Makatuon Kita sa Ulihing 40 nga Adlaw ni Jesus sa Eugta

1-2. Ano ro natabo sa daywang ka disipulo ni Jesus habang nagatikang pa-Emaus?

KU NISAN 16, 33 C.E., grabi nga kasubo ag kahadlok ro nabatyagan it mga disipulo ni Jesus. Ro daywa kanda hay nag-agto pa-Emaus, sangka baryo nga mga 11 nga kilometro (7 mi) ro kaeayuon halin sa Jerusalem. Naeuyahan gid sanda tungod si Jesus nga andang ginasunod hay ginpatay. Ro ginaeauman nanda nga obrahon it Mesias hay owa eon. Pero nakibot sanda sa masunod nga natabo.

² May nagpaeapit kanda nga sangka tawo nga bukon nanda it kilaea ag nagtikang kaibahan nanda. Ginsugid it mga disipulo ro andang pagkadismaya sa natabo kay Jesus. Gin-istorya rayon sanda it ratong tawo parti sa mga bagay nga indi gid nanda makalipatan. Gin-eksplikar na kanda “umpisa sa mga libro ni Moises ag sa mga sinueat ku tanan nga mga propeta,” kon ham-an dapat mag-antus ag mamatay ro Mesias. Pag-abot it tatlong ka eaki sa Emaus, ginsugid rayon it ratong tawo kon sin-o imaw—ro ginbanhaw nga si Jesus! Imadyina ro kasadya ku mga disipulo kat nasayran nanda nga buhi ro Mesias!—Luc. 24:​13-35.

3-4. Ano ro natabo sa mga disipulo ni Jesus, ag ano ro matun-an naton sa rayang artikulo? (Binuhatan 1:3)

³ Bago magsaka sa eangit si Jesus, nagpakita imaw sa anang mga disipulo it maabung beses sa sueod it anang ulihing 40 nga adlaw nga iya imaw sa eugta. (Basaha ro Binuhatan 1:3.) Sa ruyong panahon, ro masubo ag nahadlok nga mga sumoeunod ni Jesus hay nangin masadya ag maisog nga mga manogwali ag manogturo ku Ginharian.a

⁴ Makabenepisyo kita kon tun-an naton ro gin-obra ni Jesus sa ruyong panahon. Sa rayang artikulo, matun-an naton kon paano gingamit ni Jesus rayang panahon para (1) palig-unon ro anang mga disipulo, (2) buligan sanda nga mas maeubtan ro Kasueatan, ag (3) sanayon sanda sa mas mabahoe nga mga responsibilidad. Tan-awon ta kon paano naton matuead rayang mga halimbawa ni Jesus.

PALIG-UNA RO IBA

5. Ham-an kinahang-ean it mga disipulo ni Jesus ro pagpalig-on?

⁵ Kinahang-ean it mga disipulo ni Jesus ro pagpalig-on. Ham-an? Ro iba kanda hay gin-aywan ro andang mga baeay, pamilya, ag negosyo para magsunod kay Jesus. (Mat. 19:27) Ro iba mat-a hay ginpakaeain tungod nangin disipulo sanda ni Jesus. (Juan 9:22) Gin-obra nanda rayang mga sakripisyo tungod nagapati sanda nga si Jesus ro ginpromisa nga Mesias. (Mat. 16:16) Pero kat ginpatay si Jesus, nadueaan sanda it pag-eaum ag naeuyahan it buot.

6. Ano ro gin-obra ni Jesus kat ginbanhaw imaw?

⁶ Sayod ni Jesus nga nagakasubo ro anang mga disipulo, buko’t tungod maeuya sanda sa espiritwal, kundi tungod nasubuan eang gid sanda sa anang pagkamatay. Ngani sa adlaw mismo nga ginbanhaw imaw, ginpalig-on na ro anang mga amigo. Halimbawa, nagpakita si Jesus habang nagatangis si Maria Magdalena sa guwa ku anang eubnganan. (Juan 20:​11, 16) Nagpakita man imaw sa daywang disipulo nga ginsambit sa naunang mga parapo it rayang artikulo. Ag nagpakita pa gid imaw kay apostol Pedro. (Luc. 24:34) Ano ro matun-an naton sa halimbawa ni Jesus? Sayuron ta ro natabo ku unang beses nga nagpakita imaw.

7. Base sa Juan 20:​11-16, ano ro naobserbahan ni Jesus nga gin-obra ni Maria ku agahon it Nisan 16, ag ano ro gin-obra ni Jesus? (Tan-awa man ro piktyur.)

