TUEON-AN NGA ARTIKULO 23

KANTA 2 Jehova ang Imo Ngalan

Ham-an Importante Gid Katon ro Pangaean ni Jehova?

“‘Kamo ro akong mga saksi,’ hambae ni Jehova.”—ISA. 43:10.

RO ATONG MATUN-AN

Kon paalin naton mapakabaeaan ag mabindikar ro pangaean ni Jehova.

1-2. Paalin naton nasayran nga importante gid kay Jesus ro pangaean ni Jehova?

Ing sabat

IMPORTANTE gid kay Jesus ro pangaean ni Jehova. Imaw ro panguna nga nagaapin sa pangaean ku anang Ama. Sa nagtaliwan nga artikulo, natun-an naton nga handa mamatay si Jesus agud pamatud-an nga baeaan si Jehova ag tama ro tanan nanang ginaobra. (Mar. 14:36; Heb. 10:7-9) Ag pagkatapos it anang Sanglibo nga Dag-on nga Paghari, handa nga ibalik ni Jesus ro tanan nga awtoridad para pakabaeaanon ro pangaean ni Jehova. (1 Cor. 15:26-28) Tanan nga gin-obra ni Jesus hay nagapamatuod nga palangga na gid si Jehova.

² Nag-agto si Jesus sa eugta sa pangaean it anang Ama. (Juan 5:43; 12:13) Ginpakilaea na ro pangaean it anang Ama sa anang mga disipulo. (Juan 17:6, 26) Kat gintur-an na ro mga tawo ag nag-obra it mga milagro, ginhambae na nga halin kay Jehova ro anang kaaeam ag gahum para maobra ra. (Juan 10:25) Ro matuod, ginpangabay ni Jesus si Jehova nga bantayan ro anang mga disipulo “sa gahum ku [Anang] ngaean.” (Juan 17:11) Ngani importante gid kay Jesus ro pangaean ni Jehova. Pero, paalin mahambae it isaea nga matuod imaw nga Cristyano kon owa na nasayran o ginagamit ro pangaean ni Jehova?

3. Ano ro atong pagatalakayon sa rayang artikulo?

Ing sabat

³ Bilang mga Cristyano, ginatinguhaan naton nga tuearon si Jesus dahil importante gid katon ro pangaean ku anang Ama. (1 Ped. 2:21) Sa rayang artikulo, tan-awon naton kon ham-an ro mga nagawali it “Mayad nga Balita nahanungod sa Ginharian” hay nagadaea it pangaean ni Jehova. (Mat. 24:14) Pagatalakayon man naton kon mauno dapat kaimportante ro pangaean ni Jehova sa kada isaea katon.

“KATAWHAN NGA TAWGON SA ANANG PANGAEAN”

4. (a) Ano ro ginhambae ni Jesus sa anang mga disipulo bago imaw magbalik sa eangit? (b) Ano ro pangutana nga atong pagatalakayon?

Ing sabat

⁴ Bago imaw magbalik sa eangit, ginhambae ni Jesus sa anang mga disipulo: “Sa pag-abot ku Espiritu . . . magabaton kamo it gahum ag manginsaksi ko kamo sa Jerusalem, sa bilog nga Judea ag Samaria, ag sa bilog nga kalibutan.” (Binu. 1:8) Ngani iwali nanda ro mayad nga balita bukon eang sa Israel, kundi hasta sa maeayo nga mga lugar. Dahil kara, may tsansa ro mga tawo sa bilog nga kalibutan nga mangin disipulo ni Jesus. (Mat. 28:19, 20) Pero naghambae si Jesus: “Manginsaksi ko kamo.” Kinahang-ean baea it rayang bag-ong disipulo nga masayran ro pangaean ni Jehova, o mangin mga saksi eang sanda ni Jesus? Makabulig katon ro Binuhatan kapitulo 15 para masabat ruyong pangutana.

5. Paalin ginpakita it mga apostoles ag it mga gueang sa Jerusalem nga kinahang-ean masayran it tanan nga tawo ro pangaean ni Jehova? (Tan-awa man ro piktyur.)

