“Magpili Kamo Makaron Kon Sin-o ro Inyong Alagaron”

1. Ano ro dapat natong obrahon para mangin matuod nga masadya, ag ham-an? (Isaias 48:​17, 18)

PALANGGA gid kita it atong Ama sa eangit, ag gusto na nga mangin masadya kita makaron ag sa paeaabuton. (Man. 3:​12, 13) Gintuga na kita nga may abilidad nga makaobra it manami nga mga bagay, pero owa na kita gintaw-an it ikasarang nga gamhan ro atong sarili o mag-obra it atong sariling pagsueondan sa kon ano ro tama ag saea. (Man. 8:9; Jer. 10:23) Sayod na nga para mangin matuod kita nga masadya, dapat naton imaw alagaron ag magkabuhi base sa anang pagsueondan.​— Basaha ro Isaias 48:​17, 18.

2. Ano ro gustong ipapati katon ni Satanas, pero ano ro gin-obra ni Jehova?

² Gustong ipapati katon ni Satanas nga pwede kitang mangin masadya maskin owa si Jehova, nga kayang gamhan it mga tawo ro andang sarili. (Gen. 3:​4, 5) Para pamatud-an nga purilon si Satanas, ginpasugtan ni Jehova nga gamhan anay it mga tawo ro andang sarili sa matag-od nga panahon. Nakita naton mismo nga ro paggahum it mga tawo hay buko’t madinaeag-on. Pero, ginasugid it Biblia nga may mga tawo nga nangin matuod nga masadya dahil gin-alagad nanda si Jehova. Ag ro sambilog kanda hay si Jesu-Cristo. Una, sayuron ta kon ham-an ginpili na nga alagaron si Jehova. Rayon, sayuron ta man kon ham-an nagakadapat sa atong pagsimba ro atong Ama sa eangit. Pagkatapos, talakayon man naton ro mga rason kon ham-an ginpili naton nga alagaron si Jehova.

KON HAM-AN GINPILI NI JESUS NGA ALAGARON SI JEHOVA

3. Ano ro gustong itao ni Satanas kay Jesus, pero ano ro gin-obra ni Jesus?

³ Kat iya si Jesus sa eugta, kinahang-ean nang magpili kon sin-o ro anang alagaron. Owa magbuhay, pagkatapos nga nabautismuhan si Jesus, ginhambae ni Satanas kana nga itao na ro tanan nga ginharian sa eugta kon magsimba kana si Jesus it maskin sang beses eang. Pero nagsabat si Jesus: “Eumayo ka, Satanas! Ro kasueatan nagahambae, ‘Magsimba ka [kay Jehova] nga imong Dyos, ag imaw eamang ro imong pagaserbihan.’” (Mat. 4:​8-10) Ham-an ruyon ro gin-obra ni Jesus? Sayuron ta ro pila nga mga rason.

4-5. Ano ro pila nga mga rason kon ham-an ginpili ni Jesus nga alagaron si Jehova?

⁴ Ro panguna nga rason kon ham-an ginpili ni Jesus nga alagaron si Jehova hay dahil palangga na gid ro anang Ama. (Juan 14:31) Dugang pa, ginaalagad man ni Jesus si Jehova dahil raya ro tama nga obrahon. (Juan 8:​28, 29; Pah. 4:11, NWT) Sayod na nga si Jehova ro Ginhalinan it kabuhi ag Imaw hay masaligan ag maalwan. (Sal. 33:4; 36:9; Sant. 1:17) Kamatuoran pirme ro ginahambae ni Jehova kay Jesus ag imaw man ro nagtao kay Jesus it tanan nga una kana. (Juan 1:14) Pero iba gid si Satanas, dahil kana, nagakasaea ag nagakamatay ro mga tawo. Purilon man imaw, sueok, ag makasarili. (Juan 8:44) Sayod ni Jesus rayang mga kamatuoran, ngani owa gid imaw nagtuead kay Satanas sa pagrebelde kay Jehova.​—Fil. 2:​5-8.

⁵ Ro sambilog pa nga rason kon ham-an ginpili ni Jesus nga alagaron si Jehova hay dahil gin-isip na ro mayad nga mga resulta kon padayon imaw nga mangin mainunongon kana. (Heb. 12:2) Sayod na nga kon magpabilin imaw nga matutom, mapakabaeaan na ro pangaean it anang Ama ag maduea eon rayon ro saea ag kamatayon.

KON HAM-AN NAGAKADAPAT SI JEHOVA SA ATONG PAGSIMBA

6-7. Ham-an abu makaron ro owa nagaalagad kay Jehova, pero ham-an nagakadapat imaw sa atong pagsimba?