⁷ Basaha ro Juan 20:​11-16. Ku agahon it Nisan 16, abu nga mga bayi ro nag-agto sa lugar kon siin gin-eubong si Jesus. (Luc. 24:​1, 10) Mapukos kita sa eksperyinsya ni Maria Magdalena. Pag-abot ni Maria sa eubnganan, owa ra it sueod. Ngani nagdali-dali imaw para isugid ra kanday Pedro ag Juan, ag nagdaeagan rayon sanda paagto sa eubnganan. Kat nakita nanda nga owa’t sueod ro eubnganan, nag-uli sanday Pedro ag Juan. Pero si Maria hay nagpabilin ag nagtinangis. Owa imaw kasayod nga ginapamantaw imaw ni Jesus. Gin-obserbahan ni Jesus rayang matutom nga bayi ag gusto na ra nga paumpawan. Ngani nagpakita imaw kay Maria ag ginpalig-on na ra. Gin-istorya na imaw ag gintaw-an na it sangka importanteng asayment—ro pagsugid it pagkabanhaw ni Jesus sa anang mga igmanghod.​—Juan 20:​17, 18.

8. Paano naton matuead si Jesus?

⁸ Paano naton matuead si Jesus? Abu kitang maobra para mapalig-on ro atong mga igmanghod nga makapadayon sa pag-alagad kay Jehova. Matuead ta si Jesus kon obserbahan naton ro andang ginaagyan nga mga kalisdanan, ag makig-istorya kanda nga may empatiya. Tan-awon ta ro eksperyinsya it sister nga si Jocelyn. Namatayan imaw it manghod nga bayi tungod sa aksidente. Naghambae imaw: “Sa sueod it mahabang binuean, grabi gid ro kasubo nga akong ginbatyag.” Pero, may mag-asawa nga nag-imbita kana sa andang baeay. Ginpamatian nanda imaw it mayad, ag ginpasalig nga importante imaw kay Jehova. Naghambae si Jocelyn: “Nabatyagan ko nga sanda ro gingamit ni Jehova agud euwason ako sa pagkaeunod sa madueom ag mabagyo nga dagat. Ginbuligan nanda ako nga magpadayon sa pag-alagad kay Jehova.” Mapalig-on man naton ro iba kon pamatian naton sanda it mayad habang ginasugid nanda katon ro andang mga ginabatyag. Sa rayang paagi, mapaumpawan naton sanda ag mabuligan nga makapadayon sa pag-alagad kay Jehova.​—Roma 12:15.

BULIGI RO IBA NGA MAEUBTAN RO BISAEA IT DYOS

9. Ano ro indi maeubtan it mga disipulo ni Jesus, ag paano na sanda ginbuligan?

⁹ Ginbaton it mga disipulo ni Jesus ro Bisaea it Dyos ag gintinguhaan nga iaplikar ra sa andang kabuhi. (Juan 17:6) Pero, indi nanda maintindihan kon ham-an ginpatay si Jesus bilang sangka kriminal. Sayod ni Jesus nga may pagtuo ag pagpalangga kay Jehova ro anang mga disipulo, pero narealisar na nga kinahang-ean pa nandang maeubtan it mayad ro Kasueatan. (Luc. 9:​44, 45; Juan 20:9) Ngani ginbuligan na sanda nga maeubtan ro Kasueatan. Tan-awon naton kon paano na ra gin-obra kat nagpakita imaw sa daywang ka disipulo sa daean pa-Emaus.

10. Paano ginbuligan ni Jesus ro anang mga disipulo nga maintindihan nga imaw gid ro Mesias? (Lucas 24:​18-27)

¹⁰ Basaha ro Lucas 24:​18-27. Pansina nga owa eagi ginhambae ni Jesus sa anang mga disipulo kon sin-o imaw. Kundi, ginpangutana na anay sanda. Ham-an? Posible nga gusto ni Jesus nga sanda mismo ro maghambae it andang ginaisip ag ginabatyag. Ag ruyon ro andang gin-obra. Ginsugid nanda kana nga nagpaabot sanda nga si Jesus ro mangin hari it Israel nga magabueos sa paggahum it mga Romano. Pagkatapos nandang isugid ro andang nabatyagan, gingamit ni Jesus ro Kasueatan agud buligan sanda nga maintindihan ro mga nagkaeatabo.b Pagkagabii, nagpakita imaw sa iba pang mga disipulo ag gin-eksplikar na man kanda ro kahueogan it mga natabo. (Luc. 24:​33-48) Ano ro matun-an naton kara?