Ing sabat

⁵ Ku 49 C.E., nagtipon ro mga apostoles ag ro mga gueang sa Jerusalem agud istoryahan kon ano ro kinahang-ean obrahon it owa natuli nga mga Hentil para mangin mga Cristyano. Sa katapusan it andang pag-istorya, ro igmanghod ni Jesus nga si Santiago hay naghambae: “Ginsugid it mayad ni [Pedro] nga ro Dyos hay nagbaton eon makaron it mga tawo halin sa mga nasyon para makapili kanda it katawhan nga tawgon sa anang pangaean.” Anyong pangaean ro ginatukoy ni Santiago? Ginkutar na ro ginhambae it propeta nga si Amos: “Agud ro nabilin nga mga tawo hay sinsero nga mag-usoy kay Jehova, pati eon ro mga tawo it tanan nga mga nasyon, mga tawo nga ginatawag sa akong pangaean, hambae ni Jehova.” (Binu. 15:14-18, NWT) Bukon eang nga masayran it mga disipulo ro parti kay Jehova kundi sanda man hay ‘pagatawgon sa anang pangaean.’ Nagakahueogan ra nga daehon nanda ro pangaean it Dyos ag makilaea man sanda paagi kara.

Nagapakig-istorya si Santiago sa pila nga mga apostoles ag mga gueang sa Jerusalem. Habang nagapamati ro daywang ka igmanghod, nakabukas ro andang buyot nga binaeueon. — Sa miting it nagadumaea nga grupo ku unang siglo, naintindihan it mayad ku matutom nga mga eaki nga ro mga Cristyano hay dapat tawgon sa pangaean it Dyos (Tan-awa ro parapo 5)

6-7. (a) Ham-an nag-agto si Jesus sa eugta? (b) Ano ro mas importanteng rason kon ham-an nag-agto si Jesus sa eugta?

Ing sabat

⁶ Ro pangaean ni Jesus hay nagakahueogan nga “Si Jehova ro Kaeuwasan,” ag imaw ro gingamit ni Jehova para euwason ro tanan nga tawo nga nagatuo kana ag sa anang Unga. Nag-agto si Jesus sa eugta agud itao ro anang kabuhi para sa mga tawo. (Mat. 20:28) Paagi sa pangtubos, nangin posible nga maeuwas ro mga tawo ag mabaton nanda ro kabuhi nga owa it katapusan.—Juan 3:16.

⁷ Pero ham-an kinahang-ean tubson ro mga tawo? Dahil sa natabo sa hardin it Eden. Sa ginsambit sa nagtaliwan nga artikulo, ro unang mag-asawa nga sanday Adan ag Eba hay nagrebelde kay Jehova. Ngani, naduea nanda ro tsansa nga mabuhi sa owa’t katapusan. (Gen. 3:6, 24) Pero may mas importante pang rason kon ham-an nag-agto si Jesus sa eugta. Ginpakahuy-an ro pangaean ni Jehova. (Gen. 3:4, 5) Ngani ro pagtubos sa mga inapo nanday Adan ag Eba hay konektado sa mas mabahoe nga isyu—ro pagpakabaeaan sa pangaean ni Jehova. Ag si Jesus ro pinakabagay nga magpamatuod nga baeaan ro pangaean ni Jehova dahil imaw ro anang representante ag perpekto na nga haobra ro tanan nga ginsugo kana ni Jehova.

Paalin mahambae it isaea nga matuod imaw nga Cristyano kon owa na nasayran o ginagamit ro pangaean ni Jehova?

