Magpabulig sa mga Elder

1. Paalin ginpakita ni Jehova nga importante kana ro anang mga alagad?

IMPORTANTE kay Jehova ro anang mga alagad ag ginadipara na sanda pareho it mapinalanggaon nga manogbantay, nga nagadipara sa anang mga karnero. Ginbakae na sanda paagi sa dugo ni Jesus ag nagpili imaw it mga elder sa kongregasyon para diparahon sanda. (Binu. 20:28) Gusto it Dyos nga trataron nanda ro anang mga alagad sa mapinalanggaon nga paagi. Sa idaeum it pagpanguna it Cristo, ginapaumpawan it mga elder ro anang mga alagad ag ginaprotektahan sa espiritwal nga mga peligro.​—Isa. 32:1, 2.

2. Base sa Ezequiel 34:15, 16, sin-o ro mas ginabuligan ni Jehova?

² Nagakabaeaka gid si Jehova sa tanan nang mga alagad, pero mas ginabuligan na ratong mga nagaantus. Ro pila hay nagaantus dahil sa haobra nandang mga saea, ag ginagamit ni Jehova ro mga elder para buligan sanda. (Basaha ro Ezequiel 34:15, 16.) Pero, gusto ni Jehova nga magpabulig kita eabi eon gid kon kinahang-ean naton ra. Ngani euwas sa atong pagpangamuyo sa Dyos, kinahang-ean man naton nga magpabulig sa “gadipara ku mga tumueuo ag gaturo” sa kongregasyon.​—Efe. 4:11, 12, Ro Bag-o nga Kasugtanan, TAP.

3. Paalin kita tanan makabenepisyo sa papel it mga elder?

³ Sa rayang artikulo, tun-an naton kon paalin ginagamit ni Jehova ro mga elder para buligan kita kon nagaeuya kita sa espiritwal. Talakayon man naton ro sabat sa rayang mga pangutana: Hin-uno dapat kita magpabulig sa mga elder? Ham-an dapat kita magpabulig sa mga elder? Ag paalin kita ginabuligan it mga elder? Maskin mabakud ro atong espiritwalidad makaron ag indi pa naton kinahang-ean ro bulig it mga elder, ro sabat sa rayang mga pangutana hay mas magapabakud it atong apresasyon sa kahimusan it Dyos ag makabulig katon nga masayran kon ano ro dapat natong obrahon kon kinahang-ean naton ro andang bulig.

HIN-UNO DAPAT KITA MAGPABULIG SA MGA ELDER?

4. Ham-an mahambae naton nga ro Santiago 5:14-16, 19, 20 hay nagatukoy sa tawo nga nagamasakit sa espiritwal? (Tan-awa man ro piktyur.)

⁴ Ginsugid it disipulo nga si Santiago kon paalin ginagamit ni Jehova ro mga elder para buligan kita. Ginsueat na: “May una baea kinyo nga nagamasakit? Dapat nga tawgon na ro mga manogdumaea it . . . grupo it mga tumueuo.” (Basaha ro Santiago 5:14-16, 19, 20, Ro Bag-o nga Kasugtanan, TAP.) Ginapakita it konteksto nga ginatukoy kara ni Santiago ro tawo nga nagamasakit sa espiritwal. Ginhambaean na ro nagamasakit nga mangayo it bulig sa mga elder sa kongregasyon, bukon it sa doktor. Ginhambae na pa gid nga magamayad ruyong tawo kon mapatawad eon ro anang mga saea. Para magmayad ro nagamasakit nga tawo, kinahang-ean na nga mag-agto sa doktor, isugid ro parti sa anang masakit, ag sundon ro anang mga instruksyon. Pareho karon, kon gusto naton nga mangin maeapit it uman kay Jehova, kinahang-ean naton nga magpaeapit sa mga elder, isugid kanda ro parti sa atong problema, ag sundon ro base sa Biblia nga mga eaygay nga ginatao nanda.

