:27.) Ginatinguhaan mo baea nga mangin kwalipikado bilang ministeryal nga alagad? Kon ministeryal nga alagad ka eon, ginatinguhaan mo man baea nga abuton ro kwalipikasyon bilang elder?d Handa ka baea mag-obra it mga pagbag-o para maka-apply sa School for Kingdom Evangelizers? Ruyong eskuylahan hay magasanay ag magabulig kimo para magamit ka it mayad ni Jesus. Kon pamatyag mo hay bukon ka it kwalipikado, mangamuyo kay Jehova. Mangabay kana nga buligan ka ku anang baeaan nga espiritu agud maobra ro maskin alin man nga asayment nga itao kimo.—Luc. 11:13; Binu. 20:28.
17. Ano ro ginapamatud-an it “regalo nga mga eaki” parti sa atong Hari nga si Cristo Jesus?
17 Ro ginpili nga mga brother ni Jesus bilang “regalo nga mga eaki” hay pamatuod nga ginagiyahan na kita sa rayang katapusan nga mga inadlaw. (Mat. 28:20) Nagapasaeamat ka baea nga may Hari kita nga mapinalanggaon, maalwan, ag nakasayod it atong mga kinahang-ean ag nagatao it mga brother para buligan kita? Ngani mag-usoy it tsansa para ipakita ro imong apresasyon sa rayang mahugod nga mga eaki. Ag indi pagkalipati nga pasaeamatan si Jehova, ro ginhalinan it “kada mayad nga regalo ag himpit nga grasya.”—Sant. 1:17.
KANTA 99 Madamo nga Kauturan
a Ro mga elder nga nagaalagad bilang mga myembro it Nagadumaea nga Grupo, mga kabulig it Nagadumaea nga Grupo, mga myembro ku Komite it Branch, ag ratong mga nagaalagad sa iba pang asayment hay mga regalo man nga mga eaki.
b Gin-islan ro ibang pangaean.
c Ginatawag kato nga Turkey.
d Para sa impormasyon kon paano abuton ro pribilehiyo nga ministeryal nga alagad o elder, tan-awa ro mga artikulo nga “Mga Brother—Nagatinguha Baea Kamo nga Mangin Ministeryal nga Alagad?” ag “Mga Brother—Nagatinguha Baea Kamo nga Mangin Elder?” sa Nobyembre 2024 nga isyu it Ro Taean-awan.