8. Ano ro kinahang-ean maintindihan ku tanan nga disipulo ni Jesus?

Ing sabat

⁸ Kinahang-ean maintindihan it tanan nga magatuo kay Jesus, Judio man o Hentil, nga ro Ginhalinan it andang kaeuwasan hay ro Ama ni Jesus, si Jehova nga Dyos. (Juan 17:3) Dugang pa, pareho kay Jesus tawgon sanda sa pangaean ni Jehova. Kinahang-ean man nandang maintindihan nga importante gid nga pakabaeaanon ruyong pangaean. Nakadepende karon ro andang kaeuwasan. (Binu. 2:21, 22) Ngani ro tanan nga disipulo ni Jesus hay kinahang-ean nga magtuon parti kana ag kay Jehova. Raya ro rason kon ham-an nahambae ni Jesus sa Juan 17 sa katapusan ku anang pangamuyo: “Ginpakilaea ko ikaw kanda ag magapadayon ako sa paghimo kara, agud nga ro imong paghigugma kakon mangin-una kanda, ag ako man mangin-una kanda.”—Juan 17:26.

“KAMO RO AKONG MGA SAKSI”

9. Paalin naton mapakita nga importante katon ro pangaean ni Jehova?

Ing sabat

⁹ Klaro gid sa gintalakay naton nga para masunod si Jesus, dapat natong pakabaeaanon ro pangaean ni Jehova. (Mat. 6:9, 10) Dapat raya ro mangin pinakaimportante sa atong kabuhi. Ag kinahang-ean natong ipakita ra paagi sa atong mga ginaobra. Ngani, ano ro atong obrahon para mapakabaeaan ro pangaean ni Jehova ag pamatud-an nga purilon si Satanas?

10. Ano ro ginasugid katon ku libro it Isaias kapitulo 42 hasta’t 44? (Isaias 43:9; 44:7-9) (Tan-awa man ro piktyur.)

Ing sabat

¹⁰ Ginpabahoe ku libro it Isaias kapitulo 42 hasta’t 44 ro importante natong papel sa pagpakabaeaan ku pangaean ni Jehova. Ginasugid sa ruyong mga kapitulo ro simboliko nga kaso sa korte kon siin ginahusay ro isyu sa pagkadyos. Gusto ni Jehova nga pamatud-an it mga tawo kon baea ro andang ginasimba nga mga dyos hay matuod. Nagpatawag man imaw it mga saksi para magpamatuod sa rayang mga dyos. Pero owa gid it may makapamatuod kara!—Basaha ro Isaias 43:9; 44:7-9.

Collage: Nagaeupad ro mga anghel sa ibabaw it eugta ag nagaobserbar habang ginapakabaeaan it mga igmanghod sa bilog nga kalibutan ro pangaean ni Jehova. 1. Naga-cart witnessing ro mag-asawa. 2. Ginataw-an it bataon nga sister ro anang klasmeyt it jw.org contact card. 3. Gina-preachingan it brother ro anang kasakay nga eaki sa pangpubliko nga saeakyan. 4. Habang nakaposas ro sangka brother, ginaibhan imaw it mga pulis nga nakatabon ro itsura. 5. Habang nagaeubog sa katre it ospital, ginasugid it sister sa doktor ro anang pagpati parti sa dugo. — Paagi sa atong mga ginahambae ag ginaobra, mapamatud-an naton nga si Jehova eang ro matuod nga Dyos (Tan-awa ro parapo 10-11)

11. Base sa Isaias 43:10-12, ano ro ginhambae ni Jehova sa anang katawhan?

Ing sabat

¹¹ Basaha ro Isaias 43:10-12. Ginhambae ni Jehova sa anang katawhan: “Kamo ro akong mga saksi, . . . ag ako ro Dyos.” Ginpangutana sanda ni Jehova: “May ibang Dyos pa baea euwas kakon?” (Isa. 44:8) Ngani, may pribilehiyo kita nga masabat ruyong pangutana. Paagi sa atong mga ginahambae ag ginaobra, mapamatud-an naton nga si Jehova eang ro matuod nga Dyos. Ro anang pangaean hay eabaw gid sa tanan. Ag paagi sa atong pagkabuhi, ginapakita naton nga palangga gid naton si Jehova ag matutom kita kana maskin pa ginatinguhaan ni Satanas nga papunduhon kita. Sa rayang paagi, makabulig kita para mapakabaeaan ro Anang pangaean.

