Mga Leksyon nga Among Natun-an Halin sa Atong Pinakamayad nga Instruktor

RO HALIMBAWA IT ANG MGA GINIKANAN

Ku 1957, nagsaylo ang mga ginikanan halin sa Italy pa-Kindersley, sa Saskatchewan, Canada. Owa magbuhay, natun-an nanda ro kamatuoran, ag raya ro nangin pinakaimportante sa among kabuhi. Nadumdoman ko kat unga pa ako, pirme gid nga naga-preaching ro among pamilya. Ngani kon amat, nagapabueo-bueo ako it hambae nga “nag-auxiliary pioneer ako” sa edad nga waeo!

Pobre ang mga ginikanan, pero nagpakita sanda it mayad nga halimbawa sa pagsakripisyo para kay Jehova. Halimbawa, ku 1963, ginbaligya nanda ro kaeabanan sa andang mga pagkabutang agud makatipon it kwarta para maka-attend sa internasyonal nga kunbensyon sa Pasadena, California, U.S.A. Ku 1972, nagsaylo kami sa Trail, British Columbia, Canada, nga mga 1,000 nga kilometro ro kaeayuon para buligan ro mga nagahambae it Italian sa ruyong lugar. Nagtrabaho ang tatay bilang janitor. Gusto imaw i-promote sa trabaho pero ginbalibaran na ra para makapukos sa espiritwal nga mga ueobrahon.

Nagapasaeamat gid ako sa ang mga ginikanan dahil nagpakita sanda it mayad nga halimbawa kakon ag sa ang tatlo nga mga igmanghod. Raya ro nangin mabakud nga pundasyon it akong pagsanay sa pag-alagad kay Jehova. Ginturo nanda kakon ro leksyon nga indi ko gid makalipatan sa ang bilog nga kabuhi: Kon unahon ko ro Ginharian, indi ako pagpabay-an ni Jehova.​—Mat. 6:33.

RO UMPISA IT BILOG PANAHON NGA PAG-ALAGAD

Ku 1980, nagpakasae kami ni Debbie, sangka gwapa nga sister nga pukos gid sa pag-alagad kay Jehova. Gusto namon nga mag-alagad it bilog panahon, ngani tatlong buean pagkatapos it among kasae, nag-umpisa sa pagpayunir si Debbie. Pagkatapos it sang dag-on, nagsaylo kami sa maisot nga kongregasyon nga may mabahoe nga pagkinahang-ean, ag nagpayunir man rayon ako.

Owa magbuhay, naduea ro among kasadya sa among asayment ag nagdesisyon kami nga masaylo lang. Pero bago ron, gin-istorya anay namon ro manogdipara it sirkito. Mapinalanggaon pero prangka na kami nga ginhambaean: “Ginapalala nyo eang ro inyong sitwasyon. Nagpukos kamo sa mga kalisdanan nga inyong ginaatubang. Pero, kon magpukos kamo sa positibo nga mga bagay, mangin masadya kamo it uman.” Raya gid ro pahanumdom nga kinahang-ean namon. (Sal. 141:5) Gin-aplikar eagi namon ra ag narealisar namon nga abu gid man nga manami nga mga bagay sa among asayment. Abu sa among kongregasyon ro gustong dugangan ro andang pag-alagad kay Jehova, eakip kara ro mga bataon ag ro may mga asawa nga bukon it Saksi. Importante gid ra nga leksyon para kamon. Natun-an namon nga magpukos sa mayad nga mga bagay ag magsalig kay Jehova nga buligan na kami nga matiis ro malisud nga mga sitwasyon. (Miq. 7:7) Nangin masadya kami it uman, ag nangin mayad ro among sitwasyon.

Ro tatlo sa ap-at namon nga instruktor hay nakaalagad sa ibang bansa. Habang ginapakita nanda ro mga piktyur ag ginasugid ro mga kalisdanan ag mga pagpakamayad nga andang naeksperyinsyahan, nagpabaskog ra it among handum nga mag-alagad bilang mga misyonero. Ngani, nangin goal namon ra.

Para maabot ruyong goal, nagsaylo kami sa Quebec ku 1984, kon siin may nagahambae igto it French. Sobra sa 4,000 nga kilometro ro kaeayuon it Quebec halin sa British Columbia. Kinahang-ean namong tun-an ro andang kultura ag linggwahe. Ro sangka kalisdanan pa gid hay may mga panahon nga nauubusan kami it kwarta. May panahon nga patatas eang gid ro among nakaon halin sa among ginpamueot sa taeamnan it sangka mangunguma, kon siin ginpasugtan na mat-a kami nga magbuoe it nabilin nga mga patatas. Ag nangin mayad gid si Debbie sa iba-ibang klasi it pag-eaha kara! Maskin sa rayang mga kalisdanan, nakatiis kami nga may kasadya. Dugang pa, nakita namon nga owa gid kami ginpabay-an ni Jehova.​—Sal. 64:10.