5. Paalin naton masayran nga nagaeuya eon ro atong relasyon kay Jehova?

⁵ Sa Santiago kapitulo 5, ginapalig-on kita nga makipag-istorya sa mga elder kon mabatyagan naton nga nagaamat-amat eon it euya ro atong relasyon kay Jehova. Ngani mayad gid nga magpabulig eagi kita kanda bago pa masamad ro atong relasyon sa Dyos! Kinahang-ean natong mangin honest sa atong sarili dahil ginapaandaman kita it Biblia nga pwede natong madaya ro atong sarili parti sa atong espiritwalidad. (Sant. 1:22) Natabo ra kato sa pila nga mga Cristyano sa Sardis, ag ginhambaean sanda ni Jesus nga owa eon sanda ginakahamut-an ni Jehova. (Pah. 3:1, 2) Ngani, paalin naton masayran nga nagaeuya eon ro atong relasyon kay Jehova? Ro sambilog nga paagi hay ro pagkumparar kon mauno kita kasadya dati kat nabautismuhan kita kaysa sa makaron. (Pah. 2:4, 5) Pwede natong pangutan-on ro atong sarili: ‘Naga-enjoy pa baea ako sa pagbasa it Biblia ag sa pagpamaeandong kara? Kon amat lang baea ako naga-attend ag nagahanda sa mga miting? Nabuhinan baea ang kahugod sa pagministeryo? Mas abu baea ang oras sa pag-usoy it kwarta ag sa iba pang mga bagay?’ Kon huo ing sabat sa rayang mga pangutana, nagapakita ra nga nagaeuya eon ing relasyon kay Jehova. Ag kon pabay-an mo ra, pwede rang maglala. Kon indi naton ra kayang pabakuron o may ginaobra kita nga owa nailaan ni Jehova, dapat kitang magpabulig sa mga elder.

6. Ano dapat ro obrahon it ratong mga nakaobra it seryosong saea?

⁶ Ro pila nga mga saea hay seryoso, ag pwedeng pahalinon sa kongregasyon ro tawo nga nakaobra kara kon indi imaw maghinuesoe. (1 Cor. 5:11-13) Kon nakaobra it seryosong saea ro sangka igmanghod, dapat imaw nga magpaeapit sa mga elder dahil kon sa anang sarili eang, indi na gid kayang ayuson ro anang relasyon kay Jehova. Para mabaton naton ro kapatawaran ni Jehova paagi sa pangtubos, dapat mag-obra kita it “mga butang nga makapamatuod nga naghinuesoe” eon kita. (Binu. 26:20) Ag ro sangka paagi nga mapakita naton ra hay ro pagsugid sa mga elder nga nakaobra kita it seryosong saea.

7. Sin-o pa ro nagakinahang-ean it bulig ku mga elder?

⁷ Owa eang ginabuligan it mga elder ratong mga nakaobra it seryosong saea, kundi ginabuligan man nanda ro mga maeuya sa espiritwal. (Binu. 20:35) Halimbawa, basi nalisdan ka nga suk-ean ing saea nga mga handum. Posibleng nalisdan ka nga suk-ean ra dahil bago mo matun-an ro kamatuoran hay naadik ka dati sa droga, nagapamantaw ka it pornograpiya, o imoral ing pagkabuhi. Indi mahuya nga magpabulig. Pwede kang magpaeapit sa sangka elder nga magapamati kimo, magatao kimo it praktikal nga eaygay, ag magapasalig kimo nga nasadyahan si Jehova dahil padayon mo nga ginasuk-ean ro saea nga mga handum. (Man. 4:12) Kon naeuyahan ka it buot dahil sa ing saea nga mga handum, padumdomon ka it mga elder nga nasadyahan si Jehova dahil nagapabulig ka. Nagapakita ra nga mapainubuson ka ag importante gid kimo ing relasyon kay Jehova.​—1 Cor. 10:12.