12. Paalin natuman ro hula sa Isaias 40:3, 5?

Ing sabat

¹² Kon ginaapinan naton ro pangaean o reputasyon ni Jehova, ginatuead naton si Jesu-Cristo. Ginhula man ni Isaias nga may magauna para ‘hawanan [o, “ihanda,” ftn.] nana ro daean ni Jehova.’ (Isa. 40:3) Paalin natuman ruyong hula? Ginhanda ni Juan nga Manogbautismo ro daean para kay Jesus, nga nag-abot ag naghambae sa pangaean ni Jehova. (Mat. 3:3; Mar. 1:2-4; Luc. 3:3-6) Ginsugid man sa ruyong hula: “Ro himaya ni Jehova hay ipahayag.” (Isa. 40:5) Paalin ron natabo? Kat nag-agto si Jesus sa eugta, nangin perpekto imaw nga representante ni Jehova nga matsa si Jehova mismo ro nag-agto sa eugta.—Juan 12:45.

13. Paalin naton matuead si Jesus?

Ing sabat

¹³ Pareho kay Jesus, mga saksi man kita ni Jehova. Ginadaea naton ro pangaean ni Jehova ag ginasugid naton sa iba ro anang daeayawon nga mga inubrahan. Para maobra ra it mayad, dapat man natong isugid sa mga tawo ro tanan nga gin-obra ni Jesus para mapakabaeaan ro pangaean ni Jehova. (Binu. 1:8) Si Jesus ro pinakauna nga Saksi ni Jehova, ag ginatuead naton ro anang halimbawa. (Pah. 1:5) Pero, mauno dapat kaimportante ro pangaean ni Jehova sa kada isaea katon?

KON HAM-AN IMPORTANTE GID KATON RO PANGAEAN NI JEHOVA

14. Base sa Salmo 105:3, ano ro ginabatyag naton parti sa pangaean ni Jehova?

Ing sabat

¹⁴ Ginapabugae naton ro pangaean ni Jehova. (Basaha ro Salmo 105:3.) Nagakasadya gid si Jehova kon ginapabugae naton ro anang pangaean. (Jer. 9:23, 24; 1 Cor. 1:31; 2 Cor. 10:17) Sangka pribilehiyo gid ra para katon nga padunggan ro anang pangaean ag apinan ro anang reputasyon. Indi dapat kita mahuya nga isugid sa atong mga katrabaho, klasmeyt, kaeapit-baeay, ag sa iba pa nga mga Saksi ni Jehova kita! Gusto it Yawa nga papunduhon kita sa pagsugid it pangaean ni Jehova. (Jer. 11:21; Pah. 12:17) Ro matuod, gusto ni Satanas ag ku anang buko’t matuod nga mga propeta nga malipatan it mga tawo ro pangaean ni Jehova. (Jer. 23:26, 27) Pero dahil importante katon ro pangaean ni Jehova, gusto naton imaw nga dayawon pirme.—Sal. 5:11; 89:16.

15. Ano ro buot hambaeon it pagtawag sa pangaean ni Jehova?

Ing sabat

¹⁵ Padayon kita nga nagatawag sa pangaean ni Jehova. (Joel 2:32; Roma 10:13, 14) Ro pagtawag sa pangaean ni Jehova hay owa eang nagakahueogan nga sayod naton ag ginagamit ro personal nga pangaean it Dyos. Kundi, eakip kara ro pagkilaea naton sa Dyos bilang sangka Persona, pagsalig kana, ag pagpangabay it anang bulig ag paggiya. (Sal. 20:7; 99:6; 116:4; 145:18) Ginasugid man naton sa iba ro anang pangaean ag manami nga mga ugali. Ag ginabuligan naton sanda nga maghinuesoe ag mag-obra it mga pagbag-o para mapasadya nanda si Jehova.—Isa. 12:4; Binu. 2:21, 38.