Sang adlaw, nakabaton kami it owa ginapaabot nga tawag. Sangka imbitasyon ra nga mag-alagad sa Bethel it Canada. Bago karon, nag-apply kami para makaeskuyla sa Gilead, ngani maskin masadya kami nga nakabaton it imbitasyon sa Bethel, matsa nadismaya man kami. Pero ginbaton gihapon namon ra. Pag-abot namon sa Bethel, ginpangutana namon si Brother Kenneth Little, sangka myembro ku Komite it Branch, “Hay paalin kon maimbitahan kami nga mag-eskuyla sa Gilead?” Nagsabat imaw, “Asikasuhon galing naton ron kon maimbitahan eon kamo.”

Pagkatapos it sang domingo, gin-imbitahan kami ni Debbie nga makaeskuyla sa Gilead. Ngani kinahang-ean namong magdesisyon. Ginhambaean kami ni Brother Little: “Maskin alin man ro inyong pilion, may mga adlaw nga maisip nyo nga kunta rato lang ro inyong ginpili. Owa it sambilog sa inyong ginpili ro mas mayad dahil pareho ra nga pakamayron ni Jehova.” Ginbaton namon ro imbitasyon sa Gilead, ag pagtaliwan it mga dinag-on, nakita namon nga matuod ro ginhambae ni Brother Little. Ro anang mga ginhambae hay haeos pirme namong nagagamit para buligan ro mga igmanghod sa pagdesisyon kon ano nga asayment ro andang pilion.

RO KABUHI BILANG MISYONERO

Nasadyahan gid kami nga mangin sambilog sa 24 nga estudyante it pang-83 nga klase it Gilead nga ginhiwat sa Brooklyn, New York, ku Abril 1987. Sanday Brother Ulysses Glass ag Jack Redford ro among panguna nga mga instruktor. Madasig nga natapos ro limang buean ag naka-graduate kami ku Septyembre 6, 1987. Gin-asayn kami sa Haiti, kaibahan nanday John ag Marie Goode.

Ku 1962, ginpahalin ro ulihing mga misyonero sa Haiti. Umpisa kato, owa eon it ginpadaea igto nga misyonero nga nakaeskuyla sa Gilead bago kamon. Tatlong domingo pagkatapos it among graduation, nag-alagad kami sa Haiti, sa sangka maisot nga kongregasyon sa kabukiran nga may 35 nga publisher. Bata pa kami ag kueang sa eksperyinsya, ag kami eang ro nagaestar sa baeay nga para sa misyonero. Pobre ro mga tawo igto, ag ro kaeabanan kanda hay indi kaantigo magbasa. Habang igto kami, nakita namon nga nangin bayolente ro mga tawo dahil sa problema sa politika, may mga nagrebelde sa gubyerno ag nagprotesta, ag naeksperyinsyahan man namon ro mga bagyo.

Abu kaming natun-an sa matiniison ag masinadyahon nga mga igmanghod sa Haiti. Abu kanda ro may malisud nga pangabuhi, pero palangga nanda si Jehova ag ro pagministeryo. May sangka magueang nga sister igto nga indi kaantigo magbasa, pero kabisado na ro mga 150 nga teksto. Ro iba-ibang sitwasyon hay nagpalig-on kamon nga padayon nga iwali ro mensahe it Ginharian, nga raya eang ro solusyon sa problema it mga tawo. Nasadyahan gid kami nga masayran nga ro pila sa among mga Bible study dati hay mga regular pioneer eon, mga special pioneer, ag mga elder.

Habang igto sa Haiti, nakilaea ko ro sangka bataon nga si Trevor, nga misyonero it Mormons, ag nagkaistorya kami it pilang beses parti sa Biblia. Pagtaliwan it pilang dag-on, nakabaton ako it owa ginapaabot nga sueat halin kana. Nagsueat imaw: “Pagabautismuhan ako sa rayang paaeabuton nga asembliya! Gusto ko nga magbalik sa Haiti ag mag-alagad bilang special pioneer sa lugar kon siin nangin misyonero ako dati it Mormons.” Ag ruyon ro anang gin-obra sa sueod it mga dinag-on kaibahan sa anang asawa.