8. Kinahang-ean baea natong magpabulig sa mga elder sa kada saea nga maobra naton? Ieksplikar.

⁸ Indi naton kinahang-ean nga magpabulig sa mga elder sa kada saea nga maobra naton. Halimbawa, basi nakahambae ka it masakit sa sangka igmanghod o basi naakig ka kana. Kon matabo ron, imbes nga magpaeapit eagi sa elder, pwede mong sundon ro eaygay ni Jesus ag istoryahon ro igmanghod ag mangayo it patawad. (Mat. 5:23, 24) Pwede mo mang i-research ro mga topiko parti sa pagkakalmado, pagkamapinasensyahon, ag pagpugong sa sarili agud mas mapakita mo rayang mayad nga mga ugali. Pero kon indi mo gihapon masolbar ing problema, pwede ka eon nga magpabulig sa mga elder. Sa sueat ni apostol Pablo sa mga taga-Filipos, ginpangabay na ro sangka brother nga buligan sanday Eudias ag Sintique nga solbaron ro andang indi pagkaintindihan. Ngani mabuligan ka man it mga elder sa inyong kongregasyon.​—Fil. 4:2, 3.

HAM-AN DAPAT KITA MAGPABULIG SA MGA ELDER?

9. Ham-an indi dapat kita mahuya nga magpabulig sa mga elder kon nakasaea kita? (Hulubaton 28:13)

⁹ Kinahang-ean naton ro pagtuo ag kaisog agud makapangayo it bulig kon makaobra kita it seryosong saea o kon pamatyag naton hay indi naton kayang suk-ean ro atong kaeuyahon. Indi dapat kita mahuya nga magpabulig sa mga elder. Ham-an? Dahil kon ginasunod naton ro kahimusan ni Jehova, ginapakita naton nga nagasalig kita kana ag sa anang mga instruksyon para buligan kita nga padayon nga mangin mabakud sa espiritwal. Sayod naton nga kinahang-ean naton ro anang bulig para maobra ro tama. (Sal. 94:18) Ag kon nakasaea kita, mabaton naton ro kaeuoy ni Jehova kon isugid naton ra ag indi eon pag-obrahon it uman.​—Basaha ro Hulubaton 28:13.

10. Ano ro pwedeng matabo kon taguon naton ro atong seryosong mga saea?

¹⁰ Kon isugid naton sa mga elder ro atong mga saea, patawaron kita ni Jehova ag mabalik ro atong mayad nga relasyon kana. Pero kon indi naton ra pag-isugid kanda, pwedeng maglala ro atong sitwasyon. Kat gintago ni Haring David ro anang mga saea, nag-antus imaw sa espiritwal, emosyonal, ag pati man sa pisikal. (Sal. 32:3-5) Kon may problema kita sa espiritwal, pareho ra sa masakit o bali nga kon indi mabueong eagi hay pwedeng maglala. Owa naila si Jehova nga matabo katon ra. Ngani, gusto na nga “husayon naton ro mga bagay” sa bulig it mga elder nga anang ginagamit para mabalik ro atong mayad nga relasyon kana.​—Isa. 1:5, 6, 18.

11. Ano pa ro pwedeng matabo kon taguon naton ro atong seryosong mga saea?

¹¹ Kon taguon naton ro atong seryosong mga saea, makaapekto man ra sa iba. Posibleng nga mapunggan kara ro pagtao ni Jehova it anang baeaan espiritu sa bilog nga kongregasyon ag maduea ro paghidait sa tunga it mga igmanghod. (Efe. 4:30) Raya man ro matabo kon sayod naton nga nakaobra it seryosong saea ro sangka igmanghod sa kongregasyon, ngani dapat naton imaw palig-unon nga isugid ra sa mga elder.a Dahil kon taguon naton ra, pati kita hay makasaea kay Jehova. (Lev. 5:1) Ro atong pagpalangga kay Jehova hay magapahueag katon nga magpaeapit sa mga elder ag isugid ro atong nasayran parti sa igmanghod nga nakaobra it seryosong saea. Kon obrahon naton ra, maproteksyunan naton ro mga igmanghod sa kongregasyon ag mabuligan ro nakasaea nga mabalik ro anang mayad nga relasyon kay Jehova.