⁶ Abu makaron ro owa nagaalagad kay Jehova dahil owa pa nanda nasayran ro anang manami nga mga ugali, pati man ro mayad nga mga bagay nga anang gin-obra para kanda. Pareho man karon ro sitwasyon it mga tawo nga ginwalihan ni apostol Pablo sa Atenas. Owa man sanda kakilaea sa Dyos.​—Binu. 17:​19, 20, 30, 34.

⁷ Ginsugid ni Pablo sa mga nagapamati kana nga ro matuod nga Dyos ro “nagatao it kabuhi ag ginhawa, ag it iba pa nga mga butang.” Ginsugid na pa: “[Dahil] kana kita nagakabuhi, nagahueag ag nanginmakara.” Ro Dyos ro Manogtuga, ag “halin sa sambatong ka tawo gintuga nana ro tanan nga mga rasa [o, lahi] it mga tawo,” ngani imaw eang ro nagakadapat sa atong pagsimba.​—Binu. 17:​25, 26, 28.

8. Ano ro indi gid pag-obrahon ni Jehova? Ieksplikar.

⁸ Bilang ro Manogtuga ag ro Soberano it uniberso, pwede kuntang piliton ni Jehova ro mga tawo nga mag-alagad kana. Pero, indi na gid ron pag-obrahon. Sa kabaliskaran, nagtao imaw katon it mga ebidensya nga matuod imaw ag palangga na gid ro kada isaea katon. Gusto na nga mangin amigo ro tanan nga tawo sa owa it katapusan. (1 Tim. 2:​3, 4) Dahil karon, ginsanay kita ni Jehova nga tur-an ro iba parti sa anang katuyuan ag sugiran sanda parti sa mayad nga mga bagay nga anang pagaobrahon para sa mga tawo. (Mat. 10:​11-13; 28:​19, 20) Nagtao man imaw katon it mga kongregasyon nga kon siin masimba naton imaw ag makabaton it bulig sa mapinalanggaon nga mga elder.​—Binu. 20:28.

9. Paalin ginapakita ni Jehova nga palangga na ro mga tawo?

⁹ Ginapakita ni Jehova nga palangga na ro mga tawo paagi sa pagtao it manami nga mga bagay maskin sa ratong mga tawo nga owa nagapati kana nga matuod imaw. Isipa ra: Sa sueod it linibo nga dag-on, binilyon nga tawo ro nagdesisyon nga magkabuhi base sa andang sariling pagsueondan sa kon ano ro tama ag saea. Maskin pa karon, gintaw-an gihapon sanda ni Jehova it andang mga kinahang-eanon para mabuhi ag mangin masadya. (Mat. 5:​44, 45; Binu. 14:​16, 17) Gintaw-an na man sanda it ikasarang nga makipag-amigo, magkapamilya ag magkaunga, ag masadyahan sa andang ginpangabudlayan. (Sal. 127:3; Man. 2:24) Ginapakita eang kara nga palangga gid it atong Ama sa eangit ro tanan nga tawo. (Ex. 34:6) Talakayon ta makaron ro pila nga mga rason para padumdomon kita kon ham-an ginpili naton nga alagaron si Jehova ag kon paalin na kita ginapakamayad.

KON HAM-AN GINPILI NATON NGA ALAGARON SI JEHOVA

10. (a) Ano ro panguna nga rason kon ham-an nagaalagad kita kay Jehova? (Mateo 22:37) (b) Paalin ka nakabenepisyo sa pagkamapinasensyahon ni Jehova? (Salmo 103:​13, 14)

¹⁰ Pareho kay Jesus, ro panguna nga rason kon ham-an nagaalagad kita kay Jehova hay dahil palangga gid naton Imaw. (Basaha ro Mateo 22:37.) Nangin maeapit kita kay Jehova kat nasayran naton ro parti sa anang mga ugali. Halimbawa, mapinasensyahon si Jehova katon. Kat owa nagtuman ro mga Israelinhon kana, nagpakit-euoy imaw kanda: “Pangabay, aywani ninyo ro inyong maeain nga daeanon.” (Jer. 18:11) Sayod ni Jehova nga bukon kita it perpekto. (Basaha ro Salmo 103:​13, 14.) Kon pamaeandungan mo ro pagkamapinasensyahon ni Jehova ag ro anang iba pang manami nga mga ugali, indi baea nagapahueag ra kimo nga alagaron imaw sa owa it katapusan?