11-12. (a) Ano ro leksyon nga atong matun-an sa paagi it pagturo ni Jesus ku mga kamatuoran sa Biblia? (Tan-awa man ro piktyur.) (b) Paano ginbuligan si Nortey it nag-Bible study kana?

¹¹ Paano naton matuead si Jesus? Una, kon naga-Bible study kita, maggamit it mga pangutana nga makabulig sa ing mga ginatur-an nga masugid kon ano ro andang ginaisip ag ginabatyag. (Hulu. 20:5) Kon naintindihan mo eon ro andang ginabatyag, ipakita kanda kon paano mag-usoy it espisipiko nga mga teksto nga makabulig sa anang sitwasyon. Likawi rayon nga diktahan sanda kon ano ro andang obrahon. Kundi, buligi sanda nga maintindihan ro Kasueatan ag kon paano iaplikar ro mga prinsipyo sa Biblia sa andang kabuhi. Tan-awon ta ro eksperyinsya it brother nga si Nortey nga taga-Ghana.

¹² Kat 16 anyos si Nortey, nagpa-Bible study imaw. Pero owa magbuhay, ginkontra imaw it anang pamilya. Ano ro nakabulig kana nga magpadayon? Gingamit it naga-Bible study kana ro Mateo kapitulo 10 agud ieksplikar nga ro matuod nga mga Cristyano hay pagahingabuton. Naghambae si Nortey, “Ngani kat nag-umpisa ro pagkontra kang, kumbinsido ako nga nakita ko eon ro kamatuoran.” Ginpakita man ku naga-study kana ro Mateo 10:16 nga kinahang-ean nang mangin mahinaeongon ag matinahuron kon nagasugid it anang pagpati sa anang pamilya. Kat nabautismuhan si Nortey, gusto na nga magpayunir, pero gusto it anang tatay nga mag-eskuyla imaw sa kolehiyo. Owa gindiktahan si Nortey it naga-study kana kon ano ro obrahon, kundi naggamit imaw it mga pangutana agud buligan si Nortey nga makadesisyon base sa mga prinsipyo it Biblia. Ano ro resulta? Nagdesisyon si Nortey nga magpayunir. Ngani, ginpaeaas imaw it anang tatay. Ano ro ginbatyag ni Nortey kara? Naghambae imaw, “Kumbinsido ako nga tama ang nangin desisyon.” Kon buligan naton ro iba nga maeubtan ro Kasueatan, mabuligan naton sanda nga mangin malig-on nga mga Cristyano.​—Efe. 3:​16-19.

SANAYA RO MGA BROTHER NGA MANGIN “REGALO NGA MGA EAKI”

13. Ano ro gin-obra ni Jesus para masigurado nga mapadayon ro pagwali nga ueobrahon kon igto eon imaw sa eangit? (Efeso 4:​8, NWT)

¹³ Kat iya si Jesus sa eugta, gin-obra na ro tanan nga ginsugo kana ku anang Ama. (Juan 17:4) Pero owa nag-isip si Jesus nga imaw eang ro makaobra it mga ueobrahon nga ginsugo kana ni Jehova. Sa sueod it tatlo ag tunga nga dag-on nana nga pagministeryo, ginsanay na man ro iba sa pagwali nga ueobrahon. Bago magbalik sa eangit, ginsalig ni Jesus sa anang mga disipulo ro responsibilidad nga diparahon ro palangga nga mga karnero ni Jehova, ag pangunahan ro pagwali ag pagturo nga ueobrahon maskin ro iba kanda hay bayntehon paeang. (Basaha ro Efeso 4:​8, NWT.) Paano gingamit ni Jesus ro anang ulihing 40 nga adlaw agud buligan rayang mainunongon ag mahugod nga mga eaki nga mangin kwalipikado nga “regalo nga mga eaki”?