PAALIN KITA GINABULIGAN IT MGA ELDER?

12. Paalin ginabuligan it mga elder ratong mga maeuya sa espiritwal?

¹² Ginahambae it Biblia nga dapat buligan it mga elder ratong mga maeuya sa espiritwal. (1 Tes. 5:14) Kon nakaobra ka it saea, pangutan-on ka nanda agud masayran ro imong mga ginaisip ag ginabatyag. (Hulu. 20:5) Basi nalisdan ka nga makipag-istorya sa mga elder dahil mahueoy-on ka, o nahuya ka nga isugid kon ano gid ro natabo, pero mabuligan ka nanda kon isugid mo ro mga kalisdanan nga imong ginaatubang. Indi mabaeaka nga basi makahambae ka it “padasu-daso.” (Job 6:3) Indi ka eagi paghusgahan it mga elder base sa ing ginhambae, kundi pamatian ka nanda it mayad agud masayran nanda ro tanan nga detalye bago ka taw-an it eaygay halin sa Biblia. (Hulu. 18:13) Sayod it mga elder nga kinahang-ean it panahon para buligan ro nakasaea, ngani posibleng istoryahon ka nanda it pilang beses para mataw-an ka it insakto nga bulig.

13. Paalin kita mabuligan it mga elder paagi sa andang mga pangamuyo ag eaygay halin sa Biblia? (Tan-awa man ro piktyur.)

¹³ Kon magpabulig ka sa mga elder, tinguhaan nanda nga indi ka pagpakonsensyahon it mayad o dugangan ing kasubo nga ginabatyag. Kundi, mangamuyo sanda para kimo. Basi makibot ka nga “mabahoe gid ro mahimo” it andang pangamuyo para kimo. Kon nagpaeapit ro sangka igmanghod sa mga elder, buligan nanda imaw paagi sa paghibo o ‘paghap-eos kana it eana’ sa pangaean ni Jehova. (Sant. 5:14-16) Rayang “eana” hay nagatukoy sa kamatuoran ku Bisaea it Dyos. Paagi sa mga teksto sa Biblia, paumpawan ka it mga elder ag buligan nga mabalik ing mayad nga relasyon kay Jehova. (Isa. 57:18) Ro andang ginatao nga mga eaygay halin sa Biblia hay makatao kimo it kusog para maobra kon ano ro tama. Paagi kanda, mabatian mo ro limog ni Jehova nga nagahambae: “Raya ro daean. Magtikang [ka] kara.”​—Isa. 30:21.

14. Base sa Galacia 6:1, NWT, paalin ginabuligan it mga elder ro nakaobra it “saea nga tikang”? (Tan-awa man ro piktyur.)

¹⁴ Basaha ro Galacia 6:1, NWT. Ro sangka Cristyano nga nakaobra it “saea nga tikang” hay owa nagakabuhi base sa matarung nga mga pagsueondan it Dyos. Ro saea nga tikang hay pwedeng magtukoy sa buko’t mayad nga desisyon o pag-obra it seryosong mga saea. Dahil sa pagpalangga it mga elder, ginatinguhaan nanda nga “tadlungon ruyong tawo sa kalmado nga paagi.” Ro Griego nga termino nga gin-translate nga “tadlungon” hay pwede mang magtukoy sa pagtadlong it doktor sa nabali nga tue-an it pasyente para magmayad ra. Nagahaeong gid ro mayad nga doktor kon ginatadlong na ro tue-an para indi gid masyadong masakitan ro pasyente. Makaron man ro mga elder kon gintadlong nanda ro nakaobra it saea nga tikang, ginatinguhaan nanda maobra ra sa mabuot nga paagi dahil owa sanda naila nga mas masakitan ruyong igmanghod. Ginapadumdom man it Biblia sa mga elder nga ‘bantayan ro andang sarili.’ Kon ginabuligan kita it mga elder nga maaplikar ro mga eaygay it Biblia, sayod nanda nga bukon man sanda it perpekto ag makaobra man it saea nga mga tikang. Ngani nagahaeong gid sanda nga indi magbatyag nga mas mataas sanda kaysa sa iba ag indi maghusga eagi sa igmanghod nga andang ginabuligan, kundi mapainubuson sanda ag nagapakita it kaeuoy.​—1 Ped. 3:8.