11. Ano ro iba pang rason kon ham-an ginpili naton nga alagaron ro atong Ama sa eangit?

¹¹ Napahueag man kita nga alagaron si Jehova dahil raya ro tama nga obrahon. (Mat. 4:10) Ag sayod naton nga kon mainunongon kita kay Jehova, magaresulta ra sa mayad nga mga bagay. Ro atong katutom hay makabulig para mapakabaeaan ro pangaean ni Jehova, mapamatud-an nga purilon ro Yawa, ag mapasadya ro atong Ama. Ag kon pilion naton nga alagaron si Jehova makaron, may tsansa kita nga maalagad imaw sa owa it katapusan!—Juan 17:3.

12-13. Ano ro atong matun-an sa eksperyinsya nanday Jane ag Pam?

¹² Maskin bata pa kita, pwede natong matun-an nga palanggaon si Jehova, ag mas nagadaeum ron habang nagagueang kita. Raya ro natabo sa eksperyinsya it daywang magmaeanghod nga sanday Jane ag Pam.a Si Jane hay 11 nga dag-on ag si Pam mat-a hay 10 nga dag-on kat nag-umpisa sanda sa pag-Bible study. Maskin bukon it interesado sa pagtuon ro andang mga ginikanan, ginpasugtan nanda sanday Jane ag Pam nga mag-Bible study sa mga Saksi ni Jehova basta mag-agto gihapon sanda sa simbahan kaibahan it andang pamilya. Naghambae si Jane, “Ro ginturo kakon it mga Saksi halin sa Biblia hay nakabulig kang nga malikawan ro pagdroga ag pag-obra it imoral pareho sa ginaobra it ang kaeabanan nga kaedaran.”

¹³ Pagtaliwan it pilang dag-on, nangin Saksi sandang daywa. Nagpayunir rayon sanda habang nagadipara sa andang magueang eon nga mga ginikanan. Naghambae si Jane parti sa andang eksperyinsya: “Natun-an ko nga matutom nga ginadipara ni Jehova ro anang mga amigo ag ruyon ro ginahambae sa 2 Timoteo 2:​19, nga ‘kilaea [ni Jehova] kon sin-o ro anang mga tawo.’” Klaro gid nga ginadipara ni Jehova ratong mga nagapalangga ag nagaalagad kana!

14. Paalin naton maapinan ro pangaean ni Jehova paagi sa atong mga ginahambae ag ginaobra? (Tan-awa man ro piktyur.)

¹⁴ Gusto natong masayran it iba ro kamatuoran parti kay Jehova. Tan-awa rayang halimbawa: May maeapit ka nga amigo nga mabuot, maalwan, ag mapinatawaron. Sang adlaw, may naghambae nga ro imong amigo hay mapintas ag purilon. Ano ing obrahon? Syempre, apinan mo ing amigo. Pareho kara, kon may maghambae it buko’t matuod parti kay Jehova, ginaapinan naton ro anang pangaean paagi sa pagsugid it matuod parti kana. (Sal. 34:1; Isa. 43:10) Ginapakita naton nga gusto natong alagaron si Jehova sa bilog natong kabuhi paagi sa atong mga ginahambae ag ginaobra.

15. Paalin nakabenepisyo si apostol Pablo sa anang gin-obra nga mga pagbag-o sa anang kabuhi? (Filipos 3:​7, 8)

¹⁵ Handa kita nga mag-obra it mga pagbag-o sa atong kabuhi para mapasadya si Jehova o para mas abu ro atong maobra sa pag-alagad kana. Halimbawa, si apostol Pablo hay may importante nga posisyon sa relihiyon it mga Judio, pero gin-aywan na ra para mangin disipulo it Cristo ag para maalagad si Jehova. (Gal. 1:14) Bilang resulta, nangin masadya ro anang kabuhi ag may pribilehiyo imaw nga mangin kaibahan it Cristo nga magagahum sa eangit. Owa gid imaw nagnuoe sa anang desisyon nga alagaron si Jehova, ag kita man.​—Basaha ro Filipos 3:​7, 8.