14. Ano ro ginturo ni Jesus sa anang mga disipulo sa anang ulihing 40 nga adlaw iya sa eugta? (Tan-awa man ro piktyur.)

¹⁴ Gintaw-an ni Jesus ro anang mga disipulo it prangka pero mapinalanggaon nga pahanumdom. Halimbawa, napan-uhan na nga owa nagapati ro iba kanda nga namatay imaw ag nabanhaw. Ngani, ginbuligan na sanda nga masayran ro kamatuoran paagi sa pagtao kanda it pahanumdom. (Luc. 24:​25-27; Juan 20:27) Ginpabahoe ni Jesus nga magpukos dapat sanda sa pagdipara it mga karnero ni Jehova kaysa sa andang sekular nga mga trabaho. (Juan 21:15) Ginpadumdom na man sanda nga indi pag-ikumpara ro andang maobra sa pag-alagad kay Jehova sa maobra it iba. (Juan 21:​20-22) Ag gintadlong na ro saea nandang mga pagpati parti sa Ginharian, ag ginbuligan sanda nga magpukos sa pagwali it mayad nga balita. (Binu. 1:​6-8) Ano ro matun-an it mga elder kay Jesus?

15-16. (a) Paano matuead it mga elder si Jesus? Ieksplikar. (b) Paano nakabenepisyo si Patrick sa pahanumdom nga anang nabaton?

¹⁵ Paano matuead it mga elder si Jesus? Dapat nga sanayon ag buligan nanda ro mga brother, pati man ro mga bataon agud mangin kwalipikado sanda sa mas mabahoe nga mga responsibilidad.c Sayod it mga elder nga buko’t perpekto ro andang mga ginasanay. Dapat nandang taw-an it mapinalanggaon nga mga pahanumdom rayang bataon nga mga brother agud magdugang ro andang eksperyinsya ag mas matun-an nanda nga mangin mapainuboson, matutom, ag handa nga magbulig sa iba.​—1 Tim. 3:1; 2 Tim. 2:2; 1 Ped. 5:5.

¹⁶ Tan-awa kon paano nakabenepisyo si Patrick sa pahanumdom nga anang nabaton. Kat bataon pa imaw, masakit imaw maghambae ag bukon imaw it mabuot, maskin sa mga sister. Napan-uhan it hamtong nga elder ro kaeuyahon ni Patrick ag gintaw-an imaw it mapinalanggaon pero prangka nga pahanumdom. Naghambae si Patrick, “Nagapasaeamat ako nga gin-obra na ‘to. Dati, naeuyahan ako kon makabaton ro ibang mga brother it mga pribilehiyo nga gusto ko man. Pero ratong pahanumdom it elder hay nakabulig kakon nga magpukos sa pagbulig sa mga igmanghod kaysa sa mabaton ko nga mga asayment o pribilehiyo sa kongregasyon.” Bilang resulta, nangin elder si Patrick sa edad nga 23.​—Hulu. 27:9.

17. Paano ginpakita ni Jesus nga nagasalig imaw sa anang mga disipulo?

¹⁷ Gintaw-an ni Jesus ro anang mga disipulo it responsibilidad nga magwali ag tur-an ro mga tawo. Posible nga nagbatyag ro mga disipulo nga bukon sanda it kwalipikado sa ruyong asayment. Pero, sigurado si Jesus nga kaya nandang obrahon ra. Nagasalig gid imaw kanda, ngani ginhambae na: “Kamana [o, pareho] nga ro Ama nagpadaea kakon, ako man nagapadaea kinyo.”​—Juan 20:21.

18. Paano matuead it mga elder si Jesus?

¹⁸ Paano matuead it mga elder si Jesus? Ginasanay it eksperyensyadong mga elder ro iba paagi sa pagtao kanda it mga responsibilidad. (Fil. 2:​19-22) Halimbawa, nagapabulig ro mga elder sa mga bataon sa paglimpyo ag pagmentinar it Kingdom Hall. Pwedeng taw-an it mga elder ro mga brother it asayment ag sanayon sanda kon paano ra obrahon ag saligan sanda nga maobra nanda ra it tama. Naapresyar gid it bag-ong elder nga si Matthew ro pagsanay kana it eksperyensyadong mga elder kon paano dumaeahan ro sangka asayment, ag ro pagsalig nanda nga kaya na rang obrahon. Naghambae imaw: “Kon makaobra ako it saea, ginabuligan nanda ako nga makatuon kara ag mag-uswag.”d

19. Ano dapat ro determinado natong obrahon?

¹⁹ Gingamit ni Jesus ro anang ulihing 40 nga adlaw iya sa eugta para palig-unon, tur-an, ag sanayon ro iba. Kabay nga mangin determinado kita nga sundon it mayad ro anang halimbawa. (1 Ped. 2:21) Buligan na kita nga maobra ra. Nagpromisa imaw: “Magaiba ako kinyo pirme hasta sa katapusan kung kalibutan” o sistema it mga bagay.​—Mat. 28:20.