16. Paalin naton mapamatud-an nga purilon si Satanas?

Ing sabat

¹⁶ Handa kitang mag-antus para sa pangaean ni Jehova. (Sant. 5:10, 11) Mapamatud-an naton nga purilon si Satanas kon magpabilin kita nga mainunongon kay Jehova maskin pa mag-antus kita. Ku panahon ni Job, gin-akusahan ni Satanas ratong mga nagaalagad kay Jehova: “Itao it sangka tawo ro tanan nga una kana para sa anang kabuhi.” (Job 2:4) Ginhambae ni Satanas nga nagaalagad eang ro mga tawo kay Jehova kon mayad ro andang kabuhi, ag kon makaatubang sanda it mga kalisdanan, aywanan nanda si Jehova. Ginpamatud-an ni Job nga bukon ron it matuod. Pareho kay Job, mapamatud-an man naton nga purilon si Satanas kon indi kita magpundo sa pag-alagad kay Jehova maskin mangin malisud ro atong kabuhi. Makasalig kita nga bantayan kita ni Jehova dahil sa anang pangaean.—Juan 17:11.

17. Base sa 1 Pedro 2:12, ano ro iba pang paagi para mahimaya naton ro pangaean ni Jehova?

Ing sabat

¹⁷ Ginaobra naton ro tanan para mahimaya ro pangaean ni Jehova. (Hulu. 30:9; Jer. 7:8-11) Dahil mga representante kita ni Jehova ag ginadaea naton ro anang pangaean, pwede natong mapadunggan o mapahuy-an ra. (Basaha ro 1 Pedro 2:12.) Ngani, gusto natong obrahon ro tanan para mapadunggan ro pangaean ni Jehova paagi sa atong mga ginahambae ag ginaobra. Paagi kara, mahimaya naton ro anang pangaean maskin pa bukon kita it perpekto.

18. Ano pa gid ro atong obrahon para mapamatud-an nga importante katon ro pangaean ni Jehova? (Tan-awa man ro footnote.)

Ing sabat

¹⁸ Mas importante katon ro pangaean ni Jehova kaysa sa atong reputasyon. (Sal. 138:2) Ham-an importante gid ra? Dahil kon ginaobra naton ro mga bagay nga makapasadya kay Jehova, posibleng ro iba hay owa naila kara ag posibleng maghambae sanda it maeain nga mga bagay parti katon.a Maskin ginpakahuy-an si Jesus ag ginpabangdan nga kriminal, handa gihapon imaw nga mamatay para mapadunggan ro pangaean ni Jehova. Anang “ginbaliwala ro kahuy-anan” ngani owa imaw nabaeaka it sobra sa kon ano ro ginaisip it iba parti kana. (Heb. 12:2-4, Ro Bag-o nga Kasugtanan, TAP) Nagpukos imaw sa pag-obra ku kabubut-on it Dyos.—Mat. 26:39.

19. Ano ing ginabatyag parti sa pangaean ni Jehova, ag ham-an?

Ing sabat

¹⁹ Ginapabugae naton ro pangaean ni Jehova ag kadungganan gid para katon nga tawgon bilang mga Saksi ni Jehova. Dahil karon, handa naton nga tiison ro maskin alin nga kahuy-anan nga atong maeksperyinsyahan. Mas importante katon ro pangaean ni Jehova kaysa sa atong reputasyon. Kabay nga mangin determinado kita nga padayon nga padunggan ro pangaean ni Jehova, maskin tinguhaan ni Satanas nga papunduhon kita. Paagi kara, mapamatud-an naton nga importante gid katon ro pangaean ni Jehova, pareho kay Jesu-Cristo.

KANTA 10 Dayawon si Jehova nga Aton Dios!

a Maskin ro matutom nga si Job hay nabaeaka sa anang reputasyon kat ginpabangdan imaw ku anang tatlong amigo nga may maeain kuno imaw nga gin-obra. “Owa nagkasaea si Job o nagbasoe sa Dyos,” maskin pa namatay ro anang mga unga ag naduea ro tanan nanang pagkabutang. (Job 1:22; 2:10) Pero, kat ginpabangdan imaw nga nagaobra it maeain, gin-apinan na ro anang sarili ag naghambae it “padasu-daso.” Nangin mas importante kana ro anang reputasyon kaysa sa pagpakabaeaan ku pangaean o reputasyon it Dyos.—Job 6:3; 13:4, 5; 32:2; 34:5.