15. Ano ro posible natong obrahon kon may problema kita?

¹⁵ Makasalig kita sa atong mga elder sa kongregasyon. Ginsanay sanda nga indi pag-isugid sa iba ro kompidensyal nga mga bagay, ibase sa Biblia ro andang mga eaygay ag buko’t sa andang sariling opinyon, ag padayon kitang buligan sa atong mga problema. (Hulu. 11:13; Gal. 6:2) Iba-iba ro andang mga ugali ag eksperyinsya, pero pwede natong paeapitan ro maskin sin-o kanda para isugid ro atong mga problema. Tandaan naton nga indi dapat kita magpangayo it eaygay sa iba-ibang elder, nga nagaeaum nga may sambilog kanda nga maghambae katon it gusto eang natong mabatian. Kon obrahon naton ra, matsa pareho kita sa mga tawo nga “gusto eang nanda pamatian” ro gusto nandang mabatian ag buko’t ro pagturo ni Jehova halin sa anang Bisaea. (2 Tim. 4:3) Kon magpaeapit kita sa sangka elder parti sa atong problema, posibleng pangutan-on na kita kon gin-istorya eon naton ra sa ibang mga elder ag kon ano nga eaygay ro andang gintao katon. Ag dahil maugdang imaw mangayo anay imaw it eaygay sa ibang elder.​—Hulu. 13:10.

RO ATONG RESPONSIBILIDAD

16. Ano ro atong responsibilidad?

¹⁶ Maskin una ro mga elder para mag-eaygay ag magbulig katon, owa nanda kita ginadiktahan sa kon ano ro atong mangin desisyon. Responsibilidad naton nga ipakita nga palangga naton si Jehova ag gusto naton nga mapasadya imaw paagi sa atong ginahambae ag ginaobra. Ag buligan na kita nga makaobra it mayad nga mga desisyon ag makapabilin nga matutom kana. (Roma 14:12) Ngani owa kita ginadiktahan it mga elder kon ano ro dapat natong obrahon, kundi ginagamit nanda ro Biblia para buligan kita nga maintindihan kon ano ro kaisipan ni Jehova parti sa sangka bagay. Kon sundon naton ro andang nabase sa Biblia nga mga eaygay, masanay naton ro atong ikasarang sa pag-eubot o “paghibaeo kon ano ro mayad ag maeain” para makaobra it mayad nga mga desisyon.​—Heb. 5:14.

17. Sa ano dapat kita mangin determinado?

¹⁷ Nagapasaeamat gid kita kay Jehova dahil ginadipara gid nana kita pareho it sangka manogbantay nga nagadipara sa anang mga karnero! Ginpadaea ni Jehova “ro mayad nga manogbantay” nga si Jesus nga nagtao it anang kabuhi bilang pangtubos para mabuhi kita sa owa it katapusan. (Juan 10:11) Ag paagi sa pagtao katon it mga elder sa kongregasyon, gintuman ni Jehova ro anang promisa: “Taw-an ko kamo it mga manogbantay nga nahamut-an it akong tagipusuon, ag taw-an nanda kamo it kaaeam ag pag-eubot.” (Jer. 3:15) Kon nagaeuya o nagamasakit kita sa espiritwal, indi dapat kita magdaywang-isip nga magpabulig sa mga elder. Kabay nga mangin determinado kita nga panginpuslan it mayad ro mga bulig nga ginatao katon ni Jehova paagi sa mga elder sa kongregasyon.