16. Ano ro atong matun-an sa eksperyinsya ni Julia? (Tan-awa man ro piktyur.)

¹⁶ Kon ro pag-alagad kay Jehova ro pinakaimportante sa atong kabuhi, pakamayron na gid kita makaron ag sa paeaabuton. Tan-awa ro eksperyinsya it sangka sister nga si Julia. Halin kat bata pa imaw ag bago na pa matun-an ro kamatuoran, manogkanta imaw sa andang simbahan. Mayad gid magkanta si Julia, ngani napansin ra it sangka propesyonal nga opera singer ag ginsanay na imaw. Owa magbuhay, nangin sikat si Julia ag naga-perform imaw sa enggrande nga mga music hall. Habang nagaeskuyla imaw sa sikat nga eskuylahan it musika, may anang klasmeyt nga nagsugid kana parti sa Dyos ag ginhambae na man kana nga may pangaean ro Dyos, si Jehova. Pagkatapos karon, nag-umpisa si Julia sa pagtuon sa Biblia it daywang beses sa sang domingo. Ku ulihi, nagdesisyon imaw nga gamiton ro anang kabuhi sa pag-alagad kay Jehova kaysa sa padayunon ro anang pagiging opera singer. Buko’t maeumo ruyong desisyon. Naghambae si Julia, “Abu ro naghambae kang nga kanugon eang kuno ang talento dahil gin-amulitan ko ra, pero gusto ko gid nga gamiton ang kabuhi sa pag-alagad kay Jehova.” Ano ro anang nabatyagan makaron parti sa anang ginpili nga desisyon pagtaliwan it mga 30 nga dag-on? Naghambae imaw, “Masadya ako nga ginpili ko nga alagaron si Jehova, ag sayod ko nga itao na ang tanan nga handum sa paeaabuton.”​—Sal. 145:16.

PADAYON NGA MAG-ALAGAD KAY JEHOVA

17. Dahil nagakabuhi kita sa katapusan it rayang sistema, paalin ra makaapekto sa mga nagaalagad sa Dyos ag sa mga owa pa nagaalagad kana?

¹⁷ Nagakabuhi eon kita sa ulihing parte it katapusan ku rayang sistema. Ginsueat ni apostol Pablo: “Sa indi eon magbuhay, ro manog-abot magaabot eon, indi eon imaw magpabuhay.” (Heb. 10:37) Paalin ra makaapekto katon? Matag-od lang ro nabilin nga panahon para sa mga tawo nga pilion nga alagaron si Jehova. (1 Cor. 7:29) Ag kon ginpili eon naton nga alagaron ro Dyos, sayod naton nga ro mga kalisdanan nga atong ginatiis hay “indi eon magbuhay.”

18. Ano ro gusto ni Jehova ag ni Jesus nga obrahon naton?

¹⁸ Ginpalig-on ni Jesus ro mga tawo nga mangin anang disipulo ag padayon nga magsunod kana. (Mat. 16:24) Ngani kon dinag-on eon kita nga nagaalagad kay Jehova, kabay nga indi kita magpundo. Tinguhaan gid naton nga padayon nga mag-alagad kay Jehova. Bukon ra it maeumo, pero mangin masadya kita ag mabaton naton ro abung mga pagpakamayad, maskin makaron pa eang!—Sal. 35:27.

19. Ano ro atong matun-an sa eksperyinsya ni Gene?

¹⁹ Nagabatyag ro iba nga kon alagaron nanda si Jehova, indi nanda ma-enjoy ro andang kabuhi. Kon bata ka pa, nagabatyag ka baea nga abu ing indi pwedeng obrahon kon mag-alagad ka kay Jehova? Ro sangka bataon nga brother nga si Gene hay naghambae: “Pamatyag ko, owa ko nae-enjoy ro ang kabuhi dahil Saksi ni Jehova ako. Matsa mas masadya ro ibang mga unga kaysa kakon dahil pwede sanda maka-party, makipag-date, o makahampang it bayolente nga mga video game, habang ako hay puro pag-attend eang sa mga miting ag pagministeryo.” Paalin nakaapekto kay Gene rayang kaisipan? Naghambae imaw, “Nangin doble kara ang pagkabuhi. Ku una, na-enjoy ko man ra. Pero owa ra kakon nakatao it matuod nga kasadya. Gin-isip ko it uman ro mga kamatuoran sa Biblia nga ginbalewala ko dati ag nagdesisyon ako nga mag-alagad kay Jehova sa ang bilog nga kabuhi. Umpisa kato, nabatyagan ko nga ginasabat eon pirme ni Jehova ro ang mga pangamuyo.”

20. Ano dapat ro determinado natong obrahon?

²⁰ Nagkanta ro sangka salmista kay Jehova: “Masadya ro tawo nga imong ginpili ag ginsampit nga magpaeapit kimo para mag-estar sa ing ugsaran.” (Sal. 65:4) Kabay nga mangin determinado kita pareho kay Josue nga naghambae: “Ako ag ro akong pamilya, magaalagad kami kay Jehova.”​—Jos. 24:15.