SA EUROPE—RAYON SA AFRICA

Gin-asayn kami nga mag-alagad sa sangka parte it Europe, kon siin nagaumpisa pa eang ro ueobrahon it Ginharian. Ku 1992, nag-abot kami sa Ljubljana, Slovenia, maeapit sa ginbahuean it ang mga ginikanan bago sanda nagsaylo sa Italy. Sa ruyong panahon, may gera gihapon sa mga lugar it dating nasyon it Yugoslavia. Ro branch sa Vienna, Austria, pati man ro mga opisina sa Zagreb, Croatia, ag Belgrade, Serbia, ro nagadumaea sa pagwali nga ueobrahon sa ruyong rehiyon. Makaron, ruyong mga lugar hay may sarili eon nga pasilidad it Bethel.

Kinahang-ean eon man namong magtuon it bag-ong linggwahe ag kultura. Nagahambae ro mga taga-igto nga, “Jezik je težek,” nga nagakahueogan “Malisud ro linggwahe.” Ag kalisud gid mat-a matuod! Nagdayaw gid kami sa pagkamainunongon it mga igmanghod nga handa sa pagbaton sa mga ginaobra nga pagbag-o it organisasyon, ag nakita namon kon paalin sanda ginpakamayad ni Jehova. Nakita eon man namon kon paalin mapinalanggaon nga ginatama ni Jehova ro mga bagay sa insakto nga panahon. Abu nga mga leksyon ro among natun-an habang igto kami sa Slovenia, ag ro mga leksyon nga among natun-an dati hay nakabulig man kamon nga matiis ro mga kalisdanan nga among naeksperyinsyahan igto.

Pero abu pang pagbag-o ro maagyan namon. Ku 2000, naasayn kami sa Côte d’Ivoire, sa West Africa. Rayon, nagkagera sibil ku Nobyembre 2002, ngani kinahang-ean namong magsaylo sa Sierra Leone. Kakatapos eang man it 11 nga dag-on nga gera sibil igto. Kalisud gid nga aywan it gulpi ro Côte d’Ivoire. Pero, ro mga leksyon nga among natun-an hay nakabulig kamon nga padayon nga mangin masadya.

Nagpukos kami sa mabungahon nga teritoryo ag sa atong mapinalanggaon nga mga igmanghod, nga gintiis ro gera sa sueod it mga dinag-on. Pobre gid sanda, pero gusto nandang itao kon ano ro una kanda. May sangka sister nga nagtao it mga eambong kay Debbie. Kat nagdaywang-isip si Debbie nga batunon ra, ginpilit imaw it sister nga naghambae: “Ku panahon it gera, ro mga igmanghod sa ibang lugar hay nagbulig kamon. Makaron, kami man ro mabulig.” Gin-obra namon nga goal nga tuearon ro andang halimbawa.

Ku ulihi, nagbalik kami sa Côte d’Ivoire, pero naglala eon man ro problema sa politika igto. Ngani ku Nobyembre 2004, nag-evacuate kami sakay it helicopter, ag sangka bag eang nga nagabug-at it 10 nga kilo ro pwedeng daehon it kada isaea kamon. Sa ruyong gabii, sa saeog kami natueog sa kampo it French nga mga soldado, ag pagkasunod nga adlaw, nagbyahe kami pa-Switzerland. Kat pag-abot namon sa branch it mga tungang gabii, gin-abiabi kami ku Komite it Branch ag ku mga instruktor it Ministerial Training School kaibahan ro andang mga asawa. Ginkupkupan nanda kami, ginhandaan it mainit-init pa nga pagkaon, ag gintaw-an it abu nga Swiss chocolate. Na-touch gid kami sa andang gin-obra.

Temporaryo kami nga gin-asayn sa Ghana ag ginbalik rayon kami sa Côte d’Ivoire kat nagmayad-ayad ro sitwasyon. Ro kabuot it mga igmanghod hay nakabulig kamon nga matiis rayang magaoy nga pagsinaylo-saylo ag temporaryo nga mga asayment. Pareho kami nga nakahambae ni Debbie nga maskin normal rayang pagpalangga sa organisasyon ni Jehova, indi gid namon ra pagbalewalaon. Ro matuod, ratong malisud nga mga panahon hay nangin importante nga parte it among pagsanay.

SA MIDDLE EAST

Ku 2006, nakabaton kami it sueat halin sa world headquarters parti sa among bag-ong asayment sa Middle East. Buot hambaeon, may bag-o eon man kami nga maeksperyinsyahan nga kasadya ag kalisdanan, matun-an nga linggwahe ag kultura. Abu gid kami nga matun-an sa rayang lugar kon siin mabaskog ro impluwensya it politika ag relihiyon. Gusto gid namon ro iba-ibang linggwahe sa mga kongregasyon ag nakita namon ro paghiusa nga resulta it pagsunod sa instruksyon halin sa organisasyon. Nagdayaw gid kami sa mga igmanghod dahil eaban kanda hay maisog gid nga gintiis ro pagkontra it andang mga pamilya, kaeskuyla, katrabaho, ag mga kaeapit-baeay.

Nag-attend kami sa 2012 nga espesyal nga kunbensyon sa Tel Aviv, Israel. Rayang kunbensyon ro pinakaunang beses nga nagtipon it makara kaabu ro katawhan it Dyos sa ruyong lugar halin pa ku Pentecostes 33 C.E. Indi gid malipatan rayang okasyon!

Sa ruyong mga dinag-on, ginpadaea kami nga magbisita sa nasyon nga kon siin ginabawae ro atong ueobrahon. Nagdaea kami it pila sa atong mga publikasyon, nag-preaching, ag nag-attend sa gin-organisar nga maisot nga mga asembliya. Maskin siin may makita ka nga armado nga mga soldado ag mga checkpoint, pero nabatyagan namon nga safe kami habang ginaobra it mahinaeungon rayang mga ueobrahon kaibahan ro pila nga mga igmanghod.

PAGBALIK SA AFRICA

Ku 2013, nakabaton kami it iba gid sa among mga nangin asayment—ro pag-alagad sa branch it Kinshasa, Congo, sangka mabahoe ag manami nga nasyon pero grabi ro kapobrehon ag haeos pirme nga may inaway. Ku una nakahambae kami, “Sayod eon namon ro Africa, ngani handa eon kami.” Pero abu pa ro dapat namong matun-an, eabi eon gid sa pag-agto sa mga lugar nga owa pa haeos it mga daean. Nakita namon nga dapat kaming magpukos sa positibo nga mga bagay, eakip kara ro pagtiis ag kasadya it mga igmanghod maskin may mga problema, ro andang pagpalangga sa ministeryo, ag ro andang pagtinguha nga maka-attend it mga miting ag mga asembliya. Nakita namon mismo nga nangin madinaeag-on eang ro ueobrahon it Ginharian dahil sa bulig ni Jehova ag sa anang pagpakamayad. Ro among bilog panahon nga pag-alagad sa Congo sa sueod it dinag-on hay nagturo kamon it importante gid nga mga leksyon ag nagtao kamon it bag-o nga mga amigo, nga matsa pamilya eon namon.

Ku 2017, nag-abot kami sa bag-o eon man namon nga asayment—sa South Africa. Raya ro pinakamabahoe nga branch nga among gin-alagaran, ag bag-o gid para kamon ro among mga asayment sa Bethel. Abu eon man ro dapat namong matun-an pero, ro mga leksyon nga among natun-an dati hay mabahoe gid nga bulig kamon. Palangga gid namon ro mga igmanghod nga dinag-on eon nga nagatiis. Ag kanami gid makita ro pamilya sa Bethel nga nagahiusa maskin iba-iba ro lahi ag kultura. Kitang-kita gid ro pagpakamayad ni Jehova sa anang katawhan dahil may kalinong ra nga resulta it andang pagsuksok it bag-ong personalidad ag it pag-aplikar it mga prinsipyo sa Biblia.

Sa sueod it mga dinag-on, nakabaton kami ni Debbie it iba-ibang asayment, naka-adjust sa iba-ibang kultura, ag nakatuon it bag-ong mga linggwahe. Bukon ra it pirmeng madali, pero nabatyagan gid namon ro mainunongon nga pagpalangga ni Jehova paagi sa anang organisasyon ag sa mga igmanghod. (Sal. 144:2) Ro mga bagay nga among natun-an sa bilog panahon nga pag-alagad hay nakabulig kamon nga mangin mas mayad nga mga alagad ni Jehova.

Ginapasaeamatan ko gid ro mga ginturo kang it ang mga ginikanan, ro bulig it ang mapinalanggaon nga asawa nga si Debbie, ag ro mayad nga mga halimbawa it mga igmanghod sa bilog nga kalibutan. Habang ginaisip namon kon ano ro matabo sa paeaabuton, determinado kami nga padayon nga magtuon it mga leksyon halin sa atong Pinakamayad nga Instruktor.